“Ee, a farii i ta ˈu nei ô iti”

UA PAPAIHIA teie mau parau i roto i te hoê rata i tae atu i te amaa a te mau Ite no Iehova i Rusia. Hoê afata rahi î i te mau totini huruhuru mamoe e apee ra i te rata.

Na te hoê Ite no Iehova e tavini ra i roto i te hoê amuiraa i Rusia Hitia o te râ, o Alla, 67 matahiti, i hapono i te ô. Ua hau atu i te ahuru matahiti to Alla taviniraa ia Iehova, i te pororaa ma te itoito rahi i te parau apî maitai o te Basileia. Tera râ, ua haaparuparu taue te hoê maˈi i roto i te roro i te tahi tuhaa o to ˈna tino. Turaihia râ e te here, ua pee o Alla i te hoê â haerea e to te vahine Kerisetiano no te senekele matamua o Doreka, tei hamani i te mau ahu no to ˈna mau hoa Kerisetiano.—Ohipa 9:36, 39.

Ua papai o Alla i roto i ta ˈna rata: “Eita vau e nehenehe e faahauti i to ˈu na avae, e nehenehe â râ vau e faahauti i to ˈu na rima. No reira e poro vau ma te papai i te mau rata.” Ua na ô faahou oia e: “Ua faaoti au e a nehenehe noa ˈi au e faahauti i to ˈu na rima, e hamani au i te tahi pea totini mahanahana. Te hinaaro nei au ia horoahia teie mau totini na te mau taeae e tuahine e haere ra e patu i te mau Piha a te Basileia i te mau vahi toetoe, mai ia Rusia Hitia o te râ e Sibérie.”

No nia i ta ˈna mau pǐpǐ mau, ua parau Iesu Mesia e: “O te mea teie e ite ai te taata atoa e, e pǐpǐ outou na ˈu, ia aroha outou ia outou iho.” (Ioane 13:35) E tapao te here mai ta Alla i faaite o te mau pǐpǐ mau a Iesu.