Uiraa a te feia taio

E mea tano anei ia haere te hoê Ite no Iehova i te faaipoiporaa o te hoê fetii aore ra taata matau e ere i te Ite?

E taime oaoa te mau faaipoiporaa, e e ere i te mea maere ia hinaaro te hoê Kerisetiano e apiti atu i tera taime oaoa. Oia mau, e mea tia ia faaroo te mau taurearea aita i taea te matahiti tei titau-manihini-hia, i to ratou mau metua aore ra taata haapao, ratou hoi te tia ia rave i te faaotiraa hopea. (Ephesia 6:1-3) Eaha râ mai te peu e e ani te hoê tane e ere i te Ite no Iehova i ta ˈna vahine Kerisetiano ia apee ia ˈna i te hoê faaipoiporaa i roto i te hoê fare pure? E nehenehe to ˈna manaˈo haava e farii ia haere noa o ˈna ei taata mataitai tei faaoti papu eiaha e amui atu i te tahi aˈe peu faaroo taaihia i tera tupuraa.

Te tanoraa, e faaotiraa na te taata iho mai te peu e e opua oia e haere aore ra eita i te hoê faaipoiporaa. E mea tia râ ia ara te Kerisetiano taitahi i ta ˈna hopoia i mua ia Iehova e ia hiˈopoa oia e rave rahi faaueraa tumu bibilia ia rave oia i te faaotiraa e haere i te faaipoiporaa o te hoê taata e ere i te Ite.

E mea tia e te mea faufaa roa ˈˈe i te feruriraa o te hoê Kerisetiano, o te hinaaroraa ïa i te farii maitai a te Atua. Ua parau Iesu e: “E Varua te Atua, e te feia e haamori ia ˈna ra, e haamori ïa ma te varua e te parau mau e tia ˈi.” (Ioane 4:24) No reira, eita te mau Ite no Iehova e faaô i roto i te mau ohipa faaroo a te tahi mau ekalesia, mai te mau pure, peu faaroo, aore ra oroa e patoi ra i te parau mau o te Bibilia.—Korinetia 2, 6:14-17.

E farii te hoê Kerisetiano e e nehenehe atoa ta ˈna faaotiraa e ohipa i nia ia vetahi ê. Mai te peu e e faaoti outou i te haere atu, e inoino anei to outou mau fetii ia ore outou ia haa roa ˈtu i roto i te oroa faaipoiporaa? E mea tia atoa ia haapaohia te mea e nehenehe e tupu i nia i te mau hoa Kerisetiano. (Roma 14:13) Noa ˈtu e e faaoti outou aore ra te tahi atu mau melo o to outou utuafare e e ere i te fifi ia haere i te oroa faaipoiporaa o te hoê taata e ere i te Ite, e nehenehe anei to outou mau taeae e tuahine pae varua e huru ê roa? E haamauiui anei te reira i te manaˈo haava o vetahi?

E nehenehe te mau oroa faaipoiporaa o te mau fetii e ere i te Ite e faatupu i te mau tupuraa peapea e te fifi. Eaha ïa mai te peu e e anihia outou ia riro ei apee? Aore ra eaha ïa mai te peu e e ere to outou hoa faaipoipo i te hoê Ite e te hinaaro ra oia e amui roa ˈtu i te mau ohipa atoa o te faaipoiporaa? Mai te peu e te faaipoiporaa, e oroa tivira faaterehia ïa e te hoê haava aore ra te hoê tia a te hau, e haere atu paha outou no te mataitai noa i te hoê oroa e au i te ture.

E faatupu râ te hoê oroa faaipoiporaa ravehia i roto i te hoê fare pure aore ra faaterehia e te hoê tia faaroo, i te tahi atu mau manaˈo. No te pee i to outou manaˈo haava haapiihia i te Bibilia e no te ape i te haapae i ta outou mau tiaturiraa faaroo aore ra i te rave i te tahi mea o te faahuru ê paha i te mau taata i te faaipoiporaa, e faaoti paha outou eiaha e haere atu. (Maseli 22:3) E nehenehe outou e paruru i to outou utuafare e ia outou iho i te hepohepo rahi ma te faataa i ta outou mau tiaturiraa bibilia na mua roa, ma te faaite i te faito e oaoa ˈi outou i te amui atu aore ra ma te pûpû atu paha i te hoê huru tereraa ohipa ê atu.

I muri aˈe i te hiˈopoa-maite-raa i te mau mea atoa, e faaoti paha vetahi mau Kerisetiano e e ere i te mea ino ia haere i te hoê faaipoiporaa e ere i te Ite ei taata mataitai noa. Mai te peu râ e e manaˈo te hoê Kerisetiano e na roto i to ˈna taeraa ˈtu, e nehenehe oia e ofati i te mau faaueraa tumu bibilia a te Atua, e faaoti paha oia e e rahi aˈe te fifi i te mau maitai e fanaˈohia. Mai te peu e e opua oia eiaha e haere i te faaipoiporaa, e haere râ i te mau ohipa e tupu i muri aˈe ei manihini, e mea titauhia ia faaoti papu oia e ‘rave i te mau mea atoa ma te haamaitai i te Atua.’ (Korinetia 1, 10:31) Na roto i te raveraa i tera mau faaotiraa, “e riro . . . ta te taata nei hopoia ei nia ïa ia ˈna iho.” (Galatia 6:5) No reira, noa ˈtu eaha ta outou e faaoti, a haamanaˈo e te tapearaa i te manaˈo haava maitai i mua i te Atua ra o Iehova, o te ora ïa.