1-3. (a) Eaha to vetahi huru no nia i ta ratou i rave aore ra i ore i rave? Eaha paha ta tatou e rave no ta tatou mau hape na mua ˈˈe? (b) Eaha te haapiiraa e huti mai i te hiˈoraa o Paulo?

 ‘AHANI au i ite.’ Teie te parau peapea roa ˈˈe tei faahitihia aˈenei, ia au i te hoê rohipehe. Ahani ratou i na ô, mai tera paha ïa to ratou oraraa. Ta te taata ïa e parau. E manaˈo iho â tatou paatoa i te mau mea ta tatou e hinaaro e taui. O vetahi râ, e tatarahapa aore ra e haapeapea noa ïa no ta ratou i rave aore ra i ore i rave. Mai tera atoa anei no oe?

² Te vai ra o tei rave i te hape ino mau e tei hara rahi atoa. Area te tahi atu, te uiui nei ïa e e faaotiraa maitai anei ta ratou i rave. Ua tia ia vetahi ia ore e manaˈo noa i ta ratou i rave na. Te tahi atu râ, te faahapa noa ra ïa ia ratou ma te parau e “ahani.” (Sal. 51:3) E oe? E hinaaro anei oe e tavini i te Atua ma te ore e manaˈo noa i te mau hape ta oe i rave na? Te faahiti ra te Bibilia i te hiˈoraa o te aposetolo Paulo, o tei haapii i te na reira.

³ E hape ino mau â e e faaotiraa maitai atoa ta Paulo i rave. Ua tatarahapa roa oia no ta ˈna mau hape, ua haapii râ i te tavini i te Atua ma te taiva ore, a maitai atu ai to ˈna oraraa. E nehenehe tatou e huti mai i te haapiiraa.

4. Eaha ta te aposetolo Paulo i rave e ta ˈna i tatarahapa i muri iho?

⁴ Ei Pharisea i to ˈna apîraa, i rave na Paulo i te tahi mau mea ta ˈna i tatarahapa i muri iho. Ua  hamani ino roa oia i te mau pǐpǐ a te Mesia. Te faatia ra te Bibilia e i muri iti aˈe i to Setephano haapoheraahia, “ua hamani ino atura Saulo [o Paulo i muri aˈe] i te Etaretia : e tomo oia i roto i te mau fare, a aratō atu ai i te tane ˈe te vahine i rapae, ˈe a huri atu ai ia ratou i roto i te tapearaa.” (Ohi. 8:3, Te Faufaa Api) Mea teimaha te parau “hamani ino” ia au i te hoê taata ite i te Bibilia, o te faataa ra i te huru raveraa a Saulo i te amuiraa Kerisetiano “mai te hoê animara taehae.” E ati Iuda paieti Saulo tei tiaturi e ua hinaaro iho â te Atua ia faaore oia i te amuiraa Kerisetiano. No reira oia i hamani ino roa ˈi i te mau Kerisetiano ma te “parau haamǎtaˈu e te taparahi i . . . te tane e te vahine atoa.”—Ohi. 9:1, 2; 22:4. *

5. Eaha tei tupu i faaea ˈi Saulo i te hamani ino i te mau Kerisetiano no te poro no nia i te Mesia?

⁵ I muri aˈe, opua ˈtura Saulo e haere i Damaseko e haru i te mau Kerisetiano i ǒ ratou no te arato mai ia ratou i Ierusalema ia faautuahia e te Sunederi. Ua tapea râ Iesu, te Upoo o te amuiraa Kerisetiano, ia ˈna. (Eph. 5:23) Aitâ oia i tae atura i Damaseko i fa ˈtu ai Iesu ia ˈna ma te maramarama no te raˈi i te anaanaraa mai. Matapohia ˈtura Saulo. Tono atura Iesu ia ˈna i Damaseko, i reira e faaitehia ˈtu ai ta ˈna e rave. Ua ite tatou eaha tei tupu i muri iho.—Ohi. 9:3-22.

6, 7. Na te aha e faaite mai e aita Paulo i huna i ta ˈna mau hape ino mau?

⁶ Taa oioi atura ia Paulo e ua hape roa oia. Faaea ihora oia i te hamani ino i te mau Kerisetiano e poro atura ma te itoito rahi no nia i te Mesia. Aita i moe ia ˈna ta ˈna ohipa ino, ua papai hoi oia i muri aˈe: “Ua ite hoi outou i ta ˈu haapaoraa i mutaa iho i te parau a te ati Iuda ra, e e hamani ino hau ê to ˈu i te ekalesia o te Atua, e pau aˈera ïa ia ˈu.” (Gal. 1:13) Ua faahiti â oia i ta ˈna i rave na i to ˈna papairaa i to Korinetia, to Philipi e ia Timoteo. (A taio i te Korinetia 1, 15:9; Phil. 3:6; Tim. 1, 1:13) Noa ˈtu to ˈna haama, ua papai Paulo i ta ˈna i rave ma te ore e huna i ta ˈna mau hape ino mau.—Ohi. 26:9-11.

⁷ Mea uˈana mau â to Paulo hamani-ino-raa i te mau Kerisetiano. Ia feruri tatou i te reira, e taa roa ia tatou to ˈna tatarahapa rahi i muri iho, a faaino-atoa-hia ˈi oia e te enemi. Ta te tahi atu ïa taata ite i te Bibilia i parau. A ratere ai Paulo na te mau amuiraa, peneiaˈe ua na ô atu te tahi mau taeae a tahi ra oia a farerei ai: ‘Ah, o oe Paulo. O oe tei hamani ino ia matou!’—Ohi. 9:21.

8. Ua aha Paulo i to Iehova raua Iesu aroharaa e hereraa ia ˈna? Eaha ïa ta Paulo e haapii maira?

⁸ Ua taa ia Paulo e maoti noa te maitai rahi o te Atua i tia ˈi ia ˈna ia tavini ei aposetolo. I roto i ta ˈna na 14 rata, ua faahiti pinepine aˈe oia i te aroha o te Atua i te tahi atu feia i papai i te Bibilia. (A taio i te Korinetia 1, 15:10.) Ua mauruuru roa Paulo i to te Atua aroharaa ia ˈna. Ei faaiteraa i to ˈna aau mehara, ua “ohipa rahi” oia i roto i te taviniraa a te Atua, hau aˈe i te tahi atu mau aposetolo. Eaha ïa ta Paulo e  haapii maira? Teie ïa, ia faˈi tatou i ta tatou mau hara a taui atu ai, ua ineine Iehova i te faaore i te mau hara rahi atoa maoti te tusia taraehara o Iesu. Ia manaˈo oe e eita oe e faufaahia i te reira no te mea e hara iti rahi ta oe, a haamanaˈo ïa ia Paulo. (A taio i te Timoteo 1, 1:15, 16.) I hamani ino na Paulo ia Iesu, ua papai râ oia e ua aroha mai te Tamaiti a te Atua ia ˈna e ua horoa ia ˈna iho no ˈna. (Ohi. 9:5; Gal. 2:20) Ua haapii Paulo i te faufaaraa ia tavini i te Atua ma te ore e manaˈonaˈo i ta ˈna i rave na. Ia na reira atoa ïa oe.

9, 10. (a) No teihea mau mea e tatarahapa ˈi vetahi mau tavini a Iehova? (b) No te aha aita ˈi e apî ia manaˈo noa i ta tatou mau hape?

⁹ Peneiaˈe te tatarahapa nei oe i te raveraa i te tahi mau mea, i te mâuˈaraa to oe taime e itoito no te mau ohipa e ere i te mea faufaa roa, i te haamauiui-atoa-raa ia vetahi ê aore ra no te tahi atu tumu. Teie ïa te uiraa, e nafea oe?

¹⁰ Mea rahi o te haapeapea no te manaˈo-noa-raa i ta ratou mau hape. E afaro anei te fifi ia haapeapea rahi tatou? Eita ïa! A tamata na i te taueue ia oe e rave rahi hora i nia i te hoê parahiraa. E nuu anei oe i mua? Eita ïa, e rohirohi oe. No reira, eiaha e manaˈonaˈo, a faaafaro râ i te fifi. Mai te peu e ua hapa oe i te tahi taata, a parau ia ˈna e te tatarahapa nei oe ia hau orua. A feruri no te aha oe i hapa ˈi no te ore e tapiti. I te tahi taime, aita ˈtu e ravea maori râ te faaoromairaa i te mau faahopearaa  o ta oe mau hape. Aita e apî ia haapeapea, eita hoi te reira e tauturu ia oe ia tavini i te Atua ma te aau atoa.

11. (a) E aroha e e here mai Iehova ia aha tatou? (b) Te nahea maira te Bibilia e hau ai to tatou feruriraa?

¹¹ Te vai ra o te faahapa noa ia ratou iho, a manaˈo atu ai e mea faufaa ore ratou i te aro o te Atua. No te rahi e te ino mau o ta ratou mau hape, eita te Atua e aroha ia ratou. Te tanoraa râ, noa ˈtu eaha ta ratou i rave na, e nehenehe ratou e faˈi i te reira i te Atua, e taui e e ani ia ˈna ia faaore i ta ratou mau hara. (Ohi. 3:19) E aroha e e here Iehova ia ratou, ua na reira hoi oia i nia e rave rahi. E hamani maitai oia i te taata haehaa e te haavare ore o te tatarahapa mau. Ua faaore oia i ta Ioba hapa, tei parau: “Te tatarahapa nei au i raro i te repo e te rehu auahi.” (Ioba 42:6) Ia hau to tatou feruriraa, e pee anaˈe i ta te Bibilia e parau ra: “O tei tapoˈi i ta ˈna hara, e ore ïa e maitai; o tei faˈi râ e ua faarue, e arohahia ïa.” (Mas. 28:13; Iak. 5:14-16) No reira, e faˈi anaˈe i ta tatou hara i te Atua, e pure anaˈe ia ˈna ia faaore i te reira, e e faaite anaˈe ma te ohipa i to tatou tatarahapa mau. (Kor. 2, 7:10, 11) I reira noa ïa Iehova o te faaore rahi i te hara e aroha mai ai.—Isa. 55:7.

12. (a) Ia aha tatou mai ia Davida ia faahapa mai to tatou manaˈo haava? (b) I roto i teihea auraa i tatarahapa ˈi Iehova? E faaitoito te pahonoraa o teie uiraa ia tatou ia aha? (A hiˈo i te tumu parau tarenihia.)

¹² E tauturu mai te Atua ia pure tatou ia ˈna. E ravea puai teie. I roto i te hoê salamo nehenehe mau, ua faahiti Davida i to ˈna tiaturi e ua pahono Iehova i ta ˈna mau pure. (A taio i te Salamo 32:1-5.) Mai ta ˈna i parau, ua rohirohi roa oia i te haamamû-noa-raa i to ˈna manaˈo haava e faahapa noa ra ia ˈna. Ua hepohepo e ua maˈi-roa-hia oia. I to ˈna noa faˈiraa i ta ˈna hara i te Atua te faaoreraahia te reira, a maitai mai ai oia. Ua pahono Iehova i ta Davida mau pure e ua faaitoito ia ˈna ia haere i mua a rave noa ˈi i te mea maitai. No reira, ia taparuparu oe ia Iehova ma to aau atoa, e faaroo oia ia oe. Te peapea ra anei oe no ta oe mau hape? A tutava ïa i te rave i te mau tauiraa ma te tiaturi e ua faaore Iehova i te reira.—Sal. 86:5.

13, 14. (a) Ia feruri tatou i te aha? (b) Eaha te tahi mau uiraa e tauturu mai ia hiˈopoa ia tatou?

¹³ E nehenehe iho â tatou e huti mai i te haapiiraa i ta tatou i rave na a hiˈo  ai râ i mua. E feruri anaˈe i to tatou oraraa i teie nei e a muri aˈe. E tatarahapa anei tatou a muri aˈe i ta tatou mau maitiraa e rave nei? Te tavini ra anei tatou i te Atua ma te taiva ore ia ore tatou e tatarahapa?

¹⁴ Ua fatata te ati rahi. Mea tano ïa ia uiui: ‘E tia anei ia ˈu ia tavini atu â i te Atua? E rave i te taviniraa pionie? Eaha te haafifi ra ia ˈu ia riro ei tavini tauturu? Te tutava mau ra anei au i te ahu i te huru taata apî? E hinaaro anei Iehova i te hoê taata mai ia ˈu i roto i ta ˈna ao apî?’ Eiaha e manaˈo noa i ta oe i ore i rave, a hiˈopoa râ ia oe e a faaitoito i te tavini ia Iehova ma to aau atoa. A rave i te mau faaotiraa e ore oe e tatarahapa a muri aˈe.—Tim. 2, 2:15.

15, 16. (a) Eaha ta e rave rahi i haapae no te tavini ia Iehova ma te taime taatoa? (b) No te aha eiaha ˈi e tatarahapa i ta tatou mau haapaeraa i rave no te Atua?

¹⁵ E o oe o te tavini nei ia Iehova ma te taime taatoa? E toroa aufau-maitai-hia aore ra e imiraa tere maitai paha ta oe i haapae no te tavini atu â ia Iehova. Aore ra ua faaoti paha oe e faaea taa noa aore ra o oe tei faaipoipo eiaha e fanau i te tamarii. Ua vata atu â ïa oe no te tavini i te Betela, i roto i te paturaa na te ara, ei tiaau haaati aore ra mitionare. I teie nei ua paari oe, eiaha roa ˈtu e tatarahapa i teie mau faaotiraa ta oe i rave. Eiaha roa ˈtu e manaˈo e e ere ta oe mau haapaeraa i te mea faufaa aore ra ua rave oe i te reira i te taime tano ore.

¹⁶ No to oe here rahi ia Iehova e hinaaro mau e tauturu ia vetahi ê ia tavini ia ˈna, i rave ai oe i teie mau faaotiraa. Eiaha e manaˈo e e oraraa maitai aˈe to oe ahani oe i rave i te tahi atu â mau faaotiraa. Eiaha! Ia oaoa roa râ oe i te maitiraa i te ravea maitai roa ˈˈe no te tavini ia Iehova. E ore oia e haamoe i ta oe mau haapaeraa atoa i rave no ˈna. I roto i te paradaiso, to reira te ora mure ore tia roa, e haamaitai rahi roa oia ia oe.—Sal. 145:16; Tim. 1, 6:19.

17, 18. (a) Eaha tei tauturu ia Paulo ia tavini i te Atua ma te ore e tatarahapa? (b) Eaha ïa ta tatou e rave mai ia Paulo?

¹⁷ Eaha tei tauturu ia Paulo ia tavini i te Atua ma te ore e tatarahapa? Ua faaea oia i te manaˈonaˈo no to ˈna oraraa na mua ˈˈe. Ua haa roa râ oia ia noaa ia ˈna ta ˈna haamaitairaa. (A taio i te Philipi 3:13, 14.) Aita Paulo i manaˈo noa i ta ˈna mau ohipa ino i rave na a vai ai oia i roto i te haapaoraa ati Iuda. Ua faaitoito râ oia i te tapea i to ˈna taiva ore no te fanaˈo i te ora mure ore.

¹⁸ Eaha ïa ta Paulo e haapii maira? Eiaha tatou e manaˈonaˈo no ta tatou i rave na e ore hoi e tia ia tatou ia taui. E feruri anaˈe râ i ta tatou e rave nei no te fanaˈo i te mau haamaitairaa i mua nei. Eita e moe roa ia tatou ta tatou mau hape. Eiaha râ e faahapa noa ia tatou no te reira. E hiˈo anaˈe i mua, a tavini ai i te Atua ma to tatou aau atoa e a tiai ai i te oraraa faahiahia mau a muri aˈe!