1, 2. (a) Eaha “te sekene o Davida,” e mea nafea te reira i te patu-faahou-raahia? (b) O vai te haamori amui nei ia Iehova ei tavini na ˈna?

 I TE hoê putuputuraa faufaa a te tino aratai i Ierusalema i 49 i muri aˈe i te Mesia, ua na ô Iakobo: “Te parau mai nei Simeona [Petero] e, ua hiˈo aroha mai te Atua i te Etene i mutaa ihora, e rave i te hoê pae taata i roto ia ratou ra no to ˈna ra iˈoa. Te au nei hoi te parau a te mau peropheta ra i te reira, oia hoi tei papaihia ra e, Muri aˈera e hoi atu vau, e patu faahou i te sekene o Davida i mairi i raro ra; e te huˈahuˈa o taua sekene ra e patu-faahou-hia ïa e au, e tia ˈtu i nia: ia imi te toea o te taata i te Fatu, e te mau Etene atoa i mairihia i to ˈu ra iˈoa, te na reira maira te Fatu, o tei faatupu i teie atoa nei mau parau. Ua ite te Atua i ta ˈna atoa ra mau ohipa mai te matamua mai â.”—Ohi. 15:13-18.

² “Te sekene o Davida,” o te mau arii ïa tei na roto mai i te utuafare o Davida. Ua ‘mairi te reira i raro’ a faatahurihia ˈi te arii Zedekia. (Am. 9:11) Ua faataa râ te parau tohu e e “patu-faahou-hia” tera “sekene.” Te auraa ïa e e tia mai te tahi atu arii. O Iesu ïa, huaai no Davida. (Ezk. 21:27; Ohi. 2:29-36) Ua faaite Iakobo e ua tohu atoa Amosa e e faatavaihia te ati Iuda, oia atoa te Etene, no te riro ei arii e o Iesu i nia i te raˈi. Te tahoê nei te feia faatavaihia e e mirioni “mamoe ê atu” a Iesu no te faaite haere i te parau mau.—Ioa. 10:16.

3, 4. Eaha tei tauturu i te mau ati Iuda i Babulonia ia haafatata ˈtu ia Iehova?

³ Ua ite-maitai-hia e ua mairi “te sekene o Davida” i raro a tapeahia ˈi te mau ati Iuda i Babulonia.  E haapaoraa hape to ǒ. Mea nafea te nunaa o te Atua i te vai-taiva-ore-raa e 70 matahiti i te maoro i Babulonia? Mai ia tatou i teie mahana i roto i teie nei ao a Satani. (Ioa. 1, 5:19) E tufaa taa ê te tauturu mai ia tatou ia vai taiva ore noa.

⁴ E tuhaa te Bibilia taatoa o ta tatou tufaa pae varua. Aita ta te mau ati Iuda faatîtîhia i Babulonia e Papai moˈa i roto i to ˈna taatoaraa. Ua ite râ ratou i te Ture a Mose, na Ture Ahuru, te mau “himene no Ziona,” te parau paari e rave rahi e te faatiaraa a te mau tavini taiva ore a Iehova i tahito ra. I mihi na ratou i to ratou fenua tumu, aita ïa ratou i haamoe ia Iehova. (A taio i te Salamo 137:1-6.) Ua tauturu te reira ia ratou ia haafatata ˈtu ia Iehova noa ˈtu te mau haapiiraa e peu hape i Babulonia.

5. I tiaturi na to Babulonia e Aiphiti i tahito i teihea mau atua toru tahi?

⁵ I tahito ra, i haamori na te taata i te mau atua toru tahi. Ei hiˈoraa, i haamori na to Babulonia ia Sîn (te atua avaˈe), ia Shamash (te atua mahana) e ia Ishtar (te ruahine no te here e te tamaˈi). E atua toru tahi atoa to Aiphiti ma, te hoê papa, te hoê mama e te hoê tamaiti. Noa ˈtu e e atua toru tahi ratou, aita ratou i aifaito. Ei hiˈoraa, te vai ra te atua Osiris, te ruahine Isis e ta raua tamaiti o Horus.

6. Eaha te haapiiraa o te Toru tahi? Mea nafea tatou i te parururaahia i tera tiaturiraa hape?

⁶ E ite-atoa-hia i roto i te Amuiraa faaroo Kerisetiano te haapiiraa o te Toru tahi. Oia hoi te Metua, te Tamaiti e te varua maitai, hoê ïa Atua. Teie râ, e au ra e e ere Iehova i te mea puai hope i te mea e e tuhaa noa o ˈna o te Atua. Ua paruruhia râ te nunaa o Iehova i teie tiaturiraa hape. Ua tu hoi to tatou manaˈo i teie mau parau faaurua: “E faaroo mai, e Iseraela e: O Iehova to tatou Atua, hoê Iehova.” (Deut. 6:4) Ua faahiti atoa Iesu i tera parau. E patoi anei hoê noa ˈˈe Kerisetiano mau i ta ˈna mau parau?—Mar. 12:29.

7. No te aha aita e nehenehe e bapetizo i te hoê taata o te tiaturi noa ra i te Toru tahi ei Kerisetiano mau?

⁷ Mea taa ê roa te haapiiraa o te Toru tahi i te faaueraa a Iesu e “e faariro i te mau fenua atoa ei pǐpǐ, a bapetizo atu ai ia ratou i roto i te iˈoa o te Metua, e no te Tamaiti, e no te [v]arua [m]aitai.” (Mat. 28:19) Ia bapetizohia te hoê taata ei Kerisetiano mau e ei Ite no Iehova, e mea tia ia farii oia i te tiaraa hau aˈe o te Metua, Iehova, e i te tiaraa e te mana o ta te Atua ra Tamaiti, Iesu. Ia tiaturi atoa o ˈna e e ere te varua o te Atua i te hoê tuhaa o te Toru tahi, o ‘te puai ohipa râ a te Atua’ e tia ˈi. (Gen. 1:2, Traduction du monde nouveau) Aita te hoê taata o te tiaturi noa ra i te Toru tahi e nehenehe e bapetizohia ei taipe o to ˈna pûpûraa ia ˈna iho i te Atua ra o Iehova. Auê tatou i te oaoa e ua paruru mai ta tatou tufaa pae varua ia tiaturi i teie haapiiraa o te faaino ra i te Atua.

8. Eaha ta to Babulonia i tiaturi no nia i te mau atua e te mau demoni?

⁸ I tiaturi na to Babulonia eiaha noa i to ratou mau atua, i te mau demoni e te peu tahutahu atoa râ. Ia au i te hoê buka ite rahi, i tiaturi na ratou e no te mau demoni te taata e maˈihia ˈi. E pure ratou i to ratou mau atua a ani atoa ˈi i te mau demoni ia paruru ia ratou.—The International Standard Bible Encyclopaedia.

9. (a) Mea nafea te ati Iuda e rave rahi i te haapiiraa i te mau tiaturiraa hape no nia i te mau demoni? (b) Mea nafea tatou i te parururaahia i te atâtaraa o te peu tahutahu?

 ⁹ A tapeahia ˈi i Babulonia, mea rahi te ati Iuda tei haapii i te mau manaˈo te ore e tu i te mau Papai. I muri aˈe, ua tiaturi aˈera e rave rahi ati Iuda i te tiaturiraa Heleni e mea maitai atoa te mau demoni. Te faaite maira râ te Atua e mea atâta e mea ino te peu tahutahu, aore ra te tamataraa i te ani i te tauturu a te mau demoni. E parau mau te reira o ta tatou tufaa pae varua o te paruru ia tatou. (Isa. 47:1, 12-15) E patoi anaˈe i te peu tahutahu mai ta Iehova e parau maira.—A taio i te Deuteronomi 18:10-12; Apokalupo 21:8.

10. Eaha te nehenehe e parau no nia i te mau peu e tiaturiraa a Babulonia Rahi?

¹⁰ I teie atoa mahana, mea rahi te taata i roto i te mau haapaoraa hape te rave ra i te peu tahutahu, mai to Babulonia i tahito ra. No reira te Bibilia e faaau ai i te mau haapaoraa hape atoa mai te Babulonia Rahi. (Apo. 18:21-24) E au iho â ratou i te haapaoraa itehia i Babulonia i tahito ra. No reira mai hoi te mau tiaturiraa hape e peu ino. No te peu tahutahu, te haamoriraa idolo e te tahi atu mau hara, fatata roa Babulonia Rahi i te haamouhia.—A taio i te Apokalupo 18:1-5.

11. Eaha te mau faaararaa tei piahia no nia i te peu tahutahu?

¹¹ Ua parau Iehova: “Eita vau e faaoromai i . . . te mau oroa èè atu.” (Isa. 1:13, Te Bibilia Moˈa V.C.J.S., 1976) I te mau matahiti 1800, mea rahi te taata tei rave i te peu tahutahu. Pia aˈera Te Pare Tiairaa no Me 1885 (i parauhia na Le Phare de la Tour de Sion) i te hoê tumu parau i nia iho. Ua faaite tera vea e ua haapii te mau haapaoraa tahito e te ora noa ra te feia pohe e ua niuhia te aai o te mau taˈere atoa i nia i te manaˈo e tei roto tei pohe i te tahi atu ao. Oia atoa e te faahua parau nei te mau demoni e o ratou te feia pohe o te tamata nei i te tauaparau e te feia ora. E nehenehe ïa te mau demoni e ohipa i nia i te feruriraa e te mau haaraa o te taata e rave rahi. Hoê â faaararaa te itehia i roto i te buka rairai matamua Beretane Eaha ta te mau Papai e parau ra no nia i te peu tahutahu? Oia atoa i roto i ta tatou mau papai apî aˈe.

12. Eaha ta Solomona i parau ma te faaurua no nia i te feia pohe?

¹² E nehenehe “te feia atoa . . . i ite i te parau mau” e pahono i teie uiraa. (Ioa. 2, 1) E farii iho â tatou i teie mau parau a Solomona: “Maitai aˈe to te urî ia ora ra i to te liona ia pohe, Ua ite te feia e ora nei, e pohe ratou, aita râ a te feia i pohe ra e parau itea. . . . O tei itea ia oe ta to rima e rave ra, a rave ma to puai atoa ra; aore hoi e ohipa, aore e imiraa, aore hoi e ite, aore hoi e paari, i te apoo ta oe e haere na.”—Koh. 9:4, 5, 10.

13. Ua farii te mau ati Iuda i teihea tiaturiraa no ǒ mai i te haapaoraa e taˈere Heleni?

¹³ Ua faaite Iehova i te mau ati Iuda te parau mau no nia i tei pohe. I to te mau faatere Heleni râ haruraa ia Iuda e Arama, ua tamata ratou i te turai i te taata ia farii i te haapaoraa e te taˈere Heleni. Haamata ˈtura ïa te mau ati Iuda i te tiaturi e e ora ˈtu te tahi tuhaa o te taata ia pohe te tino a haere atu ai i roto i te tahi atu ao i reira o ˈna e hamani-ino-hia ˈi. E ere te mau Heleni i te feia matamua tei manaˈo mai tera. Ua  faaite te hoê buka e i tiaturi na to Babulonia i te hoê ao i reira te mau atua e demoni iino e haamauiui ai i te taata. (The Religion of Babylonia and Assyria) Ua tiaturi iho â ïa to Babulonia e e ora ˈtu te tahi tuhaa o te taata ia pohe te tino.

14. Eaha ta Ioba e ta Aberahama i ite no nia i te pohe e te tia-faahou-raa?

¹⁴ Noa ˈtu e aita ta Ioba e Bibilia, ua ite o ˈna i te parau mau no nia i te pohe. Oia atoa e e Atua here o Iehova o te hinaaro puai e faatia faahou mai ia ˈna ia pohe oia. (Ioba 14:13-15) Ua tiaturi atoa Aberahama i te tia-faahou-raa. (A taio i te Hebera 11:17-19.) Aita iho â raua i tiaturi e te ora noa ra tei pohe i te tahi atu vahi. Aita hoi e nehenehe e faahoˈi mai i te ora te hoê taata te ore e pohe. Mea papu e ua tauturu te varua o te Atua ia Ioba e Aberahama ia taa e aita tei pohe e ora noa ra e ia tiaturi i te tia-faahou-raa. E tuhaa tera pue parau mau o ta tatou tufaa.

15, 16. Mea nafea tatou i te tiamâraa mai i te hara e te pohe?

¹⁵ Te oaoa nei tatou e ua faaite mai te Atua i te parau mau no nia i ta ˈna i rave no te faaora ia tatou i te hara e te pohe no ǒ mai ia Adamu ra. (Roma 5:12) Ua ite tatou e aita Iesu “i haere mai ia tavinihia to ˈna, ei tavini râ, e ia horoa i to ˈna ora ei hoo no te taata e rave rahi.” (Mar. 10:45) Mea au mau ia ite no nia i te tiamâraa itehia maoti te hoo o te Mesia ra o Iesu!—Roma 3:22-24.

¹⁶ Mea faufaa roa ia tatarahapa te mau ati Iuda e Etene o te senekele matamua i ta ratou hara e ia tiaturi i te tusia taraehara o Iesu. Ia ore, eita ta ratou  hara e faaorehia. Hoê â huru i teie mahana. (Ioa. 3:16, 36) Ia tiaturi noa tatou i te mau haapiiraa hape, mai te Toru tahi e te ora-noa-raa te varua i muri aˈe i te pohe, eita tatou e faufaahia i te hoo. E nehenehe râ. Ua ite tatou i te parau mau no nia i “ta [te Atua] Tamaiti here ra; no ˈna i noaa ˈi to tatou ora, te hara i faaorehia ra, i to ˈna ra toto.”—Kol. 1:13, 14.

17, 18. Ihea e itehia ˈi te mau haamaramaramaraa faufaa no nia i to tatou aamu? No te aha mea maitai ai ia hiˈopoa i te reira?

¹⁷ Mea rahi â te nehenehe e parau no nia i te mau haapiiraa haavare ore ta tatou i farii, i ta tatou i ite ei tavini a te Atua e i te mau haamaitairaa pae varua e materia ta tatou e fanaˈo nei. Mea rahi te faatiaraa anaanatae mau i roto i ta tatou Annuaire no nia i te ohipa pororaa na te ao. Te faatia ra te mau video La foi en action, tuhaa 1 e 2, e te tahi atu mau papai mai te buka Les Témoins de Jéhovah: Prédicateurs du Royaume de Dieu i to tatou aamu. E pinepine atoa ta tatou mau vea i te faatia i te aamu putapû mau o te tahi hoa Kerisetiano here.

¹⁸ Mai te mau Iseraela tei maitaihia i te feruriruriraa i ta te Atua i rave no ratou, e maitai-atoa-hia tatou ia hiˈopoa tatou i te aamu o te mau Ite no Iehova. (Exo. 12:26, 27) Ua ite Mose taata paari i te mau ohipa faahiahia a te Atua a parau atu ai o ˈna i te mau Iseraela: “A haamanaˈo na i te anotau tahito ra, e haamanaˈo hoi i te mau matahiti i te mau ui atoa ra; a ui na i to oe na mau metua, e na ratou e faaite mai ia oe: e to oe hui tavana e na ratou e parau mai ia oe.” (Deut. 32:7) Ei nunaa o Iehova e ei nǎnǎ o ta ˈna ra aua, te arue nei tatou paatoa ia ˈna ma te oaoa e te faaite nei i ta ˈna i rave. (Sal. 79:13) E tauturu mai te mau haapiiraa ta tatou e huti mai i to tatou aamu ei nunaa o Iehova ia tavini noa ia ˈna.

19. I te mea e te fanaˈo nei tatou i te maramarama pae varua, ia aha tatou?

¹⁹ Auê tatou i te oaoa i te hahaere na te maramarama pae varua no ǒ mai i te Atua ra, eiaha râ na te pouri! (Mas. 4:18, 19) E haapii maite anaˈe ïa i te Parau a te Atua e e poro anaˈe ma te itoito rahi. E au tatou i te papai salamo tei arue i te Fatu e Arii ra o Iehova ma teie mau parau: “E tamau â vau i te haere i te etaeta na te Fatu ra, na Iehova: e faaite au i ta oe ra parau-tia, ta oe anaˈe ra. Na oe, e tau Atua, i haapii mai ia ˈu mai to ˈu apîraa mai â; e ua faaite au i ta oe ra mau ohipa umerehia e tae roa aˈenei i teie nei; ia ruhiruhia vau e ia hinahinahia tau upoo, e te Atua e, eiaha oe e faarue mai ia ˈu, ia faaite râ vau i to mana i teie nei ui; e to puai, i te taata atoa ia haere mai.”—Sal. 71:16-18.

20. Eaha ta tatou e faaite papu ia vai taiva ore tatou ia Iehova? Eaha to oe manaˈo no nia i te tiaraa o Iehova e faatere e ta tatou haamoriraa ia ˈna?

²⁰ Ma te vai taiva ore ia Iehova, te faaite papu nei tatou e te tiaturi nei tatou e e tiaraa iho â to te Atua no te faatere ia tatou e e au o ˈna ia haamorihia. (Apo. 4:11) Te horoa mai nei Iehova i to ˈna varua no te tauturu ia tatou ia faaite i te parau apî maitai e no te horoa i te tamahanahanaraa e te tiaturiraa i te taata. (Isa. 61:1, 2) Eita roa ˈtu Satani e faatiahia ia faatere i te nunaa o te Atua e i te huitaata atoa. E tauturu mai ta tatou tufaa pae varua ia faaitoito e ia vai piri noa ia Iehova ia nehenehe tatou e tavini ia ˈna i teie nei â e a muri noa ˈtu.—A taio i te Salamo 26:11; 86:12.