1, 2. No te aha vetahi e hinaaro ai e haapii no nia i te suke?

 MEA au anei na oe te suke? Mea au roa na te mau ati Iuda i tahito ra. (Nah. 3:12; Luka 13:6-9) I teie mahana, mea rahi te tanu ra i te reira na te ao. Mea maitai te suke no te ea. No vetahi, mea au atoa te reira no te mafatu.

² Ua faaau ê na Iehova i te taata i te suke. Ua parau o ˈna no nia i tei itehia i roto i to ratou aau. E tauturu atoa mai te reira ia tatou e i te feia ta tatou e here ra. Aita te Atua i faataa i te mau maitai ia amu i te suke, e auraa taipe râ to te reira. A hiˈopoa ˈi tatou i ta ˈna i parau, a feruri i te haapiiraa e huti mai ei Kerisetiano.

3. Te faahohoˈa ra te mau suke i roto i te Ieremia pene 24 ia vai ma?

³ E hiˈopoa anaˈe na mua i ta te Atua i parau i te tau o Ieremia no nia i te suke. I 617 ra, aita e taairaa maitai faahou to te nunaa no Iuda e te Atua. Ua faaite orama Iehova eaha te tiai ra ia ratou. Ua faaohipa o ˈna e piti huru suke: te mea “maitai roa” e te mea “ino roa.” (A taio i te Ieremia 24:1-3.) Te suke ino, o te arii Zedekia ïa e te feia ta te arii Nebukanesa e ta ˈna nuu i aro. E te suke maitai? O Ezekiela ïa, Daniela e to ˈna na hoa e toru, e te tahi mau ati Iuda tei afaihia i Babulonia. I muri aˈe, e hoˈi te hoê toea i rotopu ia ratou i Ierusalema no te patu faahou i te oire e to ˈna hiero. Tera iho â tei tupu.—Ier. 24:8-10; 25:11, 12; 29:10.

4. Eaha te faaitoitoraa e itehia i roto i ta te Atua i parau no nia i te suke maitai?

⁴ Ua parau Iehova no nia i te feia i faahohoˈahia e te suke maitai: “E horoa vau ia ratou i te aau e ite  mai ai ia ˈu ra, e o vau o Iehova; e riro hoi ratou ei taata no ˈu.” (Ier. 24:7) Te manaˈo tumu ïa o teie tumu parau. Mea faaitoito mau ia ite e te hinaaro ra te Atua ia fanaˈo tatou i “te aau e ite” ia ˈna. Oia hoi, ia hinaaro tatou e ite o vai ra o ˈna e e riro ei taata no ˈna. E nafea ïa? E haapii e e faaohipa anaˈe i ta ˈna Parau. E tatarahapa anaˈe i ta tatou mau hara a faarue roa ˈtu ai i te reira. Ia oti, e pûpû anaˈe i to tatou ora i te Atua e e bapetizo anaˈe i te iˈoa o te Metua, te Tamaiti e te varua moˈa. (Mat. 28:19, 20; Ohi. 3:19) Ua na reira ê na anei oe? Aore ra te haere tamau ra anei oe i te mau putuputuraa a te mau Ite no Iehova e fatata oe i te na reira?

5. No vai na mua te poroi a Ieremia?

⁵ Noa ˈtu e ua na reira ê na tatou, mea faufaa noâ ia hiˈopoa i to tatou huru e haerea. No te aha? E ite oe i te pahonoraa i roto i ta Ieremia i papai no nia i te aau. Tei nia te tahi mau pene o ta ˈna buka i te mau nunaa e ati aˈe ia Iuda. Tei nia râ te rahiraa i te nunaa no Iuda a faatere ai e pae o to ˈna mau arii. (Ier. 1:15, 16) No vai na mua te poroi a Ieremia? No te mau tane, vahine e tamarii tei pûpû ia ratou ia Iehova. Ua farii to ratou hui metua e riro ei nunaa o te Atua. (Exo. 19:3-8) E i te tau atoa o Ieremia, ua parau te nunaa: “Te haere atu nei matou ia oe, o to matou Atua hoi oe, o Iehova.” (Ier. 3:22) Mea maitai anei râ to ratou aau?

6. No te aha e anaanatae ai i ta te Atua i parau no nia i te aau?

⁶ Te faaohipa nei te mau taote i te mau ravea apî no te hiˈopoa e mea maitai anei to tatou mafatu. Area o Iehova, e nehenehe ta ˈna e rave hau atu â, mai i te tau o Ieremia. Te faaite nei teie mau parau e mea aravihi mau o ˈNa: “E haavare rahi to te aau i te mau mea atoa nei, e ua ino roa; o vai te ite? O vau o Iehova, o tei paheru i te aau, . . . ia hopoi atu vau i te taata atoa ra i tei au i ta ˈna ra parau, e tei au i te hopea o ta ˈna e rave ra.” (Ier. 17:9, 10) E ere te ‘paheruraa i te aau’ i te hoê hiˈopoaraa o te mafatu, o te tupaipai fatata e toru miria taime i roto e 70 aore ra 80 matahiti. Te aau i ǒ nei, o to tatou ïa huru o roto: to tatou mau hinaaro, manaˈo, huru aau, haerea e ta tatou mau fa. E hiˈopoa te Atua i to aau, e i nia i te tahi faito, e nehenehe atoa ta oe.

7. Mea nafea Ieremia i te faataaraa i te aau o te rahiraa o te mau ati Iuda i to ˈna ra tau?

⁷ No te faaineine no tera hiˈopoaraa, e ui anaˈe, ‘Mea maitai anei te aau o te rahiraa o te mau ati Iuda i te tau o Ieremia?’ No te ite, e hiˈopoa anaˈe i ta Ieremia i parau: “E feia peritome ore atoa te utuafare atoa o Iseraela i te aau.” Aita o ˈna i manaˈo i te peritomeraa pae tino o te mau tane ati Iuda. Noa ˈtu e mea peritomehia ratou, ia au i te Traduction du monde nouveau ua parau Iehova e “mea peritome ore noâ” ratou. Oia hoi ‘mea peritome-ore-hia ratou i te aau.’ (Ier. 9:25, 26) Eaha ïa te auraa?

8, 9. No nia i to ratou aau, ia aha te rahiraa o te mau ati Iuda?

⁸ E itehia te auraa o te ‘peritome-ore-raa i te aau’ i roto i ta te Atua i faaue i te mau ati Iuda ia rave: “E hopoi ê atu i te iri mua o to outou aau na, e te mau taata o Iuda, e to Ierusalema; o te puroro noa ˈtu tau riri . . . no te ino o ta outou  parau i rave.” No te aha mea ino ai to ratou haerea? No to ratou aau. (A taio i te Mareko 7:20-23.) O ta te Atua ïa i faaite maitai na roto ia Ieremia. Mea orure hau e te etaeta ratou. I to ˈNa aro, mea ino to ratou huru feruriraa e manaˈo turai. (A taio i te Ieremia 5:23, 24; 7:24-26.) Ua parau atu te Atua: “Ia peritomehia outou no Iehova, e hopoi ê atu i te iri mua o to outou aau.”—Ier. 4:4; 18:11, 12.

⁹ Mai te huru ra ïa e e titauhia te hoê tâpûraa taipe o to ratou aau mai i te tau o Mose. (Deut. 10:16; 30:6) E nafea ratou ‘e hopoi ê atu ai i te iri mua o to ratou aau’? E titauhia ia iriti ratou i te mau mea e etaeta ˈi to ratou aau. Oia hoi te mau manaˈo, hinaaro aore ra manaˈo turai ta te Atua e ore e au.—Ohi. 7:51.

10. Mea nafea Davida i te hiˈopoaraa i to ˈna aau? E nafea tatou e pee ai i to ˈna hiˈoraa?

¹⁰ Auê tatou i te mauruuru i te Atua i te tautururaa mai ia taa eaha te aau! E ui paha vetahi, ‘No te aha mea faufaa ˈi ia hiˈopoa maite i to tatou aau ei Ite no Iehova?’ E ere no te mea e haerea ino to e rave rahi Kerisetiano i roto i te amuiraa aore ra ua riro ratou ei “suke ino.” E nunaa taiva ore e viivii ore te mau tavini a te Atua i teie mahana. A hiˈo na i ta Davida i taparu i te Atua: “E hiˈopoa mai oe ia ˈu, e te Atua, ia ite hoi oe i tau aau; e tamata hua mai ia ˈu, e ia ite oe i tau manaˈo: e hiˈo mai, e eiaha ei haamainaina to roto ia ˈu ia oe ra.”—Sal. 17:3; 139:23, 24.

11, 12. (a) No te aha ia hiˈopoa ˈi tatou taitahi i to tatou aau? (b) Eaha ta te Atua e ore e rave?

¹¹ Te hinaaro ra Iehova ia noaa ia tatou taitahi ta ˈna farii maitai e ia fanaˈo noâ i te reira. No nia i te taata parau-tia, ua parau Ieremia: “E Iehova sabaota ra, tei tamata i te feia parau-tia ra, tei hiˈo i te manaˈo i roto i te aau.” (Ier. 20:12) Te hiˈopoa atoa nei te Atua Mana hope i te aau o te taata parau-tia. Eiaha anei ïa tatou e hiˈopoa ia tatou iho ma te haavare ore? (A taio i te Salamo 11:5.) A na reira ˈi, e ite paha tatou i te hoê haerea, fa aore ra manaˈo hohonu e etaeta rii ai to tatou aau. E titauhia ïa te tahi tâpûraa taipe no te tatara i tera ‘iri mua o to tatou aau.’ Eaha ta oe e imi a hiˈopoa ˈi i to aau? E e nafea ia rave i te mau tauiraa?—Ier. 4:4.

¹² Te mea papu, eita roa ˈtu Iehova e faahepo ia tatou ia taui. Ua parau o ˈna no nia i te “suke maitai” e ‘e horoa o ˈna ia ratou i te aau e ite mai ai’ ia ˈna. Aita o ˈna i parau e e faahepo atu o ˈna ia taui i to ratou aau. Na ratou iho râ e hinaaro i te hoê aau faaroo o te faaite ra e ua ite ratou o vai te Atua. Ia na reira atoa ïa tatou e tia ˈi.

13, 14. E nafea te mea e vai ra i roto i te aau o te hoê taata e riro ai ei mea atâta no ˈna?

¹³ Ua na ô Iesu: “No roto mai hoi i te  aau te manaˈo iino, te taparahi taata, e te faaturi, te poreneia, e te eiâ, te haavare, e te faaino.” (Mat. 15:19) Mai te peu e e turai te aau etaeta o te hoê taeae ia ˈna ia faaturi e ia ore e tatarahapa, e ere roa o ˈna i te farii maitai a te Atua. E nehenehe atoa râ te hoê taata tei ore i na reira ˈtura e vaiiho i te hoê hinaaro tano ore ia puai roa mai i roto i to ˈna aau. (A taio i te Mataio 5:27, 28.) No reira mea faufaa ˈi ia hiˈopoa i to tatou iho aau. A na reira ˈi, e ite anei oe e e hinaaro tano ore to oe no te tahi taeae aore ra tuahine, hinaaro ta te Atua e ore e farii e te titauhia ia tinai?

¹⁴ Hoê â no te hoê taeae tei ore â i taparahi i te taata. E nehenehe o ˈna e vaiiho i te inoino ia rahi roa mai i roto i to ˈna aau a riri roa ˈtu ai i to ˈna hoa Kerisetiano. (Lev. 19:17) E faaitoito anei o ˈna i te tinai i tera mau huru aau?—Mat. 5:21, 22.

15, 16. (a) A faataa na e nafea te hoê Kerisetiano e riro ei mea ‘peritome-ore-hia i te aau.’ (b) I to oe manaˈo, no te aha aita ˈi te Atua e au ra i te hoê ‘aau peritome-ore-hia’?

¹⁵ Auaˈe, aita te aau o te rahiraa o te mau Kerisetiano e fifi ra. Teie râ, ua faahiti atoa Iesu i te mau “manaˈo iino.” Ei hiˈoraa, e manaˈo paha tatou e mea faufaa aˈe to tatou taiva ore i to tatou utuafare. E aroha iho â te mau Kerisetiano i to ratou fetii. E ere ratou mai te taata aroha ore o teie mau “mahana hopea” nei. (Tim. 2, 3:1, 3) Teie râ, e nehenehe tatou e riro ei mea aifaito ore i roto i tera tuhaa. Mea rahi te manaˈo ra e mea puai aˈe iho â te taairaa o te toto. Ia inoino te tahi fetii, e inoino atoa ratou. Ua riri roa ino to Dina mau taeae i te hamani-ino-raahia o ˈna. E ua haapohe ihora ratou i te tane e rave rahi. (Gen. 34:13, 25-30) No to ˈna mau huru aau iino, ua haapohe Abasaloma ia Amanona. (Sam. 2, 13:1-30) Mea atâta mau te mau “manaˈo iino,” e ere anei?

¹⁶ E riri roa ino vetahi ia haamauiuihia te tahi fetii aore ra ia manaˈo ratou e ua na-reira-hia. Eita paha ratou e farii i te titau-manihini-raa a te hoa Kerisetiano tei haamauiui i to ratou fetii. Eita atoa paha e titau manihini ia ˈna. (Heb. 13:1, 2) E ere roa ˈtu tera haerea i te mea maitai. E tapao te reira o te aroha ore. E nehenehe Tei hiˈopoa i te aau e faaoti e mea ‘peritome-ore-hia tatou i te aau.’  (Ier. 9:25, 26) A haamanaˈo i ta Iehova i parau: “E hopoi ê atu i te iri mua o to outou aau.”—Ier. 4:4.

17. No te aha mea ohie aˈe ia taui i to tatou aau ia mǎtaˈu tatou ia Iehova?

¹⁷ A hiˈopoa ˈi i to aau, e ite paha oe e aita oe e auraro oioi ra i ta Iehova mau aˈoraa mai tei titauhia. I nia i te tahi faito, mea ‘peritome-ore-hia paha to aau.’ Ua itea paha ia oe te tahi mǎtaˈu taata, te tahi hiaai no te roo aore ra te taoˈa, aore ra te tahi huru feruriraa etaeta aore ra tiamâ. E ere o oe anaˈe tei ite i te reira. (Ier. 7:24; 11:8) Ua papai Ieremia e ‘e aau taiva e te orure hau’ to te mau ati Iuda taiva. Ua na ô â oia: “Aore hoi to ratou aau i parau e, Tatou e mǎtaˈu i to tatou Atua ra, ia Iehova, o tei horoa mai i te ûa i to ˈna tau.” (Ier. 5:23, 24) No te tatara i te ‘iri mua o te aau,’ mea faufaa roa ia mǎtaˈu e ia faatura ia Iehova. Mea ohie aˈe ïa ia taui i te huru o to tatou aau e ia rave i ta te Atua e hinaaro ra ia rave tatou.

18. Eaha ta Iehova i fafau i te feia i ô i roto i te faufaa apî?

¹⁸ E horoa mai Iehova i “te aau e ite” ia ˈna ia tamau â tatou i te faaitoito. Tera ta ˈna i fafau e rave no te feia faatavaihia i ô i roto i te faufaa apî: “E tuu vau i tau ture i roto ia ratou, e papai au i te reira i roto i to ratou aau; e e riro vau ei Atua no ratou, e ei taata hoi ratou no ˈu.” Ua na ô â oia: “E ore hoi ratou e haapii faahou, o te taata o to ˈna iho taata-tupu, o te taata a to ˈna iho taeae, i te na ôraa ˈtu e, Ia ite hoi outou ia Iehova; e ite paatoa hoi ratou ia ˈu, o tei haehaa e o tei rahi, . . . e faaore hoi au i ta ratou hara, e ore au e manaˈo faahou i ta ratou ino.”—Ier. 31:31-34. *

19. Eaha te tiaturiraa faahiahia a te mau Kerisetiano mau?

¹⁹ Te tiai ru nei paha oe i te mau haamaitairaa mure ore ta oe e fanaˈo maoti te faufaa apî, i nia anei i te raˈi aore ra i te fenua. E mea tia ia hinaaro oe e ite o vai ra o Iehova e e riro ei tavini na ˈna. E fanaˈo oe i tera mau haamaitairaa i te taime noa e faaorehia ˈi ta oe mau hara maoti te tusia o te Mesia. I te mea e e faaorehia ta oe mau hara, ia faaore atoa ïa oe i ta vetahi ê noa ˈtu e au ra e mea fifi ia na reira. A faaitoito i te tinai i te tahi noa ˈˈe ino i roto i to aau. E maitai mai ïa to aau e e faaite te reira e te hinaaro ra oe e tavini ia Iehova. Oia atoa e te haamata ra oe i te ite maitai aˈe o vai ra o ˈna. E riro oe mai te feia ta Iehova i parau atu: “E imi mai hoi outou ia ˈu, e e itea vau e outou, ia imi mai outou ia ˈu ma te aau atoa ra. . . . E itea vau e outou.”—Ier. 29:13, 14.