1, 2. O teihea parau tohu no nia i te mau mahana hopea tei haamaere i te mau pǐpǐ a Iesu, e no te aha?

 NO PARAU noa ˈtura Iesu i ta ˈna mau pǐpǐ e e haamouhia te hiero. Ua haapeapea Petero, Iakobo e Ioane i ta ˈna mau parau. (Mar. 13:1-4) O ratou anaˈe i teie nei i pihaiiho ia Iesu, ui aˈera ratou ia ˈna: “E faaite mai oe ia matou i te tupuraa o taua mau mea nei? e te tapao o to oe taeraa mai [ei Arii faatere] e te hopea o teie nei ao?” (Mat. 24:1-3) Faataa ˈtura Iesu i te mau tupuraa o te ore noa e taui i te oraraa, o te faaite atoa mai râ e fatata te ao ino a Satani i te haamouhia. Ua maere paha te mau pǐpǐ a Iesu i te hoê tupuraa taa ê ta ˈna i faahiti. Ua tohu Iesu i te mau tupuraa peapea mai te tamaˈi, te oˈe e te ino o te haere i te rahi. Ua tohu râ o ˈna i muri iho i te tahi mea maitai e itehia i te mau mahana hopea: “E parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira.”—Mat. 24:7-14.

² Ua oaoa te mau pǐpǐ a Iesu i te poro i te parau apî maitai o te Basileia e o ˈna. (Luka 8:1; 9:1, 2) Ua haamanaˈo paha ratou i ta ˈna i parau: “Te rahi mau nei te auhune sitona, te iti nei râ te feia e ooti: e teie nei, e pure outou i te Fatu o te ohipa, ia tono â oia i te rave ohipa ei ooti.” (Luka 10:2) E nafea râ ratou e poro ai e “ati noa ˈˈe teie nei ao, ia ite te mau fenua atoa”? Nohea mai te rave ohipa? Ahani ratou i feruri i te ohipa e tupu a muri aˈe a parahi noa ˈi ratou i pihaiiho ia Iesu! E maere paha ratou i te ite i te tupuraa o teie mau parau ta tatou e taio nei i roto i te Mataio 24:14.

3. E nafea te Luka 21:34 e tupu ai i teie mahana? Ia uiui tatou i te aha?

 ³ Te tupu nei te parau tohu a Iesu. E mirioni taata te haaparare nei i te parau apî maitai o te Basileia na te mau fenua atoa. (Isa. 60:22) Ua faaite râ Iesu e mea fifi no vetahi ia tiatonu i tera ohipa i taua mau mahana hopea ra. E fariu ê e e “teimaha” ratou. (A taio i te Luka 21:34.) Ta tatou ïa e ite nei. Te fariu ê nei vetahi mau tavini a te Atua i te ohipa pororaa. Tera ïa te itehia ra i roto i ta ratou mau faaotiraa no nia i te ohipa, te haapiiraa teitei, te titauraa i te mau mea materia e te rahiraa taime faataahia no te tuaro e te faaanaanataeraa. Te toaruaru nei vetahi ê no te mau haapeapearaa o te oraraa. A uiui: ‘Te maitai ra anei au? Te tuu ra anei au i to te Atua hinaaro na mua roa i roto i to ˈu oraraa?’

4. (a) Eaha ta Paulo i pure no nia i te mau Kerisetiano i Philipi, e no te aha? (b) Eaha te hiˈopoahia i roto i teie tumu parau e to muri iho, e no te aha?

⁴ E mea tia ia tutava ˈtu â te mau Kerisetiano matamua i te tuu noa i te taviniraa i te Atua na mua roa i roto i to ratou oraraa. No reira te aposetolo Paulo i pure ai “ia au,” aore ra ite papu, to Philipi “i te mau mea i hau i te maitai.” (A taio i te Philipi 1:9-11.) Mai ia Paulo, ua faaitoito te rahiraa o te mau Kerisetiano i te faaite i te parau a te Atua ma te mǎtaˈu ore. (Phil. 1:12-14) Te faaitoito atoa nei te rahiraa o tatou i te poro i te Parau a te Atua. E hiˈopoa anaˈe i ta te faanahonahoraa a Iehova e rave nei. E tauturu mai te reira ia tiatonu atu â i te pororaa, te ohipa faufaa roa ˈˈe. I roto i teie tumu parau, e feruri anaˈe i ta Iehova e faanaho nei ia tupu te Mataio 24:14. Eaha te fa o ta ˈna faanahonahoraa, e e nafea te iteraa i te reira e faaitoito ai ia tatou e i to tatou utuafare? I to muri iho tumu parau, e hiˈo mai tatou eaha te tauturu mai ia tamau â i te tavini i te Atua e ia pee i te aratairaa o ta Iehova faanahonahoraa.

5, 6. (a) No te aha Iehova i horoa ˈi i te mau orama o te tuhaa itea ore o ta ˈna faanahonahoraa? (b) Eaha ta Ezekiela i ite orama?

⁵ Mea rahi te mea ta Iehova i maiti eiaha e tuu i roto i ta ˈna Parau noa ˈtu e mea anaanatae mau. Mai te mau parau rii faufaa no nia i te roro aore ra te ao nui. Ua horoa mai râ Iehova i te mau haamaramaramaraa faufaa. E taa ïa ia tatou ta ˈna mau opuaraa e e nafea ia ora ia au i te reira. (Tim. 2, 3:16, 17) Te mea anaanatae, te faaite rii maira te Bibilia i te tuhaa itea ore o ta Iehova faanahonahoraa! Auê te oaoa rahi ia taio i te mau faataaraa a Isaia, Ezekiela, Daniela e te Apokalupo a Ioane! (Isa. 6:1-4; Ezk. 1:4-14, 22-24; Dan. 7:9-14; Apo. 4:1-11) No te aha Iehova i faatia ˈi ia tatou ia ite i te tahi mau mea e tupu ra i nia i te raˈi?

⁶ Te hinaaro ra Iehova ia haamanaˈo noa tatou e e tuhaa tatou o te hoê faanahonahoraa o te ao taatoa. Te ohipa puai nei te tuhaa itea ore o ta Iehova faanahonahoraa no te rave i to ˈNa hinaaro. Ei hiˈoraa, ua ite orama Ezekiela i te tera tuhaa itea ore faaauhia i te hoê pereoo rahi. Mea vitiviti to ˈna tere e e nehenehe ta ˈna e taui taue i te paeau. (Ezk. 1:15-21) Ua ite atoa o ˈna i Tei faahoro i tera pereoo rahi. Ua parau Ezekiela: “Ua hiˈo ihora vau mai te hesemala te huru,  mai te auahi ra e ati noa ˈˈe i roto ra . . . O te huru ra teie o te anaana o Iehova.” (Ezk. 1:25-28) Auê Ezekiela i te faahiahia i te ite i tera orama! Ua ite o ˈna e na Iehova e faatere roa ra i ta ˈna faanahonahoraa ma te aratai i te reira maoti to ˈna varua moˈa. Auê faahohoˈaraa faahiahia mau o te ohipa a te tuhaa itea ore o te faanahonahoraa a Iehova!

7. E nafea e noaa ˈi ia tatou te tiaturiraa maoti te orama a Daniela?

⁷ Ua ite atoa Daniela i te hoê orama e noaa mai ai te tiaturiraa. Ua ite o ˈna ia Iehova, “To te mau mahana tahito ra,” e parahi ra i nia i te hoê terono te vai ra te huira. (Dan. 7:9) Ua hinaaro Iehova ia ite Daniela e te tere ra ta ˈNa faanahonahoraa. Oia hoi te faatupu ra te reira i ta ˈNa opuaraa. Ua ite atoa Daniela “i te hoê mai te Tamaiti a te taata ra,” o Iesu ïa, i te fanaˈoraa i te tiaauraa i nia i te tuhaa i te fenua o te faanahonahoraa a Iehova. Eita te Mesia e faatere tau matahiti noa. ‘E mana mure ore râ to ˈna o te ore e mou, e to ˈna basileia, e ore ïa e pau.’ (Dan. 7:13, 14) Te turaihia nei tatou ia tiaturi ia Iehova e ia taa i ta ˈna e rave nei. Ua horoa o ˈNa i ta ˈna Tamaiti ra “te mana, e te hinuhinu, e te basileia.” Te tiaturi ra Iehova i ta ˈna Tamaiti. E nehenehe ïa e tiaturi ia Iesu no te aratai ia tatou.

8. Eaha te huru aau o Ezekiela e Isaia i mua i te mau orama no ǒ mai ia Iehova ra? Eaha atoa to tatou huru aau?

 ⁸ Eaha to tatou huru aau i mua i teie mau orama o te faanahonahoraa a Iehova? Mai ia Ezekiela, e faahiahia mau tatou i mua i ta Iehova e rave nei. Auê tatou i te haihai e! (Ezk. 1:28) E turai mai te feruri-maite-raa i ta Iehova faanahonahoraa ia ohipa, mai ia Isaia. A tia ˈi ia ˈna ia faaite haere i ta Iehova e rave nei, ua na reira oia ma te ore e haamarirau. (A taio i te Isaia 6:5, 8, 9.) Ua papu ia Isaia e maoti te turu a Iehova, aita roa e fifi e tapea ia ˈna. Oia atoa, e hinaaro tatou e turu i ta Iehova faanahonahoraa ma te tavini atu â i te Atua. Mea faaitoito mau ia ite e e tuhaa tatou o te hoê faanahonahoraa o te rave noa ra i to Iehova hinaaro!

9, 10. No te aha mea faufaa ˈi te hoê tuhaa ite-mata-hia o ta Iehova faanahonahoraa?

⁹ Na roto i ta ˈna Tamaiti, ua haamau Iehova i nia i te fenua i te hoê tuhaa ite-mata-hia o ta ˈna faanahonahoraa o te ohipa amui e te tuhaa i nia i te raˈi. No te aha mea faufaa ˈi te reira no te faatupu i te ohipa faataahia e te Mataio 24:14? Teie e toru tumu.

¹⁰ A tahi, ua parau Iesu e e poro ta ˈna mau pǐpǐ “e tae noa ˈtu i te hopea o te fenua.” (Ohi. 1:8) Te piti, e hinaaro te feia poro i te maa pae varua e i te faaitoitoraa. (Ioa. 21:15-17) Te toru, e hinaaro ratou i te mau putuputuraa no te haamori ia Iehova e no te haapii e nafea ia poro. (Heb. 10:24, 25) Eita tera mau fa e naea mai tera noa. E mea tia ia faanaho maitai te mau pǐpǐ a te Mesia i te reira.

11. E nafea ia faaite e te turu nei tatou i te faanahonahoraa a Iehova?

¹¹ E nafea ia faaite e te turu nei tatou i te faanahonahoraa a Iehova? Te tahi ravea, o te tiaturiraa ïa i te mau taeae ta Iehova e Iesu e tiaturi ra no te aratai ia tatou i roto i te pororaa. Mea rahi te ohipa e te tupuraa i roto i teie nei ao te nehenehe e haafariu ê ia ratou i ta ratou hopoia. Ua tiatonu noa râ te tuhaa ite-mata-hia o te faanahonahoraa a Iehova i te aha?

12, 13. E nafea te mau matahiapo e amo ai i ta ratou hopoia? No te aha mea faaitoito ai te reira?

¹² Ua faatoroahia te mau matahiapo aravihi na te ao no te tiaau e no te turu i te ohipa pororaa i te vahi i reira ratou e tavini ai. A rave ai i te mau faaotiraa, e imi teie mau taeae i te aratairaa o te Bibilia ma te faariro i te reira ei ‘lamepa i to ratou avae e ei tiarama no to ratou eˈa.’ E pure atoa ratou no te ani i te aratairaa a Iehova.—Sal. 119:105; Mat. 7:7, 8.

¹³ Mai te mau matahiapo i te senekele matamua, te tuu nei te mau matahiapo i ‘te haapiiraa i te parau’ na mua roa. (Ohi. 6:4) Te oaoa mau nei ratou i te ite i te haereraa i mua o te pororaa i ǒ ratou e na te ao. (Ohi. 21:19, 20) Aita ratou e haamau noa ra i te mau faatureraa. Te pee nei râ ratou i te mau Papai e te aratairaa a te varua moˈa a te Atua a rave ai i te mau faanahoraa e titauhia ia parare â te parau apî maitai. (A taio i te Ohipa 15:28.) Ma te na reira, te vaiiho nei teie mau taeae tiaturihia i te hiˈoraa maitai no te taatoaraa i roto i te amuiraa.—Eph. 4:11, 12.

14, 15. (a) Eaha tei faanahohia no te turu i te ohipa pororaa na te ao? (b) Eaha to huru aau no nia i ta oe e rave nei no te turu i te ohipa pororaa?

 ¹⁴ Mea rahi te ore e ite ra i te ohipa e ravehia ra no te faaineine i te maa pae varua no ta tatou mau papai, putuputuraa e tairururaa. E tausani rima tauturu te ohipa ra ma te tuutuu ore no te huri i tera maa pae varua na roto e 600 tiahapa reo. E nehenehe ïa te taata e rave rahi e haapii no nia i “te peu taa ê a te Atua” na roto i to ratou iho reo. (Ohi. 2:7-11) Te ohipa nei te mau taeae e tuahine apî i nia i te mau matini neneiraa e tahoêraa buka. E operehia tera mau papai i roto i te mau amuiraa i te mau vahi atea roa ˈtoa.

¹⁵ Mea rahi te faanahoraa tei ravehia ia tiatonu tatou i te pororaa i te parau apî maitai e ta tatou amuiraa. Teie te tahi noa mau hiˈoraa o te mau ohipa te ore e itehia ta e tausani Kerisetiano e apiti nei: te paturaa i te mau Piha a te Basileia e Piha tairururaa, te tautururaa i te feia tei faaruru i te ati natura aore ra i te hoê fifi ru i te pae rapaauraa, te faanahoraa i ta tatou mau tairururaa, te mau haapiiraa Kerisetiano. No te aha teie mau ohipa? No te tauturu ia tatou ia poro i te parau apî maitai e ia haere i mua i roto i te parau mau. E no te tauturu e rave rahi atu â taata ia riro ei tavini a Iehova. Ua tiatonu mau â te tuhaa ite-mata-hia o te faanahonahoraa a Iehova i te mau mea faufaa roa ˈˈe!

16. Eaha te mau maimiraa e nehenehe e rave no te haamoriraa utuafare aore ra no ta oe iho haapiiraa?

¹⁶ Te rave tamau ra anei tatou maa taime no te feruri i ta te faanahonahoraa a Iehova e rave ra? I roto i ta ratou haamoriraa utuafare aore ra i ta ratou iho haapiiraa, ua faataa vetahi maa taime no te rave i te mau maimiraa no nia i te faanahonahoraa a feruri maite atu ai. Mea anaanatae mau ia hiˈopoa i te mau orama a Isaia, Ezekiela, Daniela e Ioane. Oia atoa i te buka Les Témoins de Jéhovah: Prédicateurs du Royaume de Dieu e te tahi atu mau papai aore ra DVD na roto i te reo Farani. E haapii mai tatou i te mau mea anaanatae mau no nia i te faanahonahoraa a te Atua.

17, 18. (a) Mea nafea teie tumu parau i te tautururaa ia oe? (b) Eaha te mea tia ia uiui tatou?

¹⁷ Mea maitai no tatou ia feruriruri i ta Iehova e rave nei na roto i ta ˈna faanahonahoraa no te turu i te ohipa pororaa. Mai teie faanahonahoraa faahiahia mau, e faaoti papu anaˈe e tiatonu noa i te mau mea faufaa roa ˈˈe. Hoê â ïa faaotiraa papu ta tatou i ta Paulo tei papai: “Tei ia matou mai nei teie nei toroa, e o matou hoi i arohahia mai, aita ˈtura matou i rohirohi.” (Kor. 2, 4:1) Ua faaitoito atoa o ˈna i to ˈna mau hoa Kerisetiano: “Eiaha tatou e rohirohi i te parau maitai, ei te tau mau ra hoi tatou e ooti ai ia ore tatou ia toaruaru.”—Gal. 6:9.

¹⁸ E mea tia anei ia rave tatou aore ra to tatou utuafare i te tahi mau faatanoraa no te tuu iho â i te mau mea faufaa aˈe na mua roa? E nehenehe anei e faaohie i to tatou oraraa aore ra e faaiti mai i te mau faaanaanataeraa no te haapao maite atu â i te pororaa, te ohipa faufaa roa ˈˈe? I to muri nei tumu parau, e hiˈopoa tatou e pae tuhaa o te tauturu mai ia pee maite i te faanahonahoraa a Iehova.