UA NA ô Iesu e e ore roa te hoê ofai o te hiero o Iehova e vaiihohia i nia iho i te tahi. Ua tupu teie parau tohu a haamou ai te nuu Roma arataihia e Titus ia Ierusalema i 70 ra. (Mat. 24:2) I muri aˈe, ua faanaho te emepera Julien e patu faahou i te hiero.

O Julien te emepera etene hopea no Roma. Ua fanaˈo teie tamaiti fetii a Constantin le Grand i te haapiiraa no ǒ mai i te mau faahua Kerisetiano. A riro mai ai râ ei emepera i 361, ua patoi roa ˈtu Julien i ta ratou i haapii atu no te mau haapiiraa a te mau etene. Te pii ra te mau buka tuatapaparaa ia ˈna “te Apotata.”

Mea riri roa na Julien te Kerisetianoraa. Teie paha te tahi tumu: I te onoraa o to ˈna matahiti, ua ite o ˈna i te mau faahua Kerisetiano ia haapohe i to ˈna papa e fetii. Ia au i te feia tuatapapa o te ekalesia, ua faaitoito Julien i te mau ati Iuda ia patu faahou i te hiero no te haapapu e e peropheta haavare o Iesu. *

Aita e feaaraa e ua faanaho Julien e patu faahou i te hiero. Aita râ te feia tuatapapa i papu e ua haamata anei o ˈna i te ohipa paturaa. Mai te peu e e, aita i itehia te tumu i faaea ˈi tera ohipa. Te mea papu râ, aita i naea ia Julien e piti matahiti manaraa, ua haapohehia o ˈna e aita te hiero i patu-faahou-hia.