I 1958, ua fanau vau i ta ˈu tamaiti ia Gary. Ua taa oioi ia ˈu e te vai ra te hoê fifi. I titauhia ahuru avaˈe ia itea i te taote eaha to ˈna maˈi e e pae â matahiti ia haapapu te mau taote taa ê i Lonedona e tera iho â. E iva matahiti i muri aˈe ia Gary, ua fanau vau ia Louise. Auê au i te oto a faaite ai o ˈna i te mau tapao peapea aˈe i ta to ˈna taeae!

Ua parau mǎrû mai te mau taote e e maˈi piihia LMBB * to ta ˈu na tamarii toopiti e aita e rapaauraa. I tera tau, mea iti roa tei itehia no nia i tera maˈi varavara tutuuhia e te metua. Teie te mau tapao matauhia: te mohimohiraa te mata a matapo atu ai, te maˈi poria, te manimani rima e avae hau, te mau fifi i te pae tino e no te haapii, te mau fifi no te faatere i te mau mero, te omaha tihota, te mauiui i roto i te mau puoiraa ivi e te maˈi mape. E ere ïa i te ohipa nainai ia haapao i ta ˈu na tamarii. Ia au i te hoê maimiraa apî, te manaˈohia ra e i Beretane, 1 taata i nia 125 000 tei roohia i tera maˈi. Mea rahi atu â râ tei roohia i te hoê huru au noa o tera maˈi.

I muri iti noa ˈˈe i to ˈu faaipoiporaa, ua paraparau vau i te hoê Ite no Iehova. Ua taa oioi ia ˈu e tera te parau mau. Aita roa ˈtu râ ta ˈu tane i anaanatae. No ta ˈna ohipa, e teretere noa matou. Aita ïa ta ˈu e nehenehe e apiti i te hoê amuiraa. Ua tamau noa râ vau i te taio i te Bibilia e i te pure ia Iehova. Mea mahanahana mau ia taio e “e haapuraa hoi Iehova no te feia i hamani-ino-hia; e haapuraa i te anotau ahoaho” e e ‘ore roa o ˈna e faarue i tei imi ia ˈna’!—Sal. 9:9, 10.

I te mea e ua mohimohi to Gary mata, ua afaihia o ˈna i te hoê fare haapiiraa taa ê i te pae miti apatoa o Beretane i te onoraa o to ˈna matahiti. Ua noho o ˈna i ǒ. Ua taniuniu noa mai o ˈna ia ˈu no te faaite mai i te mau mea e haapeapea ra ia ˈna. Na roto i te niuniu, ua tia ia ˈu ia tauturu ia ˈna ia taa i te mau faaueraa tumu Bibilia. Tau matahiti i muri iho i to ˈu fanauraa ia Louise, ua roohia vau i te sclérose en plaques (maˈi o te ino roa ˈtu â a ore atu ai te tahi mau tuhaa o te tino e hauti faahou) e te fibromyalgie (maˈi e mauiui hanoa ˈi te mau uaua iˈo). Ua hoˈi mai Gary i te fare i te 16raa o to ˈna matahiti. Teie râ, ua ino roa ˈtu â to ˈna mata e ua faataahia o ˈna mai te hoê taata matapo i 1975. I 1977, ua faarue mai ta ˈu tane ia matou.

I to Gary iho â hoˈiraa mai, ua apiti matou i te hoê amuiraa î i te here e ua bapetizo vau ia ˈu i 1974. A taurearea ˈi, ua tauturu te hoê matahiapo ia Gary ia farii i te mau tauiraa i nia i to ˈna tino. Auê au i te oaoa! Ua tauturu mai te tahi atu mau Ite ia rave i te ohipa i te fare. I te pae hopea, e pae o ratou tei aufauhia e te turuutaa no te tauturu ia matou. Auê haamaitairaa e!

Ua haere noa Gary i mua i roto i te parau mau e ua bapetizo ia ˈna i 1982. Ua hinaaro mau o ˈna e rave i te taviniraa pionie tauturu. Ua faaoti ïa vau e apiti ia ˈna i roto i tera taviniraa e ua na reira noa vau e rave rahi matahiti. Tau matahiti i muri aˈe, ua oaoa mau ta ˈu tamaiti a parau ai to matou tiaau haaati ia ˈna, “Gary, no te aha eita oe e rave i te taviniraa pionie tamau?” Tera iho â te faaitoitoraa ta Gary i hinaaro. Faatoroahia ˈtura o ˈna i 1990.

 E piti taime te tauiraahia to Gary tauupu haavare, i 1999 e i 2008. Mea peapea aˈe râ te mau fifi mafatu o Louise. I te fanauraahia o ˈna, mea matapo o ˈna. E i to ˈu iteraa i te hoê manimani hau i nia i to ˈna avae, ua taa ia ˈu e hoê â maˈi to ˈna i to Gary. Ua faaite oioi te mau hiˈopoaraa e mea rahi te mero i roto ia ˈna tei ino. E pinepine o ˈna i te tâpûhia. E pae atoa tâpûraa tei ravehia i nia i to ˈna mau mape. Mai ia Gary, e omaha tihota atoa to ˈna.

Ua taa ia Louise te mau fifi e itehia mea titau-anaˈe-hia te hoê tâpûraa. E paraparau ê na ïa o ˈna i te mau taote tâpû, taote faataoto e i te pǔpǔ faatere o te fare maˈi no te faataa no te aha eita o ˈna e farii i te pâmuraa toto. Ei faahopearaa, e taairaa maitai to ˈna e te feia tei haapao maite i to ˈna mau fifi pae tino.

Mea rahi te mea ta matou e rave nei i te fare no te haamori ia Iehova. Hou te faraa mai te mau ravea apî, i rave na vau tau hora no te taio e o Gary raua Louise. I teie nei, maoti te mau CD, DVD e haruharuraa i nia i te www.pr418.com, ua tia ia matou ia haamau i te hoê porotarama haapiiraa Bibilia tahebedoma i te taime taa ê. Oia atoa ia horoa i te mau pahonoraa i te mau putuputuraa.

I te tahi taime, e tamau aau Gary i ta ˈna mau pahonoraa. E tumu parau anaˈe ta ˈna i te Haapiiraa no te taviniraa Kerisetiano, e vauvau o ˈna i te reira na roto i ta ˈna iho mau parau. Ua riro mai o ˈna ei tavini tauturu i 1995 e mea rahi ta ˈna hopoia i te Piha a te Basileia. E farii popou o ˈna i te mau melo o te amuiraa e e tauturu atoa o ˈna i te tuhaa haapurororaa.

E apiti te tahi atu mau Ite ia Gary i roto i te taviniraa. E pinepine e na ratou e turai i to ˈna parahiraa turairai ta ˈna e faaohipa no to ˈna mau mauiui i te mau puoiraa ivi. Ua tauturu te hoê Ite ia ˈna ia faatere i te haapiiraa Bibilia a te hoê taata e anaanatae ra. Ua faaitoito atoa Gary i te hoê tuahine tei ore i poro faahou e 25 matahiti. Te haere nei raua toopiti i te mau putuputuraa.

I te ivaraa o to ˈna matahiti, ua haapii Louise i te nino i te ahu e to ˈna mama ruau. E na mâua te hoê taata utuutu i haapii atu ia ˈna te au-rima-raa. I te mea e mea au roa na ˈna te niraraa, ua raraa o ˈna i te ahu taoto ua rau te û na te pepe e na te feia paari o te amuiraa. Ua hamani atoa i te mau tareta parau faatau aroha e te mau hohoˈa tapiripiri nainai. Ua poihere te feia tei fanaˈo i tera mau tareta i te reira. A taurearea ˈi, ua haapii o ˈna i te faaohipa i te hoê matini patapataraa parau. I teie nei, maoti te hoê matini roro uira taa ê e faaroohia te reo, e papai o ˈna i to ˈna mau hoa. Ua bapetizohia Louise i te 17raa o to ˈna matahiti. E opereraa taa ê anaˈe, e rave mâua i te taviniraa pionie tauturu. Mai ia Gary, e tamau aau Louise i te mau irava no te faataa i to ˈna faaroo i ta te Atua i fafau no nia i te ao i reira “e faaaraarahia ˈi te mata o te matapo” e e ore “to reira e parau e, Ua paruparu vau i te maˈi.”—Isa. 33:24; 35:5.

Auê matou i te mauruuru no te pue parau mau faufaa i roto i te Parau faaurua a Iehova! Ua î to matou aau i te mauruuru no te tauturu î i te here a te amuiraa, mea fifi roa ˈtu â hoi ahani aita ratou. E maoti iho â râ te tauturu a Iehova, mea faufaa mau to matou oraraa.