UA FAREREI to ˈu na metua i 1919 i te hoê tairururaa a te Feia haapii Bibilia nunaa rau i Cedar Point, i Marite. Ua faaipoipo raua i tera iho â matahiti. I fanauhia vau i 1922, e to ˈu teina o Paul e piti matahiti i muri iho. Ua fanauhia ta ˈu vahine, Grace, i 1930. Ua paari to ˈna na metua, o Roy e Ruth Howell, i roto i te parau mau. E Feia haapii Bibilia atoa to ˈna mau metua tupuna e e hoa ratou no te taeae Charles Taze Russell.

Ua farerei au ia Grace i 1947 e ua faaipoipo mâua i te 16 no Tiurai 1949. Na mua ˈˈe râ, ua tauaparau mâua ma te huna ore no nia i to mâua oraraa ei hoa faaipoipo. Ua faaoti mâua e rave i te taviniraa taime taatoa e eiaha e fanau i te tamarii. I te 1 no Atopa 1950, ua haamata amui mâua i te taviniraa pionie. E i 1952, ua anihia mai ia riro ei tiaau haaati.

Ua hinaaro mâua i te tauturu no te rave maite i tera taviniraa apî. Ua haapii mai au i te hiˈoraa o te mau taeae aravihi e ua imi atoa vau i te tauturu no Grace. Ua haere ïa vau ia Marvin Holien, e hoa rahi mea maoro o ˈna i roto i tera taviniraa, a ani atu ai ia ˈna: “Mea apî Grace e e ere o ˈna i te mea aravihi roa. Te manaˈo ra anei oe i te hoê tuahine o te nehenehe e tauturu ia ˈna?” Ua pahono mai oia: “E. E pionie aravihi o Edna Winkle o te nehenehe e tauturu mau ia ˈna.” I muri aˈe, ua parau Grace no nia ia Edna: “Ua tauturu mai o ˈna ia ˈu ia ore e mǎtaˈu i mua i te uputa e ia pahono maitai i te mau patoiraa. Ua haapii mai o ˈna ia faaroo i te taata no te ite eaha te parau atu. Tera iho â ta ˈu i hinaaro!”

Ua tavini mâua Grace i roto e piti tuhaa haaati i Iowa e i te tahi mau tuhaa o Minnesota e Dakota Apatoa. E ua tonohia mâua i te tuhaa haaati 1 o New York, tei roto atoa ïa Brooklyn e te Queens. No mâua, e ere roa ˈtu mâua i te mea  aravihi no tera hopoia. I taio-atoa-hia na i roto i tera tuhaa te amuiraa no Brooklyn Heights o tei putuputu na i te Piha a te Basileia i te Betela. Mea rahi te melo o te Betela aravihi i roto. I muri iho i ta ˈu oreroraa parau taviniraa matamua i roto i tera amuiraa, ua parau mai te taeae Nathan Knorr: “Malcolm, ua horoa mai oe i te aˈoraa te titauhia ia faaohipa matou, mea tano iho â. Eiaha e haamoe, ia ore oe e tauturu ia matou maoti te mau aˈoraa î i te here, mea faufaa ore oe no te faanahonahoraa. Mea maitai ta oe e rave ra, a tamau â.” Ua faatia vau ia Grace i teie mau parau a faaoti ai te putuputuraa. A hoˈi ai i roto i to mâua piha i te Betela, ua taˈi ihora mâua. Ua topa hoi te hau i tera taime.

Tau avaˈe i muri aˈe, ua tae mai te hoê rata o tei titau manihini ia mâua ia apiti i te 24raa o te piha no te Haapiiraa no Gileada o te oti i Fepuare 1955. Hou a haere ai i ǒ, ua faaitehia mai e eita te reira e faaineine ia mâua ia riro ei mitionare. E tauturu mai râ ia aravihi atu â i roto i te taviniraa ratere. Mea faahiahia mau tera haapiiraa o tei haapii atoa mai ia haehaa.

I te otiraa te haapiiraa, ua tonohia mâua i roto i te taviniraa mataeinaa i Indiana, Michigan e Ohio. I Titema 1955, ua maere roa mâua a tae mai ai te hoê rata a te taeae Knorr o tei na ô: “A faaite mai na i to oe manaˈo, eiaha e huna. Mai te peu e ua ineine orua i te haere mai e i te faaea i te Betela . . . aore ra i te haere i te fenua ê i muri aˈe i te faaearaa maa taime i te Betela, a parau mai. Mai te peu e mea au aˈe na orua te taviniraa mataeinaa e haaati, a parau mai.” Ua pahono atu mâua e e oaoa mâua i te amo i te mau hopoia atoa e horoahia mai. Aita i maoro, ua anihia mai ia haere i te Betela!

I te mau matahiti oaoa a tavini ai au i te Betela, ua horoa vau i te mau oreroraa parau i roto i te mau amuiraa e i te mau tairururaa na Marite atoa. Ua haapii e ua tauturu vau e rave rahi taeae apî o tei amo i muri aˈe i te mau hopoia rahi aˈe i roto i te faanahonahoraa a Iehova. I te pae hopea, ua ohipa vau ei papai parau no te taeae Knorr i roto i te tuhaa e faanaho ra i te ohipa pororaa na te ao nei.

Mea oaoa mau tera mau matahiti i roto i te Tuhaa taviniraa. Ua tia ia ˈu ia ohipa e te taeae Thomas (Bud) Sullivan o tei tiaau na i tera tuhaa e rave rahi matahiti. Ua haapii atoa mai au i te hiˈoraa o te tahi atu mau taeae. O Fred Rusk  te tahi, o tei anihia ia haapii ia ˈu. Te haamanaˈo nei au ma te putapû i te taime i ui ai au ia ˈna, “Fred, no te aha oe i tuu ai e rave rahi faatanoraa i nia i te tahi o ta ˈu mau rata?” Ua ata o ˈna e ua haaferuri mai ia ˈu ma te parau, “Malcolm, a paraparau ai, e nehenehe oe e faataa i ta oe i parau. Ia papai râ oe i te tahi rata, na te Betela anaˈe iho â râ te reira, ia papu e ia tano ta oe mau parau e tia ˈi.” Parau mai nei o ˈna, “A faaitoito! Mea maitai ta oe e rave ra e e maitai roa ˈtu â te reira.”

I tera mau matahiti i te Betela, ua rau te ohipa a Grace. Ua tamâ e ua atuatu atoa o ˈna i te mau piha nohoraa. Ua oaoa o ˈna i ta ˈna ohipa. E tae roa mai i teie mahana, ia farerei mâua i te tahi mau taeae mea apî hoi ratou i tera tau ra i te Betela, e parau ratou ia Grace ma te mata ataata, “Ua haapii mai oe ia ˈu ia faanaho i to ˈu roˈi, e ua au roa to ˈu mama i ta oe i rave.” Ua oaoa atoa Grace i te ohipa i roto i te Tuhaa e haapao ra i te mau tamatahitiraa i ta tatou mau vea, te Tuhaa e pahono ra i te feia taio e te Tuhaa e haapao ra i te mau haruharuraa. Maoti taua mau ohipa rau ra, ua haapii o ˈna e noa ˈtu eaha ta tatou e rave e teihea roa tatou, e fanaˈoraa taa ê e e haamaitairaa ia tavini i roto i ta Iehova faanahonahoraa. Tera noâ to ˈna manaˈo.

I te mau matahiti 1970, ua ite mâua e mea tia ia haapao atu â i to mâua mau metua ruhiruhia. E mea tia ïa ia rave i te hoê faaotiraa paari mau. Aita mâua i hinaaro e faarue i te Betela e i to mâua mau hoa Kerisetiano herehia. I to ˈu râ manaˈo, na ˈu te hopoia e haapao i to mâua mau metua. Ua faarue ïa mâua i te Betela ma te tiaturi e hoˈi i ǒ ia taui ta mâua tupuraa.

No te amo i ta mâua mau haamâuˈaraa, ua ohipa vau no te hoê taiete parururaa. Eita e moe ia ˈu i ta te hoê tia faatere i parau mai: “Ua manuïa teie ohipa no te mea e pûpûhia te mau parau parururaa i te taata i te ahiahi. I reira oe e ite ai ia ratou. Aita ˈtu mea faufaa aˈe i te haereraa mai i ǒ nei i te mau ahiahi atoa no te haere e farerei i te taata.” Ua pahono atu vau, “Mea papu e ua ite oe i ta oe e parau ra e te faatura nei au i te reira. E hopoia atoa râ ta ˈu i te pae varua. Ua haapao maite noa vau i te reira e aita vau e hinaaro ra e taui. E haere au e farerei i te taata i te ahiahi, eiaha râ i te Mahana piti e te Mahana maha, e putuputuraa faufaa roa ta ˈu.” Aita vau i mairi i te mau putuputuraa no te rave i te ohipa e ua haamaitai mau Iehova ia ˈu.

Tei te hoê fare ruau to ˈu mama a pohe ai o ˈna i Tiurai 1987. Tei pihaiiho mâua ia ˈna. Ua parau te tuati maˈi rahi ia Grace: “A hoˈi i te fare  e tamǎrû rii ia oe. Ua ite te taata atoa e ua faaea noa oe i pihaiiho i to metua vahine hoovai. Eiaha e haapeapea, ua rave oe i tei maraa ia oe.”

I Titema 1987, ua faaî mâua i te api parau no te tavini â i te Betela, te vahi ta mâua i hinaaro. Tau mahana râ i muri iho, ua itehia mai e e mariri ai taata to Grace i te aau rahi. Ua tâpûhia o ˈna e ua ora mai o ˈna i te mariri ai taata. Ua tae mai râ te hoê rata no te Betela mai o tei faaitoito ia mâua ia tamau â i ta mâua taviniraa i roto i te amuiraa. Ua faaoti papu mâua e poro atu â.

Ua noaa ia ˈu te tahi ohipa i Texas. Mea tano tera vahi no mâua, mea mahanahana aˈe hoi. I na 25 matahiti i ǒ nei i Texas, ua piri roa to mâua taairaa e te mau taeae e tuahine î i te here.

Ua roohia Grace i te mariri ai taata i te aau rahi, te thyroïde e te titi. Aita roa ˈtu râ o ˈna i amuamu no nia i to ˈna mau fifi. Ua turu noa mai o ˈna ia ˈu e ua faatura noa mai ei upoo utuafare. I ui-pinepine-hia na oia, “Eaha te tumu i manuïa ˈi to orua faaipoiporaa e e oaoa ˈi orua?” E horoa o ˈna e maha tumu: “E hoa rahi mâua. E tauaparau mâua i te mau mahana atoa. Mea au roa na mâua e faataa i te taime no mâua. E eita roa ˈtu mâua e haere e taoto ua riri anaˈe.” I te tahi taime, e riri hoê no te mea ua hape te tahi. E faaore e e haamoe râ mâua i tera hape. Ua tauturu rahi mai te reira.

Mea rahi ta mâua i haapii mai i te mau fifi ta mâua i faaruru:

1.  A tiaturi noa ia Iehova e a farii i ta ˈna e faatia ra. Eiaha roa ˈtu e tiaturi i to oe iho ite.—Mas. 3:5, 6; Ier. 17:7.

2.  A pee i te aratairaa a te Bibilia noa ˈtu eaha te fifi. Mea faufaa roa ia faaroo ia Iehova e i ta ˈna mau ture. Na oe e maiti, e faaroo aore ra eita.—Roma 6:16; Heb. 4:12.

3.  Te farii maitai a Iehova, tera te mea faufaa aˈe i roto i te oraraa. A haapao na mua i to ˈna hinaaro, eiaha râ i te moni.—Mas. 28:20; Koh. 7:1; Mat. 6:33, 34.

4.  A pure no te aravihi e te itoito atu â i roto i ta Iehova taviniraa. A feruri i nia i ta oe e nehenehe e rave, eiaha i nia i tei ore e maraa ia oe.—Mat. 22:37; Tim. 2, 4:2.

5.  A haamanaˈo e aita ˈtu faanahonahoraa te fanaˈo ra i te haamaitairaa e te farii maitai a Iehova.—Ioa. 6:68.

Ua tavini mâua Grace ia Iehova hau atu i te 75 matahiti e ei hoa faaipoipo fatata e 65 matahiti. E taime faahiahia mau ta mâua i fanaˈo a tavini amui ai ia Iehova i teie mau matahiti. Te tiaturi e te pure nei mâua ia ite to mâua mau taeae e tuahine e e oraraa oaoa mau ta ratou e fanaˈo a tiaturi ai ia Iehova.