I Kenya, ua titau-manihini-hia e piti pionie ia tomo i roto i te hoê fare. Ua maere roa raua i te iteraa i te hoê taata nainai e tarava ra i nia i te roˈi. Mea nainai roa to ˈna ouma e mea poto to ˈna mau rima. Ua ataata o ˈna a faaite ai raua i te parau fafau a te Atua e e ‘ouˈauˈa noa te pirioi mai te aili.’—Isa. 35:6.

Ua itea i na pionie e ua fanauhia Onesmus e te hoê maˈi e fatifati hanoa te ivi a tano ai. I te mea e aita e rapaauraa e ora ˈi i tera maˈi, ua manaˈo Onesmus e e mauiui noa o ˈna e e faaea noa o ˈna i roto i te hoê parahiraa turairai.

Ua farii Onesmus i te hoê haapiiraa Bibilia. Aita râ to ˈna mama i faatia ia ˈna ia haere i te mau putuputuraa ma te haaferuri ia ˈna e e nehenehe o ˈna e pepe e e mauiui atu â. Ua haruharu ïa te mau taeae i te mau oreroraa parau i te mau putuputuraa e ua faaroo Onesmus i te reira i te fare. I muri aˈe e pae avaˈe haapiiraa, ua faaoti Onesmus e haere i te mau putuputuraa noa ˈtu e mea atâta no ˈna.

Ua mauiui atu â anei Onesmus a haere ai i te mau putuputuraa? Aita roa ˈtu. Te haamanaˈo ra o ˈna: “E au ra e ua iti mai to ˈu mauiui i te mau putuputuraa.” No ˈna, ua maitai mai o ˈna no to ˈna tiaturiraa apî. Ua oaoa roa te mama o Onesmus a ite ai e ua maitai mai o ˈna e ua farii atoa i te hoê haapiiraa Bibilia. Ua parau o ˈna, “Te raau a ta ˈu tamaiti, o te taviniraa ïa i te Atua.”

Aita i maoro, ua riro mai Onesmus ei taata poro bapetizo-ore-hia. I muri aˈe, ua bapetizohia ˈtura o ˈna e e tavini tauturu o ˈna i teie nei. Noa ˈtu e eita ta ˈna e nehenehe e faaohipa i to ˈna na avae e hoê o to ˈna na rima, ua hinaaro Onesmus e rave i tei tia ia ˈna i roto i te taviniraa a Iehova. Ua hinaaro o ˈna e riro ei pionie tauturu, ua feaa râ. Ua ite hoi o ˈna e e titauhia te taata no te turai i to ˈna parahiraa. A faaite ai o ˈna i to ˈna mau hoa Kerisetiano i ta ˈna tapitapiraa, ua parau ratou e e tauturu ratou ia ˈna. Ta ratou iho â i rave e ua riro mai Onesmus ei pionie tauturu.

Ua hinaaro Onesmus e riro ei pionie tamau, ua feaa atoa râ. Ua faaitoito râ te hoê irava mahana ia ˈna. O te Salamo 34:8 ïa: “A tamata na ia ite i te maitai o Iehova!” Ua feruri maite Onesmus i tera irava e ua faaoti e riro ei pionie tamau. I teie nei, te poro nei oia e maha mahana i te hebedoma e mea rahi ta ˈna piahi Bibilia e haere maitai ra i mua i te pae varua. I 2010, ua apiti o ˈna i te Haapiiraa no te mau pionie. Te taeae i haapii ia ˈna i ǒ, o te hoê ïa o na pionie e piti tei poro ia ˈna. Auê o ˈna i te oaoa e!

Fatata e 40 matahiti to Onesmus i teie nei e ua pohe to ˈna na metua. Te haapao nei râ te mau taeae e tuahine o ta ˈna amuiraa i to ˈna mau hinaaro i te mau mahana atoa. Te oaoa mau nei o ˈna i te mau haamaitairaa atoa ta ˈna e fanaˈo nei e te tiai ru nei oia i te mahana ‘e ore te taata e parau e, Ua paruparu vau i te maˈi.’—Isa. 33:24.