‘E na reira ei manaˈoraa ia ˈu’
“E oti aˈera ia ˈna te haamaitai i te Atua, vavahi ihora [i te pane], na ô atura, A rave mai, a amu; e taipe teie o to ˈu tino e ofatihia no outou nei; e na reira outou ei manaˈoraa ia ˈu.”—KOR. 1, 11:24, Traduction du monde nouveau.
1, 2. Eaha paha ta te mau aposetolo i manaˈo hou te tere hopea o Iesu i Ierusalema?
UA ITE te feia tiai no Ierusalema i te tuhaa matamua o te avaˈe. I to te Sunederi faarooraa i te reira, faaite aˈera ratou e ua haamata te hoê avaˈe apî, Nisana. Parare aˈera tera parau apî maoti te auahi e te vea. Ua ite te mau aposetolo e fatata roa te Pasa. Ua taa iho â ia ratou e e hinaaro Iesu e tapae i Ierusalema hou tera oroa.
2 I tera taime, tei Pérée Iesu e ta ˈna mau aposetolo, i te tahi atu pae o Ioridana. Te haere nei o ˈna i Ierusalema no te taime hopea. (Mat. 19:1; 20:17, 29; Mar. 10:1, 32, 46) Ua ite anaˈe te mau ati Iuda afea te mahana matamua no Nisana, e taio ratou 13 atu â mahana no te faatupu i te Pasa i muri aˈe i te toparaa mahana o te 14 no Nisana.
3. No te aha mea faufaa ˈi no te mau Kerisetiano te taio mahana o te Pasa?
3 Teie te taio mahana o te Amuraa maa a te Fatu, o te tuati atoa ra i te Pasa: te 14 no Eperera 2014. E mahana taa ê teie no te mau Kerisetiano mau e te feia e anaanatae ra i te parau mau. No te aha? No te mau parau i roto i te Korinetia 1, 11:23-25 (MN): “Ua rave te Fatu ra o Iesu i te pane i te rui i haavarehia mai ai oia ra: e oti aˈera ia ˈna te haamaitai i te Atua, vavahi ihora, na ô atura, A rave mai, a amu; e taipe teie o to ˈu tino e ofatihia no outou nei; e na reira outou ei manaˈoraa ia ˈu. E ua na reira atoa hoi i te auˈa.”
4. (a) Eaha te uiui no nia i te Oroa haamanaˈoraa? (b) E nafea e itehia ˈi i te taio mahana o te Oroa haamanaˈoraa i te matahiti taitahi? (A hiˈo i te tumu parau tarenihia “Oroa haamanaˈoraa 2014.”)
4 Papu maitai e e tae mai oe i te oroa ta Iesu i parau i ta ˈna mau pǐpǐ ia faatupu i te mau matahiti atoa. Hou roa râ, a uiui: ‘E nafea ia faaineine ia ˈu no tera oroa? Eaha te faaohipahia? Eaha te tereraa o tera tupuraa? E no te aha mea faufaa ˈi no ˈu tera oroa e na taoˈa taipe e faaohipahia?’
NA TAOˈA TAIPE
5. Eaha ta Iesu i parau i ta ˈna mau aposetolo ia faaineine no te Pasa?
5 A parau ai Iesu i ta ˈna mau aposetolo ia faanaho i te hoê piha no te oroa Pasa, aita o ˈna i faahiti i te mau faaneheneheraa e tuu i roto. Peneiaˈe ua hinaaro noa Iesu i te hoê piha mâ e te au maitai e ô ai ratou paatoa. (A taio i te Mareko 14:12-16.) Ua faaineine atoa na aposetolo i tei titauhia no te amuraa maa, mai te pane hopue ore e te uaina uteute. I te otiraa te oroa Pasa, ua faaohipa Iesu i teie na taoˈa taipe.
6. (a) I muri iho i te oroa Pasa, eaha ta Iesu i parau no nia i te pane? (b) O teihea huru pane te faaohipahia i te Oroa haamanaˈoraa?
6 Tei reira te aposetolo Mataio o tei papai i muri aˈe: “Ua rave ihora Iesu i te pane, e oti aˈera i te haamaitai i te Atua, vavahi ihora, tuu atura i te mau pǐpǐ ra, na ô atura, A rave, a amu.” (Mat. 26:26) E “pane” hopue ore te reira o tei faaohipahia no te Pasa. (Exo. 12:8; Deut. 16:3) Ua faaineinehia tera pane maoti noa te faraoa ota sitona e te pape. Aita i tuuhia te hopue aore ra te tahi atu mea mai te miti papaa. Mea rairai ïa te pane e mea ohie ia ofatifati. I teie mahana, hou te Oroa haamanaˈoraa, e ani te mau matahiapo i te hoê taata ia faaineine i tera pane maoti te faraoa ota sitona e te pape a farai pani atu ai e maa hinu. (Aita anaˈe e faraoa ota sitona, e nehenehe e faaohipa i te faraoa ota o te tahi atu huero mai te raiti, te kerite aore ra te to popaa.) E nehenehe atoa e rave i te pane hopue ore ati Iuda aita e kerite, e huero moa aore ra e oniani i roto.
7. Eaha te huru uaina ta Iesu i faaohipa, e eaha ta tatou e faaohipa i te Oroa haamanaˈoraa?
7 Te na ô faahou ra Mataio: “Ua rave ihora [Iesu] i te auˈa, haamaitai atura i te Atua, tuu atura ia ratou ra, na ô atura, A inu outou atoa.” (Mat. 26:27, 28) E auˈa uaina uteute ta Iesu i rave. (E ere i te pape vine, ua oti ê na hoi te auhune vine.) Noa ˈtu e aita e uaina i te Pasa matamua i Aiphiti, aita Iesu i patoi ia inuhia te reira i te Pasa. Ua faaohipa atoa o ˈna maa uaina i te Amuraa maa a te Fatu. E faaohipa atoa ïa te mau Kerisetiano i te uaina i te Oroa haamanaˈoraa. I te mea e aita e faufaa ia haamaitai atu â i to Iesu toto, e ravehia te hoê uaina aita i anoihia te ava aore ra te tahi atu raau faanoˈanoˈa. E faaohipahia te hoê uaina uteute hamanihia i te fare aore ra tei hoohia mai i te fare toa mai te Beaujolais, Burgundy aore ra Chianti.
TE AURAA O NA TAOˈA TAIPE
8. No te aha te mau Kerisetiano e anaanatae ai i te auraa o te pane e te uaina?
8 Ua faaite te aposetolo Paulo e e mea tia ia faatupu te tahi atu mau Kerisetiano, eiaha noa te mau aposetolo, i te Amuraa maa a te Fatu. Ua papai o ˈna i to ˈna mau taeae i Korinetia: “I noaa hoi ia ˈu i te Fatu ra ta ˈu i tuu atoa ˈtu ia outou na, e ua rave te Fatu ra o Iesu i te pane . . . e oti aˈera ia ˈna te haamaitai i te Atua, vavahi ihora, na ô atura, A rave mai, a amu; e taipe teie o to ˈu tino e ofatihia no outou nei; e na reira outou ei manaˈoraa ia ˈu.” (Kor. 1, 11:23, 24, MN) E anaanatae te mau Kerisetiano i teie mahana i te auraa o te pane e te uaina no te mea e titauhia ia faatupu ratou i teie oroa taa ê i te mau matahiti atoa.
9. Eaha to vetahi manaˈo hape no nia i te pane ta Iesu i faaohipa?
9 No te mau huriraa Bibilia o te faaohipa-rahi-hia ra, te faaite ra te tahi mau taata faaroo e ua parau Iesu: ‘O to ˈu tino teie.’ No ratou, ua riro semeio mai te pane ei tino o Iesu. E ere râ i tei tupu. * Te ite noa ra ta Iesu mau aposetolo i to ˈna tino a amu ai ratou i te pane hopue ore. Ua faaohipa ïa o ˈna i te parau taipe mai ta ˈna i rave i te taime e rave rahi.—Ioa. 2:19-21; 4:13, 14; 10:7; 15:1.
10. I te Amuraa maa a te Fatu, te faahohoˈa ra te pane i te aha?
10 Ua faataipe te pane ta te mau aposetolo i ite e i fatata i te amu i te tino o Iesu. Teihea tino? I te tahi taime, ua manaˈo te mau tavini a te Atua e e taipe te pane o “te tino o te Mesia,” oia hoi te amuiraa a tei faatavaihia. No te aha? No te mea ua ofati Iesu i te pane, aita râ hoê aˈe o ta ˈna mau ivi i ofatihia. (Eph. 4:12; Roma 12:4, 5; Kor. 1, 10:16, 17; 12:27) Ma te feruri râ i nia i te mau Papai, ua taahia e te faahohoˈa ra te pane i to Iesu tino taata, tei faaauhia no ˈna. Ua mauiui Iesu e ua rî-atoa-hia o ˈna. No reira, i te Amuraa maa a te Fatu, te faahohoˈa ra te pane i te tino taata o Iesu ta ˈna i horoa no ta tatou mau hara.—Pet. 1, 2:21-24; 4:1; Ioa. 19:33-36; Heb. 10:5-7.
11, 12. (a) Eaha ta Iesu i parau no nia i te uaina? (b) I te Amuraa maa a te Fatu, te faahohoˈa ra te uaina i te aha?
11 Te tauturu maira te reira ia taa eaha ta Iesu i parau no nia i te uaina. Te taio nei tatou: “Ua na reira atoa hoi i te auˈa, ia oti aˈe tana amuraa, na ô atura, Teie nei auˈa, e taipe ïa o te faufaa apî i to ˈu nei toto.” (Kor. 1, 11:25, MN) O te auˈa anei ta Iesu i tapea te faufaa apî? E ere. Te manaˈo ra Iesu i te uaina i roto i tera auˈa. Ia au i ta Iesu i parau, te faataipe ra aore ra te faahohoˈa ra te uaina i te aha? I to ˈna toto o te haamaniihia.
12 I roto i te Evanelia a Mareko, te ite ra tatou i ta Iesu mau parau: “E taipe teie o to ˈu toto o te faufaa apî i haamaniihia no te taata e rave rahi.” (Mar. 14:24, MN) Oia mau, e “haamaniihia” te toto o Iesu “no te taata e rave rahi ia matara [aore ra ia faaorehia] te hara.” (Mat. 26:28) Te faahohoˈa maitai ra ïa te uaina uteute i te toto o Iesu. Maoti to ˈna toto e fanaˈo ai tatou i te hoo ‘e faaorehia ˈi ta tatou mau hara.’—A taio i te Ephesia 1:7.
Ua inu te mau aposetolo i te uaina o tei faataipe i te toto o te faufaa o Iesu (A hiˈo i te paratarafa 11, 12)
TE HAAMANAˈORAA I TE POHERAA O TE MESIA
13. A faataa e nafea te Oroa haamanaˈoraa i te poheraa o te Mesia e faatupuhia ˈi.
13 Mai te peu e a tahi ra oe e haere ai i te Oroa haamanaˈoraa e te mau Ite no Iehova, eaha ta oe e ite? E tupu te reira i te hoê vahi mâ e te au maite i reira te taatoaraa e oaoa ˈi i te putuputuraa. Peneiaˈe e ite oe i te tahi maa tiare, tanotano noa râ, ia ore ia manaˈohia e e vahi arearearaa teie. E faataa mai te hoê matahiapo aravihi ma te taa maitai e te tura i ta te Bibilia e parau ra no nia i tera tupuraa. E tauturu o ˈna i te taatoaraa ia mauruuru no ta te Mesia i rave no tatou. Oia hoi, ua pohe o ˈna ei hoo ia ora tatou. (A taio i te Roma 5:8-10.) E faataa te taeae orero e piti tiaturiraa faahitihia e te Bibilia no te mau Kerisetiano.
14. Eaha na tiaturiraa e hiˈopoahia i roto i te oreroraa parau o te Oroa haamanaˈoraa?
14 Te tahi tiaturiraa, o te faatereraa ïa e te Mesia i nia i te raˈi. Te tiaturiraa ïa o te hoê pǔpǔ iti Kerisetiano. Tei roto atoa te mau aposetolo taiva ore. (Luka 12:32; 22:19, 20; Apo. 14:1) Area te rahiraa o te mau Kerisetiano taiva ore i teie mahana, te tiaturi nei ïa ratou e ora e a muri noa ˈtu i nia i te fenua o te riro ei paradaiso. I reira te hinaaro o te Atua e ravehia ˈi i nia i te fenua mai i te raˈi atoa. O ta te mau Kerisetiano ïa e pure noa ra. (Mat. 6:10) Te faataa ra te mau Papai i te mau mea faahiahia ta ratou e ite e a muri noa ˈtu.—Isa. 11:6-9; 35:5, 6; 65:21-23.
15, 16. Eaha te ravehia e te pane i te Oroa haamanaˈoraa?
15 A fatata ˈi te hopea o ta ˈna oreroraa parau, e faaite te taeae orero e ua tae i te taime no te pee i ta Iesu i parau i ta ˈna mau pǐpǐ ia rave. Mai tei faahitihia na, e faaohipahia e piti taoˈa taipe: te pane hopue ore e te uaina uteute. E vaiihohia te reira i nia i te hoê airaa maa i pihaiiho i te taeae orero. E taio o ˈna i te hoê faatiaraa Bibilia o te faataa ra i ta Iesu i parau e i rave a haamau ai i tera oroa. Ei hiˈoraa, te taio nei tatou i roto i te Mataio: “Ua rave ihora Iesu i te pane, e oti aˈera i te haamaitai i te Atua, vavahi ihora, tuu atura i te mau pǐpǐ ra, na ô atura, A rave, a amu; e taipe teie o to ˈu tino.” (Mat. 26:26, MN) Ua ofatifati Iesu i te pane hopue ore no te horoa i te mau aposetolo i to ˈna pae aui e i to ˈna pae atau. E ite oe i te putuputuraa i te 14 no Eperera maa pane i roto i te mau mereti.
16 Ehia mereti te faaohipahia? E faaohipahia te mereti e titauhia no te faahaere oioi i te pane i rotopu i te feia atoa e putuputu mai. Eita e ravehia te tahi faanahoraa taa ê. I muri aˈe i te hoê pure poto, e faahaerehia te mau mereti ma te naho maitai ia au i tei nehenehe. Tau taata te amu i te pane aore ra aita roa ˈtu, mai tei itehia i roto i te rahiraa o te amuiraa i te Oroa haamanaˈoraa i 2013.
17. I te Oroa haamanaˈoraa, e nafea te aratairaa a Iesu no nia i te uaina e peehia ˈi?
17 Ia oti, e hutihia te ara-maite-raa i nia i ta Mataio i faataa â: “Ua rave ihora [Iesu] i te auˈa, haamaitai atura i te Atua, tuu atura ia ratou ra, na ô atura, A inu outou atoa; e taipe teie o to ˈu toto, e toto no te faufaa apî, i haamaniihia no te taata e rave rahi ia matara te hara.” (Mat. 26:27, 28, MN) Ma te pee i te reira, e faaotihia te tahi atu pure a faahaere atu ai i te mau “auˈa” uaina uteute i rotopu i te feia atoa e tae mai.
18. No te aha mea faufaa ˈi ia tae i te Oroa haamanaˈoraa noa ˈtu e mea iti te rave i na taoˈa taipe aore ra aita roa ˈtu?
18 I te Oroa haamanaˈoraa, o te mau Kerisetiano anaˈe o te faatere e o Iesu i roto i to ˈna Basileia i te raˈi te amu i te pane e te inu i te uaina. (A taio i te Luka 22:28-30; Tim. 2, 4:18) Area te rahiraa, e feia mataitai faatura noa ïa o te ore e amu i te pane e e inu i te uaina. Mea faufaa ia tae i te Amuraa maa a te Fatu, e faaite hoi te reira e mea faufaa mau no ratou te tusia o Iesu. I te Oroa haamanaˈoraa, e nehenehe ratou e feruri i nia i te mau haamaitairaa ta ratou e fanaˈo maoti te tusia taraehara o Iesu. Te tiaturi nei ratou e riro ei melo o te “feia rahi roa” o te ora mai i te “ati rahi” e fatata maira. E tavini teie a te Atua o te “horoi i to ratou ahu, e ua teatea, i te toto o te Arenio.”—Apo. 7:9, 14-17.
19. Eaha te rave no te faaineine ia oe e no te faufaahia i te Amuraa maa a te Fatu?
19 E faaineine te mau Ite no Iehova na te ao ia ratou no teie putuputuraa taa ê. Tau hebedoma na mua ˈtu, e titau manihini tatou i te taata e rave rahi roa ia tae mai i tera oroa. I te mau mahana hou te Oroa haamanaˈoraa, e taio te rahiraa o tatou i te mau faatiaraa Bibilia no nia i ta Iesu i rave e no nia i tei tupu i te hoê â mahana i te matahiti 33. E faaineine ê na tatou ia tatou ia tae iho â i te Oroa haamanaˈoraa. Mea maitai ia tae oioi atu no te farii i te mau manihini e no te faaroo i te porotarama taatoa. E faufaa-mau-hia tatou paatoa, te mau melo o te amuiraa e te mau manihini, i te peeraa i te taioraa e te faataaraa o te mau irava i roto i ta tatou iho Bibilia. Te mea faufaa roa ˈˈe, e faaite atu tatou i to tatou mauruuru haavare ore no to Iesu tusia e te pee ra tatou i ta ˈna faaueraa: “E na reira outou ei manaˈoraa ia ˈu.”—Kor. 1, 11:24.
^ Ia au i te aivanaa Heremani ra o Heinrich Meyer, aita te mau aposetolo i manaˈo e te amu ra ratou i te tino o Iesu e te inu ra i to ˈna toto. No te mea “aita te tino o Iesu i ofatihia ˈtura (te ora noa ra o ˈna).” Ua parau atoa o ˈna e ua faaohipa Iesu i te mau parau ohie ia taa no te faataa eaha te auraa o te pane e te uaina e ua hinaaro Iesu ia maramarama maitai ta ˈna mau pǐpǐ i ta ˈna mau parau.
