TE PARAU maitai ra te Bibilia: “E aroha” te tane faaipoipo i ta ˈna vahine mai ia ˈna iho. Ia “auraro” atoa te hoê vahine i ta ˈna tane e tia ˈi. Ia rave raua i ta raua tuhaa “ei hoê.” (Eph. 5:33; Gen. 2:23, 24) A mairi ai te tau, e puai roa ˈtu â te taairaa o na hoa faaipoipo oaoa e e here roa ˈtu â raua te tahi i te tahi. E nehenehe te reira e faaauhia i te mau aˈa o na tumu raau e tupu apipiti.

Eaha râ ia pohe hoê o raua? E mutu tera taairaa puai mau. E pinepine, e mauiui e e moemoe te apiti e ora noa ra. E riri atoa paha aore ra e faahapa ia ˈna iho. I na 58 matahiti faaipoiporaa, ua ite Miriama i te taata e rave rahi ia oto i to ratou hoa faaipoipo tei pohe. * A pohe ai râ ta ˈna tane, ua parau oia: “Aita roa ˈtu vau i taa i tera huru tupuraa i na mua ˈˈe. E taa noa ia oe a faaruru ai oe i te reira.”

Ia au i te tahi feia maimi, aita e hepohepo rahi aˈe i te poheraa o te hoê hoa faaipoipo here. Te manaˈo iho â o te apiti e rave rahi. I muri aˈe e 25 matahiti faaipoiporaa, ua pohe ta Mira tane. E rave rahi matahiti tei mairi, te faataa nei râ o ˈna i to ˈna huru aau ma te parau: “E au ra e ua tatarahia te tahi mero o to ˈu tino.”

A ite ai i te mau vahine ivi e oto ra i ta ratou tane tau matahiti, i manaˈo noa na Tina e ua rahi roa tera oto. Pohe atura ta ˈna tane i muri aˈe e 38 matahiti faaipoiporaa. Noa ˈtu e ua hau  atu i te 20 matahiti tei mairi, te parau nei â oia, “Te manaˈo nei au ia ˈna i te mau mahana atoa.” Pinepine Tina i te taˈi no to ˈna mihi rahi i ta ˈna tane.

Te haapapu ra te Bibilia e mea mauiui mau ia pohe te hoê hoa faaipoipo e eita te reira e ore oioi. A pohe ai Sara, ‘ua haere Aberahama i te otohaa ia Sara e oto ia ˈna.’ (Gen. 23:1, 2) Noa ˈtu to ˈna tiaturi i te tia-faahou-raa, ua mauiui mau Aberahama a pohe ai ta ˈna vahine here. (Heb. 11:17-19) Aita i moehia ia Iakoba ta ˈna vahine here ra o Rahela tei pohe. Ua faahiti oia ia ˈna ma te here i ta ˈna mau tamaiti.—Gen. 44:27; 48:7.

Eaha te haapii mai i teie na hiˈoraa Bibilia? E pinepine te mau tane e vahine ivi i te mauiui e rave rahi matahiti. E haamanaˈo anaˈe e e taˈi e e oto ratou no te hoê moeraa rahi, eiaha no te mea mea paruparu ratou. E faaite anaˈe i te aumihi e e turu noa anaˈe ia ratou.

E ere i te mea ohie ia pohe te hoê hoa faaipoipo. I muri aˈe e rave rahi matahiti faaipoiporaa, ua ite te tane e nafea ia tamahanahana i ta ˈna vahine e ia faaitoito ia ˈna a hepohepo aore ra a toaruaru ai. Aita faahou anaˈe ta ˈna tane, aita faahou atoa te here e te tamahanahanaraa ta te vahine i fanaˈo noa na. Oia atoa, a mairi ai te tau, ua ite te vahine eaha te rave ia vai hau e ia oaoa ta ˈna tane. E tapea o ˈna ia ˈna ma te mǎrû, e faahiti i te mau parau tamǎrû e e haapao i ta ˈna e anaanatae e e hinaaro mau ra. Aita e faaauraa to te reira. Ia pohe ta ˈna vahine, e moemoe roa paha te tane. No reira vetahi mau hoa faaipoipo ua pohe to ratou apiti e hiˈo ai i te ananahi ma te papu ore e te mǎtaˈu. Eaha te aratairaa Bibilia te nehenehe e tauturu ia ratou ia ite i te hau?

“Eiaha e tapitapi i to ananahi ra, na ananahi hoi e tapitapi i ta ˈna iho. O te mahana o to ˈna iho ino atire ïa.” (Mat. 6:34) Tei nia na mua ta Iesu mau parau i te mau hinaaro materia. Ua tauturu râ te reira i te taata e rave rahi ia faaruru i te pohe o te hoê taata herehia. Tau avaˈe i muri aˈe i te poheraa o ta ˈna vahine, ua papai te hoê tane ivi o Tamui te iˈoa: “Te mihi rahi noa nei â vau ia Monia. E i te tahi taime, e au ra e mea ino roa ˈtu â. Ua taa râ ia ˈu e mai tera iho â, e iti mai te mauiui a mairi ai te tau.”

Oia mau, ua faaoromai o Tamui. Mea nafea? Ua parau oia, “Maoti ta Iehova tauturu, ua faaruru vau hoê mahana i muri i te tahi.” Aita Tamui i oto rahi roa ino. Aita to ˈna mauiui i ore i te hoê noa po e aita te reira i haaparuparu ia ˈna. Ua pohe anei to oe apiti? A tutava i te faaruru i te reira hoê mahana i muri i te tahi. Aita oe i ite eaha te maitai aore ra te faaitoitoraa ta oe e fanaˈo ananahi.

A haamanaˈo e na te pohe tutuuhia e Adamu  i faataa ê ia orua. Aita Iehova i opua ia pohe te taata. E tuhaa râ te reira o “te ohipa a te diabolo.” (Ioa. 1, 3:8; Roma 6:23) Te faaohipa ra Satani i te pohe e te mǎtaˈu i te pohe no te faatîtî i te taata e ia ore ratou e fanaˈo i te tiaturiraa. (Heb. 2:14, 15) Te oaoa nei Satani aita anaˈe te taata e tiaturi faahou ra e ite i te oaoa e te mauruuru mau, i roto atoa i te ao apî a te Atua. Te mauiui rahi nei ïa oe no te hara a Adamu e no te mau ravea paari a Satani. (Roma 5:12) E faaore roa Iehova i te ino ta Satani i rave ma te faaore roa i te pohe. Ua tiamâ mai e rave rahi vahine e tane ivi i te mǎtaˈu ta Satani e faaohipa noa ra. O oe atoa paha.

Mea rahi te mea e taui i roto i te mau taairaa e te taata a faahoˈihia mai ai te feia pohe i te ora i nia i te fenua. A feruri na i te mau metua, papa e mama ruau aore ra tupuna o te faahoˈihia mai i te ora e o te naea mǎrû i te tia-roa-raa e ta ratou mau tamarii e mootua. E faaorehia te mau faahopearaa o te matahiti rahi. E mea tia anei ia taui te mau uˈi apî i to ratou manaˈo i to ratou mau tupuna? No tatou, eita anei tera mau tauiraa e haamaitai i te taairaa o te huitaata?

Mea rahi te uiraa e hiti mai no nia i te feia e faatia-faahou-hia, no nia atoa i te feia ua pohe e piti tane aore ra hau atu. Ua tuu te mau Sadukea i te hoê uiraa no nia i te hoê vahine tei faaipoipo e hitu taime no te mea ua pohe te  tane taitahi. (Luka 20:27-33) Eaha te tupu ia faahoˈihia mai ratou i te ora? Aita tatou i ite. Eiaha ïa e feruri rahi roa i nia iho e e haapeapea roa ino. Ia tiaturi tatou i te Atua e tia ˈi. Te mea papu, mea maitai te mau mea atoa ta Iehova e rave. Eiaha tatou e mǎtaˈu atu, e tiaturi anaˈe râ.

Te hoê haapiiraa maramarama roa ˈˈe o te Bibilia, o te tiaturiraa ïa o te tia-faahou-raa. Te haapapu ra te mau faatiaraa Bibilia no nia i te mau tia-faahou-raa i tahito ra e ‘e faaroo te feia atoa i roto i te apoo i to Iesu reo e e haere mai i rapae.’ (Ioa. 5:28, 29) E oaoa te taata i te ite i tei tiamâ mai i te pohe. I te tahi aˈe pae, eita e nehenehe e feruri i te oaoa o te feia e faahoˈihia mai i te ora.

Auê te huitaata i te oaoa a faahoˈihia mai ai e miria taata pohe i te ora! (Mar. 5:39-42; Apo. 20:13) E tamahanahana te feruri-maite-raa i teie semeio i te feia atoa ua pohe to ratou feia herehia.

E tumu maitai anei no te oto ia tupu te tia-faahou-raa? Te pahono ra te Bibilia, aita. Ia au i te Isaia 25:8, “e haamou roa [Iehova] i te pohe e a muri noa ˈtu.” Oia atoa ïa te mau faahopearaa ino mau o te pohe. Te na ô faahou ra hoi tera parau tohu: “Na te Fatu ra, na Iehova, e horoi i te roimata i te mau mata atoa.” Mai te peu e te oto nei oe no te mea ua pohe to apiti, e tauturu te tiaturiraa o te tia-faahou-raa ia oe ia oaoa.

Aita e taata e taa roa ra i ta te Atua e rave i roto i te ao apî. Te na ô ra Iehova: “Mai te raˈi nei hoi e teitei rahi to ˈna i to te fenua; oia atoa to ˈu ra haerea, e teitei ïa i to outou haerea, e to ˈu ra mau manaˈo i to outou ra mau manaˈo.” (Isa. 55:9) E tauturu mai te parau fafau a Iesu no nia i te tia-faahou-raa i mua mai ia tiaturi ia Iehova, mai ia Aberahama. Mea faufaa roa ia rave te Kerisetiano taitahi i teie mahana i ta te  Atua e titau maira. ‘E au ïa ia tatou taua ao a muri nei’ e te feia o te faatia-faahou-hia mai.—Luka 20:35.

A tamau i te tiaturi. No te taata, mea peapea te a muri aˈe. Te horoa maira râ Iehova i te tiaturiraa o te tahi mea maitai aˈe. Eita tatou e nehenehe e ite e nafea mau Iehova e haamâha ˈi i to tatou mau hinaaro. E tiaturi papu anaˈe râ e e na reira iho â o ˈna. Ua papai te aposetolo Paulo: “O te tiairaa hiˈohia ra, e ere ïa i te tiai; o ta te taata hoi i ite ra, eaha oia e tia ˈi ia tiai atu i te reira? I tiai râ tatou i tei ore i itea e tatou, te manaˈo nei hoi tatou i te reira ma te fatimauu ore.” (Roma 8:24, 25) E tauturu te tiaturi-papu-raa i ta te Atua i fafau ia faaoromai. Maoti te faaoromai, e ora oe i te tau e ‘horoa ˈi Iehova i ta to aau e hinaaro ra.’ ‘E haamâha oia i te hiaai o te mau mea ora atoa nei.’—Sal. 37:4; 145:16; Luka 21:19.

Hou noa ˈˈe te poheraa o Iesu, ua haapeapea ta ˈna mau aposetolo. Ua tamahanahana Iesu ia ratou ma teie mau parau: “Eiaha e horuhoru to outou aau, e faaroo i te Atua, e e faaroo atoa mai hoi ia ˈu.” Ua na ô atu oia: “Eita vau e vaiiho otare noa ia outou, e hoˈi mai â vau ia outou nei.” (Ioa. 14:1-4, 18, 27) E tauturu ta ˈna mau parau i ta ˈna mau pǐpǐ faatavaihia i te roaraa o te tau ia tiaturi e ia faaoromai. Mai te peu e te tiai ru nei oe i te ite faahou i to oe feia herehia tei pohe, a tamau i te tiaturi. Ia papu ia oe e eita roa ˈtu Iehova e ta ˈna Tamaiti e vaiiho ia oe ia oto noa!