1, 2. (a) Eaha ta te Basileia o te Atua e rave? (b) No te aha tatou e papu ai e e tae mai te Basileia?

 I TE matahiti 31, i nia i te hoê mouˈa i pihaiiho ia Kaperenaumi, ua haapii Iesu Mesia i ta ˈna mau pǐpǐ ia pure: “Ia tae to oe ra hau,” aore ra Basileia. (Mat. 6:10) Te manaˈo nei e rave rahi e eita paha te Basileia e tae mai. Ua papu râ ia tatou e e pahonohia iho â ta tatou mau pure haavare ore ia tae mai te Basileia o te Atua.

² Te opuaraa a Iehova, o te faaohiparaa ïa i te Basileia no te tahoê i to ˈna utuafare i nia i te raˈi e i nia i te fenua. E tupu iho â te reira. (Isa. 55:10, 11) Ia au i te mau mea faahiahia tei tupu i na 100 matahiti i mairi, ua riro ê na o ˈna ei Arii! Te rave nei te Atua i te mau ohipa rahi e te faahiahia no ta ˈna mau mirioni tavini taiva ore. (Zek. 14:9; Apo. 15:3) Mea taa ê râ te riroraa mai Iehova ei Arii e te taeraa mai o te Basileia o te Atua ta Iesu i haapii mai ia pure. Eaha te taa-ê-raa? E ia aha tatou?

3. (a) Afea Iesu i te ariiraa mai e ihea? (b) E nafea oe e haapapu ai e ua haamauhia te Basileia i 1914? (A hiˈo i te nota i raro i te api.)

³ I te pae hopea o te mau matahiti 1800, ua taa-maitai-hia ˈtu â te parau tohu ta Daniela i papai a 2 500 matahiti aˈenei: “Ia tae i te anotau o taua mau arii ra, e faatupu ai te Atua o  te raˈi ra i te hoê basileia, o te ore roa ïa e mou.” (Dan. 2:44) Tau ahuru matahiti te Feia haapii Bibilia i te faaiteraa e e riro 1914 ei matahiti faufaa. Ua parau te hoê taata papai e e riro tera matahiti ei matahiti e manuïa ˈi te mau mea atoa. Tera atoa te manaˈo o te taata e rave rahi. I tera noa râ matahiti, ua haamata te Tamaˈi rahi Matamua e ua tupu te parau tohu Bibilia. Ua haapapu te oˈe, te aueueraa fenua, te maˈi rahi e te tahi atu mau parau tohu Bibilia tei tupu i muri iho e ua haamata Iesu Mesia i te faatere i nia i te raˈi ei Arii o te Basileia o te Atua i 1914. * Ma te faatoroa i ta ˈna Tamaiti ei Arii Mesia, ua riro atoa mai Iehova ei Arii i roto i te tahi atu tuhaa!

4. Eaha te ohipa matamua ta te Arii faatoroa-apî-hia i rave, e o vai ma ta ˈna i haapao i muri iho?

⁴ Te ohipa matamua i ravehia e te Arii faatoroa-apî-hia e te Atua, o te aroraa ïa ia Satani, te enemi rahi o to ˈna Metua. Huri maira Iesu e ta ˈna mau melahi i te Diabolo e ta ˈna mau demoni atoa i te fenua nei. Oaoa roa aˈera to te raˈi, area to te fenua nei, ua ati ïa mai tei ore i itehia aˈenei. (A taio i te Apokalupo 12:7-9, 12.) I muri iho, haapao maira te Arii i ta ˈna mau pǐpǐ i te fenua nei no te tamâ, te haapii e te faanaho ia ratou no te rave i te hinaaro o te Atua. Ua farii ratou i te reira, a vaiiho mai ai i te hiˈoraa maitai.

5. Teihea huru tamâraa tei tupu i rotopu 1914 e te omuaraa 1919?

⁵ I muri aˈe i to Iesu tamâraa i te raˈi i te mana ino o Satani e ta ˈna mau demoni, ua faaue Iehova ia Iesu ia hiˈopoa e ia tamâ i ta ˈna mau pǐpǐ i te fenua nei i te pae varua. E tamâraa pae varua teie mai ta te peropheta Malaki i faataa. (Mal. 3:1-3) Ia au i te tuatapaparaa, ua tupu te reira i rotopu 1914 e te omuaraa 1919. * No te riro ei melo o te utuafare o Iehova, e titauhia ia mâ, aore ra ia moˈa, tatou. (Pet. 1, 1:15, 16) Eiaha roa ta tatou haamoriraa ia viivii i te haapaoraa hape aore ra i te poritita a teie nei ao.

6. E nafea te maa varua e operehia ˈi, e no te aha mea faufaa roa ˈi te reira?

⁶ I muri iho, ua faaohipa Iesu i to ˈna mana faatere no te faatoroa i te hoê “tavini haapao maitai e te paari.” E opere tamau teie tavini i te maa maitai i te pae varua na te feia atoa o te nǎnǎ hoê roa a Iesu. (Mat. 24:45-47; Ioa. 10:16) Mai 1919 mai, ua haapao maitai te hoê pǔpǔ iti taeae faatavaihia i te hopoia rahi e faatamaa i te “utuafare.” Te operehia nei ïa te maa varua na roto i teie pǔpǔ iti ia rahi mai to tatou faaroo. E ia faaoti atu â tatou ia vai mâ noa i te pae varua, i te pae morare, i te pae feruriraa e i te pae tino. E haapii e e faaineine atoa teie maa varua ia tatou ia rave hope i te ohipa faufaa roa ˈˈe i te fenua nei. Te haafaufaa ra anei oe i teie mau faanahoraa?

7. (a) Eaha te ohipa faufaa ta Iesu i haamata i te rave i te fenua nei? (b) E tamau noa teie ohipa e tae roa ˈtu i teihea taime?

⁷ I to Iesu haamataraa i ta ˈna taviniraa i te fenua nei, ua na ô oia: “E parau haere â vau i te parau maitai o te basileia o te Atua i te mau oire ê atu â e tia ˈi, i tonohia mai ai hoi au.” (Luka 4:43) E toru matahiti e te afa teie taviniraa i te riroraa ei ohipa faufaa roa o to ˈna oraraa. Ua  faaue oia i ta ˈna mau pǐpǐ ia poro haere e ua fatata mai te Basileia o te raˈi. (Mat. 10:7) I muri aˈe i to ˈna tia-faahou-raa, ua tohu Iesu e e haaparare ta ˈna mau pǐpǐ i teie poroi “e tae noa ˈtu i te hopea o te fenua.” (Ohi. 1:8) Ua fafau oia ia ratou e e turu roa ˈtu oia i teie ohipa faufaa mau e tae roa mai i teie mahana.—Mat. 28:19, 20.

8. Mea nafea to te Arii faaitoitoraa i ta ˈna mau pǐpǐ i te fenua ia poro?

⁸ I 1919 te faataaraahia eaha ˈtu â te parau apî oaoa o te Basileia. (Mat. 24:14) Te faatere ra te Arii i nia i te raˈi e i haaputu na oia i te hoê pǔpǔ iti pǐpǐ tamâhia i te fenua nei. Ua farii ratou ma te aau tae i ta Iesu faaueraa e poro i te parau apî oaoa o te Basileia o te Atua e ati aˈe te fenua! (Ohi. 10:42) Ei hiˈoraa, i Tetepa 1922, fatata e 20 000 taata no te fenua rau tei tairuru i Cedar Point, i Marite. Mea turu ratou i te Basileia. Eaha râ paha ratou i te oaoa i to taeae Rutherford horoaraa i te oreroraa parau “Te Basileia” e to ˈna parauraa: “Inaha, te faatere ra te Arii! E vea outou na ˈna. No reira, a poro, a poro, a poro i te Arii e to ˈna basileia!” E piti tausani o ratou tei apiti atu i te hoê “Mahana pororaa” taa ê, ma te haere e poro e 72 kilometera i te atea i te vahi tairururaa. Ua parau te hoê taeae e e ore roa e moe ia ˈna te poroi e poro i te Basileia e te itoito rahi o te feia i tairuru mai. E ere o ˈna anaˈe tei parau mai tera.

9, 10. (a) Eaha tei faanahohia no te faaineine i te feia poro i te Basileia? (b) Eaha te maitai ta outou taitahi i huti mai i teie faaineineraa?

⁹ I 1922, hau atu i te 17 000 taata e poro ra i te Basileia i e 58 fenua i te ao nei. Ua hinaarohia râ te tahi faaineineraa. I te senekele matamua, ua horoa te Arii maitihia i te tahi mau aratairaa papu maitai i ta ˈna mau pǐpǐ: eaha te poro, ihea e e nafea. (Mat. 10:5-7; Luka 9:1-6; 10:1-11) I teie mahana atoa, te haapao nei Iesu e ia fanaˈo te feia poro atoa i te Basileia i te mau aratairaa e ravea ia aravihi ratou i roto i te pororaa. (Tim. 2, 3:17) No te faaineine i ta ˈna mau pǐpǐ no te taviniraa, te faaohipa nei Iesu i te amuiraa Kerisetiano. Te hoê ravea, o te Haapiiraa no te taviniraa Kerisetiano ïa i roto hau atu i te 111 000 amuiraa i te ao nei. Maoti teie haapiiraa e aravihi ai hau atu i te hitu mirioni taata no te poro e te haapii i te “taata atoa” ma te aau tae.—A taio i te Korinetia 1, 9:20-23.

¹⁰ Te vai ra te tahi atu â mau haapiiraa no te faaineine i te mau matahiapo o te amuiraa, te mau pionie, te mau taeae taa  noa, te mau taeae faaipoipo e ta ratou vahine, te mau melo o te Tomite amaa e ta ratou vahine, te mau tiaau ratere e ta ratou vahine e te mau mitionare. * Teie ta te mau piahi o te hoê piha Haapiiraa Bibilia no te mau taeae faaipoipo e ta ratou vahine i parau ma te mauruuru: “Maoti teie faaineineraa taa ê, ua rahi atu â to matou here no Iehova e ua ineine maitai aˈe matou i te tauturu ia vetahi ê.”

11. Noa ˈtu te mau patoiraa, mea nafea te mau Kerisetiano i te tamau-noa-raa i te poro?

¹¹ Te ite ra te enemi ra o Satani i te mau tutavaraa rahi e ravehia ra no te poro e te haapii i te parau apî o te Basileia ia vetahi ê. No te tapea i te reira, te patoi tia ˈtu nei oia aore ra ma te haavarevare i te poroi o te Basileia e i te feia poro. Eita râ te enemi e manuïa. Ua haaparahi Iehova i ta ˈna Tamaiti “i nia ê roa i te mau arii, e te feia mana, e te puai, e te rahi.” (Eph. 1:20-22) Ei Arii, e faaohipa Iesu i to ˈna mana no te paruru e no te aratai i ta ˈna mau pǐpǐ. E papu ïa ia ˈna e te ravehia ra te hinaaro o to ˈna Metua. * Te porohia ra te evanelia e e mirioni taata aau tae o tei haapiihia e nafea ia haamori ia Iehova. E fanaˈoraa taa ê mau â te apitiraa i tera ohipa rahi!

12. A faataa na i te tahi mau faatanoraa i ravehia mai te haamauraahia te Basileia.

¹² Mai te haamauraahia te Basileia i 1914, ua rave te Arii i te mau faatanoraa no nia i te huru faanahoraa a te mau tavini a te Atua no te rave i te hinaaro o to ˈna Metua. (A taio i te Isaia 60:17.) I 1919, ua faatoroahia i roto i te amuiraa taitahi te hoê taeae no te haapao i te pororaa. I 1927, ua faanahohia te pororaa i tera i tera fare i te mau Tapati atoa. I 1931, ua amo te mau tavini a te Atua i te iˈoa Bibilia Ite no Iehova a itoitohia ˈtu ai i te poro atu â i te Basileia. (Isa. 43:10-12) I 1938, e riro mai te hoê taeae ei tiaau ia faaî o ˈna i te mau titauraa Bibilia, aita e maitiraa faahou. I 1972, e ere faahou na te hoê noa tiaau e aratai i te amuiraa, na te hoê tino matahiapo râ. Ua faaitoitohia te mau taeae atoa o te faaî ra i te mau titauraa ia ‘faaamu i te nǎnǎ a te Atua i roto ia ratou.’ (Pet. 1, 5:2) I 1976, ua faanahohia te Tino aratai ei ono  tomite o te tiaau i te ohipa a te Basileia na te ao. Oia mau, ua faanahonaho mǎrû noa te Arii ta Iehova i maiti i ta ˈna mau pǐpǐ ia haa ia au i to te Atua hinaaro.

13. A 100 matahiti i teie nei te Basileia i te faatereraa, eaha ïa ta oe i faaoti i te rave?

¹³ A feruri na i ta te Arii Mesia i rave i na 100 matahiti matamua o ta ˈna faatereraa. Ua tamâ o ˈna i te hoê nunaa no to Iehova iˈoa. Ua aratai o ˈna i te pororaa i te parau apî maitai o te Basileia i roto e 239 fenua. Ua haapii o ˈna e mirioni taata e nafea ia haamori ia Iehova. Ua tahoê o ˈna hau atu e hitu mirioni pǐpǐ taiva ore o te horoa nei ia ratou iho no te rave i te hinaaro o to ˈna Metua. (Sal. 110:3) E ohipa rahi iho â e te faahiahia ta Iehova e rave ra na roto i te Basileia Mesia. E tupuraa faahiahia ˈtu â râ te tiai ra ia tatou!

14. (a) Eaha ta tatou e ani nei i te Atua a pure ai ia tae mai to ˈna Basileia? (b) Eaha ta tatou irava matahiti 2014, e no te aha ua tano maitai ai te reira?

¹⁴ Ua faariro Iehova i ta ˈna Tamaiti o Iesu ei Arii Mesia i 1914. E ere râ te reira i te pahonoraa taatoa o ta tatou pure ia tae mai to ˈna Basileia. (Mat. 6:10) Ua tohu te Bibilia e e ‘arii mai Iesu i rotopu i to ˈna mau enemi.’ (Sal. 110:2) Te patoi noa ra te mau faatereraa taata i raro aˈe i te mana o Satani i te Basileia. A pure ai ia tae mai to te Atua Basileia, te ani nei tatou i te Atua ia haamou te Arii Mesia e to ˈna mau arii apiti i te mau faatereraa taata e i te feia patoi i te Basileia. I reira ïa e tupu ai te Daniela 2:44. Oia hoi, ‘e hope roa taua mau basileia ra i te parari e i te pau’ i te Basileia o te Atua. E haamou-roa-hia ïa te mau faatereraa e patoi ra i te Basileia. (Apo. 6:1, 2; 13:1-18; 19:11-21) Fatata roa te reira i te tupu. Tano maitai iho â ïa te Mataio 6:10 ei irava matahiti 2014: Ia tae mai te Basileia o te Atua. A 100 ïa matahiti te Basileia o te Atua i te haamauraahia i nia i te raˈi!

15, 16. (a) Eaha te mau tupuraa faahiahia e itehia i te roaraa o te Faatereraa tausani matahiti? (b) Eaha te ohipa hopea ta Iesu e rave ei Arii Mesia, e eaha te auraa no te opuaraa a Iehova?

¹⁵ E haamou na mua te Arii Mesia i to te Atua mau enemi. Ia oti, e huri o ˈna ia Satani e ta ˈna mau demoni i roto i te abuso hoê tausani matahiti. (Apo. 20:1-3) I te mea e aita faahou tera mana ino, e faaohipa oioi te Basileia i te mau maitai o te tusia taraehara o Iesu e e tatara roa i te mau faahopearaa o te hara a Adamu. E faahoˈi mai te Arii i te ora e mirioni taata o te taoto nei i roto i te pohe e e faanaho ia haapiihia ratou no nia ia Iehova. (Apo. 20:12, 13) E riro te fenua taatoa ei paradaiso, mai i te ǒ i Edene, e e naea i te taata taiva ore atoa te tia-roa-raa.

¹⁶ A hope ai te Faatereraa tausani matahiti a te Mesia, ua raea te fa a te Basileia Mesia. E faahoˈi ïa Iesu i te Basileia i to ˈna Metua. (A taio i te Korinetia 1, 15:24-28.) Aita ïa e faufaa faahou te hoê arai i rotopu ia Iehova e ta ˈna mau tamarii i nia i te fenua. E tahoê ta te Atua mau tamaiti i te raˈi e ta ˈna mau tamarii i te fenua nei i to ratou Metua i te raˈi ei melo o te hoê â utuafare.

17. Eaha ta oe i faaoti papu i te rave no te Basileia?

¹⁷ Eaha ta te mau tupuraa faahiahia i na 100 matahiti faatereraa o te Basileia e haapapu maira? Te faatere ra Iehova e e tupu iho â ta ˈna opuaraa no te fenua. E tamau anaˈe i te tavini ia ˈna ma te taiva ore e i te poro i te Arii e to ˈna Basileia. Ua papu ia tatou e fatata Iehova i te pahono i ta tatou pure haavare ore: Ia tae mai te Basileia o te Atua!