UA FANAUHIA to ˈu papa i Graz, Auteteria, i 1899. Mea apî ïa oia a tupu ai te Tamaˈi rahi Matamua. Ua ô o ˈna i roto i te nuu Heremani i muri noa ˈˈe i te haamataraa te Piti o te Tamaˈi rahi i 1939 e ua haapohehia i 1943 i roto i te aroraa i Rusia. E piti noa matahiti to ˈu a ere ai au i to ˈu papa, aita ïa vau i matau ia ˈna. A ite ai e e papa to te rahiraa o te mau tamaroa i te fare haapiiraa, ua mihi au, aita hoi to ˈu. I muri aˈe, ei taurearea, ua tamahanahanahia vau a haapii ai no nia i to tatou Metua i te raˈi, te hoê Metua teitei aˈe o te ore e pohe.

E hitu matahiti to ˈu a apiti ai au i te hoê pǔpǔ uˈi apî parauhia Boy Scout. E faanahonahoraa na te ao nei teie tei haamauhia i 1908 i Beretane na te hoê tenerara o te nuu Beretane, Stephenson Smyth Baden-Powell. Ua haamau o ˈna i 1916 i te Wolf Cubs no te mau tamaroa apî aˈe o to ˈu faito matahiti.

Mea au na ˈu ta matou mau puhapa na te mataeinaa i te hopea hebedoma: e taoto i raro aˈe i te fare ie, e oomo i te ahu a te mau Scout e e taahi ma te pee i taˈi o te faatete. Mea au roa ˈtoa na ˈu te mau taime e himene ai matou e te tahi atu mau Scout i pihai iho i te auahi i te ahiahi. Oia atoa a hauti ai matou i roto i te uru raau. Mea rahi atoa ta matou i haapii mai no nia i te natura. I reira vau i te haafaufaaraa i te mau mea ta to tatou Atua i poiete.

E faaitoitohia te mau Boy Scout ia rave i te hoê ohipa maitai i te mahana taitahi. Tera ta ratou parau tumu. E aroha matou te tahi i te tahi ma te parau “Ia vai ineine noa.” Mea au roa na ˈu te reira. I roto i ta matou pǔpǔ, ua hau atu matou i te hoê hanere tamaroa. E Katolika te afaraa, e Porotetani te tahi atu afaraa e i pee na hoê tamaroa ia Bouddha.

Mai 1920, ua faanaho-tamau-hia te mau haaputuputuraa nunaa rau a te mau Boy Scout. Ua apiti au i te hituraa o tera tairururaa i Bad Ischl, i Auteteria, i Atete 1951. Oia atoa i te ivaraa i Atete 1957 i pihai iho ia Birmingham, i Beretane. I tera taime, fatata e 33 000 Scout matou no e 85 fenua. Fatata e 750 000 taata tei haere mai e hiˈo ia matou, oia atoa te arii vahine Elizabeth no Beretane. No ˈu, e au te riroraa ei Boy Scout i te riroraa ei melo o te hoê fetii taeae na te ao. Aita vau i ite atura e eita e maoro, e fanaˈo vau i te hoê fetii taeae maitai aˈe o te here i te Atua.

I te tau uaaraa tiare i 1958, fatata vau i te faaoti i ta ˈu tau haapiiraa toroa ei tuati i te Grand  Hotel Wiesler i Graz (Auteteria). I ohipa na vau e o Rudolf Tschiggerl, e raatira tutu faraoa monamona. Ua poro mai o ˈna ia ˈu ma te faanaho-ore-hia. Aita vau i faaroo aˈenei i te tahi mea no nia i te parau mau. Ua faahiti na mua o ˈna i te Toru tahi e ua parau mai e e ere te reira i te hoê haapiiraa Bibilia. Ua turu vau i te Toru tahi e ua hinaaro vau e faaite ia ˈna e ua hape o ˈna. Mea au na ˈu i to ˈu hoa ohipa e ua hinaaro vau e turai ia ˈna ia hoˈi i roto i te Ekalesia Katolika.

Ua noaa ia Rudolf, ta tatou e pii Rudi, te hoê Bibilia na ˈu. Ua onoono vau e e Bibilia Katolika noa ta ˈu e hinaaro. Ua haamata vau i te taio i te reira e ua itea ia ˈu e ua tuu Rudi i te hoê api parau neneihia e te taiete Watchtower i roto i te Bibilia. Ua patoi râ vau no te mea no ˈu, ua papaihia te reira ia manaˈo te taata e ua tano iho â te mea ta ratou e taio ra, e ere hoi. Ua farii râ vau i te tauaparau e o Rudi no nia i te Bibilia. Ua faaite Rudi i te haroaroaraa ma te ore e pûpû faahou mai i te tahi atu papai. E toru avaˈe i te maoro, ua aparau mâua no nia i te Bibilia i te tahi taime e e pinepine te reira i te oti i te maororaa po.

I te otiraa ta ˈu haapiiraa toroa i te hotera i to ˈu oire tumu i Graz, ua aufau to ˈu mama i te tahi atu â faaineineraa no ˈu i te hoê fare haapiiraa i te pae o te hotera i Bad Hofgastein. Ua haere ïa vau i tera oire i roto i te hoê peho o te mau Alpes. Ua taaihia teie fare haapiiraa i te Grand Hotel i Bad Hofgastein e i te tahi taime i haere na vau i ǒ no te aravihi atu â.

Ua faaite Rudi i to ˈu vahi nohoraa apî i te amaa i Vienne e ua tono mai ratou e piti tuahine mitionare, o Ilse Unterdörfer raua Elfriede Löhr. I te hoê mahana, ua pii mai te taata haapao i te piha tomoraa o te hotera ia ˈu ma te parau e e piti vahine i roto i te hoê pereoo te hinaaro ra e paraparau ia ˈu. Ua maere vau no te mea aita vau i matau ia raua. Ua haere râ vau e hiˈo no te ite o vai raua. I muri aˈe, ua haapii mai au e ei Ite i raro aˈe i te faatereraa Nazi i Heremani, i afai na raua i te mau papai a opanihia ˈi te ohipa pororaa hou te Piti o te Tamaˈi rahi. Ua haru-atoa-hia raua e te mau mutoi huna Heremani (Gestapo) hou a haamata ˈi te tamaˈi e ua afaihia i te aua haavîraa i Lichtenburg. E a tupu ai te tamaˈi, ua afaihia raua i te aua haavîraa i Ravensbrück, i pihai iho ia Berlin.

Ua faatura vau i teie na tuahine, hoê â hoi faito matahiti to raua i to to ˈu mama. Aita ïa vau i hinaaro e haamâuˈa i to raua taime no te tauaparau a parau atu ai i muri aˈe tau hebedoma aore ra tau avaˈe e aita vau i anaanatae. Ua ani ïa vau ia raua ia horoa noa mai i te mau irava no nia i te haapiiraa Katolika o te monoraa aposetolo. Ua faaite atoa ˈtu vau e e afai vau i te reira i te perepitero a aparau atu ai ia ˈna. I to ˈu manaˈo, mea na reira vau e ite ai i te parau mau.

Te tatara ra te Ekalesia Katolika i ta Iesu mau parau i roto i te Mataio 16:18, 19 no te turu i teie  haapiiraa o te monoraa aposetolo. Te parau atoa ra te Ekalesia Katolika e eita roa ˈtu te pâpa, matauhia mai te Metua Moˈa, e hape a faataa ˈi i te mau haapiiraa faaroo. Mai ia ˈu, mea rahi te Katolika te tiaturi e te niu nei i to ratou faaroo i nia i te reira. Ua manaˈo vau e mai te peu e ua parau te pâpa e mea mau te Toru tahi, tera iho â ïa. Ua manaˈo atoa râ vau e mai te peu e ua hape te pâpa, mea hape ïa te Toru tahi.

I to ˈu haereraa e hiˈo i te perepitero, aita o ˈna i nehenehe e pahono i ta ˈu mau uiraa. Ua rave mai râ o ˈna i te hoê buka no nia i te haapiiraa faaroo Katolika o te faataa ra i te monoraa aposetolo. Ua parau mai o ˈna ia hopoi i te reira i te fare, o ta ˈu iho â i rave. Ua taio vau i tera buka e ua hoˈi atu ia ˈna ra e te uiraa e rave rahi. Aita i tia i te perepitero ia pahono i ta ˈu mau uiraa. Parau mai nei o ˈna: “Aita vau e nehenehe e faataui i to oe manaˈo, aita atoa oe e nehenehe e faataui i to ˈu. . . . Ia maitai oe!” Aita o ˈna i hinaaro ia tauaparau â mâua.

I tera taime, ua ineine au i te haapii i te Bibilia e o Ilse raua Elfriede. Mea rahi ta ˈu i haapii mai no nia i te Metua Moˈa mau i nia i te raˈi, te Atua ra o Iehova. (Ioa. 17:11) Aitâ e amuiraa i tera vahi. O na tuahine e piti ïa tei faatere na i te mau putuputuraa i te fare o te hoê utuafare tei faaite i te anaanatae. Mea iti roa ratou. I te mea e aita e taeae bapetizohia no te aratai, e tauaparauraa ïa te putuputuraa i rotopu i na tuahine e piti ma te faaohipa i te mau papai i faanahohia. I te tahi taime, e haere mai te hoê taeae no te tahi atu oire no te horoa i te hoê oreroraa parau no te taatoaraa i te hoê vahi tarahuhia.

Ua haamata Ilse raua Elfriede i te haapii ia ˈu i te Bibilia i Atopa 1958 e ua bapetizohia vau e toru avaˈe i muri iho i Tenuare 1959. Hou to ˈu bapetizoraa, ua ani vau ia raua e e nehenehe anei ta ˈu e apee ia raua i tera i tera fare no te hiˈo e nafea ia poro. (Ohi. 20:20) I muri iho i te apeeraa ia raua no te taime matamua, ua ani atu vau i te tahi tuhaa fenua na ˈu no te poro. Ua faataa mai raua i te hoê oire iti na ˈu no te haere e poro o vau anaˈe i tera i tera fare e no te hoˈi e farerei i te taata te faaite i te anaanatae. Te taeae matamua ta ˈu i apee i roto i te pororaa, o te tiaau haaati ïa o tei haere mai e hiˈo ia matou i muri aˈe.

I 1960, i te otiraa ta ˈu tau haapiiraa i te pae o te hotera, ua hoˈi au i to ˈu oire tumu no te tamata i te haapii i te pue parau mau Bibilia i to ˈu fetii. E tae roa mai i teie nei, aita hoê aˈe tei farii i te parau mau. Te faaite nei râ vetahi i te tahi anaanatae.

I 1961, ua taiohia i te mau amuiraa te mau rata no ǒ mai i te amaa o te faaitoito ra ia rave i te taviniraa pionie. E taeae taa noa vau e mea maitai to ˈu ea. No ˈu, aita ïa to ˈu e otoheraa no te riro ei pionie. Ua ani vau i te tiaau haaati o Kurt Kuhn i to ˈna manaˈo ia ohipa â vau tau avaˈe no te hoo mai i te hoê pereoo, mea faufaa hoi te reira ei pionie. Ta ˈna pahonoraa? “E pereoo anei to Iesu e to ta ˈna mau aposetolo no te rave i te taviniraa taime taatoa?” Tera iho â hoi! Ua opua ïa vau e rave oioi i te taviniraa pionie. I te mea râ e i ohipa na vau e 72 hora i te hebedoma i te fare tamaaraa o te hoê hotera, e mea tia ia rave na mua vau i te tahi mau tauiraa.

 Ua ani au i ta ˈu paoti e e nehenehe anei ta ˈu e ohipa e 60 hora. Ua farii o ˈna e ua aufau mai i te hoê â tino moni. Aita i maoro i muri aˈe, ua ani au ia ˈna ia ohipa e 48 noa hora i te hebedoma. Ua farii atoa o ˈna e ua aufau mai i te hoê â tino moni. Ua ani au i muri iho ia ohipa e 36 noa hora i te hebedoma, aore ra e 6 hora i te mahana i nia e 6 mahana. Ua farii-faahou-hia ta ˈu aniraa. E te mea maere, ua aufau noa mai â o ˈna i te hoê â tino moni! E au ra e aita ta ˈu paoti i hinaaro e vaiiho ia ˈu. Maoti teie porotarama, ua tia ia ˈu ia haamata i te taviniraa pionie tamau. I tera tau, e titauhia ia naea i te pionie 100 hora i te avaˈe.

E maha avaˈe i muri aˈe, ua faatoroahia vau ei pionie taa ê. Oia atoa, mai tei parauhia i teie mahana, ei tiaau o te tino matahiapo i roto i te hoê amuiraa nainai i te mataeinaa o Carinthia i te oire o Spittal an der Drau. I tera tau, i titauhia na ia naea i te pionie taa ê 150 hora i te avaˈe. Aita to ˈu e hoa pionie. Teie râ, ua oaoa mau vau i te tauturu i roto i te taviniraa a te tuahine Gertrude Lobner, o tei amo i te hopoia ravehia i teie nei e te papai parau o te amuiraa.

I 1963, ua anihia mai au ia riro ei tiaau haaati. I te tahi taime, e rave au i te pereoo auahi no te haere i tera i tera amuiraa e ta ˈu mau afata vairaa ahu e vairaa papai teiaha mau. Aita e pereoo to te rahiraa o te mau taeae, aita ïa ratou e nehenehe e tii mai ia ˈu i te pereoo auahi. I te mea e aita vau i hinaaro ia huru ê te mau taeae ma te aufau i te hoê taata o te faahoro ia ˈu i ǒ ratou, e na avae noa ïa vau e tae roa ˈtu i to ratou fare.

I 1965, ua titau-manihini-hia vau i te 41raa o te piha o te Haapiiraa no Gileada. Mai ia ˈu, e Kerisetiano taa noa atoa e rave rahi. I to ˈu maere rahi, ua tonohia vau i to ˈu fenua i Auteteria i roto i te tuhaa haaati. Hou râ a faarue ai ia Marite, ua anihia mai au ia haere na muri i te hoê tiaau haaati no e maha hebedoma. Ua au mau vau i te taviniraa e o Anthony Conte, te hoê taeae î i te here. Mea au atoa na ˈna te pororaa e mea rahi te faahopearaa maitai mau ta ˈna i ite i roto i tera tuhaa. Ua tavini mâua i te pae apatoerau o New York, i Cornwall.

I to ˈu hoˈiraa i Auteteria, ua tonohia vau i roto i te hoê tuhaa haaati i reira vau i te farereiraa ia Tove Merete, te hoê tuahine haviti mau. Ua paari o ˈna i roto i te parau mau mai te paeraa o to ˈna matahiti. A ani mai ai te mau taeae mea nafea mâua i te farereiraa, e parau atu mâua ma te hoata, “Na te amaa i faanaho i te reira.” Ua faaipoipo mâua i te matahiti i muri iho, i Eperera 1967, e ua tamau mâua i roto i te taviniraa haaati.

I te matahiti i muri iho, ua taa ia ˈu e ma te aroha hamani maitai o Iehova, ua faaamu o ˈna ia ˈu ei tamaiti pae varua na ˈna. I reira te haamataraa te hoê taairaa taa ê e to ˈu Metua i te raˈi e tae noa ˈtu e te mau Kerisetiano atoa o te parau ra, mai ta te Roma 8:15 e faahiti ra, “E Aba, e tau Metua.”

Ua tamau mâua Merete i te tavini amui i roto i te tuhaa haaati e tuhaa mataeinaa e tae roa i 1976. I te tahi taime i te tau toetoe, i taoto na mâua i roto i te piha toetoe mau aita e matini haaveavea. I te hoê taime, ua ara mai mâua e ua ite e ua paari  roa te ahu taoto i pihai iho i to mâua ihu! Ua faaoti mâua i muri iho i te rave mai i te hoê matini haaveavea nainai no te ore e toetoe roa i te po. I te tahi mau vahi, no te haere i te haumitiraa i te po, e mea tia ia haere i rapae na roto i te hiona i te hoê fare e ô noa mai ai te mataˈi. Aita atoa to mâua e nohoraa. I te Monire, e pinepine ïa mâua i te faaea i te fare i reira mâua i te taviniraa i te hebedoma na mua ˈtu. E i te Mahana piti poipoi, e haere mâua i te tahi atu amuiraa.

Te oaoa nei au i te parau e i te roaraa o te mau matahiti, ua turu rahi noa mai ta ˈu vahine here. Mea au na ˈna te pororaa e aita roa ˈtu vau i faaitoito aˈenei ia ˈna ia haere e poro. Te here e te haapao maite atoa nei o ˈna i te mau taeae e tuahine o te amuiraa. E tauturu rahi mau te reira.

I 1976, ua anihia mai mâua ia tavini i te amaa no Auteteria e ua faatoroahia vau ei melo o te Tomite amaa. I tera tau, na te amaa no Auteteria i haapao i te ohipa i te fenua e rave rahi i Europa Hitia o te râ. Na te amaa atoa i faanaho ia tapae te mau papai i tera mau fenua ma te huna. Na te taeae Jürgen Rundel i aratai i te reira ma te imi i te ravea. E fanaˈoraa taa ê ia ohipa e o ˈna. I muri aˈe, ua anihia mai au ia tiaau i te ohipa huriraa na roto ahuru reo no Europa Hitia o te râ. Ua tamau Jürgen raua ta ˈna vahine o Gertrude i te tavini ma te taiva ore ei pionie taa ê i Heremani. Mai 1978, ua haamata te amaa no Auteteria i te faaineine i te mau vea i nia i te roro uira e i te nenei i te reira na roto e ono reo i nia i te hoê matini neneiraa nainai. Ua hapono atoa matou i te mau vea pauroa te avaˈe i te mau fenua tei ani mai. Na Otto Kuglitsch, o te tavini ra i teie nei i te amaa i Heremani e ta ˈna vahine o Ingrid, i haapao i tera tuhaa.

I pia atoa na te mau taeae i Europa Hitia o te râ i te papai i to ratou fenua ma te faaohipa i te mau matini nenei-faahou-raa aore ra ma te nenei maoti te mau hohoˈa i patahia. Ua hinaaro râ ratou i te tauturu no rapaeau mai i to ratou fenua. Ua paruru Iehova i teie ohipa. E i te amaa, ua here matou i teie mau taeae tei tavini i roto i te mau tupuraa fifi e i raro aˈe i te opaniraa e rave rahi matahiti i te maoro.

I 1989, ua oaoa vau i te haere i Rumania e te taeae Theodore Jaracz, te hoê melo o te Tino aratai.  Te fa? E tauturu i te hoê pǔpǔ taeae rahi ia amui faahou mai i te faanahonahoraa. Mai 1949, no te tumu rau, ua faataa ê mai ratou i te faanahonahoraa e ua haamau i ta ratou iho mau amuiraa. Teie râ, ua tamau noa ratou i te poro e i te bapetizo. Ua tuu-atoa-hia ratou i te fare auri no to ratou tiaraa amui ore Kerisetiano mai te mau taeae i roto i te faanahonahoraa fariihia e te pu rahi. I te mea e mea opani noâ te ohipa i Rumania, ua haere mâua i te fare o te taeae Pamfil Albu no te farerei huna e maha matahiapo e tuhaa faufaa ta ratou. Oia atoa i te mau tia o te Tomite fenua no Rumania ta te pu rahi e farii ra. Ua rave atoa mâua i te hoê taata huri no Auteteria mai, o Rolf Kellner.

I te pitiraa o te po tauaparauraa, ua turai te taeae Albu i ta ˈna na matahiapo e maha ia amui ia matou a parau ai, “Ia ore tatou e na reira i teie nei, aita e ravea faahou ta tatou i muri aˈe.” I muri iho, fatata e 5 000 taeae tei hoˈi mai i roto i te faanahonahoraa. Ua upootia mau o Iehova e ua pau Satani!

I te pae hopea o te matahiti 1989, ma te maere rahi, ua ani mai te Tino aratai ia haere mâua ta ˈu vahine e ohipa i te pu rahi i New York. Ua haamata mâua i ta mâua taviniraa i te Betela i Brooklyn i Tiurai 1990. I 1992, ua faatoroahia vau ei tauturu o te Tomite taviniraa o te Tino aratai. E mai Tiurai 1994 atu, ua oaoa vau i te tavini i roto i te Tino aratai.

Mea maoro i teie nei te tau a ohipa ˈi au ei tuati i roto i te hoê hotera. I teie mahana, te oaoa nei au i te apiti i te faaineineraa e te opereraa i te maa pae varua i to tatou fetii taeae na te ao. (Mat. 24:45-47) A hiˈo ai i na 50 tiahapa matahiti i roto i te taviniraa taime taatoa taa ê, hoê noa mea ta ˈu e nehenehe e faaite: to ˈu mauruuru e oaoa rahi no te haamaitairaa a Iehova i nia i to tatou fetii taeae na te ao. Mea au na ˈu e haere i te mau tairururaa mataeinaa nunaa rau i reira tatou e haapii mai ai no nia i to tatou Metua i te raˈi ra o Iehova e i te parau mau Bibilia.

Te pure nei au ia haapii e mirioni atu â taata i te Bibilia, ia farii i te parau mau e ia tavini ia Iehova ma te auhoê e to tatou fetii taeae Kerisetiano na te ao. (Pet. 1, 2:17) Te tiai ru atoa nei au i te ite, mai te raˈi mai, i te faatia-faahou-raa i nia i te fenua e i te ite i to ˈu papa pae tino. Te hinaaro nei au ia farii o ˈna i te haamori ia Iehova i roto i te paradaiso. Hoê â atoa hinaaro to ˈu no to ˈu mama e te tahi atu fetii here.