1. Eaha te hinaaro o te taata e o vai te nehenehe e haamâha i te reira?

 E HINAARO te taata atoa e piri atu â i te tahi atu taata. E oaoa tatou i te fanaˈo i te utuafare e te hoa o te here mau ra ia tatou, o te haafaufaa maira e o te taa maira. Te taairaa piri roa râ e titauhia ia faatupu, o te taairaa ïa e to tatou Atua poiete ra o Iehova.—Koh. 12:1.

2. Eaha ta Iehova e fafau maira, e no te aha aita ˈi te taata e rave rahi e tiaturi ra i teie parau fafau?

² Te titau manihini nei Iehova ia tatou ia riro ei hoa no ˈna. Te fafau ra oia e ia haafatata ˈtu tatou ia ˈna e haafatata atoa mai oia ia tatou. (Iak. 4:8) Ua oaoa tatou i te ite i te reira. E rave rahi râ taata o te manaˈo ra e e ere i te mea tano ia tiaturi e te hinaaro ra te Atua e haafatata ia ratou. Te manaˈo ra hoi ratou e eita e au ia ratou ia faatupu i te hoê taairaa e o ˈna aore ra mea atea roa o ˈna. E nehenehe mau anei e haafatata ˈtu ia Iehova?

3. Eaha te tiaturi no nia ia Iehova?

 ³ E nehenehe iho â e ite o vai Iehova no te mea ‘aita oia i atea ê atu’ i te feia e hinaaro ra e ite ia ˈna. (A taio i te Ohipa 17:26, 27; Salamo 145:18.) Te hinaaro nei Iehova e farii ia tatou ei hoa piri no ˈna noa ˈtu e e taata tia ore tatou. (Isa. 41:8; 55:6) No ta ˈna iho i ite, ua parau te fatu salamo no nia ia Iehova: “E tei faaroo i te pure ra, e tae atoa mai te taata atoa ia oe ra. E ao to te taata i haapaohia e oe, e ua faafatatahia mai.” (Sal. 65:2, 4) E hiˈo anaˈe i teie nei i roto i te Bibilia, mea nafea te arii Asa no Iuda i te haafatataraa ˈtu i te Atua e mea nafea te Atua i te haafatata-atoa-raa ia Asa.

4. Eaha te hiˈoraa ta te arii Asa i vaiiho no te nunaa o Iuda?

⁴ E taata itoito rahi o Asa no te haamoriraa mau. E peu matauhia te pâiˈa e te haamori idolo a arii mai ai oia. Ua auraro oia ia Iehova ma te faaore i teie mau ohipa ino. (Arii 1, 15:9-13) I te mea hoi e ua haafatata ˈtu Asa ia Iehova e ua faaroo i ta ˈNa mau ture, ua nehenehe ia ˈna ia parau i te nunaa ia “imi i te Atua no to ratou hui tupuna ia Iehova, e [ia] haapao hoi i te ture e te mau parau atoa.” Ua haamaitai Iehova i na ahuru matahiti matamua o te faatereraa a Asa ma te horoa i te hau mau. Ua ite Asa e no ǒ mai teie hau ia Iehova ra, e ua parau oia i te nunaa: “Ua imi tatou i horoa mai ai oia i te hau no tatou e ati noa ˈˈe.” (Par. 2, 14:1-7) Eaha tei tupu i muri iho?

5. I roto i teihea tupuraa i haapapu ai Asa e ua tiaturi oia i te Atua, e eaha te faahopearaa?

⁵ A feruri na e o oe te arii Asa. Te aratai ra Zera ati Kusa 1 000 000 tane e e 300 pereoo tamaˈi no te aro i to oe nunaa. (Par. 2, 14:8-10) Fatata te tataipitiraa ïa o te rahiraa faehau e vai ra i roto i ta oe nuu. E nafea oe? E ani anei oe no te aha te Atua i ore ai i tapea i te reira? E tiaturi anei oe i to oe iho paari aore ra e tiaturi oe ia Iehova no te paruru ia oe? Ua faaite papu o Asa e e taairaa piri roa to ˈna e o Iehova e ua tiaturi maite oia ia ˈNa. Ua pii Asa: “E tauturu mai ia matou, e to matou Atua, e Iehova; te tiaturi nei hoi matou i nia ia oe.” Mea nafea te Atua i te pahonoraa ia ˈna? Ua pau ihora to Kusa ia Iehova. Aita hoê aˈe enemi i ora mai.—Par. 2, 14:11-13.

6. E nafea tatou e pee ai i to Asa hiˈoraa?

⁶ Mea nafea o Asa i te tiaturi-papu-raa e e paruru e e aratai te Atua ia ˈna? Te parau ra te Bibilia e “e parau tia ta Asa i te aro o Iehova” e ‘ua tia to ˈna aau ia Iehova.’ (Arii 1, 15:11, 14) E mea tia ia tavini atoa tatou i te Atua ma te aau taatoa ia nehenehe tatou e haafatata ˈtu ia ˈna i teie nei â e a muri aˈe. Te mauruuru nei tatou i ta Iehova i rave no te haafatata ia  tatou ia ˈna ra e i ta ˈna tauturu ia nehenehe tatou e faatupu i te hoê taairaa piri e o ˈna. E hiˈo anaˈe e piti ravea ta te Atua e faaohipa ra no te na reira.

7. (a) Eaha ta Iehova i rave ia haafatata ˈtu tatou ia ˈna? (b) Eaha te ravea rahi roa ˈˈe a te Atua ia haafatata ˈtu tatou ia ˈna?

⁷ Ua faaite Iehova i to ˈna here i te taata i to ˈna poieteraa i te hoê fenua nehenehe mau ei nohoraa no tatou. E te tamau noa ra oia i te faaite i to ˈna here ma te horoa mai i te aho ora i te mahana taitahi. (Ohi. 17:28; Apo. 4:11) Te mea faufaa ˈtu â, te haapao nei oia i to tatou mau hinaaro pae varua. (Luka 12:42) Te haapapu atoa maira oia e na ˈna e faaroo ra i ta tatou pure. (Ioa. 1, 5:14) Te ravea rahi roa ˈˈe râ a Iehova no te haafatata ia tatou ia ˈna ra e no te faaite i to ˈna here ia tatou, o te hoo ïa. (A taio i te Ioane 1, 4:9, 10, 19.) Ua tono Iehova i ta ˈna iho Tamaiti ia horoa o ˈna i to ˈna ora no tatou. Maoti noa teie tusia e nehenehe ai tatou e tiaturi e ora e a muri noa ˈtu ei taata tia roa.—Ioa. 3:16.

8, 9. Eaha te tuhaa a Iesu i roto i te opuaraa a Iehova?

⁸ Ua opua Iehova i te hoo no te maitai o te taata atoa, tae noa ˈtu te feia o tei ora hou te hoo a aufauhia ˈi. Mea nafea ïa? No Iehova, mai te huru ra e ua aufau-aˈena-hia te hoo a tohu ai oia no nia i to tatou Faaora. Ua ite hoi oia e e tupu iho â ta ˈna i opua no te huitaata. (Gen. 3:15) E hanere matahiti i muri aˈe, ua haamauruuru te aposetolo Paulo ia Iehova no te tiamâraa itehia maoti te hoo aufauhia e te Mesia ra ia Iesu. Ua faataa o Paulo e ‘ua faaore te Atua i te mau hara i ravehia i mutaa ihora.’ (Roma 3:21-26) Eita ïa e nehenehe e haafatata ˈtu i te Atua aita anaˈe Iesu.

⁹ E fanaˈo te feia haehaa i te hoê taairaa piri roa e o Iehova maoti noa ia Iesu. Te parau ra te Bibilia: “Ua faarahi . . . te Atua i to ˈna aroha ia tatou nei, i te mea te vai taata hara noa nei â tatou, i pohe ai te Mesia no tatou nei.” (Roma 5:6-8) Ua aufauhia te hoo, eiaha no te mea e au ia tatou te reira, no te mea râ ua here rahi mau Iehova e Iesu ia tatou. Ua parau Iesu: “E ore roa te taata e tae mai ia ˈu nei, maori râ ia faatae mai te Metua o tei tono mai ia ˈu nei ia ˈna.” Ua parau atoa oia: “Aore roa e taata e tae i te Metua ra, maori râ ei ia ˈu.” (Ioa. 6:44; 14:6) Maoti te varua moˈa, te faatae aore ra te haafatata nei Iehova i te taata ia ˈna ra maoti Iesu. E te tauturu ra oia ia ratou ia faatupu i te hoê taairaa maitai e o ˈNa ia nehenehe ratou e fanaˈo i te ora mure ore. (A taio i te Iuda 20, 21.) E hiˈo anaˈe i teie nei i te piti o te ravea ta te Atua e faaohipa ra ia haafatata ˈtu tatou ia ˈna.

10. E nafea te Bibilia e tauturu mai ai ia haafatata ˈtu â i te Atua?

¹⁰ Tae roa mai i teie nei i roto i teie tumu parau, ua faaohipa tatou 14 buka Bibilia. Ma te faaohipa i to ˈna varua moˈa, ua faaurua Iehova i te papairaa o te Bibilia ia haafatata ˈtu tatou ia ˈna. Aita anaˈe te Bibilia, e nafea tatou e ite ai e e nehenehe ta tatou e haafatata ˈtu i to tatou Atua poiete? Aita anaˈe te reira, e nafea tatou e haapii ai no nia i te hoo e i ta Iesu e rave ra no te tauturu mai ia haafatata ˈtu ia Iehova? I roto i te Bibilia tatou e haapii ai i te huru faahiahia mau o Iehova e ta ˈna opuaraa no te huitaata. Ei hiˈoraa, i roto i te Exodo 34:6, 7, te faataa ra Iehova ia ˈna iho mai te “Atua aroha noa, e te hamani maitai rahi, e te faaoromai rahi, e te maitai rahi, e te parau mau; e te vaiiho maite i te aroha e tausani noa ˈtu te ui; e te faaore i te parau-tia ore, e te hara, e te ino.” O vai te ore e hinaaro e haafatata ˈtu i te hoê Atua mai teie? Ua ite Iehova e ia haapii atu â tatou no nia ia ˈna, e papu atu â ia tatou e te vai mau ra o ˈna e e piri atu â tatou ia ˈna.

11. No te aha mea faufaa ˈi ia haapii no nia ia Iehova? (A hiˈo i te hohoˈa matamua.)

¹¹ Te parau ra te omuaraa o te buka E haafatata ˈtu ia Iehova e a riro mai ai te hoê taata ei hoa piri no tatou, e matau atu â tatou ia ˈna e e faahiahia i mua i to ˈna mau huru maitatai. No reira, no te fanaˈo i te hoê taairaa piri roa e te Atua, e titauhia ia haapii tatou o vai mau oia ma te hiˈopoa i to ˈna mau huru maitatai i roto i te Bibilia. Te oaoa nei tatou e ua faanaho Iehova ia papaihia te Bibilia ma te mau parau ohie ia taa.

12. No te aha Iehova i faaohipa ˈi i te mau taata no te papai i te Bibilia?

¹² E nehenehe ta Iehova e faaohipa i te mau melahi no te papai i te Bibilia. Te hinaaro rahi nei ratou e ite o vai tatou e eaha ta tatou e rave ra. (Pet. 1, 1:12) E nehenehe ta ratou e papai ma te tia roa i ta Iehova poroi no te huitaata. E ere râ te mau melahi mai te mau taata. Aita roa ˈtu ratou i ite aˈenei i te mau huru aau, hinaaro e paruparu mai to tatou. Ua ite Iehova e mea taa ê mau te mau melahi ia tatou. No reira oia i maiti ai ma te paari i te mau taata no te papai i te Bibilia. Ia taio tatou no nia i te mau inoino, feaaraa, mǎtaˈu e hape o te feia papai Bibilia e te tahi atu, e taa ia tatou to ratou mauiui. E ia taio tatou no nia i to ratou mau taime oaoa, e taa ia tatou to ratou oaoa. Mai te peropheta Elia, “mai ia tatou atoa te huru” o te feia papai Bibilia.—Iak. 5:17.

13. Eaha to oe huru aau a taio ai i te pure a Iona?

 ¹³ Ei hiˈoraa, ua horoa te Atua ia Iona te hoê hopoia faufaa mau, tera râ, ua horo ê oia. Ahani e na te hoê melahi i papai i to Iona aamu, eita ta ˈna e nehenehe e faataa roa i to Iona mau huru aau. Mea maitai aˈe ïa ia maiti Iehova ia Iona no te papai i to ˈna iho aamu, oia atoa i ta ˈna pure i te Atua i roto i te hohonu o te moana. Ua parau Iona: “A tarapape [aore ra ahoaho] ai tau varua i roto ia ˈu ra, ua manaˈo ihora vau ia Iehova.”—Iona 1:3, 10; 2:1-9.

14. No te aha e taa ˈi ia oe ta Isaia i papai no nia ia ˈna iho?

¹⁴ E itehia te tahi atu hiˈoraa i roto i ta Isaia i papai no nia ia ˈna iho. I to te hoê orama no nia i te hanahana o Iehova tautururaa ia ˈna ia taa e e taata hara mau oia, ua parau oia: “Auê hoi au nei e! ua mamû iho nei au; e taata vaha viivii hoi au; e tei rotopu hoi au i te mau taata vaha viivii atoa i te parahiraa: ua hiˈo hoi tau mata nei i te arii, ia Iehova sabaota.” (Isa. 6:5) Eita roa ˈtu ta te hoê melahi e nehenehe e parau i te reira no nia ia ˈna iho, o Isaia râ, oia ïa e ua na reira iho â o ˈna. I te mea e e taata tia ore tatou mai ia Isaia, e nehenehe tatou e taa eaha to ˈna huru aau.

15, 16. (a) No te aha tatou e taa ˈi i te mau huru aau o te tahi atu mau taata? A faataa. (b) Eaha te tauturu ia tatou ia haafatata ˈtu â ia Iehova?

¹⁵ Eita ta te melahi e nehenehe e parau no ˈna iho mai ia Iakoba, oia hoi “e ore roa vau nei e au i te mau hamani-maitai-raa mai.” Aore ra mai ia Petero o tei faataa ia ˈna iho mai te  hoê “taata hara.” (Gen. 32:10; Luka 5:8) Eita te mau melahi e “mǎtaˈu” mai te mau pǐpǐ a Iesu i te tahi taime. Eita atoa ratou e hinaaro i te itoito no te poro i te parau apî oaoa a hamani-ino-hia ˈi ratou mai ia Paulo e te tahi atu. (Ioa. 6:19; Tes. 1, 2:2) No te aha? No te mea mea tia roa te mau melahi i roto i te mau tuhaa atoa e e mea puai aˈe ratou i te taata. Mai te feia o ta Iehova i faaohipa no te papai i te Bibilia, e taata tia ore atoa tatou. E nehenehe ïa tatou e taa i to ratou mau huru aau. Ia taio tatou i ta ratou i papai, e nehenehe tatou “e oaoa atoa i te feia e oaoa ra, e oto atoa hoi i te feia e oto ra.”—Roma 12:15.

¹⁶ Ma te feruri maite i to Iehova huru i nia i ta ˈna mau tavini taiva ore i tahito ra, e ite tatou e rave rahi ohipa faahiahia no nia i to tatou Atua. E ite mai tatou e ua haafatata ˈtu oia i te taata tia ore ma te mǎrû e te here. E piri ˈtu â tatou ia Iehova a ite maitai ai tatou o vai o ˈna e a here roa ˈi ia ˈna.—A taio i te Salamo 25:14.

17. (a) Eaha te aˈoraa maitai ta Azaria i horoa ia Asa? (b) Mea nafea Asa i te tâuˈa-ore-raa i te aˈoraa a Azaria, e eaha te faahopearaa?

¹⁷ Eaha ˈtu â te haapii mai no nia i te arii Asa? I muri aˈe i to ˈna upootiaraa i nia i te nuu Kusa, ua horoa ˈtu te peropheta Azaria i te aˈoraa î i te paari. Ua parau oia: “Ei pihaiiho Iehova ia outou, outou i ati mai ia ˈna ra; ia imi outou ia ˈna, e itea ïa oia e outou: ia faarue râ outou ia ˈna, e faarue atoa oia ia outou.” (Par. 2, 15:1, 2) I muri aˈe râ, aita o Asa i pee i teie aˈoraa maitai. I to te arii o te basileia apatoerau o Iseraela aroraa ia Iuda, ua mǎtaˈu Asa. Aita oia i ani i te tauturu a Iehova, ua faaau râ o ˈna i te faufaa e to Arama o te ore hoi e haamori ia Iehova. Ua parau Iehova ia ˈna: “E parau maamaa ta oe i tena ra: e teie nei, ei tamaˈi â ta oe.” Tera iho â tei tupu. (Par. 2, 16:1-9) Eaha te haapiiraa e huti mai?

18, 19. (a) Eaha te rave e ere anaˈe to tatou taairaa e o Iehova i te mea piri roa mai i na mua ˈˈe? (b) E nafea tatou e tamau ai i te haafatata ˈtu â ia Iehova?

¹⁸ Eiaha roa ˈtu tatou e faaatea ê mai ia Iehova. Mai te peu e e ere to tatou taairaa e o ˈna i te mea piri roa mai i na mua ˈˈe, e rave oioi anaˈe i ta Hosea 12:6 e parau ra: “E fariu oe i to oe ra Atua: e haapao i te aroha hamani maitai ra e te parau au, e ati tamau maite i to oe ra Atua.” Ma te feruriruri i te hoo e ma te haapii maite i te Bibilia, e nehenehe tatou e haafatata ˈtu â ia Iehova.—A taio i te Deuteronomi 13:4.

¹⁹ Ua papai te fatu salamo: “E mea maitai râ ia ˈu ia haafatata ˈtu i te Atua.” (Sal. 73:28) Mea maitai no tatou taitahi atoa. E haamau anaˈe ei fa e tamau noa i te haapii i te mau mea apî no nia ia Iehova. Ma te na reira, e rahi roa ˈtu â to tatou here ia ˈna. E ia haafatata ˈtu â tatou ia ˈna, e haafatata ˈtu â Iehova ia tatou i teie nei â e a muri noa ˈtu!