1, 2. (a) Eaha te tahi o te mau hopoia a te tiai mamoe Iseraela? (b) E nafea te mau metua e tuea ˈi i te mau tiai mamoe?

 I ISERAELA i tahito ra, mea fifi te oraraa o te mau tiai mamoe. E mea titauhia ia ohipa ratou i rapae i te tau veavea e toetoe. E ia paruru atoa i ta ratou mamoe i te mau animara taehae e te feia eiâ. E hiˈopoa tamau te mau tiai i te mamoe taitahi e e rapaau i tei maˈihia aore ra tei pepe. E haapao taa ê ratou i te mau pinia mamoe, mea paruparu aˈe hoi ratou i te mau mamoe tei paari.—Gen. 33:13.

² E mea tia ia faaite te mau metua Kerisetiano i te hoê â huru maitatai i to te mau tiai mamoe. Te hopoia a te mau metua, o te haapiiraa ïa i ta ratou tamarii ia au i te mau ture aveia a Iehova. (Eph. 6:4) Mea ohie noa anei? E ere! E pinepine te mau tamarii i te faaû i te mau manaˈo ta Satani e paturu ra. Te vai atoa ra to ratou iho huru tia ore. (Tim. 2, 2:22; Ioa. 1, 2:16) E nafea outou e nehenehe ai e tauturu i ta outou tamarii? E hiˈopoa anaˈe e toru ohipa ta outou e nehenehe e rave no te haapao i ta outou tamarii mai te tiai mamoe: (1) E matau maitai ia ratou, (2) e faaamu ia ratou e (3) e aratai ia ratou.

3. E nafea te mau metua e matau maitai ai i ta ratou tamarii?

³ E hiˈopoa maite te hoê tiai maitai i ta ˈna mamoe taitahi no te papu e aita te mamoe i maˈihia. Te na ô ra te Bibilia: “A hiˈo maitai na i to nǎnǎ mamoe.” (Mas. 27:23) Ei metua, e hinaaro outou e hiˈo maitai i to “nǎnǎ mamoe,” oia hoi i ta outou mau tamarii. E mea tia ïa ia haapao outou i ta ratou e rave ra e ia ite atoa i to ratou mau manaˈo e huru aau. E nafea ïa? A tauaparau pinepine e ta outou mau tamarii.

4, 5. (a) Eaha te tahi mau manaˈo ohie ia faaohipa te nehenehe e tauturu i te tamarii ia faaite i to ratou mau manaˈo e huru aau? (A hiˈo i te hohoˈa matamua.) (b) Eaha ta outou i rave ia paraparau ohie aˈe ta outou mau tamarii ia outou?

⁴ Ua faaite vetahi mau metua e mea fifi ia tauaparau e ta ratou mau tamarii a taurearea ˈi. Eita paha teie mau taurearea e hinaaro e faaite i to ratou mau manaˈo e huru aau. Tera atoa anei no outou? Eaha ïa te rave? Eiaha e faahepo ia ratou ia parahi a tauaparau atu ai ehia hora i te maoro. A tamata râ i te tauaparau ia ratou i te taime au maitai. (Deut. 6:6, 7) A faataa i te taime no ratou. A hahaere e o ratou. A hauti aore ra a ohipa e o ratou i te fare. Mea hau anaˈe ta outou mau tamarii, e anaanatae ratou i te faaite i to ratou mau manaˈo e huru aau.

⁵ E ia ore â ta outou tamarii e hinaaro e paraparau? A tamata ïa i te tahi atu ravea. Ei hiˈoraa, eiaha ïa e ani eaha ta ˈna i rave i tera mahana, a faaite atu râ eaha ta outou i rave. E anaanatae ïa o ˈna i te faaite mai i ta ˈna i rave. Aore ra no te ite eaha to ˈna manaˈo no nia i te hoê tumu parau, a tuu atu i te mau uiraa no nia i te tumu parau iho, eiaha râ no nia ia ˈna. E nehenehe outou e ani eaha te manaˈo o to ˈna mau hoa no nia i te reira e eaha te aˈoraa ta ˈna e horoa ˈtu.

6. E nafea ta outou mau tamarii e ite ai e e taime to outou no ratou e mea ohie ia paraparau ia outou?

⁶ E hinaaro ta outou mau tamarii e paraparau ia outou a ite ai ratou e e taime to outou no ratou e mea ohie ia paraparau ia outou. Eita ratou e faaite atu i to ratou mau fifi a ite ai e mea rahi roa ta outou ohipa no te faataa i te taime no ratou. E nafea ia papu e mea ohie ia paraparau ia outou? Eiaha e parau noa ˈtu e, “E nehenehe oe e paraparau mai i te mau taime atoa e hinaaro ai oe.” E hinaaro ta outou mau tamarii taurearea e ite e eita outou e riri i ta ratou e parau atu. Oia atoa e mea faufaa no outou to ratou mau fifi. Te parau ra Kayla, ahuru ma iva matahiti to ˈna: “E nehenehe ta ˈu e paraparau i to  ˈu papa no nia i te mau mea atoa. Eita o ˈna e tâpû mai i ta ˈu parau e eita o ˈna e haava mai. E faaroo noa mai o ˈna. E horoa noa mai ïa o ˈna i te mau aˈoraa maitai aˈe.”

7. (a) E nafea te hoê metua e vai aifaito ai a tauaparau ai no nia i te hoê tumu parau mai te haamatauraa? (b) E nafea te mau metua e nehenehe ai e faariri i ta ratou tamarii?

⁷ I te tahi mau taime, e titauhia ia tauaparau outou e ta outou tamarii no nia i te mau tumu parau fifi ia paraparau, mai te haamatauraa i te tahi taata no te faaipoipo. A na reira ˈi, ia papu ia outou e te haapii atu nei iho â outou i te mea tano. Ei hiˈoraa, i te hoê fare tamaaraa, e hiˈo outou i te tapura o te mau maa e pûpûhia ra. E faaararaa anaˈe to nia iho no nia i te taeroraa i te maa. E haere outou e tamaa i te tahi atu vahi, e ere anei? E nehenehe te reira e tupu atoa e ta outou tamarii. Mai te peu e e faaararaa anaˈe ta outou mau aˈoraa, e riri mai ta outou tamarii a ore atu ai e ani faahou mai i to outou manaˈo. (A taio i te Kolosa 3:21.) A vai aifaito râ. Te na ô ra te hoê tuahine apî o Emily te iˈoa: “Ia paraparau mai to ˈu metua ia ˈu no nia i te haamatauraa, eita raua e faataa mai i te reira mai te hoê mea au ore. E faataa mai râ raua e mea oaoa ia haamatau i te hoê taata e ia ite mai i te hoê tane faaipoipo. Ua tauturu mai te reira ia ˈu ia paraparau ia raua ma te ore e haama no nia i teie tumu parau. E hinaaro vau ia ite raua i te taairaa ta ˈu e faatupu ra e te tahi atu, aita vau e hinaaro ra e huna i te reira ia raua.”

8, 9. (a) Eaha te mau maitai ia faaite i te faaoromai e ia faaroo ma te ore e tâpûpû i te parau? (b) Eaha ta outou i ite a faaroo ai i ta outou tamarii?

⁸ A faaoromai e a faaroo maitai i ta outou tamarii. E faaite te reira e mea ohie ia paraparau ia outou. (A taio i te Iakobo 1:19.) Te na ô ra te hoê metua vahine taa noa o Katia te iˈoa: “I na mua ˈˈe, e riri hanoa vau i ta ˈu tamahine. Aita ta ˈna parau i oti atura, era ˈtu ta ˈu. Ua rohirohi roa vau no te faaroo ia ˈna aore ra aita vau i hinaaro ia haapeapeahia mai au. I teie nei, ua taui au i to ˈu huru e ua taui atoa ta ˈu tamahine. Mea faaroo aˈe o ˈna i teie nei.”

⁹ Ua ite te hoê papa o Ronald te iˈoa i te hoê â tupuraa e ta ˈna tamahine taurearea. Te na ô ra o ˈna: “A faaite mai ai o ˈna e te here ra o ˈna i te hoê tamaroa i te fare haapiiraa, ua riri roa vau i te omuaraa. Haamanaˈo aˈera vau e mea faaoromai o Iehova i nia i ta ˈna mau tavini e aita o ˈna e titau rahi roa ra ia ratou. Feruri ihora vau e mea maitai aˈe no ˈu ia vaiiho i ta ˈu tamahine ia faaite mai i to ˈna huru aau hou a aˈo ai ia ˈna. Ua oaoa roa vau i te na reiraraa! A tahi ra vau e taa ˈi i te huru aau o ta ˈu tamahine. A oti ai o ˈna i te paraparau, ua ite au e mea ohie aˈe ia paraparau ia ˈna ma te here. E te mea maere, ua farii maitai o ˈna i ta ˈu aˈoraa. Ua  faaite mai o ˈna i to ˈna hinaaro e taui.” A tauaparau pinepine e ta outou mau tamarii. E ite ïa outou i to ratou mau manaˈo e huru aau. I muri aˈe, e ani mai iho â ratou i to outou manaˈo a rave ai i te mau faaotiraa. *

10, 11. E nafea e tauturu ai i ta outou tamarii ia faaea i roto i te parau mau?

¹⁰ Ua ite te hoê tiai maitai e e nehenehe te mamoe e moe. E haamata paha te tahi mamoe i te amu i te aihere tei atea rii i te nǎnǎ. E atea mǎrû noa oia i te nǎnǎ a atea ê roa ˈtu ai. E nehenehe atoa te reira e tupu i nia i ta tatou tamarii. E nehenehe ratou e haamata mǎrû noa i te faarue i te parau mau peneiaˈe no te amuimuiraa ino aore ra te faaanaanataeraa atâta. (Mas. 13:20) E nafea ia ore te reira ia tupu?

¹¹ A haapii ai i ta outou tamarii, eaha te rave ia ite outou i te tahi mau tuhaa i reira e titauhia ˈi ia haamaitai mai ratou? A tauturu atu, eiaha e tiai! A tauturu atoa ia ratou ia faaite atu â i to ratou mau huru maitatai. (Pet. 2, 1:5-8) E taime maitai roa te haamoriraa utuafare no te na reira. Ua faataa mai Ta tatou taviniraa i te Basileia no Atopa 2008: “Te faaitoitohia ra te mau upoo utuafare ia amo i ta ratou hopoia i mua ia Iehova ia papu ia ratou e te ravehia ra te hoê porotarama haapiiraa Bibilia utuafare tamau e te au.” Te faaohipa ra anei outou i teie taime no te haapao i ta outou mau tamarii mai te tiai mamoe? Ia papu ia outou e te oaoa mau nei ta outou tamarii i te mau tutavaraa ta outou e rave ra no te tauturu ia ratou.—Luka 11:28; Phil. 1:10.

12. (a) Mea nafea te feia apî i te faufaaraahia i te haamoriraa utuafare tamau? (A hiˈo atoa i te tumu parau tarenihia “ Mea au na ratou.”) (b) Mea nafea outou i te faufaaraahia i te haamoriraa utuafare?

¹² Ua faufaahia te hoê taurearea o Carissa te iˈoa e to ˈna utuafare i ta ratou porotarama haamoriraa utuafare. Te na ô ra o ˈna: “Mea au roa na ˈu ia parahi amui matou a paraparau atu ai. E riro te reira ei taime maitai mau te ore e moe. E pee iho â to ˈu papa i ta matou porotarama haamoriraa utuafare. Mea faaitoito mau ia ite ia ˈna ia rave maite i te reira e e hinaaro atoa vau e na reira. E tumu maitai atu â ïa  ta ˈu no te faatura ia ˈna ei papa, oia atoa i ta ˈna aratairaa i te pae varua.” Te na ô ra te hoê tuahine apî aˈe o Brittney te iˈoa: “Ua piri atu â vau i to ˈu na metua maoti te haamoriraa utuafare. Ua faaite mai te reira e e hinaaro raua e faaroo i to ˈu mau fifi e te haapeapea nei raua no ˈu. Ua tauturu mai te reira ia riro ei utuafare auhoê e te paari.” Te fa matamua a te mau metua, o te haapiiraa ïa i ta ratou tamarii ia here ia Iehova. E o te haamoriraa utuafare te tahi ravea maitai aˈe no te na reira. *

13. Eaha te turai i te hoê tamarii ia tavini ia Iehova?

¹³ E faaohipa te hoê tiai mamoe maitai i te hoê raau no te aratai e te paruru i ta ˈna nǎnǎ. Ta ˈna fa matamua, o te aratairaa ïa i ta ˈna mau mamoe i “te amuraa maitai.” (Ezk. 34:13, 14) Hoê â atoa hopoia ta outou ei metua. E hinaaro outou e aratai i ta outou tamarii ia tavini ia Iehova. E hinaaro outou ia manaˈo atoa ta outou tamarii mai te fatu salamo o tei papai: “Mea au na ˈu te rave i to oe hinaaro, e tau Atua; te vai nei hoi ta oe ture tei roto i to ˈu nei aau.” (Sal. 40:8) Tera anaˈe te manaˈo o ta outou tamarii, e hinaaro ratou e pûpû i to ratou ora ia Iehova e e bapetizo. No te rave i teie faaotiraa, e mea tia ia taa maitai ia ratou eaha te titauhia ra e ia hinaaro mau ratou e tavini ia Iehova.

14, 15. (a) Eaha te fa a te mau metua? (b) No te aha paha te hoê taurearea e feaa ˈi no nia i te parau mau?

¹⁴ Peneiaˈe aita te taairaa o ta outou mau tamarii e o Iehova i maitai atu â. Aita atoa paha ratou i papu e o te parau mau iho â ta te mau Ite no Iehova e tiaturi ra. Eaha te rave? A faaitoito i te haaferuri i ta outou mau tamarii e i te tauturu atu ia here ia Iehova ma te aau atoa. A haapii atu ia haafaufaa i te mau mea atoa ta Iehova i rave no ratou. (Apo. 4:11) E ia ineine ratou, e nehenehe ratou e faaoti e tavini ia Iehova.

¹⁵ Mai te peu e e au ra e te feaa ra ta outou mau tamarii no nia i te parau mau, a faaoromai e a tutava i te aratai ia ratou. A tauturu ia ratou ia taa e o te taviniraa ia Iehova te huru oraraa maitai roa ˈˈe e te horoa mai i te mau haamaitairaa mure ore. A faaitoito atoa i te imi i te tumu mau e feaa ˈi ratou. Ei hiˈoraa, te patoi mau ra anei iho â ta outou tamaiti i ta te Bibilia e parau ra aore ra te mǎtaˈu noa ra o ˈna i te poro i te tahi atu mau tamarii? Te feaa mau ra anei iho â ta outou tamahine e mea î i te paari ta te Atua mau faaueraa aore ra te moemoe noa ra o ˈna no te mea ua tuuhia o ˈna i te hiti?

16, 17. E nafea te mau metua e nehenehe ai e tauturu i ta ratou tamarii ia faatupu i to ratou iho mau taairaa e o Iehova?

¹⁶ E nafea ia tauturu i ta outou mau tamarii ia papu e tei roto ratou i te parau mau? Ua tia i te metua e rave rahi ia tauturu i ta ratou tamarii ma te tuu atu i teie mau uiraa: “Mea ohie anei no oe ia riro ei Kerisetiano aore ra mea fifi? I to oe manaˈo, eaha te mau maitai ia riro ei Kerisetiano? Eaha te mau fifi? Eaha to oe  manaˈo i te mau maitai ta tatou e fanaˈo ra i teie nei e e fanaˈo i muri aˈe? Mea rahi aˈe anei te reira ia faaauhia i te mau fifi?” A tuu atu i teie mau uiraa ma te faaohipa i ta outou iho mau parau. A paraparau ma te haavare ore, te mǎrû e te au. Eiaha râ mai te huru ra e te faahapa ra outou ia ratou. E nehenehe atoa e tauaparau i nia i te Mareko 10:29, 30. E hinaaro paha vetahi feia apî e papai i roto e piti tapura i te mau maitai ia riro ei Kerisetiano e i te mau fifi. E tauturu te reira ia outou e i ta outou mau tamarii ia ite eaha te mau fifi ta ratou e faaruru ra e e nafea ia faaafaro i te reira. I te mea e mea faufaa ia haapii i te buka Bibilia haapii e te buka “Te here o te Atua” e te taata e anaanatae ra i te parau mau, e ere anei ïa i te mea faufaa roa ˈtu â ia na reira e ta outou iho mau tamarii? Te na reira ra anei outou?

¹⁷ A paari mai ai ratou, na ta outou iho mau tamarii e faaoti e tavini ia Iehova aore ra eita. E ere no te mea ua faaoti outou e tavini ia Iehova e e na reira atoa ratou. Mea faufaa ia faatupu ta outou mau tamarii i to ratou iho taairaa e o Iehova. (Mas. 3:1, 2) E nafea mai te peu e te fifi ra ta outou tamarii i te haafatata ˈtu i te Atua? A faaitoito ia ˈna ia hiˈopoa i ta ˈna mau tiaturiraa e ia uiui: ‘Nafea vau e ite ai e te vai mau ra te Atua? Nafea vau e ite ai e te tâuˈa ra Iehova ia ˈu? Te tiaturi mau ra anei au e e maitaihia vau i te faaroo i ta te Atua mau faaueraa?’ E te mau metua, a riro ei tiai mamoe maitai e a aratai mǎrû noa i ta outou mau tamarii. A tauturu ia ratou ia papu e o te taviniraa ia Iehova te huru oraraa maitai roa ˈˈe. *—Roma 12:2.

18. E nafea te mau metua e nehenehe ai e pee i te hiˈoraa o Iehova, te Tiai mamoe Rahi?

¹⁸ E hinaaro te mau Kerisetiano mau atoa e pee i te hiˈoraa o te Tiai mamoe Rahi ra o Iehova. (Eph. 5:1; Pet. 1, 2:25) Mea faufaa roa ia matau maitai te mau metua i ta ratou nǎnǎ, oia hoi ta ratou mau tamarii here. Mea faufaa roa ia aratai te mau metua i ta ratou tamarii ia nehenehe ratou e fanaˈo i te mau haamaitairaa mure ore ta te Atua e fafau ra. A rave i tei nehenehe no te haapao i ta outou mau tamarii mai te tiai mamoe e no te haapii ia ratou ia here ia Iehova!