1. Eaha to Iehova manaˈo i ta ˈna ohipa? Eaha ïa ta ˈna i rave?

 TE OAOA nei Iehova i ta ˈna ohipa. (Sal. 135:6; Ioa. 5:17) Te hinaaro nei oia ia oaoa te mau melahi e te taata i ta ratou ohipa. No reira o ˈna i horoa ˈtu ai i te ohipa au mau e te mauruuru. Ua faaohipa atoa Iehova i ta ˈna Tamaiti fanau tahi i roto i ta ˈNa ohipa poieteraa. (A taio i te Kolosa 1:15, 16.) Te faaite maira te Bibilia e hou oia a haere mai ai i te fenua, tei pihai iho Iesu i te Atua ei “rave ohipa aravihi.”—Mas. 8:30, Traduction du monde nouveau.

2. E nafea tatou e ite ai e e ohipa faufaa e te mauruuru noa ta te mau melahi?

² Mai te Genese e tae atu i te Apokalupo, te faataa ra te Bibilia e ua horoa noa Iehova i te ohipa i te mau melahi. A hara ˈi e a tuuhia ˈi Adamu raua Eva i rapaeau i te paradaiso, ua horoa Iehova i te tahi ohipa i te mau melahi. I roto i te Genese, te taio nei tatou e ua “tuu [te Atua] i te pae i te hitia o te râ i taua ô i Edene ra, te kerubi ma te ˈoˈe ura e fariuriu haere, ei tiai i te eˈa i te raau ora.” (Gen. 3:24) E i roto i te Apokalupo, te haapii nei tatou e “ua tono” Iehova “i tana melahi e faaite i tana mau tavini i te mau mea e fatata i te tupu.”—Apo. 22:6.

3. Ei taata, mea nafea Iesu i te peeraa i te hiˈoraa o to ˈna Metua?

³ Ei taata, ua rave Iesu ma te oaoa i te ohipa ta Iehova i horoa ia ˈna. E ua pee o ˈna i te hiˈoraa o to ˈna Metua ma te horoa i te ohipa faufaa i ta ˈna mau pǐpǐ. Ia oaoa ratou i ta ratou ohipa, ua parau o ˈna: “Amene, amene, e parau atu vau ia outou, O te faaroo mai ia ˈu ra e rave atoa oia i teie nei mau ohipa ta ˈu e rave nei, e e rahi atu â ta ˈna e rave i teie, no te mea te haere nei au i tau Metua ra.” (Ioa. 14:12) Ua tauturu Iesu i ta ˈna mau pǐpǐ ia taa e mea ru ta ratou ohipa a faataa ˈi: “E rave au i te ohipa a tei tono mai ia ˈu nei ra, oi vai aˈe te ao; te fatata mai nei hoi te rui, aore roa e taata e ohipa i reira.”—Ioa. 9:4.

4-6. (a) No te aha tatou e mauruuru ai e ua rave o Noa e Mose i ta Iehova i parau ia raua? (b) Eaha na faahopearaa e piti o te mau ohipa ta te Atua i horoa i te taata?

⁴ Na mua roa ˈˈe Iesu a haere mai ai i te fenua, ua horoa Iehova i te ohipa mauruuru mau i te taata. Noa ˈtu e aita Adamu raua Eva i faaoti i ta raua ohipa, ua faaoti te taata e rave rahi i ta te Atua i faaue ia ratou ia rave. (Gen. 1:28) Ua horoa Iehova ia Noa i te mau faaueraa taa maitai no nia i te araka e hamani ia ora mai oia e to ˈna utuafare i te diluvi. Ua rave o Noa i te mau mea atoa ta Iehova i parau. Te ora nei tatou i teie mahana no te mea ua pee maite oia i ta Iehova mau faaueraa.—Gen. 6:14-16, 22; Pet. 2, 2:5.

⁵ Ua horoa Iehova ia Mose i te mau faaueraa taa maitai no nia i te hamaniraa i te sekene e te faanahoraa i te autahuˈaraa. Ua rave Mose i te mau mea atoa ta Iehova i parau atu ia ˈna. (Exo. 39:32; 40:12-16) Eaha te haapii mai i te ohipa puai a Mose e i to ˈna auraro? Mai ta te aposetolo Paulo i faataa, ua faataipe te sekene e te autahuˈaraa i “te mau mea maitatai a muri atu.”—Heb. 9:1-5, 9; 10:1.

⁶ A tupu mǎrû noa ˈi ta te Atua opuaraa, ua fanaˈo ta ˈna mau tavini i te ohipa rau. Noa ˈtu e ua taui paha te ohipa i horoahia ˈtu, ua faahanahana noa te reira ia Iehova e ua haamaitai i te taata. Tera te nehenehe e parau no te ohipa ta Iesu i rave hou a haere mai ai i te fenua e a ora ˈi oia ei taata. (Ioa. 4:34; 17:4) I teie mahana, te faahanahana nei te ohipa ta Iehova i horoa mai ia ˈna. (Mat. 5:16; a taio i te Korinetia 1, 15:58.) No te aha e parau ai mai te reira?

7, 8. (a) A faataa na i te ohipa ta te mau Kerisetiano i teie mahana e oaoa nei i te rave. (b) Ia aha ia horoa mai Iehova i te aratairaa?

⁷ E fanaˈoraa taa ê mau â e ua ani Iehova i te mau taata tia ore ia tavini ia ˈna ei hoa rave ohipa no ˈna. (Kor. 1, 3:9) Te apiti nei vetahi mau Kerisetiano i te ohipa paturaa, mai ia Noa e o Mose. Te tauturu nei vetahi i te patu i te mau Piha tairururaa, Piha a te Basileia e piha a te amaa. E mai te peu e te faaapî nei oe i te hoê Piha a te Basileia i ǒ oe aore ra  te patu nei i te pu rahi i Warwick (New York), a poihere i ta oe fanaˈoraa taa ê! (A hiˈo i te hohoˈa matamua.) E taviniraa moˈa te reira. O vetahi noa paha te nehenehe e apiti i te ohipa paturaa. Teie râ, o te taatoaraa o te mau Kerisetiano te nehenehe e apiti i te ohipa paturaa pae varua, oia hoi te ohipa pororaa. E faahanahana te reira ia Iehova e e haamaitai i te taata. (Ohi. 13:47-49) Na te faanahonahoraa a te Atua e aratai nei i te ohipa pororaa. Te auraa ïa e i te tahi taime, e anihia mai ia haere i roto i te tahi atu huru taviniraa.

⁸ Ua hinaaro noa iho â te mau tavini taiva ore a Iehova e pee i ta ˈna aratairaa. (A taio i te Hebera 13:7, 17.) Eita paha tatou e taa i te mau tumu atoa e tuuhia ˈi tatou i roto i te tahi atu huru taviniraa aore ra e fanaˈo i te aratairaa apî. E ohipa amui râ tatou e o Iehova. Ua ite hoi tatou e no ǒ mai te mau tauiraa ia ˈna ra e e mea maitai noa te mau faahopearaa.

9. Eaha te hiˈoraa maitai ta te mau matahiapo e horoa i te amuiraa?

⁹ E itehia te hinaaro puai o te mau matahiapo e rave i to Iehova hinaaro a aratai ai ratou i te amuiraa. (Kor. 2, 1:24; Tes. 1, 5:12, 13) Te oaoa nei te mau matahiapo i te ohipa puai e i te pee i te aratairaa e te haapii oioi nei ratou i te mau ravea apî no te poro. Noa ˈtu e ua feaa rii vetahi a faanaho ai i te pororaa na roto i te niuniu paraparau, i te uahu aore ra na te mau aroâ, ua ite ratou i te mau faahopearaa maitai. Ei hiˈoraa, ua faaoti e maha pionie i Heremani e poro i te mau vahi tapihooraa tei ore i porohia mea maoro i teie nei. Ua parau hoê o ratou, o Michael te iˈoa, e ua mǎtaˈu rii ratou no te mea a tahi ra ratou e tamata faahou ai i teie huru taviniraa. Te na ô ra o ˈna: “Ua ite paha Iehova i te reira, e taviniraa au mau hoi ta matou i fanaˈo i tera poipoi te ore e moehia. Ua oaoa mau matou i te peeraa i te aratairaa i roto i Ta tatou taviniraa i te Basileia e i te turuiraa i nia ia Iehova!” Te hinaaro ra anei oe e tamata i te mau ravea pororaa apî i roto i ta oe tuhaa fenua?

10. Eaha te mau tauiraa ta te faanahonahoraa i rave i te mau matahiti i mairi aˈenei?

 ¹⁰ I te tahi taime, e ravehia te mau tauiraa i te Betela. Ei hiˈoraa, i te mau matahiti i mairi aˈenei, ua opanihia te tahi mau amaa nainai e ua afaihia ta ratou ohipa i te mau amaa rahi aˈe. Ua rave ïa te mau Kerisetiano e ohipa ra i roto i tera mau amaa i te tahi mau faatanoraa. Ua ite râ ratou i muri aˈe i te mau maitai o tera mau tauiraa. (Koh. 7:8) Te oaoa nei teie mau rave ohipa itoito i te tuhaa ta ratou e rave nei i roto i te aamu o teie tau o te nunaa o Iehova!

11-13. Eaha te mau fifi ta vetahi i ite a rave ai te faanahonahoraa i te tahi mau tauiraa?

¹¹ E nehenehe e huti mai i te tahi mau haapiiraa faufaa i te mau taeae e tuahine tei tavini i te mau amaa tei amuihia i te tahi atu. Mea rahi o ratou tei tavini e rave rahi matahiti i roto i teie mau amaa. Ua anihia na hoa faaipoipo tei tavini na i roto i te hoê Betela nainai ia haere i te Betela i Mehiko. Mea rahi roa ˈˈe te feia e rave ra i te ohipa i ǒ. Te na ô ra o Rogelio, te tane: “Mea fifi mau ia faarue i te utuafare e te hoa.” No Juan, te tahi atu taeae i te Betela tei anihia ia haere i Mehiko, mai te huru ra ïa e ua haamata faahou o ˈna i te hoê oraraa apî. Te na ô ra o ˈna: “E mea tia ia faatupu faahou i te mau taairaa apî. E titau te reira ia faatano atu i te mau taˈere e huru feruriraa apî.”

¹² A amuihia ˈi vetahi mau amaa i Europa, ua anihia i te melo e rave rahi o te mau amaa tei opani ia haere i te amaa i Heremani. Ua faaruru atoa ratou i te mau fifi. E ere i te mea ohie ia faarue i te vahi i reira oe i te paariraa mai. Ua mihi vetahi no Helevetia i te mau mouˈa Alpes e vetahi no Auteteria i te hoê utuafare o te Betela nainai aˈe.

¹³ Ua rave te mau melo o te Betela o tei tonohia i roto i te hoê amaa i te fenua ê i te tauiraa e rave rahi. E mea tia ia haamatau ratou i te hoê fare apî, te hoa rave ohipa apî e peneiaˈe i te hoê hopoia apî. Oia atoa i te hoê amuiraa apî, te hoê tuhaa fenua apî e peneiaˈe te hoê reo apî. Mea fifi paha ia rave i teie mau tauiraa. Teie râ, ua na reira e rave rahi o ratou ma te oaoa. No te aha? E faaroo anaˈe vetahi o ratou.

14, 15. (a) Mea nafea e rave rahi i te faaiteraa e te poihere ra ratou i ta ratou fanaˈoraa taa ê e ohipa e o Iehova? (b) Eaha te haapii mai i to ratou hiˈoraa?

¹⁴ Te na ô ra Grethel: “Ua farii au i te aniraa no te mea o te ravea teie e faaite ai au ia Iehova e aita to ˈu here ia ˈna i taotiahia i te hoê fenua, i te hoê paturaa aore ra i te tahi hopoia.” Te parau ra Dayska: “I to ˈu haamanaˈoraa e no ǒ mai teie titau-manihini-raa ia Iehova ra, ua farii au i te reira ma te oaoa.” Te manaˈo atoa ïa o André raua Gabriela o te parau ra: “A tupu ai te reira, ua ite mâua i te tahi atu ravea no te tavini ia Iehova ma te tuu i to mâua mau hinaaro i te hiti.” No ratou, mea maitai aˈe eiaha e patoi i te mau tauiraa ta te faanahonahoraa a  Iehova e rave. Ia farii râ tatou i te reira ma te oaoa.

¹⁵ A amuihia ˈi te mau amaa, ua tonohia vetahi ei pionie. Tera ïa tei tupu no te taeae e tuahine e rave rahi tei ohipa na i te mau amaa i Danemata, Norevetia e Tuete. Ua amuihia teie mau amaa no te haamau i te amaa no Scandinavie. Te parau ra na hoa faaipoipo o Florian raua Anja: “Ua hiˈo mâua i ta mâua hopoia apî ei tautooraa oaoa mau. Noa ˈtu eaha te vahi e tavini ai, mea faahiahia roa no mâua ia faaohipahia e Iehova. E nehenehe iho â e parau e ua haamaitai-rahi-hia mâua!” E ere te rahiraa o tatou i roto i tera tupuraa. Teie râ, e nehenehe tatou e pee i te huru feruriraa maitai o teie mau taeae e tuahine e e tuu i te mau ohipa taaihia i te Basileia na mua roa. (Isa. 6:8) E nehenehe tatou e papu e e haamaitai noa iho â Iehova i te feia e poihere ra i ta ratou fanaˈoraa taa ê e ohipa e o ˈna noa ˈtu te vahi.

16. (a) Eaha ta te Galatia 6:4 e parau maira ia rave? (b) Eaha ta tatou fanaˈoraa taa ê rahi roa ˈˈe?

¹⁶ No to tatou huru tia ore, e pinepine tatou i te faaau ia tatou i te tahi atu. Te faaite mai nei râ te Parau a te Atua ia haapao i ta tatou iho e nehenehe e rave. (A taio i te Galatia 6:4.) Aita tatou pauroa e nehenehe e riro mai ei matahiapo, pionie, mitionare aore ra melo o te Betela. E fanaˈoraa taa ê au mau teie. Te fanaˈoraa taa ê rahi roa ˈˈe râ ta tatou pauroa e fanaˈo nei, o te riroraa ïa ei taata poro i te parau apî oaoa, te hoê hoa rave ohipa no Iehova. E poihere anaˈe i teie fanaˈoraa taa ê!

17. I roto i teie ao, eaha te mau haafifiraa ta tatou e farerei? No te aha râ eiaha ˈi e paruparu?

¹⁷ I roto i teie nei ao, eita ta tatou e nehenehe e tavini ia Iehova mai ta tatou e hinaaro ra. Tei roto paha tatou i te mau tupuraa te ore e nehenehe e taui  no te mau hopoia utuafare aore ra te maˈi. Eiaha râ tatou e paruparu. Noa ˈtu eaha te fifi ta tatou e faaruru ra, e nehenehe tatou e poro i te iˈoa o Iehova e i to ˈna Basileia. Te mea faufaa aˈe, o te raveraa ïa i ta tatou e nehenehe no Iehova, mai te pureraa ia ˈna no te tauturu i te mau Kerisetiano o te nehenehe e tavini rahi aˈe ia ˈna. A haamanaˈo, mea faufaa roa no Iehova te taata atoa o te arue ra i to ˈna iˈoa!

18. Eaha ta tatou e tiai nei i te fanaˈo? Eaha râ te fanaˈoraa taa ê rahi ta tatou e fanaˈo aˈena ra?

¹⁸ Te faatia ra Iehova ia riro tatou ei hoa rave ohipa no ˈna noa ˈtu to tatou huru tia ore. E fanaˈoraa taa ê faahiahia mau ia ohipa e to tatou Atua i teie mau mahana hopea nei! Te tiai nei tatou i te ora mau i a muri aˈe i reira tatou e ite ai i te hoê oraraa oaoa mau mai tei ore e itehia i teie mahana. Fatata roa Iehova, i roto i ta ˈna ao apî, i te haamaitai ia tatou e te ora mure ore oaoa e te hau.—Tim. 1, 6:18, 19.

19. Eaha te a muri aˈe oaoa ta Iehova e fafau ra?

¹⁹ Ua fatata roa te ao apî ta te Atua i fafau. E haamanaˈo anaˈe i ta Mose i parau i te mau Iseraela na mua noa ˈˈe a tomo ai i te Fenua tǎpǔhia: “E na to Atua na Iehova e haamaitai roa mai i te mau ohipa atoa a to rima e rave ra.” (Deut. 30:9) I muri iho ia Aramagedo, e horoa Iehova i te fenua i to ˈna mau hoa rave ohipa, mai ta ˈna i fafau. Ta tatou hopoia apî i tera taime, o te faariroraa ïa i te fenua ei paradaiso nehenehe mau!