I TE Mahana piti 18 no Mati 2014, i te 79raa o to ˈna matahiti, ua faaoti te hoê melo o te Tino aratai a te mau Ite no Iehova ra o Guy Hollis Pierce i ta ˈna hororaa i te fenua. Ei taeae o te Mesia, ua faatia-faahou-hia oia e ua fanaˈo i ta ˈna haamaitairaa i te raˈi.—Heb. 2:10-12; Pet. 1, 3:18.

Ua fanauhia Guy Pierce i Auburn i Kalifonia (Marite) i te 6 no Novema 1934 e ua bapetizohia i 1955. Ua faaipoipo o ˈna i ta ˈna vahine here ra o Penny i 1977 e ua tamariihia raua. E au atoa o ˈna i te papa no e rave rahi. I 1982, ua haamata raua Penny i te taviniraa pionie. E i 1986, ua tavini oia ei tiaau haaati i Marite 11 matahiti i te maoro.

I 1997, ua haamata Guy raua Penny Pierce i te tavini ei melo o te utuafare o te Betela i Marite. Ua ohipa taeae Pierce i roto i te Tuhaa taviniraa e i 1998 ua maitihia ei tauturu a te Tomite o te mau rave ohipa a te Tino aratai. I te 2 no Atopa 1999, i te rururaa matahiti, ua faaitehia e ua maitihia o ˈna ei melo o te Tino aratai. I te mau matahiti i mairi, ua tavini o ˈna e te mau Tomite no te mau rave ohipa, no te papairaa, no te piaraa e o te mau tiaau.

E mata ataata to taeae Pierce e mea hoata atoa. Eita te taata e huru ê i te haere ia ˈna ra noa ˈtu nohea mai ratou e to ratou taˈere. Ta te taata râ i au roa ia ˈna, o to ˈna ïa here, to ˈna haehaa, to ˈna faatura i ta te Atua mau ture e aratairaa e to ˈna tiaturi papu ia Iehova. E pinepine taeae Pierce i te parau e mea papu aˈe te tupuraa o te mau parau fafau a Iehova i te hitiraa o te mahana. E ua hinaaro oia ia ite te taata atoa i te reira.

Ua ohipa puai taeae Pierce no Iehova, mai te aahiata e e pinepine tae roa ˈtu i te maororaa po. Ua revareva o ˈna na te ao no te faaitoito i to ˈna mau taeae e tuahine Kerisetiano. E taime noa iho â to ˈna no te feia atoa e ani i ta ˈna tauturu aore ra i te tahi aˈoraa. E rave rahi matahiti atoa i muri aˈe, te haamanaˈo ra te mau hoa haamori i to ˈna farii maitai, to ˈna auhoaraa e ta ˈna mau faaitoitoraa niuhia i nia i te Bibilia.

E mihi te vahine o to tatou taeae e hoa here ia ˈna, oia atoa ta ˈna na tamarii e ono, ta ˈna mau mootua e hina e ta ˈna tamarii pae varua e rave rahi. Na Mark Sanderson, te tahi atu melo o te Tino aratai, i vauvau i te oreroraa parau hunaraa a te taeae Pierce i te Betela i Brooklyn i te Mahana maa 22 no Mati 2014. Ua faahiti o ˈna i te tiaturiraa e ora i te raˈi o te taeae Pierce e ua taio i ta Iesu mau parau: “E rave rahi te parahiraa mau i te fare o tau Metua ra . . . E ua oti anaˈe i te faaauhia e au te hoê vahi no outou ra, e hoˈi mai au e aratai ia outou i o ˈu ra; ei reira atoa outou i te vahi e parahihia e au ra. Ua ite hoi outou i teie nei vahi ta ˈu e haere nei, e ua ite hoi outou i te eˈa.”—Ioa. 14:2-4.

E mihi mau tatou ia taeae Pierce. Te oaoa nei râ tatou e ua ‘ite o ˈna i te eˈa’ o to ˈna “parahiraa” tamau.