Ua taa anei ia oe te auraa?
“Haamaramarama maira oia ia ratou, ia taa ia ratou te auraa o te mau papairaa.”—LUKA 24:45, Te Faufaa Api.
1, 2. Mea nafea Iesu i te faaitoitoraa i ta ˈna mau pǐpǐ i te mahana o to ˈna tia-faahou-raa?
TE HAERE avae ra e piti pǐpǐ a Iesu i te hoê oire iti 11 kilometera i te atea ia Ierusalema. Te oto ra raua no te mea ua pohe Iesu e aitâ raua i ite e ua faatia-faahou-hia mai oia. Fa aˈera Iesu ia raua e haere atura e o raua. “Ua faaite maira oia ia raua i te auraa i te mau parau no ˈna iho i roto i te mau parau atoa i papaihia ra, mai ia Mose mai â e tae roa ˈˈera i te mau peropheta atoa.” (Luka 24:13-15, 27) Ua tamahanahanahia raua e ua î ihora to raua aau i te anaanatae no te mea ua ‘faaite atu o ˈna i te auraa’ o te mau Papai.—Luka 24:32.
2 I tera ahiahi, ua hoˈi teie na pǐpǐ i Ierusalema e ua faatia i tei tupu i te mau aposetolo. A paraparau noa ˈi ratou, fa aˈera Iesu ia ratou pauroa. Ua mehameha te mau aposetolo e ua haamata i te feaa e o Iesu mau anei tera. Te faataa maira te Bibilia mea nafea o ˈna i te faaitoitoraa ia ratou: “Haamaramarama maira oia ia ratou, ia taa ia ratou te auraa o te mau papairaa.”—Luka 24:45, Te Faufaa Api.
3. No te aha tatou e nehenehe ai e paruparu i roto i ta tatou taviniraa? E nafea râ ia oaoa noa?
3 I te tahi taime, e oto atoa paha tatou mai te mau pǐpǐ. Noa ˈtu e te tavini maite nei tatou ia Iehova, e nehenehe tatou e paruparu ia ore te taata e farii i ta tatou pororaa. (Kor. 1, 15:58) Aore ra te manaˈo nei paha tatou e aita ta tatou mau piahi Bibilia e haere roa ra i mua i te pae varua. Peneiaˈe ua patoi roa vetahi o ratou ia Iehova. E nafea ia oaoa noa i roto i ta tatou taviniraa? Te tahi tauturu, o te taa-maitai-raa ïa i te auraa o ta Iesu mau faahohoˈaraa. E hiˈopoa mai tatou e toru, oia atoa te mau haapiiraa e huti mai.
TE TAATA UEUE HUERO E TAOTO RA
4. Eaha te auraa o ta Iesu faahohoˈaraa o te taata ueue huero?
4 A taio i te Mareko 4:26-29. Eaha te auraa o ta Iesu faahohoˈaraa o te taata ueue huero e taoto ra? Te faahohoˈa ra te taata ueue huero i te feia poro i te Basileia e te huero i te poroi ta ratou e poro ra i te taata aau maitai. Mai te mau taata atoa, ‘e taoto teie taata ueue huero i te rui e e ara i te ao.’ Mai te tanuraa i te ootiraa, e titauhia te taime ia ‘tupu te huero.’ E na tera huero “iho” e tupu mǎrû noa mai. Oia atoa, e paari mǎrû noa mai te hoê taata i te pae varua aore ra e haafatata mǎrû noa o ˈna ia Iehova. Ua haere roa anaˈe o ˈna i mua no te faaoti e tavini i te Atua, e hotu mai o ˈna ma te pûpû i to ˈna ora ia Iehova a bapetizo atu ai.
E faatupu Iehova i te parau mau i roto i te aau o te feia haehaa
5. No te aha Iesu i faatia ˈi i te faahohoˈaraa o te taata ueue huero e taoto ra?
5 No te aha Iesu i faatia ˈi i teie faahohoˈaraa? Ua hinaaro Iesu ia ite tatou e na Iehova e faatupu i te parau mau i roto i te aau o te feia haehaa. (Ohi. 13:48; Kor. 1, 3:7) E ueue e e faarari tatou i te huero, eita râ tatou e nehenehe e turai aore ra e haavitiviti i te tupuraa. Mai te taata o te faahohoˈaraa, eita tatou e ite e nafea te huero o te Basileia e tupu ai. A rave ai i ta tatou ohipa o te mau mahana atoa, eita paha tatou e ite e te tupu ra tera huero i roto i te tahi taata. Teie râ, i muri aˈe, e hotu mai te reira e e amui mai te pǐpǐ apî ia tatou i roto i te ohipa ootiraa.—Ioa. 4:36-38.
6. Eaha te farii no nia i te haereraa i mua o te hoê piahi Bibilia?
6 Eaha te haapii mai i teie faahohoˈaraa? A tahi, eita tatou e nehenehe e haavitiviti i te haereraa i mua o te hoê piahi Bibilia i roto i te parau mau. Noa ˈtu e e horoa tatou i tei nehenehe no te tauturu e no te turu ia ˈna, eiaha roa ˈtu tatou e faahepo ia ˈna ia bapetizo. E farii anaˈe râ ma te haehaa e o ˈna anaˈe te nehenehe e faaoti e pûpû i to ˈna ora i te Atua. E farii Iehova i ta tatou pûpûraa ia ˈna ia here mau tatou ia ˈna.—Sal. 51:12; 54:6; 110:3.
7, 8. (a) A faataa na eaha te tahi atu mau haapiiraa te huti mai i te faahohoˈaraa a Iesu o te taata ueue huero e taoto ra. (b) Eaha ta te reira e haapii maira no nia ia Iehova e Iesu?
7 Te piti, e tauturu mai te taaraa i te haapiiraa o teie faahohoˈaraa ia ore e haaparuparu aita anaˈe tatou e ite oioi i te maitai o ta tatou ohipa haapiiraa. Ia faaoromai râ tatou. (Iak. 5:7, 8) Mai te peu e ua rave tatou i tei maraa no te tauturu i te piahi e aita râ te parau mau i rahi mai i roto i to ˈna aau, e ere i te auraa e e ere tatou i te taata haapii maitai. E vaiiho Iehova i te huero o te parau mau ia rahi mai i roto noa i te aau o te hoê taata haehaa o te ineine i te rave i te mau tauiraa. (Mat. 13:23) Eiaha ïa tatou e manaˈo e ua taaihia te manuïaraa o ta tatou taviniraa i te rahiraa taata tei bapetizo ia ratou. Eita hoi Iehova e faito i te manuïaraa o ta tatou taviniraa i te huru o te taata i mua i ta tatou haapiiraa. O ta tatou râ mau tutavaraa ta ˈna e haafaufaa nei.—A taio i te Luka 10:17-20; Korinetia 1, 3:8.
Eita Iehova e faito i te manuïaraa o ta tatou taviniraa i te huru o te taata i mua i ta tatou haapiiraa
8 Te toru, eita e nehenehe e ite noa i te mau tauiraa e tupu ra i roto i te aau o te hoê taata. Ei hiˈoraa, ua parau na hoa faaipoipo o tei haapii e te hoê mitionare e ua hinaaro raua e riro mai ei feia poro bapetizo-ore-hia. Ua haamanaˈo oia ia raua e e mea titauhia na mua ia faaea raua i te puhipuhi i te avaava. Ua maere roa oia i to raua parauraa e ua faaea aˈena raua e rave rahi avaˈe i teie nei. Ua taa ia raua e noa ˈtu e e puhipuhi raua i te avaava ma te huna, e ite mai Iehova e mea riri na ˈna te feia haavarevare. Ua faaoti ïa raua e puhipuhi i te avaava i mua i te mitionare aore ra e faaea roa i tera peu. Noa ˈtu e aita te mitionare i ite i te tauiraa rahi ta teie na hoa faaipoipo i rave, ua tauturu to raua here ia Iehova o te rahi noa ˈtura ia rave i te mau faaotiraa tano.
TE UPEˈA TORO
9. Eaha te auraa o te faahohoˈaraa a Iesu o te upeˈa toro?
9 A taio i te Mataio 13:47-50. Eaha te auraa o te faahohoˈaraa a Iesu o te upeˈa toro? Ua parau Iesu e e au te pororaa o te poroi o te Basileia i te tuuraa i te hoê upeˈa toro rahi i roto i te miti. E “iˈa e rave rahi te huru” te noaahia e te hoê upeˈa toro. Oia atoa, e mirioni taata ua rau te huru te farii ra i ta tatou ohipa pororaa. (Isa. 60:5) Te haapapu ra na mirioni taata e haere maira i te mau matahiti atoa i ta tatou mau tairururaa e Oroa haamanaˈoraa i te reira. E au te tahi o teie mau taata i te iˈa “maitatai” e e riro mai ratou ei melo o te amuiraa Kerisetiano. E te tahi atu, e au ïa ratou i te iˈa “iino” e eita Iehova e farii ia ratou.
I muri iho i te taioraa i te Mataio 13:47-50, a hiˈo na i te tahi tupuraa no teie nei tau
E tavini te feia mea au na ratou te parau mau ia Iehova (A hiˈo i na paratarafa 9-12)
10. No te aha Iesu i faatia ˈi i te faahohoˈaraa o te upeˈa toro?
10 No te aha Iesu i faatia ˈi i teie faahohoˈaraa? Aita te faataa-ê-raa i te iˈa i roto i te faahohoˈaraa i taaihia i te haavaraa hopea i te ati rahi. Te faataa nei râ te reira i te ohipa e tupu i te mau mahana hopea o teie nei ao. Ua faaite Iesu e e ere pauroa te taata o te au i te poroi o te Basileia te hinaaro e riro ei tavini a Iehova. Aita te taata e rave rahi o tei haere mai i te mau putuputuraa aore ra o tei haapii i te Bibilia i ineine i te pûpû i to ratou ora ia Iehova. (Arii 1, 18:21) Ua faaea atoa vetahi i te haere mai i te mau putuputuraa. Ua paari vetahi feia apî i roto i te parau mau. Aita râ ratou iho i haapii mau i te here ia Iehova. Ua faataa maitai Iesu e na tatou taitahi e rave i ta tatou iho faaotiraa. Ia rave tatou i te faaotiraa tano, e hiˈo mai Iehova ia tatou ei taata “hinaarohia.”—Hag. 2:7.
11, 12. (a) E nafea tatou e faufaahia ˈi i te faahohoˈaraa o te upeˈa toro? (b) Eaha ta te reira e haapii maira no nia ia Iehova e Iesu?
11 E nafea tatou e faufaahia ˈi i te faahohoˈaraa o te upeˈa toro? Ia taa ia tatou te haapiiraa o teie faahohoˈaraa, eita tatou e oto aore ra e paruparu ia ore te hoê piahi Bibilia aore ra ta tatou tamarii e hinaaro e tavini ia Iehova. Ua rave paha tatou i tei nehenehe no te haapii ia ˈna. Eita te hoê taata e riro ei hoa no Iehova no te mea noa ua farii oia i te haapii i te Bibilia aore ra ua paari oia i roto i te parau mau. Ia ore oia e hinaaro e farii i ta Iehova aratairaa, eita ta ˈna e nehenehe e riro ei tavini a Iehova.
12 Te auraa anei ïa e eita roa ˈtu te feia o tei faarue i te parau mau e fariihia ia hoˈi mai i roto i te amuiraa? Te auraa atoa anei e e aita e ravea no te hoê taata tei ore â i pûpû i to ˈna ora ia Iehova? E ere. E nehenehe noâ o ˈna e riro ei hoa no Iehova hou a haamata ˈi te ati rahi. Te pii nei Iehova ia ratou: “E fariu mai outou ia ˈu, e na ˈu e fariu atu ia outou.” (Mal. 3:7) Te faataa-maitai-hia ra te reira i roto i te faahohoˈaraa a Iesu o te tamaiti haamâuˈa faufaa.—A taio i te Luka 15:11-32.
TE TAMAITI HAAMÂUˈA FAUFAA
13. Eaha te auraa o te faahohoˈaraa o te tamaiti haamâuˈa faufaa?
13 Eaha te auraa o ta Iesu faahohoˈaraa o te tamaiti haamâuˈa faufaa? Te faahohoˈa ra te metua tane î i te aumihi i to tatou Metua î i te here ra o Iehova. E te tamaiti tei haamâuˈa i ta ˈna faufaa, i te feia ïa o tei faarue i te amuiraa. Ua riro ratou ei taata o te ao a Satani o tei au i “te fenua roa” e o tei atea roa ia Iehova. (Eph. 4:18; Kol. 1:21) Ua ite vetahi o ratou i muri aˈe e ua hape mau ratou e ua faaoti e hoˈi ia Iehova ra. E titauhia te tutavaraa rahi. No to ratou râ haehaa e tatarahapa mau i ta ratou i rave, e faaore Iehova i ta ratou hara e e farii ia ratou ma te oaoa.—Isa. 44:22; Pet. 1, 2:25.
Te hinaaro mau ra Iehova ia hoˈi mai te feia tei faarue ia ˈna
14. No te aha Iesu i faatia ˈi i te faahohoˈaraa o te tamaiti haamâuˈa faufaa?
14 No te aha Iesu i faatia ˈi i teie faahohoˈaraa? Ua faaite Iesu e te hinaaro mau ra Iehova ia hoˈi mai te feia tei faarue ia ˈna. Aita te metua tane i roto i te faahohoˈaraa i faaea i te tiaturi e e hoˈi mai ta ˈna tamaiti. A ite ai o ˈna na “te atea ê” i ta ˈna tamaiti tei hoˈi mai, horo aˈera o ˈna ia ˈna ra. Ua hinaaro te metua tane ia ite ta ˈna tamaiti e te fariihia ra oia ma te oaoa. E turai teie faahohoˈaraa i te feia tei faarue i te parau mau ia hoˈi mai i teie nei iho â taime ia Iehova ra. Peneiaˈe ua ino roa to ratou mau taairaa e o Iehova, ua haama ratou e e ere i te mea ohie ia hoˈi mai. Mea hoona râ te mau tutavaraa. E oaoa Iehova, Iesu e te mau melahi ia hoˈi mai ratou.—Luka 15:11-32.
15, 16. (a) Eaha te mau haapiiraa e huti mai i ta Iesu faahohoˈaraa o te tamaiti haamâuˈa faufaa? A faataa. (b) Eaha ta te reira e haapii maira no nia ia Iehova e Iesu?
15 E nafea e faufaahia ˈi i te faahohoˈaraa o te tamaiti haamâuˈa faufaa? E mea tia ia pee tatou i to Iehova hiˈoraa o te here. Ia hoˈi mai te hoê taata i roto i te amuiraa, eiaha tatou e “faataata parau-tia hua” ia tatou iho a ore atu ai e farii popou ia ˈna. E faaino te reira i to tatou iho auhoaraa e o Iehova. (Koh. 7:16) Te tahi atu haapiiraa e huti mai, o te hiˈoraa ïa i te hoê taata tei faarue i te amuiraa mai “te mamoe i moe.” E mamoe ïa teie te nehenehe e hoˈi mai. (Sal. 119:176) E ia farerei tatou i te hoê taata tei atea ê i te amuiraa e tei ore râ i tiavaruhia, e rave anei tatou i tei nehenehe no te tauturu ia ˈna ia hoˈi mai? E faaite oioi anei tatou i te reira i te mau matahiapo ia nehenehe ratou e tauturu atu? E na reira tatou ia taa maitai e ia faaohipa tatou i te haapiiraa no ǒ mai i te faahohoˈaraa a Iesu.
“E fanaˈoraa taa ê mau ia riro ei melo o te faanahonahoraa a Iehova!”
16 Te mauruuru nei te feia tei hoˈi mai i te aroha hamani maitai e te here o Iehova e i te turu o te amuiraa. Te na ô ra te hoê taeae tei tiavaruhia e 25 matahiti i te maoro: “Mai to ˈu faahoˈiraahia mai, ua rahi atu â to ˈu oaoa a fanaˈo ai au i te mau ‘anotau haumǎrû’ no ǒ mai ia Iehova. (Ohi. 3:19) Te turu e te here mau nei te taatoaraa ia ˈu! E utuafare pae varua faahiahia mau to ˈu i teie nei.” Te parau ra te hoê tuahine apî tei hoˈi mai i muri aˈe i te atea-ê-raa ia Iehova e i te paruparuraa e pae matahiti i te maoro: “Aita ta ˈu e nehenehe e faataa ˈtu eaha te huru a faaitehia mai ai i nia ia ˈu te here ta Iesu i faahiti. E fanaˈoraa taa ê mau ia riro ei melo o te faanahonahoraa a Iehova!”
17, 18. (a) Eaha ta tatou i haapii mai i teie na faahohoˈaraa e toru? (b) Ua faaoti papu tatou i te rave i te aha?
17 Eaha te mau haapiiraa e huti mai i teie mau faahohoˈaraa? A tahi, ua ite mai tatou e eita e nehenehe e haavitiviti i te haereraa i mua o te hoê piahi Bibilia i roto i te parau mau. Na Iehova tera tuhaa. Te piti, mea tano ore ia manaˈo e e hinaaro te feia atoa e amui maira e e haapii ra na muri ia tatou e tavini ia Iehova. E te toru, noa ˈtu e e faarue vetahi ia Iehova, eiaha tatou e faaea i te tiaturi e e hoˈi mai ratou. A hoˈi mai ai ratou, e farii anaˈe ia ratou ma te faaite i to Iehova here.
18 E tamau anaˈe tatou paatoa i te imi i te ite, te haapao maitai e te paari. A taio ai i ta Iesu mau faahohoˈaraa, a uiui: ‘Eaha te auraa o teie faahohoˈaraa? No te aha i papaihia ˈi te reira i roto i te Bibilia? E nafea vau e faaohipa ˈi i te haapiiraa ta ˈu i huti mai? Eaha ta te reira e haapii maira no nia ia Iehova e Iesu?’ A na reira ˈi, e faaite tatou e te taa ra ia tatou te mau parau a Iesu.