A pee i te itoito e te haroaroaraa o Iesu
“O ta outou i hinaaro na, ore noa ˈi te ite ia ˈna; . . . i te faarooraa ˈtu, ore noa ˈi outou i te hiˈo atu ia ˈna i teie nei.”—PET. 1, 1:8.
1, 2. (a) E nafea tatou e fanaˈo ai i te ora mure ore? (b) E nafea tatou e tapea noa ˈi i to tatou tere?
A RIRO mai ai ei Kerisetiano, mai te huru ra e ua haamata tatou i te hoê tere. Ia vai taiva ore tatou i te Atua, e manuïa to tatou tere e e nehenehe tatou e ora e a muri noa ˈtu. Te parau ra Iesu: “Area te mau papu e tae noa ˈtu i te hopea ra, oia te ora.” (Mat. 24:13) Oia mau, ia tae i te hopea o to tatou tere, e mea titauhia ia vai taiva ore noa e tae roa ˈtu i te hopea, te hopea o to tatou oraraa aore ra te hopea o teie nei ao ino. E titauhia râ ia vai ara noa ia ore teie ao ia haafariu ê ia tatou. (Ioa. 1, 2:15-17) E nafea e tapea noa ˈi i to tatou tere?
2 E hiˈoraa tia roa o Iesu no tatou. Ma te haapii i ta te Bibilia e parau ra no nia i te tere aore ra huru oraraa o Iesu, e nehenehe tatou e haapii no nia ia ˈna. E here e e faatupu tatou i te faaroo ia ˈna. (A taio i te Petero 1, 1:8, 9.) Ua parau mai te aposetolo Petero e ua vaiiho mai o Iesu i te hiˈoraa no tatou ia pee. (Pet. 1, 2:21) Ia pee maite tatou i to ˈna hiˈoraa, e faaoromai tatou e tae roa ˈtu i te hopea. * I roto i te tumu parau matamua, ua haapii mai tatou e nafea ia pee i te haehaa e te aroha o Iesu. I roto i teie tumu parau, e haapii mai tatou e nafea ia pee i to ˈna itoito e haroaroaraa.
E TAATA ITOITO O IESU
3. Eaha te itoito, e e nafea tatou e fanaˈo ai i te reira?
3 Te itoito, o te hoê ïa huru aau o te horoa mai i te puai e o te tauturu mai ia faaoromai i te mau fifi. E nehenehe atoa te itoito e tauturu mai ia paturu i te mea maitai, ia vai mǎrû noa e ia vai taiva ore i te Atua i mua i te fifi. Ua taaihia te itoito i te mǎtaˈu, te tiaturiraa e te here. E nafea ïa? Ia mǎtaˈu tatou i te faariri i te Atua, eita tatou e vaiiho i te mǎtaˈu taata ia ohipa i nia ia tatou. (Sam. 1, 11:7; Mas. 29:25) E tauturu mai te tiaturiraa ia Iehova ia tiatonu i to tatou a muri aˈe, eiaha râ i to tatou mau ati. (Sal. 27:14) E turai mai te here pipiri ore ia faaite i te itoito noa ˈtu te hamani-ino-raa. (Ioa. 15:13) E itoitohia tatou a tiaturi ai i te Atua e a pee ai i te hiˈoraa o ta ˈna Tamaiti.—Sal. 28:7.
4. Mea nafea Iesu i te faaiteraa i te itoito i roto i te hiero? (A hiˈo i te hohoˈa matamua.)
4 I te 12raa o to ˈna matahiti, ua faaite Iesu i te itoito ‘i roto i te hiero, a parahi ai oia i ropu i te mau orometua.’ (A taio i te Luka 2:41-47.) Ua ite maitai teie mau orometua i te ture a Mose, oia atoa râ te mau tutuu ati Iuda tei haafifi hoi i te taata ia pee i te Ture. Aita râ to ratou ite i tapea ia Iesu ia paraparau ia ratou. Aita o ˈna i mǎtaˈu. Ua tamau o ˈna i te “ui” ia ratou eiaha te mau uiraa matauhia no ǒ mai i te hoê tamaroa apî mai ia ˈna. Te mau uiraa hohonu râ tei huti i te ara-maite-raa e tei haaferuri i teie mau orometua. E mai te peu e ua tamata te mau orometua i te faahema ia Iesu ma te mau uiraa e tupu ai te aimârôraa, aita ratou i manuïa. Ua maere te feia atoa e te mau orometua “i to ˈna ite e ta ˈna parau.” Ua paturu mau â Iesu i te parau mau itehia i roto i te Parau a te Atua ma te itoito!
5. Mea nafea Iesu i te faaiteraa i te itoito i roto i ta ˈna taviniraa?
5 I roto i ta ˈna taviniraa, ua faaite Iesu i te itoito i roto i te tuhaa rau. Ei hiˈoraa, ua faaite o ˈna i te taata e te haavare ra te mau tia faaroo ia ratou ma te haapii atu i te haapiiraa hape. (Mat. 23:13-36) Aita atoa Iesu i vaiiho i te ao ia haapiˈo ia ˈna. (Ioa. 16:33) Ua tamau noa o ˈna i te poro noa ˈtu te patoiraa. (Ioa. 5:15-18; 7:14) E e piti taime o ˈna i te tamâraa i te hiero ma te tiahi i te feia e hinaaro e haaviivii i te haamoriraa mau i ǒ.—Mat. 21:12, 13; Ioa. 2:14-17.
Ua parau atu Iesu ma te itoito i te tiripuna teitei ati Iuda e o ˈna te Mesia e te Tamaiti a te Atua
6. Mea nafea Iesu i te faaiteraa i te itoito i te mahana hopea o to ˈna ora i te fenua?
6 E hiˈo anaˈe i te itoito o Iesu i te mahana hopea o to ˈna ora i te fenua. Ua ite Iesu eaha te tupu ia taiva Iuda ia ˈna. Noa ˈtu râ, i te oroa Pasa, ua parau o ˈna ia Iuda: “Ta oe e rave ra ia peepee i te rave.” (Ioa. 13:21-27) I te ô i Getesemane, ua parau o ˈna ma te itoito i te mau faehau tei haere mai e tapea ia ˈna e o ˈna o Iesu. Noa ˈtu e ua ite o ˈna fatata o ˈna i te pohe, ua paruru o ˈna i ta ˈna mau pǐpǐ ma te parau i te mau faehau: “E tuu atu ia ratou nei ia haere na.” (Ioa. 18:1-8) I muri aˈe, a uiui ai te tiripuna teitei ati Iuda ia ˈna, ua parau atu Iesu ma te itoito e o ˈna te Mesia e te Tamaiti a te Atua. Aita o ˈna i mǎtaˈu noa ˈtu e ua imi noa te tahuˈa rahi i te tumu no te haapohe ia ˈna. (Mar. 14:60-65) Ua tapea Iesu i to ˈna hapa ore i te Atua e ua pohe i nia i te pou haamauiuiraa. I muri iho i te hutiraa i te aho no te taime hopea, ua tuô o ˈna: “Ua oti.”—Ioa. 19:28-30.
A PEE I TE ITOITO O IESU
7. E te mau taurearea, eaha to outou huru aau ia riro ei Ite no Iehova, e e nafea outou e faaite ai e mea itoito outou?
7 E nafea e pee ai i te itoito o Iesu? I te fare haapiiraa. E taurearea ma, mea itoito outou a parau ai i to outou mau hoa haapiiraa e ia vetahi ê e Ite no Iehova outou. Te faaite nei ïa outou i to outou oaoa ia amo i te iˈoa o Iehova noa ˈtu e e faaooo atu vetahi. (A taio i te Salamo 86:12.) E hinaaro paha vetahi ia tiaturi outou i te tauiuiraa o te mau mea ora. E nehenehe râ outou e tiaturi e e parau mau ta te Bibilia e faaite ra no nia i te poieteraa. E nehenehe e faaohipa i te buka rairai Cinq questions à se poser sur l’origine de la vie no te pahono i te feia e hinaaro i “te tiaturi i roto ia outou.” (Pet. 1, 3:15) E oaoa ïa outou i te ite e ua paturu outou i te parau mau Bibilia ma te itoito!
8. No te aha e nehenehe ai e poro ma te itoito?
8 I roto i ta tatou taviniraa. Ei Kerisetiano mau, mea faufaa ia tamau i te faaite “i te parau a te Fatu [Iehova] ma te mǎtaˈu ore.” (Ohi. 14:3) No te aha e nehenehe ai e poro ma te itoito? A tahi, ua ite tatou e no roto mai ta tatou poroi i te Bibilia. O te parau mau te reira. (Ioa. 17:17) Te piti, ‘e hoa rave ohipa tatou no te Atua’ e ua horoa mai o ˈna i to ˈna varua moˈa no te tauturu mai. (Kor. 1, 3:9; Ohi. 4:31) Te toru, te here nei tatou ia Iehova e i te taata. E hinaaro ïa tatou e rave i tei nehenehe no te faaite i te parau apî oaoa. (Mat. 22:37-39) No to tatou itoito, eita tatou e faaea i te poro. Ua faaoti papu tatou i te haapii i te parau mau i te feia tei “haapourihia,” aore ra tei haavarehia e te mau tia faaroo. (Kor. 2, 4:4) E e tamau tatou i te poro i te parau apî oaoa noa ˈtu e e patoi vetahi ê i ta tatou poroi aore ra e hamani ino mai ia tatou.—Tes. 1, 2:1, 2.
9. E nafea e faaite ai i te itoito i roto i te ati?
9 I roto i te ati. Ia tiaturi tatou i te Atua, e horoa mai o ˈna i te faaroo e te itoito titauhia no te faaoromai i te fifi. Ia pohe te hoê taata herehia, e oto tatou. Eita râ tatou e ere i te tiaturiraa. Ua papu ia tatou e e haapuai mai “te Atua no ˈna anaˈe te mahanahana.” (Kor. 2, 1:3, 4; Tes. 1, 4:13) A maˈihia ˈi aore ra a pepe ai, e mauiui paha tatou. E patoi râ tatou i te rapaauraa atoa ta te Atua e ore e au. (Ohi. 15:28, 29) A hepohepo ai, e ‘faahapa mai paha to tatou aau ia tatou.’ Eita râ tatou e tuu. E tiaturi tatou ia Iehova o “te fatata nei . . . i te feia aau paruparu.” *—Ioa. 1, 3:19, 20; Sal. 34:18.
E TAATA HAROAROA O IESU
10. Eaha te haroaroaraa, e e nafea te hoê Kerisetiano haroaroa e paraparau ai e e haa ˈi?
10 Te haroaroaraa, o te aravihi ïa no te taa i te taa-ê-raa i rotopu i te maitai e te ino a maiti atu ai i te rave i te mea maitai. (Heb. 5:14) E rave te hoê Kerisetiano haroaroa i te mau faaotiraa o te haapaari i to ˈna mau taairaa e te Atua. E haapao maitai o ˈna eiaha e faahuru ê i te tahi atu ma ta ˈna mau parau. Te faaoaoa nei râ o ˈna ia Iehova no te mea te maiti nei o ˈna i te mau parau o te tauturu ia vetahi ê. (Mas. 11:12, 13) Eita o ˈna “e riri vave.” (Mas. 14:29) “E ore e piˈo to ˈna haerea,” oia hoi e rave noa o ˈna i te mau faaotiraa maitai i roto i to ˈna oraraa. (Mas. 15:21) E nafea ia riro ei taata haroaroa? E mea tia ia haapii tatou i te Parau a te Atua e ia faaohipa i ta tatou i haapii mai. (Mas. 2:1-5, 10, 11) E nehenehe atoa e haapii e e pee i to Iesu hiˈoraa tia roa o te haroaroaraa.
11. Mea nafea Iesu i te faaiteraa i te haroaroaraa ma ta ˈna huru paraparau?
11 Ua faaite Iesu i te haroaroaraa i roto i ta ˈna mau parau e haaraa atoa. Ta ˈna huru paraparau. A poro ai i te parau apî oaoa, ua faaohipa Iesu i te mau parau mǎrû i maere ai te feia i faaroo ia ˈna. (Mat. 7:28; Luka 4:22) E pinepine o ˈna i te taio aore ra i te faahiti i te Parau a te Atua. Ua ite maitai o ˈna eaha te irava e faaohipa i roto i tera e tera tupuraa. (Mat. 4:4, 7, 10; 12:1-5; Luka 4:16-21) Ua putapû roa atoa te taata i ta Iesu mau parau a faaroo ai ia ˈna ia faataa i te mau Papai. I muri aˈe i to ˈna tia-faahou-raa, ua paraparau Iesu i na pǐpǐ e piti e haere ra i Emausa. Ua faataa ˈtu Iesu i te auraa o te mau papai te faahiti ra ia ˈna. Ua parau teie na pǐpǐ i muri aˈe: “E ere, e hoa, i anaanatae to tâua aau ia ˈna i paraparau mai ia tâua i te aratia ra, a faaite mai ai ia tâua i te auraa i te mau parau i papaihia ra.”—Luka 24:27, 32.
12, 13. A faataa mai na i te tahi mau hiˈoraa e faaite ra e e ore Iesu e ru i te riri e i to ˈna huru au noa.
12 To ˈna huru aau e haerea. Ua tauturu te haroaroaraa ia Iesu ia “ore e ru i te riri.” (Mas. 16:32) E nehenehe ta ˈna e haavî i to ˈna huru aau e e faaite i te “mǎrû.” (Mat. 11:29) Mea faaoromai noa Iesu i nia i ta ˈna mau pǐpǐ noa ˈtu ta ratou mau hape. (Mar. 14:34-38; Luka 22:24-27) E ua faaea hau noa a hamani-ino-hia ˈi oia.—Pet. 1, 2:23.
13 Ua tauturu te haroaroaraa ia Iesu ia faaite i te huru au noa. Ua taa ia ˈna no te aha i haamauhia ˈi te ture a Mose e ua ohipa te reira i nia i to ˈna huru i nia i te taata. Ei hiˈoraa, a feruri na i te vahine tei ‘pohehia i te tapahi.’ (A taio i te Mareko 5:25-34.) Tei rotopu teie vahine i te hoê nahoa taata, ua tapea o ˈna i te ahu o Iesu e ua ora mai o ˈna. Ia au i te ture a Mose, mea viivii o ˈna. Eiaha roa ˈtu ïa o ˈna ia tapea i te tahi atu. (Lev. 15:25-27) Aita râ Iesu i parau iria ˈtu ia ˈna. No te aha? No te mea ua ite oia e mea faufaa aˈe te mau huru maitatai mai “te aroha, e te haapao mau ra” i te auraro etaeta i te ture a Mose. (Mat. 23:23) Ua parau mǎrû atu Iesu ia ˈna: “E tau tamahine, i ora oe i to faaroo; a haere ma te hau, e ma te ora i to maˈi.” Ua turai te haroaroaraa ia Iesu ia faaite i te mǎrû. Auê ïa hiˈoraa nehenehe mau!
14. Ua maiti Iesu i te rave i te aha, e mea nafea o ˈna i te haapao-noa-raa i ta ˈna taviniraa?
14 To ˈna huru oraraa. Ua faaite Iesu i te haroaroaraa ma to ˈna huru oraraa. Ua maiti o ˈna i te taviniraa ei toroa no ˈna. (Luka 4:43) Ua rave atoa Iesu i te mau faaotiraa tei tauturu ia ˈna ia haapao noa e ia faaoti i teie ohipa. Ei hiˈoraa, e huru oraraa au noa to ˈna. E nehenehe ïa ta ˈna e faaohipa i to ˈna taime e itoito i roto i te taviniraa. (Luka 9:58) Ua ite Iesu e mea faufaa roa ia faaineine i te tahi atu ia tamau ratou i te ohipa pororaa i muri aˈe i to ˈna poheraa. (Luka 10:1-12; Ioa. 14:12) E ua fafau o ˈna i ta ˈna mau pǐpǐ e e tauturu o ˈna ia ratou i roto i te taviniraa “e tae noa ˈtu i te hopea o teie nei ao.”—Mat. 28:19, 20.
A PEE I TE HAROAROARAA O IESU
E tauturu mai te haroaroaraa ia taa i te hinaaro o te taata e ia maiti maitai i ta tatou mau parau (A hiˈo i te paratarafa 15)
15. E nafea e faaite ai i te haroaroaraa ma ta tatou huru paraparau?
15 E nafea e pee ai i te haroaroaraa o Iesu? Ta tatou huru paraparau. I nia i to tatou mau taeae e tuahine, e faaohipa tatou i te mau parau o te faaitoito ia ratou, eiaha o te haaparuparu atu. (Eph. 4:29) A poro ai i te Basileia o te Atua, e mea tia “ia rapaauhia” ta tatou mau parau “i te miti,” oia hoi ia faatano tatou i ta tatou mau parau. (Kol. 4:6) E tutava tatou i te taa eaha te hinaaro o te taata e eaha ta ratou e anaanatae ra a maiti maitai atu ai i ta tatou mau parau. Ia faaohipa tatou i te mau parau mǎrû, e hinaaro te taata e faaroo ia tatou e e haaputapû ta tatou poroi i to ratou aau. E a faataa ˈi i ta tatou mau tiaturiraa, e taio roa ˈtu tatou i roto i te Bibilia. O te Parau a te Atua hoi te aratai. Ua ite tatou e mea puai aˈe te poroi Bibilia i te tahi noa ˈˈe mea ta tatou e nehenehe e parau.—Heb. 4:12.
16, 17. (a) E nafea tatou e nehenehe ai e faaite i teie na huru maitatai: haere maine i te riri e huru au noa? (b) E nafea e haapao noa ˈi i ta tatou taviniraa?
16 To tatou mau huru aau e haerea. E tauturu mai te haroaroaraa i mua i te faateimaharaa ia haavî i to tatou mau huru aau e e tauturu mai ia “haere maine hoi i te riri.” (Iak. 1:19) Ia faahuru ê mai te tahi atu, e tutava tatou i te taa no te aha ratou i paraparau ai aore ra i haa ˈi mai tera. Mea ohie aˈe ïa ia faaore i te hapa e ia ore e riri atu. (Mas. 19:11) E tauturu atoa mai te haroaroaraa ia faaite i te huru au noa. E haamanaˈo tatou e mea tia ore to tatou mau taeae e tuahine e te faaruru nei paha ratou i te fifi ta tatou e ore e taa maitai ra. Ua ineine tatou i te faaroo i to ratou manaˈo. E ia nehenehe, eita tatou e onoono i nia i to tatou iho manaˈo.—Phil. 4:5.
17 To tatou huru oraraa. Ua ite tatou e o te pororaa i te parau apî oaoa ta tatou haamaitairaa rahi roa ˈˈe. E rave ïa tatou i te mau faaotiraa o te tauturu mai ia haapao noa i ta tatou taviniraa. E maiti tatou i te tuu ia Iehova na mua roa i roto i to tatou oraraa. E oraraa au noa atoa to tatou. E nehenehe ïa tatou e faaohipa i to tatou taime e itoito no te poro i te parau apî oaoa hou a tae mai ai te hopea.—Mat. 6:33; 24:14.
18. E nafea tatou e tapea noa ˈi i to tatou tere o te aratai i te ora mure ore, e eaha ta oe i faaoti papu e rave?
18 Ua haapii mai tatou i te tahi mau huru maitatai nehenehe mau o Iesu. Auê oaoa e! A feruri na i te mau maitai ia haapii i te tahi atu o to ˈna mau huru maitatai e i te riro mai ia ˈna. E faaoti papu anaˈe ïa e pee i to Iesu hiˈoraa. Ma te na reira, e tapea noa tatou i to tatou tere o te aratai i te ora mure ore e e haafatata ˈtu â tatou ia Iehova.
^ Ua papaihia te Petero 1, 1:8, 9 no te mau Kerisetiano e tiaturi ra e ora i nia i te raˈi. E nehenehe atoa râ te mau parau a Petero e faaohipahia no te mau Kerisetiano e tiaturi ra e ora i te fenua e a muri noa ˈtu.
^ No te tahi mau hiˈoraa o te taata o tei faaite i te itoito i roto i te ati, a hiˈo i Te Pare Tiairaa o te 1 no Titema 2000, api 24-28; e te A ara mai na! o te 8 no Tenuare 1995, api 26-30.