Ua faataa Te Pare Tiairaa o te 15 no Tetepa 1950 (Beretane) e i te tahi taime e faahohoˈa te tahi taata, tupuraa aore ra taihaa i roto i te Bibilia i te tahi taata aore ra i te tahi mea rahi aˈe i a muri aˈe. I faahiti na ta tatou mau papai i na mua ˈˈe e i faahohoˈa na te mau tane e vahine taiva ore mai ia Debora, Elihu, Iepheta, Ioba, Rahaba, Rebeka e e rave rahi atu â tavini i te feia faatavaihia aore ra i te “feia rahi roa.” (Apo. 7:9) Ei hiˈoraa, i parau na matou e i faahohoˈa na Iepheta, Ioba e Rebeka i te feia faatavaihia. E o Debora raua Rahaba, i te feia rahi roa. I te mau matahiti râ i mairi aˈenei, aita matou i faaohipa faahou i teie mau huru faaauraa. No te aha?

Te haapii ra te mau Papai e te faahohoˈa ra te tahi mau taata faahitihia i roto i te Bibilia i te tahi taata aore ra i te tahi mea rahi aˈe i a muri aˈe. Ei hiˈoraa, i roto i te Galatia 4:21-31, ua faahiti te aposetolo Paulo i te hoê “parau faaau” i reira e itehia ˈi e piti vahine. O Hagara te vahine matamua, te tavini vahine a Aberahama. Ua faataa Paulo e ua faahohoˈa o ˈna i te nunaa Iseraela o tei taaihia ia Iehova na roto i te ture a Mose. Te piti o te vahine, o te “vahine tiamâ” ïa o Sara, oia hoi te vahine a Aberahama. Ua faahohoˈa o ˈna i te vahine a te Atua, oia hoi te tuhaa i te raˈi o te faanahonahoraa a te Atua. Ua faahiti atoa Paulo e rave rahi tuearaa i rotopu i te arii tahuˈa ra o Melehizedeka e o Iesu. (Heb. 6:20; 7:1-3) Hau atu â, ua faaau Paulo i te peropheta Isaia e ta ˈna mau tamaiti ia Iesu e te mau Kerisetiano faatavaihia. (Heb. 2:13, 14) Na Iehova i turai ia Paulo ia rave i teie mau faaauraa atoa. E nehenehe ïa e papu e mea tano iho â te reira.

E ere râ no te mea e te faaite ra te Bibilia e e auraa taipe to te hoê taata e e auraa taipe to te mau parau rii atoa aore ra te mau tupuraa atoa i roto i  te oraraa o taua taata ra. Ei hiˈoraa, ua faataa Paulo e te faahohoˈa ra Melehizedeka ia Iesu. Aita râ o ˈna i faahiti i te taime a afai ai Melehizedeka i te pane e te uaina na Aberahama i muri aˈe i te upootiaraa i nia e maha arii. Aita ïa e tumu Bibilia no te imi i te tahi auraa i tera tupuraa.—Gen. 14:1, 18.

Ua hape mau râ te tahi mau taata papai i te mau senekele i muri aˈe i te poheraa o te Mesia. No ratou, e auraa taipe to te rahiraa o te mau aamu Bibilia. Teie ta te hoê buka ite rahi e parau ra no nia i te mau haapiiraa a Origène, Ambroise e Jérôme: “Ua imi ratou i te mau taipe i roto i te mau tupuraa atoa ta te mau Papai e faahiti ra, te mau tupuraa faufaa ore atoa. E ua itehia mai iho â ia ratou. I manaˈo na ratou e te huna ra te tupuraa matau-roa ˈˈe-hia i te hoê parau mau tahuna-maitai-hia. . . . Hoê â atoa i roto i te rahiraa iˈa ta te mau pǐpǐ i haru mai i te po a ite ai ratou i te Faaora tei faatia-faahou-hia. Ua tamata vetahi i te taa i tera numera, oia hoi 153!”—The International Standard Bible Encyclopaedia.

No te tahi atu taata papai o Augustin no Hippone te iˈoa, e auraa taipe to te aamu Bibilia i reira Iesu i faatamaa ˈi e 5 000 tane maoti e pae pane kerite e e piti iˈa. Ua parau o ˈna e te faahohoˈa ra na pane kerite e pae i na buka matamua e pae o te Bibilia. E i te mea e mea maitai aˈe te sitona i te kerite, mea maitai aˈe te “Faufaa apî” i te “Faufaa tahito.” Ua faataa atoa o ˈna e te faahohoˈa ra na iˈa e piti i te hoê arii e te hoê tahuˈa. Teie te faataaraa a te tahi atu aivanaa no nia i te hooraa mai Iakoba i te tufaa matahiapo a Esau e te tahi maa uteute: te faahohoˈa ra te reira i te hooraa mai Iesu i te tiaturiraa o te ora i nia i te raˈi no te huitaata e to ˈna toto uteute!

Mea fifi anei ia tiaturi i teie mau faataaraa? Ua taa ïa ia oe eaha te fifi. Aita ta te taata e nehenehe e ite teihea aamu Bibilia te faahohoˈa ra i te tahi mea rahi aˈe aore ra aita. Ia aha ïa? Ia haapii mai te mau Papai e te faahohoˈa ra te hoê taata, te hoê tupuraa aore ra te hoê taihaa i te tahi taata aore ra i te tahi mea rahi aˈe i a muri aˈe, e farii tatou i tera faataaraa. Eiaha râ tatou e parau e e auraa taipe to te hoê aamu Bibilia aita anaˈe e tumu Bibilia.

E nafea ïa tatou e faufaahia ˈi i te mau parau rii faufaa e te mau aamu i roto i te Bibilia? Ua papai te aposetolo Paulo: “Te mau parau atoa hoi i papaihia i mutaa ihora, i papaihia ïa ia ite tatou; ia noaa to tatou tiairaa, i te faaoromai e te mahanahana o te parau i papaihia ra.” (Roma 15:4) Ua papai Paulo i teie mau parau i te mau Kerisetiano faatavaihia i te senekele matamua no te faaite e nafea ratou e faufaahia ˈi i te mau aamu Bibilia. E tae roa mai râ i teie mahana, ua faufaahia te mau Kerisetiano atoa tae noa ˈtu te mau “mamoe ê atu” i te mau haapiiraa itehia i roto i te mau Papai.—Ioa. 10:16; Tim. 2, 3:1.

E ere râ te rahiraa o te mau aamu Bibilia no te feia faatavaihia anaˈe, te “mamoe ê atu” aore ra te Kerisetiano i te taime taa maitai o te tuatapaparaa. Ua faufaahia râ te taatoaraa o ta te Atua mau tavini, no tahito ra e no teie mahana, i te rahiraa o te mau aamu Bibilia. Ei hiˈoraa, eita te mau mauiui o Ioba e faahohoˈa noa ra i te mau mauiui o te feia faatavaihia i te Tamaˈi rahi matamua. Mea rahi te tavini a te Atua, te tane e te vahine, tei faatavaihia e te “mamoe ê atu,” tei mauiui mai ia Ioba e tei faufaahia i te hiˈopoaraa i teie aamu. “Ua ite hoi [ratou] i ta te Fatu i rave i te hopea ˈˈe; e ua î te Fatu i te aroha, e te hamani maitai rahi.”—Iak. 5:11.

I roto i ta tatou mau amuiraa, te ite nei tatou i te mau vahine paari taiva ore mai ia Debora e i te mau matahiapo apî î i te paari mai ia Elihu. Oia atoa i te mau pionie o te faaite i te hoê â itoito rahi i to Iepheta e i te mau tane e vahine taiva ore o te faaite i te faaoromai mai ia Ioba. Te oaoa mau nei tatou e ua haapao Iehova ia fanaˈo tatou i “te mau parau atoa hoi i papaihia i mutaa ihora . . . ia noaa to tatou tiairaa, i te faaoromai e te mahanahana o te parau i papaihia ra”!

No reira, eita tatou e tutava i te imi i te hoê auraa taipe aore ra i te hoê tupuraa no a muri aˈe i roto i te mau aamu Bibilia atoa. E haafaufaa ˈtu â râ ta tatou mau papai i teie nei i te mau haapiiraa faufaa e huti mai i roto i te Bibilia.