1. No te aha e haapuai noa ˈi i to tatou taairaa e o Iehova?

 EI Ite no Iehova bapetizohia, te fanaˈo nei oe i te hoê mea faufaa roa: te hoê taairaa piri e o Iehova. Te haafifihia nei râ tera taairaa e te ao a Satani e to tatou huru tia ore. No reira, mea titauhia ia haapuai noa tatou paatoa i to tatou taairaa e o Iehova.

2. (a) Eaha te hoê taairaa? (A hiˈo i te nota i raro i te api.) (b) E nafea tatou e haapuai ai i to tatou taairaa e o Iehova?

² No oe, te vai mau ra anei Iehova? E Hoa anei oia no oe? E hinaaro anei oe ia puai atu â to oe taairaa e o ˈna? Te faataa ra te Iakobo 4:8 eaha te titauhia ia rave oe: “E haafatata ˈtu i te Atua, e na ˈna e haafatata mai ia outou na.” O orua Iehova te ohipa i roto i tera taairaa. * Ia rave oe i te  mau taahiraa no te haafatata ˈtu ia Iehova, e rave atoa oia i te mau taahiraa no te haafatata ˈtu ia oe. Rahi atu â oe i te na reira, rahi atu â oe i te papu e te vai mau ra oia. E no te mea e piri roa to orua taairaa, e manaˈo oe mai ia Iesu o tei parau: “Tei tono mai ia ˈu nei, e parau mau” e “ua ite au ia ˈna.” (Ioa. 7:28, 29) Eaha râ te tahi mau mea ta oe e nehenehe e rave no te haafatata ˈtu ia Iehova?

3. E nafea tatou e nehenehe ai e paraparau e o Iehova?

³ Ia hinaaro oe e haafatata ˈtu ia Iehova, mea faufaa roa ia paraparau tamau orua. E nafea râ? A feruri na e nafea oe e paraparau ai i te hoê hoa o te faaea ra i te vahi atea. E nehenehe orua e papai pinepine te tahi i te tahi e e faaohipa i te niuniu paraparau. E paraparau oe ia Iehova ia tamau oe i te pure ia ˈna. (A taio i te Salamo 142:2.) E nafea râ oe e nehenehe ai e vaiiho ia Iehova ia paraparau ia oe? Ma te tamau i te taio i ta ˈna parau, te Bibilia, e ma te feruri maite i te reira. (A taio i te Isaia 30:20, 21.) A hiˈo e nafea teie aparauraa i rotopu ia oe e o Iehova e haapuai ai i to oe taairaa e o ˈna e e faariro ai ia ˈna ei Hoa mau no oe.

4, 5. E nafea Iehova e paraparau ai ia oe ia haapii oe i te Bibilia? A faataa.

⁴ Te Bibilia, o te poroi ïa a te Atua no te taata atoa. E nehenehe râ anei te Bibilia e tauturu ia oe ia haafatata ˈtu ia Iehova? E! A tamau ai oe i te taio e i te haapii i te Bibilia, a haapao maitai i to oe huru aau a taio ai oe i te reira. E a feruri e nafea oe e faaohipa ˈi i ta oe i haapii mai. Ma te na reira, e vaiiho ïa oe ia Iehova ia paraparau ia oe. E riro oia ei Hoa piri o te tauturu ia oe e e haafatata ˈtu â oe ia ˈna.—Heb. 4:12; Iak. 1:23-25.

⁵ Ei hiˈoraa, eaha to oe huru aau a taio ai i te mau parau a Iesu: “Eiaha e haapue noa i te taoˈa na outou i teie nei ao”? Ia rave oe i te nehenehe no te tuu ia Iehova na mua roa i roto i to oe oraraa, e ite oe e te faaoaoa ra oe ia ˈna. E nehenehe atoa râ oe e taio i te mau parau  a Iesu e e taa e mea faufaa ia faaohie oe i to oe oraraa e ia tavini rahi atu â i te Atua. Mai te peu e tera iho â, te tauturu nei ïa Iehova ia oe ia taa eaha ta oe e nehenehe e rave no te haafatata ˈtu ia ˈna.—Mat. 6:19, 20.

6, 7. (a) Ia haapii tatou i te Bibilia, eaha te itehia i nia i to tatou here ia Iehova e i nia i to ˈna here ia tatou? (b) Eaha ta tatou fa matamua ia haapii tatou i te Bibilia?

⁶ Parau mau, ia haapii tatou i te Bibilia, e ite mai tatou eaha te mau tauiraa te nehenehe e rave no te tavini maitai atu â ia Iehova. Oia atoa râ te mau mea î i te here ta ˈna e rave ra e to ˈna huru faahiahia mau i here atu â ˈi tatou ia ˈna. E ia here atu â tatou ia ˈna, e here atu â oia ia tatou e e puai roa ˈtu â to tatou taairaa e o ˈna.—A taio i te Korinetia 1, 8:3.

⁷ Ia hinaaro tatou e haafatata ˈtu ia Iehova, e mea faufaa roa ia haapii i te Bibilia no te tumu maitai. Ua parau Iesu: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioa. 17:3) E nehenehe tatou e haapii e rave rahi mea apî e te anaanatae ia taio tatou i te Bibilia. Tera râ, ta tatou fa matamua, o te ite-maitai-raa ïa o vai Iehova.—A taio i te Exodo 33:13; Sal. 25:4.

8. (a) Eaha paha to vetahi manaˈo i ta Iehova huru raveraa i nia i te arii Azaria? (b) Ia matau maitai oe ia Iehova, eaha to oe huru aau i ta ˈna i rave?

⁸ Ia ite tatou ia Iehova mai te hoê Hoa piri, eita tatou e haapeapea ia ore te Bibilia e faataa noa no te aha oia i ohipa ˈi mai ta ˈna i rave. Ei hiˈoraa, a faatere ai o Azaria ei arii no Iuda, te haamori ra te nunaa i te mau atua hape. Aita o Azaria i apiti atu. “Ua rave oia i te parau tia i te aro o Iehova.” (Arii 2, 15:1-5) Tera râ, ua tairi Iehova ia Azaria i te lepera. No te aha? Aita teie tuhaa o te aamu e faataa mai ra. Eaha to oe huru aau i ta Iehova i rave? E haapeapea e e manaˈo anei oe e e ere Iehova i te mea aifaito a faautua ˈi ia Azaria aita hoê aˈe tumu? Aita. Mai te peu e ua matau maitai oe ia Iehova, ua ite oe e mea tano noa ta ˈna mau aˈoraa. E ‘aˈo Iehova ma te mâmâ,’ aore ra ma te tano. (Ier. 30:11) Noa ˈtu e aita paha oe i ite no te aha Iehova i faautua ˈi ia Azaria, ia papu ia oe e mea tano ta Iehova i rave.

9. Eaha te mau haamaramaramaraa o te tauturu mai ia taa no te aha Iehova i tairi ai ia Azaria i te lepera?

⁹ Te horoa mai ra te Bibilia hau atu â haamaramaramaraa no nia i te oraraa o te arii Azaria, o tei matau-atoa-hia mai te arii Uzia. (Arii 2, 15:7, 32) Te parau ra te toea o te aamu o te Paraleipomeno 2, 26:3-5, 16-21 e “ua rave oia i te parau tia i te aro o Iehova.” Ua parau atoa râ te reira e i muri iho, “ua teoteo aˈera [oia] e pohe atura.” Ua tamata te arii i te rave i te tahi mea o te mau tahuˈa anaˈe te faatiahia ia rave. Ua parau atu na vau ahuru ma hoê tahuˈa e ua hape oia e ua tamata ratou i te tapea ia ˈna. Ua aha oia? No to ˈna teoteo, riri atura oia ia ratou! E tauturu mai teie mau haamaramaramaraa hau ia taa no te aha Iehova i tairi ai i te arii i te lepera.

10. No te aha aita e titauhia ia ite i te tumu e rave ai Iehova i te tahi ohipa? E nafea e tiaturi atu â ˈi e e rave noa Iehova i te mea tano?

¹⁰ Eaha te haapiiraa faufaa ta tatou e huti mai? I roto i te aamu o te arii  Azaria, ua navai te faataaraa o te tauturu mai ia taa no te aha Iehova i faautua ˈi ia ˈna. Aita anaˈe râ te Bibilia e horoa i te mau haamaramaramaraa atoa, eaha ta oe e rave? E uiui anei oe mai te peu e ua rave iho â Iehova i te mea tano? Aore ra e manaˈo anei oe e ua navai te haamaramaramaraa Bibilia no te tiaturi e e rave noa te Atua i te mea tano? (Deut. 32:4) Rahi atu â oe i te ite o vai Iehova, rahi atu â oe i te here e i te tiaturi ia ˈna. Aita ïa e titauhia ra ia ite oe i te tumu o te mau mea atoa ta ˈna e rave ra. Ma te haapii i te Bibilia, e ite atu â oe o vai Iehova e e haafatata ˈtu â oe ia ˈna.—Sal. 77:12, 13.

11-13. E nafea oe e ite ai e te faaroo ra Iehova i te mau pure? (A hiˈo i te hohoˈa matamua.)

¹¹ Ia pure tatou, e haafatata ˈtu â tatou ia Iehova. E arue, e haamauruuru tatou ia ˈna e e ani tatou i ta ˈna tauturu. (Sal. 32:8) Ia hinaaro râ tatou e riro ei hoa piri no Iehova, ia papu ia tatou e te faaroo mai ra oia i te mau pure.

¹² Te parau ra te tahi mau taata e aita te Atua e faaroo ra i te mau pure e e ravea noa teie e maitai ai oe. Te tiaturi nei ratou e e tauturu noa te pure ia oe ia feruri i to oe mau fifi e ia ite mai i ta oe iho mau pahonoraa. Parau mau, e nehenehe te pure e tauturu ia oe i roto i teie mau tuhaa. Tera râ, ia paraparau oe ia Iehova  na roto i te pure, te faaroo mau ra oia ia oe. E nafea oe e papu ai i te reira?

¹³ A feruri na: Hou Iesu a haere mai ai i te fenua, ua ite oia e ua pahono Iehova i te mau pure a ta ˈNa mau tavini i te fenua. Ei taata, ua pure Iesu i to ˈna Metua i te raˈi no nia i to ˈna mau manaˈo e huru aau. I te hoê taime, ua pure oia i te po taatoa. (Luka 6:12; 22:40-46) E na reira anei Iesu mai te peu e ua manaˈo oia e aita Iehova e faaroo mau ra i te pure? Ua haapii atoa Iesu i ta ˈna mau pǐpǐ e nafea ia pure ia Iehova. E na reira anei oia mai te peu e ua manaˈo oia e aita Iehova e faaroo ra i te mau pure? Mea papu, ua ite Iesu e te faaroo mau ra Iehova i te mau pure. Ua parau atoa oia: “E tau Metua, e haamaitai au ia oe, o oe i faaroo mai ia ˈu nei. Area vau ua ite au e e faaroo mai â oe ia ˈu.” E nehenehe atoa tatou e papu e te faaroo ra Iehova i ta tatou mau pure.—Ioa. 11:41, 42; Sal. 65:2.

14, 15. (a) E nafea tatou e maitaihia ˈi a ani ai i te mea taa maitai i roto i ta tatou mau pure? (b) E nafea te mau pure a Kathy i tauturu ai ia ˈna ia haafatata ˈtu â ia Iehova?

¹⁴ Eita paha e ite-maitai-noa-hia te pahonoraa o ta oe mau pure. Ia ani râ oe i te mea taa maitai i roto i ta oe mau pure, e ite papu roa ˈtu â oe i ta Iehova mau pahonoraa e e ite oe e te vai mau ra oia. Ia vaiiho oe ia Iehova ia ite i te mau mea atoa e haapeapea ra ia oe, e haafatata mai oia ia oe.

¹⁵ Ei hiˈoraa, mea pinepine Kathy i te haere i roto i te taviniraa. * Ua parau râ  oia: “Aita roa ˈtu vau i au i te taviniraa.” I to ˈna faatuhaaraahia, ua faaitoito te hoê matahiapo ia ˈna ia rave i te taviniraa pionie tamau. Ua parau oia: “Ua horoa mai o ˈna i te hoê aniraa e ua faaoti au e riro ei pionie. Ua haamata atoa râ vau i te pure ia Iehova i te mau mahana atoa ia tauturu mai ia ˈu ia au i te taviniraa.” Ua pahono anei Iehova i ta ˈna mau pure? I muri aˈe e toru matahiti ei pionie, te parau nei oia i teie nei: “Ma te apiti rahi atu â i te taviniraa e maoti te hiˈoraa o te tahi atu mau tuahine, ua aravihi mǎrû noa vau no te poro. I teie mahana, mea au roa na ˈu te taviniraa. Ua piri atoa ˈtu â to ˈu taairaa e o Iehova i teie nei.” Ua tauturu mau â te mau pure a Kathy ia ˈna ia haafatata ˈtu â ia Iehova.

16, 17. (a) Ia aha tatou no te tamau i te haapuai i to tatou taairaa e o Iehova? (b) Eaha ta tatou e hiˈo i roto i to muri mai tumu parau?

¹⁶ E nehenehe tatou e haafatata ˈtu ia Iehova e a muri noa ˈtu. E faaroo noa anaˈe ïa ia ˈna ma te tamau i te haapii i te Bibilia e i te paraparau ia ˈna na roto i te pure. Ma te na reira e puai roa mai ai to tatou taairaa e o Iehova e maoti ta ˈna tauturu e nehenehe ai tatou e faaruru i te mau fifi.

¹⁷ Tera râ, i te tahi mau taime, te faaruru nei tatou i te mau fifi noa ˈtu e e tamau tatou i te pure ia Iehova. I tera mau taime, e haamata paha tatou i te ore e tiaturi faahou ia Iehova. E manaˈo paha tatou e aita Iehova e faaroo ra i ta tatou mau pure a uiui atu ai e e hoa mau anei tatou no ˈna. Ia haamata oe i te feruri mai te reira, eaha te rave? E tauturu mai te tumu parau i muri mai ia oe.