AAMU
Te mau haamaitairaa “i te hora au e te hora au ore”
UA FANAUHIA vau i Mati 1930 i te oire iti no Namkumba, i Malawi, i roto i te hoê utuafare o te tavini ra i te Atua ma te taiva ore. I 1942, ua pûpû vau i to ˈu ora ia Iehova e ua bapetizohia vau i roto hoê o ta matou mau anavai nehenehe mau. I na 70 matahiti i mairi, mai te faaitoitoraa a te aposetolo Paulo ia Timoteo, ua tutava vau i te “faaite hua . . . i te parau, ia onoono maite â, i te hora au e te hora au ore.”—Tim. 2, 4:2.
I 1948, ua haere mai o Nathan Knorr e o Milton Henschel i Malawi e ua faaitoito mai to raua tere ia ˈu ia tavini ia Iehova ma te taime taatoa. I muri aˈe, ua matau mai vau ia Lidasi. E tuahine haaviti mau oia o tei haamau atoa ei fa e tavini ia Iehova ma te taime taatoa. Ua faaipoipo mâua i 1950. E i 1953, e piti tamarii ta mâua. Noa ˈtu e e rave rahi ta mâua hopoia utuafare, ua faaoti mâua e e nehenehe ta ˈu e rave i te taviniraa pionie tamau. E piti matahiti i muri aˈe, ua anihia mai au ia tavini ei pionie taa ê.
Ua faaitoito mai te mau tairururaa no te hamani-ino-raa i muri mai
I muri iti noa ˈˈe, ua oaoa vau i te haere na te mau amuiraa ei tiaau haaati. I te mea e ua turu noa mai o Lidasi, ua nehenehe ia ˈu e haapao i ta to ˈu utuafare e hinaaro mau ra e e faaea noa i roto i te taviniraa taime taatoa. * Ua hinaaro mâua toopiti e tavini ia Iehova ma te taime taatoa. Ua faanaho maite ïa mâua e maoti te tauturu a ta mâua tamarii, ua rave Lidasi i te taviniraa taime taatoa i 1960.
I 1962, ua fanaˈo matou i te tairururaa mataeinaa “Tavini itoito.” E hoê matahiti i muri aˈe, ua haere mai o taeae Henschel i Malawi no te tairururaa mataeinaa taa ê i pihaiiho i te oire no Blantyre. Ua hau atu i te 10 000 taata o tei haere mai i tera tairururaa. A haamanaˈo ai au i tera mau porotarama taa ê mau, ua papu ia ˈu e ua faaineine e ua haapuai maitai te reira ia matou taitahi i Malawi no te mau taime fifi e tupu i muri mai.
TE MAU TAIME FIFI
Ua opani te faatereraa hau i te ohipa pororaa e ua haru i te amaa
I 1964, ua hamani-ino-hia te mau Ite no Iehova no te oreraa ratou e apiti i te mau ohipa
poritita. Ei faahopearaa, ua hau atu i te 100 Piha a te Basileia e 1 000 tiahapa fare o te mau taeae o tei vavahihia. Ua tamau noa mâua Lidasi i roto i te tuhaa haaati e tae roa i te taime a opani ai te faatereraa i te mau Ite no Iehova i 1967. Ua haru te faatereraa hau i te amaa, ua faahepo i te mau mitionare ia faarue i te fenua e ua tuu e rave rahi Ite i te fare tapearaa. O mâua atoa Lidasi. A matara mai ai mâua i te fare tapearaa, ua tamau noa mâua i roto i te tuhaa haaati ma te haapao maitai râ.I te hoê mahana i Atopa 1972, te haere mai ra te mau melo o te hoê pǔpǔ poritita parauhia te Taatiraa a te feia apî no Malawi i to matou fare. Tera râ, ua horo maira hoê o ratou e ua parau mai ia ˈu ia haere e tapuni no te mea te opua nei ratou i te haapohe ia ˈu. Ua parau atu vau i ta ˈu vahine e ta ˈu tamarii ia haere e tapuni i roto i te uru meiˈa i pihaiiho. Ua horo atoa ˈtu vau e ua paiuma i nia i te hoê tumu vi rahi. I reira, ua hiˈo noa vau ia ratou ia vavahi i to matou fare e ta matou mau taihaa atoa.
No te mea aita to tatou mau taeae i apiti i te ohipa poritita, ua tutuihia to ratou mau fare
A rahi roa mai ai te hamani-ino-raa, e tausani Ite tei faarue ia Malawi. Ua faaea matou i te hoê puhapa no te feia i horo ê i Mozambique e tae roa i Tiunu 1974. I tera taime, ua anihia mâua Lidasi ia tavini ei pionie taa ê i Dómue, i Mozambique. Ua tamau mâua i te tavini ei pionie e tae roa i 1975 a faahepohia ˈi mâua ia faarue ia Mozambique no te hoˈi i Malawi. Te hamani-ino-noa-hia ra te mau Ite i ǒ.
A hoˈi ai i Malawi, ua anihia vau ia haere e hiˈo i te mau amuiraa i te oire pu, o Lilongwe. Noa ˈtu te hamani-ino-raa e te mau fifi atoa, ua rahi mai te mau amuiraa i roto i ta mâua mau tuhaa haaati.
TE TURU Î I TE HERE A IEHOVA
I te hoê mahana, ua tae atu mâua i te hoê oire iti a faaterehia ˈi te hoê putuputuraa poritita. Ua ite te tahi mau taata e e Ite no Iehova mâua e ua haaparahi ia mâua e te hoê pǔpǔ poritita parauhia Pionie apî no Malawi. Ua taparu mâua i ta Iehova tauturu e aratairaa. I te otiraa te putuputuraa, ua haamata ratou i te tairi ia mâua. Ua horo taue maira te hoê vahine paari e ua tuô: “Ee, a vaiiho ia raua! E tamaiti teie a to ˈu taeae. A vaiiho ia ˈna ia haere i to ˈna tere!” Ua parau te taata tei faanaho i te putuputuraa: “A vaiiho ia raua!” Aita mâua i ite no te aha teie vahine i parau ai mai tera, e ere hoi oia i to mâua fetii. Ua papu ia mâua e ua faaroo Iehova i ta mâua pure.
Titeti poritita
I 1981, ua ite-faahou-hia mâua e te Pionie apî no Malawi. I tera taime, ua rave ratou i to mâua pereoo taataahi, te mau taihaa e te mau buka, oia atoa te mau papie faufaa no nia i te mau taeae o te tuhaa haaati. Ua taie mâua e ua horo i te fare o te hoê matahiapo. Tera râ, ua haapeapea mâua no nia i te mau haamaramaramaraa e vai ra i roto i te mau papie. I to te pǔpǔ Pionie apî no Malawi hiˈoraa i te mau papie, ua itehia ia ratou te mau rata ta te mau taeae no Malawi atoa i hapono mai. Ua mǎtaˈu aˈera ratou a manaˈo ai e e tia faatere teitei paha vau. Ua faahoˈi oioi ïa ratou i te mau papie atoa i te mau matahiapo no reira.
I te tahi atu taime, tei nia mâua i te hoê pahi no te haere i te tahi atu pae o te anavai. E tia poritita te fatu o te pahi e ua hinaaro oia e hiˈopoa i te mau titeti poritita a te horopatete. A piri noa mai ai oia ia mâua, ua ite oia i te hoê taata eiâ o ta te mutoi e imi noa ra. Haapao noa ˈtura te taata i tera ohipa e faaea aˈera te fatu o te pahi i te hiˈopoa i te mau titeti poritita. Ua ite faahou â mâua i te turu î i te here a Iehova.
TAPEAHIA E TUUHIA I TE FARE TAPEARAA
I Fepuare 1984, te haere ra vau i Lilongwe no te hapono i te mau tapura ohipa i te amaa i Zambie. Ua tapea mai te hoê mutoi ia ˈu e ua hiˈopoa i ta ˈu pute. Ua itehia ia ˈna te tahi mau papai Bibilia. Ua afai ïa o ˈna ia ˈu i te aua mutoi e ua haamata i te tairi mai. Ua taamu oia ia ˈu e te taura e ua tuu ia ˈu i roto i te hoê piha e te feia eiâ tei tapeahia.
I te mahana i muri iho, ua afai te mutoi rahi ia ˈu i roto i te tahi atu piha e ua hinaaro oia ia tarima vau i te hoê papie o te parau ra: “O vau o Trophim Nsomba, e ere faahou vau i te Ite no Iehova ia nehenehe vau e tiamâ mai.” Ua patoi vau i te tarima i te papie a parau atu ai ia ˈna: “Ua ineine au eiaha noa ia tapeahia vau, ia pohe atoa râ. E Ite no Iehova noâ vau.” Ua riri roa te mutoi rahi e no to ˈna tupai-puai-raa i ta ˈna iri papairaa, ua horo mai te hoê mutoi no te tahi atu piha e hiˈo eaha tei tupu. Ua parau atu te mutoi rahi: “Ua patoi teie taata i te tarima i te papie ia faaea oia i te poro. A vaiiho ïa ia ˈna ia tarima e e Ite no Iehova oia. E afai tatou ia ˈna i te aua mutoi i Lilongwe.” I tera taime, aita ta ˈu vahine i ite teihea roa vau. E maha mahana i muri aˈe, ua tia i te tahi mau taeae ia parau ia ˈna eaha tei tupu.
I te aua mutoi i Lilongwe, ua faaite mai te mau mutoi i te hamani maitai. Ua parau te mutoi rahi: “Teie te hoê mereti raiti no te mea ua tapeahia oe no te Parau a te Atua. E taata eiâ anaˈe te tahi atu.” I muri iho, ua afaihia vau i te fare tapearaa no Kachere, i reira vau i te faaearaa e pae avaˈe.
Ua oaoa roa te taata faatere i te fare tapearaa i te ite ia ˈu i te haereraa mai no te mea ua hinaaro oia ia ˈu ei “orometua” no te fare tapearaa. Ua tatara oia i te tiaraa o te tahi atu orometua e ua parau atu ia ˈna: “Aita vau e hinaaro ra ia haapii faahou oe i te Parau a te Atua i ǒ nei. Ua tuuhia hoi oe i te fare tapearaa no te mea ua eiâ oe i ta oe ekalesia!” No reira, i te mau hebedoma atoa, ua haapii au i te Bibilia i te putuputuraa no te feia mau auri.
I muri aˈe, ua ino roa ˈtu â to ˈu tupuraa. Ua uiui mai te feia toroa o te fare tapearaa no to ratou hinaaro e ite ehia rahiraa Ite no Iehova i Malawi. Aita vau i horoa ˈtu i te pahonoraa ta ratou i hinaaro e ua tairi ratou ia ˈu a moe roa ˈi to ˈu hiroa. I te tahi atu taime, ua hinaaro ratou e ite teihea roa ta tatou pu rahi. Ua na ô atu vau: “Ua ui mai outou i te hoê uiraa ohie roa, e pahono atu vau.” Ua parau atu vau ia ratou e te faataa ra te Bibilia i ta matou pu rahi. Ua maere roa ratou e ua na ô: “Ihea roa i roto i te Bibilia?”
Ua parau atu vau: “I roto i te Isaia 43:12.” Ua imi e ua taio maite ratou i te reira: “O outou to ˈu ite, e o vau te Atua, te na reira maira Iehova.” Ua taio ratou i tera irava e toru taime e ua ui: “No te aha tei roto te pu rahi a te mau Ite no Iehova i te Bibilia eiaha râ i Marite?” Ua pahono atu vau: “No te mau Ite no Iehova atoa i Marite, e faataa teie irava i ta ratou pu rahi.” No te mea eita vau e faaite i ta ratou i hinaaro e faaroo, ua afaihia vau i te fare tapearaa no Dzaleka, i te pae apatoerau no Lilongwe.
TE MAU HAAMAITAIRAA I TE MAU TAIME FIFI
I to ˈu taeraa ˈtu i te fare tapearaa no Dzaleka i Tiurai 1984, e 81 Ite no Iehova i reira. I te mea e ua î roa te fare tapearaa, e taoto noa ïa na 300 taata mau auri i nia i te tahua ma te pirihao. I muri aˈe, ua nehenehe te taatoaraa o te mau Ite e putuputu ei pǔpǔ iti no te tauaparau i nia i te hoê irava i te mahana taitahi e ua faaitoito mau â te reira ia matou.
Taeae i tapeahia i muri aˈe i te hoê haavaraa
I Atopa 1984, ua haere matou paatoa i te tiripuna e ua faautuahia i te fare tapearaa e piti matahiti. Mai na mua ˈtu, ua tuuhia matou e te feia e ere i te Ite no Iehova. Ua parau râ te taata faatere i te fare tapearaa i te taatoaraa: “Eita te mau Ite no Iehova e puhipuhi i te avaava. Eiaha ïa outou, te feia tiai, e faahuehue ia ratou ma te ani atu i te avaava e eiaha e faaue ia ratou ia ohi mai i te tahi arahu ama no te faaama i ta outou avaava. E nunaa o te Atua ratou! Ia horoahia na te mau Ite no Iehova atoa i te maa e piti taime i te mahana. Aita ratou i ǒ nei no te mea e ohipa ino ta ratou i rave, no ta ratou râ mau tiaturiraa i roto i te Bibilia.”
Te vai atu â te mau haamaitairaa no to matou haerea maitai. Ia haapoiri te raˈi aore ra ia ûa, eita te feia tiai e vaiiho i te feia mau auri ia haere i rapae. Ua vaiiho râ ratou ia matou ia haere i rapae no to ratou tiaturi ia matou. Ua ite ratou e eita matou e horo ê. Ei hiˈoraa, i te hoê taime a rave ai matou i te ohipa i roto i te faaapu, ua maˈihia te hoê taata tiai. Ua faahoˈi ïa matou ia ˈna i te fare tapearaa. No to matou haerea maitai, ua nehenehe matou e ite i te iˈoa o Iehova ia faahanahanahia e to matou feia tiai.—TE MAU TAIME AU
I te 11 no Me 1985, ua matara mai au mai te fare tapearaa no Dzaleka e ua oaoa roa vau i te ite i to ˈu utuafare! Te haamauruuru nei matou ia Iehova no to ˈna tautururaa mai ia tapea i to matou hapa ore ia ˈna i tera mau taime fifi mau. Hoê â to matou huru aau i to te aposetolo Paulo o tei papai: “Aita hoi matou i hinaaro, e te mau taeae, e ia ore outou ia ite i to matou pohe a roohia mai ai matou . . . e aita roa matou i manaˈo e e ora: e manaˈo pohe to matou i roto ia matou iho, ia ore matou ia tiaturi ia matou iho, i te Atua ra i tei faatia i tei pohe ra: o tei faaora ia matou i taua pohe rahi ra.”—Kor. 2, 1:8-10.
Taeae Nsomba e ta ˈna vahine Lidasi i mua i te hoê Piha a te Basileia i 2004
I te tahi taime, e au ra e eita mâua e ora mai. Ua ani noa râ mâua ia Iehova i te itoito, te paari e te haehaa ia tamau mâua i te faahanahana i to ˈna iˈoa rahi.
Ua haamaitai Iehova i ta mâua taviniraa ia ˈna “i te hora au e te hora au ore.” I teie mahana, ua oaoa roa mâua i te ite i te hoê amaa apî nehenehe mau i Lilongwe e 1 000 tiahapa Piha a te Basileia apî i Malawi! No mâua Lidasi, mea faahiahia mau teie mau haamaitairaa no ǒ mai ia Iehova ra. E au ra e e moemoeâ teie! *
^ Eita te mau taeae e tamarii apî ta ratou i te fare e titau-manihini-hia no te tavini ei tiaau haaati.
^ No te ite atu â no nia i te hamani-ino-raa i Malawi, a hiˈo i te Buka matahiti a te mau Ite no Iehova no 1999, api 171-223 (Farani).
^ A faaineinehia ˈi teie tumu parau, ua pohe te taeae Nsomba i te 83raa o to ˈna matahiti.