A RIRO mai ai Anita * ei Ite no Iehova, ua inoino roa ta ˈna tane. Ua tamata oia i te tapea ia Anita ia ore oia e haere i te mau putuputuraa e ua faaue oia ia ˈna ia ore roa ˈtu e faahiti i te iˈoa o te Atua. No te faaroo noa i te iˈoa o Iehova, e riri roa oia.

Hau atu â, aita te tane a Anita e hinaaro ia haapii oia i ta raua mau tamarii no nia ia Iehova aore ra ia afai ia ratou i te mau putuputuraa. Mea fifi roa no ˈna, no te mea e tamata oia i te tauturu i ta ˈna mau tamarii ia ore ta ˈna tane e ite i te reira.

Mai ta te hiˈoraa o Anita e faataa ra, e nehenehe te hoê melo o to oe utuafare e tamata ia faaea oe i te tavini ia Iehova. Aore ra te vai ra paha te tahi atu tupuraa fifi. Peneiaˈe ua maˈihia oe no te hoê roaraa taime. Ua pohe paha ta oe tamarii, ta oe tane aore ra vahine. Aore ra ua faarue paha hoê melo o to oe utuafare i herehia e oe ia Iehova. I roto i teie mau tupuraa, e nafea oe no te vai taiva ore ia Iehova?

Ua parau te aposetolo Paulo: “Ia faaoromai tamau.” (Heb. 10:36) Na te aha ïa e tauturu ai ia oe ia faaoromai?

Ia mauiui oe, a haamanaˈo e mea titauhia ia tiaturi oe ia Iehova no te faaoromai. A pure no te ani i ta ˈna tauturu. O ta Ana ïa i rave i te pohe-taue-raa ta ˈna tane. A 30 matahiti to raua faaipoiporaa. Te parau ra o Ana: “Aita roa ˈtu oia i hoˈi mai i te fare mai te ohipa mai. E 52 matahiti noa to ˈna.”

Noa ˈtu mea rahi ta Ana ohipa, te vai noa râ to ˈna mauiui. Eaha ïa ta ˈna i rave? Te parau ra oia: “Ua haamahora vau i to ˈu aau ia Iehova e ua taparuparu atu vau i ta ˈna tauturu.” Ua ite oia e ua tauturu Iehova ia ˈna no te mea ia pure anaˈe Ana, e ite oia i te hau e te mǎrû i muri aˈe. E te na ô ra oia: “Ua papu ia ˈu e e faahoˈi mai iho â Iehova i ta ˈu tane i te tia-faahou-raa.”—Phil. 4:6, 7.

Ua fafau Iehova i ta ˈna mau tavini e e faaroo oia i ta ratou mau pure. (Sal. 65:2) E horoa oia i ta ratou e hinaaro mau ra ia tamau ratou i te tavini ia ˈna. Oia atoa, e  tauturu Iehova ia oe ia vai taiva ore ia ˈna noa ˈtu te mau tupuraa fifi mau.

Ua horoa mai Iehova i te tahi atu ravea no te tauturu ia tatou ia faaoromai, o to tatou mau taeae e tuahine ïa o te amuiraa. E nehenehe tatou e haapii mai i te huru raveraa a te mau taeae no Tesalonia no te tauturu i te tahi i te tahi a hamani-ino-hia ˈi ratou ma te uˈana. I te roaraa i tera taime, mea titauhia hoi ia ratou ia rahi atu â i te faaitoito te tahi i te tahi. (Tes. 1, 2:14; 5:11) Ua tauturu ratou i to ratou mau taeae e tuahine ia vai taiva ore ia Iehova ma te amuimui e te mau hoa piri. E nafea tatou e vai taiva ore mai te feia no Tesalonia?

Mea titauhia ia faahoa i roto i te amuiraa e ia faaitoito te tahi i te tahi, i roto iho â râ i te mau taime fifi. (Roma 14:19) Ua mauiui atoa te aposetolo Paulo no te hamani-ino-raa e te tahi atu mau fifi. Ua horoa râ Iehova ia ˈna i te puai no te faaoromai. Ei hiˈoraa, ua tauturu Iehova ia Paulo maoti te mau taeae e tuahine. Ua parau te aposetolo no nia i to ˈna mau hoa: “O ratou tei haamahanahana mai ia ˈu nei.” (Kol. 4:10, 11) Mea here na teie mau taeae ia Paulo. Ia hinaaro oia i te tauturu, e tamahanahana e e faaitoito ratou ia ˈna. Peneiaˈe e manaˈo oe i te tahi taime a parau ai aore ra a rave ai te mau  taeae e tuahine o ta oe amuiraa i te tahi ohipa o tei faaitoito ia oe.

Ua horoa atoa mai Iehova i te tahi atu tauturu, o te mau matahiapo o te amuiraa. E nehenehe ratou e faaitoito ia oe e e horoa ˈtu i te aˈoraa maitai no roto mai i te Bibilia. Ua riro ratou “mai te faarǔrǔraa i te vero ra, e mai te pupuniraa i te mataˈi rahi ra; e mai te pape rii tahe i te vahi pâpâmaro ra; e mai te mǎrǔ o te hoê mato rahi i te fenua paurâ.” (Isa. 32:2) Mea tamahanahana ia ite e ua ineine teie mau taeae i te tauturu ia tatou. No reira, i te mau taime fifi, a haere e farerei i te mau matahiapo. E nehenehe ratou e tauturu ia oe ia tavini noa oe ia Iehova.

Mea papu, eita ta te mau matahiapo e nehenehe e faatitiaifaro i to oe mau fifi atoa. E taata tia ore atoa ratou mai ia oe. (Ohi. 14:15) E nehenehe râ oe e maitai mai ia haere oe e farerei i te hoê matahiapo e a pure ai oia ia Iehova no nia i to oe fifi. (Iak. 5:14, 15) Ei hiˈoraa, ua faaitoito te mau matahiapo i te hoê taeae no Italia o te mauiui ra e rave rahi matahiti no te hoê maˈi ino mau. Ua parau oia: “Maoti te here e te haapao maitai o te mau taeae, oia atoa te haere-pinepine-raa mai e hiˈo ia ˈu, ua tauturu te reira ia ˈu ia faaoromai.” Mai te peu e te mauiui noa ra oe, te hinaaro ra Iehova ia ani oe i te tauturu a te mau matahiapo.

Ia tiatonu tatou i te taviniraa ia Iehova, e ite tatou e nafea Iehova e tauturu ai ia tatou. O ta John ïa i ite. I te 39raa o to ˈna matahiti, ua ite oia e e maˈi mariri ai taata to ˈna. No ˈna, e ere i te mea tano i maˈihia ˈi oia, mea apî roa hoi o ˈna. E ua haapeapea oia no ta ˈna vahine e ta raua tamaiti, e toru matahiti noa to ˈna. Te parau ra oia: “Aita noa ta ˈu vahine i haapao i ta mâua tamaiti, ua haapao atoa râ oia ia ˈu, oia hoi ma te tauturu ia ˈu ia haere e hiˈo i to ˈu mau taote.” No te mau ravea rapaauraa, ua rohirohi roa oia e ua mauiui atoa to ˈna opu. E ere tera anaˈe. Ua ite atoa John e fatata to ˈna papa i te pohe e mea titauhia i te hoê taata no te haapao ia ˈna.

Eaha tei tauturu ia John e to ˈna utuafare i te roaraa o tera taime fifi? Noa ˈtu e e pinepine John i te rohirohi, e imi oia i te ravea ia tamau to ˈna utuafare i te tiatonu i nia i te taviniraa ia Iehova. Te na ô ra oia: “E apiti matou i te mau putuputuraa atoa, e haere tamau matou i roto i te taviniraa i te mau hebedoma atoa e e rave tamau i te arui haamoriraa utuafare, noa ˈtu e mea fifi.” Ua haapii John i te faufaaraa ia vai puai noa to ˈna taairaa e o Iehova. Noa ˈtu i te omuaraa ua huru ê e ua haapeapea o ˈna, ua mǎrû roa ˈtu â mai o ˈna. Ua ite oia e ua here Iehova ia ˈna e ua horoa ˈtu i te puai ta ˈna i hinaaro. Oia atoa, ia haapeapea aore ra ia mǎtaˈu oe, e nehenehe Iehova e tauturu ia oe. Te parau ra John: “E nehenehe Iehova e faaitoito atu â ia oe, mai ta ˈna i na reira i nia ia ˈu.”

Ia mauiui oe, a haamanaˈo i te mau parau a Paulo: “Ia faaoromai tamau.” A tiaturi ia Iehova ma te pure ia ˈna. A vai piri noa e to oe mau taeae e tuahine o te amuiraa, a ani i te tauturu a te mau matahiapo e a tamau i te tiatonu i te haamoriraa ia Iehova. E tauturu oia ia oe i roto i te mau fifi atoa o ta oe e farerei ra i teie nei â aore ra i roto i te mau fifi o ta oe e farerei i mua nei.