1. No te aha Paulo i parau ai e ‘te mana o te Atua, o te Mesia ïa’?

 UA FAAITE Iehova i to ˈna puai ma te faahiahia mau maoti Iesu. I te fenua nei, ua faatupu Iesu i te mau semeio. E nehenehe tatou e taio i te tahi o teie mau faatiaraa i roto i te Bibilia. E haapuai te reira i to tatou faaroo. (Mat. 9:35; Luka 9:11) Ua horoa Iehova i te puai rahi ia Iesu. No reira te aposetolo Paulo i parau: ‘Te mana o te Atua, o te Mesia ïa.’ (Kor. 1, 1:24) E nafea râ te mau semeio a Iesu e ohipa ˈi i nia ia tatou?

2. Eaha te haapii mai i te mau semeio a Iesu?

² Ua parau te aposetolo Petero e ua faatupu Iesu i te mau “tapao,” aore ra semeio. (Ohi. 2:22) Eaha ta teie mau semeio e haapii mai ra? Te haapii mai ra te reira i ta Iesu e rave i te roaraa o ta ˈna Faatereraa tausani matahiti. I tera taime, e faatupu oia i te mau semeio rahi aˈe ta te huitaata e nehenehe e fanaˈo i te fenua nei. E tauturu atoa mai teie mau semeio ia taa i te mau huru maitatai o Iesu e o to ˈna  Metua. I roto i teie tumu parau, e hiˈopoa mai tatou e toru semeio a Iesu, e e nafea te reira e ohipa ˈi i nia ia tatou i teie mahana e no a muri aˈe.

3. (a) No te aha Iesu i faatupu ai i ta ˈna semeio matamua? (b) Mea nafea Iesu i te faaiteraa i te aau horoa noa i te oire no Kana?

³ Ua faatupu Iesu i ta ˈna semeio matamua i te hoê faaipoiporaa i roto i te oire no Kana. Aita tatou i ite no te aha, aita i ravai te uaina no te taatoaraa o te manihini. E nehenehe na taata faaipoipo apî e haama roa, no te mea na raua tera hopoia e farii i te mau manihini. Tei reira atoa te mama o Iesu, o Maria. Ua ani anei o ˈna ia Iesu te tauturu a tiaturi ai e e mana to ˈna no te na reira? Ua feruri maite hoi o Maria i te taatoaraa o te mau parau tohu no nia i ta ˈna tamaiti e ua ite oia e e piihia o ˈna te “Tamaiti na te Teitei.” (Luka 1:30-32; 2:52) Te mea papu, ua hinaaro Maria raua Iesu e tauturu i na hoa faaipoipo. Ua taui semeio Iesu i na 380 litera pape ei “uaina maitai.” (A taio i te Ioane 2:3, 6-11.) Ua faahepohia anei Iesu ia faatupu i teie semeio? Aita. Ua na reira oia no te mea ua haapao oia i te taata e ua pee i te hiˈoraa o to ˈna Metua no nia i te faaiteraa i te aau horoa noa.

4, 5. (a) Eaha ta te semeio matamua a Iesu e haapii mai ra? (b) Eaha ta te semeio a Iesu i te oire no Kana e haapii mai ra no nia i te a muri aˈe?

⁴ Ua horoa semeio atu â Iesu i te uaina maitai e ua ravai no te pǔpǔ rahi. Eaha te haapii mai i teie semeio? E ere Iehova e Iesu i te mea pipiri, e aau horoa rahi râ to raua. Te haapapu mai ra te reira e te haapao maite ra raua i te manaˈo o te taata. Te faaite atoa ra te reira e e faaohipa Iehova i to ˈna puai ia navai maitai te maa i roto i te ao apî, noa ˈtu te vahi e ora ˈi tatou i te fenua.—A taio i te Isaia 25:6.

⁵ A feruri na! Fatata Iehova i te horoa mai i ta tatou e hinaaro mau ra. E fanaˈo te taata taitahi i te hoê fare nehenehe e te maa maitai. E mauruuru rahi tatou no to Iehova faaiteraa i te aau horoa noa no te mau mea faahiahia atoa ta ˈna e ho mai i roto i te paradaiso i te fenua nei.

6. Mea nafea Iesu i te faaohiparaa i to ˈna mana, e e nafea tatou e nehenehe ai e pee i to ˈna hiˈoraa?

⁶ Aita roa ˈtu Iesu i faaohipa i to ˈna mana no te mau tumu miimii. A feruri na i tei tupu a faahema ˈi te Diabolo ia Iesu ia faariro oia i te mau ofai ei maa. Aita Iesu i hinaaro e faaohipa i to ˈna mana no to ˈna iho maitai. (Mat. 4:2-4)  Ua faaohipa râ Iesu i to ˈna puai no te tauturu i te tahi atu. E nafea tatou e pee ai i to ˈna haerea miimii ore? Ua parau Iesu e ia “horoa” noa tatou e tia ˈi. (Luka 6:38) E nehenehe tatou e na reira ma te titau manihini ia vetahi ê i to tatou fare no te tamaa. Oia atoa, ma te rave i te taime i muri aˈe i te hoê putuputuraa no te taata o te hinaaro ra i te tauturu, mai te faarooraa e mea nafea te hoê taeae e horoa ˈi i ta ˈna tumu parau. Aore ra ma te horoaraa i te tauturu ohie ia faaohipa e te faaineineraa i te tahi atu i roto i te taviniraa. Te pee ra ïa tatou i to Iesu aau horoa noa ma te ru i te tauturu atu ia vetahi ê i te taime atoa e nehenehe ai tatou.

7. Eaha te fifi e itehia ra i roto i te ao a Satani?

⁷ E ere te veve no teie nei. Ua parau Iehova i te mau Iseraela e “eita roa hoi e ore te taata rii taoˈa ore i nia i te fenua na.” (Deut. 15:11) Hanere matahiti i muri aˈe, ua parau Iesu: “E tia mau â hoi te taata rii i ǒ outou nei.” (Mat. 26:11) Te parau ra anei Iesu e e ite-noa-hia te veve i te fenua nei e a muri noa ˈtu? Aita. No ˈna, e ite-noa-hia te veve a ora ˈi tatou i roto te ao a Satani. Eaha râ taa-ê-raa ia ora tatou i roto i te ao apî! I tera taime, aita faahou e veve. E fanaˈo te taatoaraa i te maa e rave rahi e e haamâhahia te mau hinaaro atoa!

8, 9. (a) No te aha Iesu i faaamu ai i te taata e rave rahi? (b) Eaha to oe manaˈo no teie semeio?

⁸ Ua papai te fatu salamo no nia ia Iehova: “Te heheu nei oe i to rima, e te haamâha nei i te hiaai o te mau mea ora atoa nei.” (Sal. 145:16) I te fenua nei, ua pee Iesu ma te tia roa i to ˈna Metua e ua haapao noa oia i ta vetahi e hinaaro mau ra. Aita o ˈna i na reira noa no te faaite i to ˈna puai, no te mea râ te haapao mau ra oia i te taata. E hiˈopoa mai tatou te Mataio 14:14-21. (A taio.) Ua pee te nahoa ia Iesu na raro noa na roto i te mau oire. (Mat. 14:13) A fatata ˈi te ahiahi, ua haapeapea te mau pǐpǐ no te mea ua paruparu e ua poia te taata. Ua ani atura ratou ia Iesu ia faahoˈi i te nahoa ia haere ratou e hoo mai i ta ratou iho maa. Eaha ta Iesu e rave?

⁹ Ua faaamu Iesu e 5 000 tane oia atoa te vahine e te tamarii maoti e pae noa pane e e piti iˈa. No te aha Iesu i faatupu ai i teie semeio? No te mea ua here mau â oia i te taata e ua haapao ia ratou. E mea papu e e rave rahi maa ta Iesu i horoa semeio atu. Ua ‘amu te nahoa, e ua paia aˈera.’ Maoti te reira, e itoitohia ratou ia hoˈi ratou i to ratou fare. (Luka 9:10-17) I te paiaraa te taatoaraa, ua haaputuputu te mau pǐpǐ i te toea maa e ua î roa 12 ete!

10. I mua nei, eaha te tupu no nia i te parau o te veve?

¹⁰ No te nounou e te piˈo o te mau tia faatere, e hanere mirioni taata te ora ra i roto i te veve. Te vai atoa ra vetahi o to tatou mau taeae aita e ravai ra i te maa. Fatata râ te feia o tei auraro ia Iehova e  ora i roto i te hoê ao aita e taata piˈo aore ra veve faahou. O Iehova te Atua mana hope, e te ru ra oia i te haamâha i te mau hinaaro o te taata atoa, e mana hoi to ˈna no te na reira. Ia au i ta ˈna i fafau, fatata roa oia i te faaore i te mauiui!—A taio i te Salamo 72:16.

11. No te aha tatou i papu ai e fatata te Mesia i te faaohipa i to ˈna puai i nia i te fenua taatoa, e ei faahopearaa, eaha ta oe e rave?

¹¹ I te fenua nei, ua faatupu Iesu i te mau semeio i te hoê vahi nainai no e toru noa matahiti e te afa. (Mat. 15:24) E tauturu râ Iesu ei Arii i te taata atoa i te roaraa o ta ˈna Faatereraa tausani matahiti. (Sal. 72:8) Te haapapu mai ra te mau semeio a Iesu e te hinaaro ra oia e faaohipa i to ˈna puai no to tatou maitai. Aita to tatou e mana no te faatupu i te mau semeio, tera râ, eaha ta tatou e nehenehe e rave? E nehenehe tatou e faaohipa i to tatou taime e puai no te faaite i te tahi atu no nia i te hoê a muri aˈe faahiahia mau o ta te Bibilia e fafau ra. Tera te hopoia a te mau Ite no Iehova. (Roma 1:14, 15) Ia feruri maite tatou i ta te Mesia e fatata i te rave, e hinaaro ru tatou i te faaite i te reira ia vetahi ê.—Sal. 45:1; 49:3.

12. No te aha i papu ai ia tatou e ua taa roa ia Iesu i te mau mea e haaati ra i te fenua?

¹² A poiete ai te Atua i te fenua e i te mau mea atoa, “tei pihaiiho hoi [Iesu] ia ˈna i reira mai te tamaiti faaamu,” aore ra rave ohipa aravihi. (Mas. 8:22, 30, 31; Kol. 1:15-17) Ua taa roa ia Iesu i te mau mea e haaati ra i te fenua. Ua ite oia e nafea e faaohipa e e haavî i te mau puai o te natura.

13, 14. Mea nafea Iesu i te haavîraa i te puai o te natura? A faataa.

¹³ I te fenua nei, ua faaite Iesu e e mana to ˈna no ǒ mai i te Atua ra no te haavî i te mau puai o te natura. A feruri na mea nafea Iesu i te haavîraa i te mataˈi. (A taio i te Mareko 4:37-39.) Te faataa ra te hoê taata ite i te Bibilia e ua faaohipahia i roto i te buka Mareko te taˈo Heleni ra “mataˈi” ei maa mataˈi rahi. E itehia te reira ma teie mau tapao: te ata ereere, te mataˈi rorofai puai mau, te patiri e te vai pue. Ia oti te reira, aita e hohoˈa faahou to te fenua. Te faataa ra te aposetolo Mataio i teie mataˈi mai te hoê “vero rahi.”—Mat. 8:24.

¹⁴ A feruri na: Te tairi ra te are i te hiti o te pahi a haere roa mai ai te pape i roto. Noa ˈtu te maniania o te mataˈi e te pahi e opaopa noa ra, te taoto ra Iesu no to ˈna rohirohi. Ua mǎtaˈu râ te mau pǐpǐ, e ua faaara ˈtura ia Iesu e ua parau: “Ua pohe tatou!” (Mat. 8:25) Ua aha Iesu? Ua tia aˈera oia e ua na ô atura i te mataˈi e te miti: “A faaea, a mania.” (Mar. 4:39) Ua faaea ˈtura te mataˈi e “mania roa ˈtura.” Auê ïa faaiteraa faahiahia mau o te mana ta Iesu i  faaohipa no te haavî i te mau puai o te natura!

15. Mea nafea to Iehova haapapuraa e e nehenehe ta ˈna e haavî i te mau puai o te natura?

¹⁵ No ǒ mai te mana o Iesu ia Iehova ra, e ua ite tatou e e nehenehe ta te Atua mana hope e haavî i te mau puai o te natura. Ei hiˈoraa, hou te diluvi, ua parau Iehova: “E hitu â rui toe e haamairi mai ai au i te ûa i nia i te fenua nei, e ia piti taau rui, e ia piti taau ao.” (Gen. 7:4) I roto atoa i te Exodo 14:21, te taio ra tatou: “Taa ê atura te miti ia Iehova i te hoê mataˈi rahi no te hitia o te râ.” E ia taio tatou te Iona 1:4: “Ua tuu maira . . . Iehova i te hoê mataˈi rahi i taua tai ra, rahi atura te vero i te moana; manaˈohia ihora e parari taua pahi ra.” Mea maitai roa ia ite e i roto i te ao apî, e nehenehe noa ta Iehova e haavî i te mau puai o te natura.

16. No te aha mea tamahanahana ˈi ia ite e e mana to Iehova e Iesu no te haavî i te mau puai o te natura?

¹⁶ Mea tamahanahana ia ite e e mana to Iehova e Iesu no te haavî i te mau puai o te natura. I te roaraa o ta Iesu Faatereraa tausani matahiti, e fanaˈo te feia atoa o te ora i te fenua i te hau. Eita roa ˈtu te taata e pepe aore ra e pohe i teie mau ati natura, mai te mataˈi rorofai, te miti faaî, te mouˈa auahi e te aueueraa  fenua. Eita tatou e mǎtaˈu i te mau ati atoa, no te mea tei te huitaata ra “te sekene o te Atua”! (Apo. 21:3, 4) Ua tiaturi tatou e e horoa Iehova ia Iesu ra i te mana no te haavî i te mau puai o te natura i te roaraa o ta ˈna Faatereraa tausani matahiti.

17. Eaha te tahi ravea e pee ai tatou i to te Atua e to te Mesia hiˈoraa i teie nei â?

¹⁷ Mea papu, eita ta tatou e nehenehe e arai i te mau ati natura. O Iehova e Iesu anaˈe te nehenehe. Tera râ, e nehenehe ta tatou e rave i te tahi mea. A faaohipa i te Maseli 3:27. (A taio.) Ia mauiui to tatou mau taeae, e nehenehe tatou e tauturu atu ma te haapao i to ratou mau maitai pae tino e huru aau e ma te tamahanahana ia ratou. (Mas. 17:17) Ei hiˈoraa, e nehenehe tatou e tauturu ia ratou i muri aˈe i te hoê ati natura. Ua parau te hoê vahine ivi i to te hoê mataˈi tuinoraa i to ˈna fare: “Ua mauruuru roa vau i te riroraa ei melo o te faanahonahoraa a Iehova, eiaha noa no te fanaˈo i te tauturu i te pae materia oia atoa râ i te pae varua.” Ua peapea atoa te tahi atu tuahine faaea taa noa a tuino ai te mataˈi i to ˈna fare. I muri aˈe i to te mau taeae tautururaa ia ˈna no te tataî i to ˈna fare, ua parau oia: “Ua hau atu i te nehenehe e faataa ˈtu! Aita vau i ite e nafea e faaite roa ˈtu i to ˈu huru aau. Mauruuru Iehova.” Te mauruuru nei tatou i to tatou mau taeae e tuahine i te haapao-maitai-raa i ta vetahi e hinaaro mau ra. Hau atu â i te reira, te mauruuru roa ra tatou ia Iehova e Iesu i te haapao-maitai-raa mai ia tatou.

18. Eaha ta oe i faahiahia i to Iesu faatupuraa i te mau semeio?

¹⁸ I te roaraa o ta ˈna taviniraa, ua haapapu Iesu e o ˈna ‘te mana o te Atua.’ Aita roa ˈtu râ oia i faaohipa i to ˈna mana no te faatietie ia ˈna i mua ia vetahi ê aore ra no to ˈna iho maitai. Ua faaohipa râ Iesu i to ˈna mana no te faatupu i te mau semeio no to ˈna here mau i te taata. E ite hau atu â tatou i nia i te reira i roto i to muri mai tumu parau.