1. Eaha ta te taata e rave rahi e manaˈo ra e ere i te mea ino?

 TE ORA nei tatou i roto i te hoê ao mea morare ore roa. Ei hiˈoraa, e rave rahi taata o te manaˈo ra e ere i te mea ino ia riro ei mahu aore ra ia taoto e te hoê taata aita i faaipoipo. I roto i te mau hohoˈa teata, buka, himene e faatianianiraa, ua î roa te reira i te mau peu taatiraa pae tino tia ore. (Sal. 12:8) E nehenehe râ ta Iehova e tauturu ia tatou ia ora ia auhia mai tatou e a ˈna. E nehenehe tatou e vai viivii ore noa aore ra e vai mâ i roto i te hoê ao mea morare ore mau â.—A taio i te Tesalonia 1, 4:3-5.

2, 3. (a) No te aha ia patoi tatou i te mau hinaaro tano ore? (b) Eaha ta tatou e hiˈopoa mai i roto i teie tumu parau?

² Ia auhia mai e Iehova, mea tia ia patoi tatou i te mau mea atoa mea riri na ˈna. No te mea râ e taata tia ore tatou, e nehenehe te peu morare ore e huti ia tatou, mai te hoê iˈa o te hutihia e te arainu. Ia haamata te mau manaˈo morare ore e tupu i roto i to tatou feruriraa, e mea tia ia patoi oioi i te reira. Ia ore anaˈe, e rahi roa mai te hinaaro morare ore e tae roa i te taime e hara ˈi tatou. Tera iho â ta te Bibilia e parau ra: “E ua tô anaˈe  taua hinaaro tia ore ra, fanau maira ta ˈna, o te hara.”—A taio i te Iakobo 1:14, 15.

³ E nehenehe te hoê hinaaro tano ore e tupu mai i roto i to tatou aau. No reira e mea titauhia ia haapao maitai i nia i ta tatou e haamata ra i te hinaaro. Ia patoi tatou i te mau hinaaro tano ore, e haapae atoa tatou i te taatiraa pae tino tia ore e te mau faahopearaa ino o te reira. (Gal. 5:16) I roto i teie tumu parau, e hiˈopoa mai tatou e toru tuhaa o te tauturu mai ia aro i te mau hinaaro tano ore: to tatou auhoaraa e o Iehova, te mau aˈoraa no ô mai i ta ˈna Parau e te tauturu a te mau Kerisetiano feruriraa paari.

4. No te aha mea faufaa no tatou ia haafatata ˈtu ia Iehova?

⁴ Te parau ra te Bibilia i te feia e hinaaro ra e “haafatata ˈtu i te Atua”: “E horoi na i to outou rima, . . . e tamâ na i to outou aau.” (Iak. 4:8) Ia riro Iehova ei Hoa rahi no tatou, eita noa tatou e hinaaro e faaoaoa ia ˈna ma to tatou mau haerea. E hinaaro atoa râ tatou e faaoaoa ia ˈna ma to tatou mau manaˈo. Ia viivii ore noa e ia mâ to tatou mau manaˈo, e mâ atoa ïa to tatou aau. (Sal. 24:3, 4; 51:6; Phil. 4:8) Te taa ra ia Iehova i to tatou huru tia ore e to tatou manaˈo tia ore o te haamata i te ohipa. No te mea râ e aita tatou e hinaaro e faaoto ia Iehova, e rave tatou i tei nehenehe no te patoi i te mau manaˈo tano ore. (Gen. 6:5, 6) E tutava ïa tatou no te tapea i te mau manaˈo viivii ore.

5, 6. E nafea te pure e nehenehe ai e tauturu ia tatou ia aro i te mau hinaaro morare ore?

⁵ E tauturu mai Iehova ia aro i te mau manaˈo morare ore ia ani noa tatou i ta ˈna tauturu. E horoa mai oia i to ˈna varua moˈa ia nehenehe tatou e puai mai no te vai viivii ore noa. I roto i ta tatou mau pure, e nehenehe tatou e ani ia Iehova e te hinaaro ra tatou e faaoaoa ia ˈna ma to tatou mau manaˈo. (Sal. 19:14) Ma te haehaa, e ani atu tatou ia ˈna ia hiˈopoa aita anei te tahi mau hinaaro tano ore i roto i to tatou aau o te nehenehe e turai ia tatou ia rave i te hara. (Sal. 139:23, 24) A tamau i te ani ia Iehova i te tauturu ia oe no te patoi i te peu morare ore e no te rave i te mea maitai noa ˈtu e e ere i te mea ohie.—Mat. 6:13.

⁶ Hou a haapii ai no nia ia Iehova, i au na paha tatou i te rave i te mau ohipa ta ˈna e ore roa e au, e peneiaˈe te aro noa nei tatou i teie mau hinaaro tano ore. E nehenehe râ ta Iehova e tauturu ia tatou ia taui e ia rave i ta ˈna e hinaaro ra. Ei hiˈoraa, i muri aˈe i to te arii Davida taotoraa ia Bate-seba, ua tatarahapa oia e ua taparu ia Iehova ia horoa i “te aau mâ” ia ˈna e ia tauturu atoa ia auraro. (Sal. 51:10, 12) No reira, ia tamau tatou i te aro i to tatou mau hinaaro puai i te mau peu morare ore i na mua ˈˈe, e tauturu mai ïa Iehova ia hinaaro rahi atu â tatou i te auraro ia ˈna e ia rave i te mea tia. E nehenehe Iehova e tauturu ia tatou ia haavî i to tatou mau manaˈo tia ore.—Sal. 119:133.

7. E nafea te Parau a te Atua e tauturu mai ai ia patoi i te mau manaˈo morare ore?

⁷ Maoti ta ˈna Parau, te Bibilia, e nehenehe Iehova e tauturu ia tatou ma te pahono i ta tatou mau pure. Ia au te Bibilia, mea viivii ore te paari o te Atua. (Iak. 3:17) Ia taio tatou i te Bibilia i te mau mahana atoa, e faaî tatou i to tatou feruriraa i te mau manaˈo viivii ore. (Sal. 19:7, 11; 119:9, 11) I roto atoa i te Bibilia, te vai ra te mau hiˈoraa e te mau faaararaa o te tauturu mai ia patoi i te mau manaˈo e te mau hinaaro morare ore.

8, 9. (a) No te aha te hoê taata apî i taoto ai e teie vahine faaturi? (b) Ia au i te hiˈoraa o te Maseli pene 7, eaha te mau tupuraa ta tatou e nehenehe e ape?

 ⁸ I roto i te Maseli 5:8, te faaara mai ra te Parau a te Atua ia ape i te mau peu morare ore. I roto i te Maseli pene 7, te faahitihia ra te aamu o te hoê taata apî o te haere i te ahiahi i pihaiiho i te fare o te hoê vahine faaturi. Tei te hoê aroâ ïa teie vahine i te tiaraa, e ‘ahu o te faaturi’ to ˈna. Ua tapiri atu oia i teie taata apî, ua haru ia ˈna, ua apa ia ˈna e ua parau atu i te mau parau o te faatupu i te hinaaro ino i roto ia ˈna. Aita oia i patoi i teie mau hinaaro, e ei faahopearaa, ua taoto oia e teie vahine. Noa ˈtu e aita oia i opua i te rave i te hara, ua hema râ oia. Tera ïa te faahopearaa ino mau ta ˈna e amo i roto i to ˈna oraraa. Ahani oia i taa e mea atâta tera tupuraa, e faaea atea noa ïa oia i teie vahine.—Mas. 7:6-27.

⁹ Mai teie taata apî, e nehenehe atoa tatou e rave i te mau faaotiraa ino, no te mea aita tatou i ite i te fifi. Ei hiˈoraa, i te po, te faaite ra te reni afata teata i te tahi mau porotarama hohoˈa faufau, e mea atâta i te taui-noa-raa i te mau reni no te ite eaha te hohoˈa e mataitai. I nia i te Internet atoa, mea atâta ia pata i nia i te hoê reni o te aratai ia ratou i te hoê vahi matau-ore-hia. Oia atoa, i te faaohiparaa i te reni aparauraa aore ra i te tahi atu mau reni i nia i te Internet e itehia ra te mau faatianianiraa morare ore e te mau reni hohoˈa faufau. I roto i teie mau tupuraa, e nehenehe tatou e faatupu i te mau hinaaro morare ore a mataitai ai i te reira. E nehenehe ïa te reira e aratai ia tatou ia faaroo ore ia Iehova.

10. No te aha mea atâta ˈi te peu faahinaaro? (A hiˈo i te hohoˈa matamua.)

 ¹⁰ Te parau atoa ra te Bibilia e eaha to te mau tane e vahine huru i nia i te tahi e te tahi. (A taio i te Timoteo 1, 5:2.) E faaite te mau Kerisetiano i te peu faahinaaro i to ratou noa hoa faaipoipo aore ra i na taata e opua ra i te faaipoipo. Eita râ ratou e na reira i nia i te tahi atu. E manaˈo paha vetahi e e ere i te mea ino ia faaite i te peu faahinaaro i te tahi taata, ma te hautiutiraa i te tino, ma te apǎraa rima, ma te hiˈoraa ˈtu noa ˈtu e eita raua e tapeapea ia raua. Ia faahinaaro râ e piti taata te tahi i te tahi, e nehenehe raua e faatupu i te manaˈo morare ore o te aratai ia raua i te peu taatiraa pae tino tia ore. Ua tupu aˈena te reira, e nehenehe e tupu faahou mai.

11. Eaha te haapiiraa e huti mai i te hiˈoraa o Iosepha?

¹¹ E hiˈoraa maitai o Iosepha no tatou. Ua hinaaro te vahine a Potiphara i te tamata ia Iosepha ia taoto oia e o ˈna. Ua patoi Iosepha ia ˈna, aita râ teie vahine i faaea i te faahema ia ˈna. Pauroa te mahana, ua ani noa oia ia Iosepha ia “ati atu ia ˈna.” (Gen. 39:7, 8, 10) Ua faataa te hoê aivanaa Bibilia e ua tiaturi te vahine a Potiphara e ahani o raua anaˈe, e nehenehe paha ta Iosepha e faahinaaro ia ˈna. Ua faaoti papu o Iosepha eiaha roa ˈtu e farii i ta ˈna faahinaaroraa e aita iho â oia i hema. No reira, aita oia i vaiiho i te mau hinaaro tano ore ia rahi mai i roto i to ˈna aau. I to teie vahine haruraa i te ahu o Iosepha e i te faaheporaa ia taoto raua, “ua faarue atura . . . oia i te ahu i tana rima, horo maira, e tae maira i rapae au.”—Gen. 39:12.

12. E nafea tatou e ite ai e e nehenehe te mau mea ta tatou e mataitai e ohipa i roto i to tatou aau?

¹² Ua faaara Iesu e e nehenehe te mau mea ta tatou e mataitai e ohipa i roto i to tatou aau e e faatupu i te mau hinaaro taatiraa tano ore. Ua parau oia: “O te hiˈo noa ˈtu i ta vetahi ê ra vahine ei faatupu i te hinaaro, ua faaturi ïa ia ˈna i to ˈna ihora aau.” (Mat. 5:28) Tera ïa te ohipa i tupu i nia i te arii Davida. “Na nia i te tapoˈi fare o te arii ra: i reira to ˈna iteraa ˈtu i te hoê vahine te horoi ra ia ˈna iho.” Aita râ oia i faaea i te mataitai i teie vahine e i te manaˈonaˈo noa ia ˈna. (Sam. 2, 11:2) Noa ˈtu e e tane ta teie vahine, ua haamata Davida i te hinaaro ia ˈna e i te taoto ia ˈna.

13. No te aha e mea titauhia ia “faaau i te faufaa” i to tatou mata, e e nafea tatou e na reira ˈi?

¹³ Ia hinaaro tatou e patoi i te mau manaˈo morare ore, e mea titauhia ia pee tatou i to Ioba hiˈoraa. Ua parau oia: “Ua faaau vau i te faufaa i o ˈu nei pue mata.” (Ioba 31:1, 7, 9) Mai ia Ioba, e nehenehe tatou e faaoti i te ore roa ˈtu e mataitai i te hoê taata ma te hoê manaˈo morare ore. E ia ite tatou i te mau hohoˈa faufau i nia i te roro uira, na roto i te hoê poroi faatianianiraa, i roto i te hoê vea aore ra i te tahi atu mau ravea, e oioi ïa tatou i te fariu ê i to tatou mata.

14. Eaha te mea titauhia ia rave tatou no te vai viivii ore noa?

¹⁴ Ia feruri oe i nia i ta tatou i hiˈopoa mai nei, ua taa paha ia oe i tei titauhia no te rave atu â no te aro i te mau hinaaro morare ore. Ia titauhia ia oe ia rave i te tahi mau tauiraa, a na reira oioi! Ia auraro oe i ta Iehova e parau, e nehenehe oe e ape i te mau peu taatiraa pae tino tia ore e e vai viivii ore noa.—A taio i te Iakobo 1:21-25.

15. Ia ite oe e mea fifi ia aro i te mau hinaaro tano ore, no te aha mea faufaa ˈi ia ani i te tauturu?

¹⁵ Ia ite oe e mea fifi ia aro i te mau hinaaro tano ore, a aparau atu e te hoê taata o te amuiraa mea maoro o ˈna i te taviniraa  ia Iehova e o te nehenehe e horoa ˈtu i te mau aˈoraa no roto i te Bibilia. Peneiaˈe, e ere i te mea ohie no oe ia aparau no nia i to oe mau fifi e te tahi atu. Tera râ, mea faufaa ia ani i te tauturu. (Mas. 18:1; Heb. 3:12, 13) E nehenehe te mau Kerisetiano feruriraa paari e tauturu ia oe ia taa eaha te mau tauiraa te titauhia ia oe ia rave. I muri aˈe, a rave i teie mau tauiraa ia nehenehe Iehova e riro noa ei Hoa no oe.

16, 17. (a) E nafea te mau matahiapo e tauturu ai i te feia mea fifi no ratou ia aro i te mau hinaaro morare ore? A faataa. (b) No te aha mea faufaa ˈi no te feia e mataitai ra i te hohoˈa faufau ia ani oioi i te tauturu?

¹⁶ Mea aravihi iho â râ te mau matahiapo o ta tatou amuiraa no te tauturu mai. (A taio i te Iakobo 5:13-15.) E rave rahi matahiti, ua faaite te hoê taata apî i Beresilia e mea fifi roa no ˈna ia aro i te mau hinaaro morare ore. Te na ô ra oia: “Ua ite au e aita Iehova e au ra i to ˈu mau manaˈo, e ua haama roa râ vau i te faaite i te tahi atu i to ˈu huru aau.” Ua taa râ i te hoê matahiapo e ua hinaaro teie taata apî i te tauturu. E ua faaitoitohia oia ia vaiiho i te mau matahiapo ia tauturu ia ˈna. Te parau ra teie taata apî: “Ua maere au i te hamani maitai o te mau matahiapo i nia ia ˈu, ua hau ê to ratou hamani maitai e te taa ohie, e aita vau i manaˈo e e fanaˈo vau i te reira. Ua faaroo maite ratou i to ˈu mau fifi. Ua faaohipa ratou i te Bibilia no te haapapu faahou i to Iehova here no ˈu e ua pure ratou e o vau. Ua faaohie atu â te reira ia ˈu ia farii i te mau aˈoraa o te Bibilia ta ratou i horoa mai.” I muri aˈe i te haapuairaa i to ˈu mau taairaa e o Iehova, te parau ra oia: “Te taa ˈtura ia ˈu i teie nei i te faufaaraa ia ani i te tauturu, eiaha râ i te tamata-noa-raa i te faateimaha ia tatou e ta tatou hopoia.”

¹⁷ Mai te peu e ua matau oe i te mataitai i te hohoˈa faufau, e mea titauhia ia ani oioi oe i te tauturu. E tiai noa â oe i te ani i te tauturu, rahi roa ˈtu â oe i te hinaaro i te rave i te peu taatiraa pae tino tia ore. Ia na reira oe, e haamauiui oe ia vetahi e e nehenehe te reira e turai i te taata ia faaino ia Iehova. E rave rahi o tei ani i te tauturu a te mau matahiapo e o tei farii i te mau aˈoraa no te faaoaoa ia Iehova e e faaea i roto i te amuiraa.—Sal. 141:5; Heb. 12:5, 6; Iak. 1:15.

18. Eaha ta oe i faaoti papu i te rave?

¹⁸ E rahi roa ˈtu â te ao a Satani i te ohipa morare ore. Te tutava nei râ te mau tavini a Iehova i te tapea i te mau manaˈo mâ e te viivii ore. Te oaoa roa ra Iehova i teie mau Kerisetiano. Ia piri noa tatou ia Iehova e ia pee i te mau aˈoraa no roto mai i ta ˈna Parau e i te amuiraa Kerisetiano. Ma te na reira, e oaoa tatou e e manaˈo haava mâ ïa to tatou. (Sal. 119:5, 6) E i a muri aˈe, ia oti Satani i te haamouhia, e ora ïa tatou e a muri noa ˈtu i roto i te ao apî e te mâ a te Atua.