1. Ua faaitoito te aposetolo Ioane ia tatou ia aha, e no te aha?

 TE FAAITOITO mai ra te aposetolo Ioane ia feruri maite i to Iehova here rahi no tatou. Te taio ra tatou i roto te Ioane 1, 3:1: “A hiˈo na i te huru o to te Metua [here] ia tatou nei.” Ia feruri maite tatou i to Iehova here rahi no tatou e mea nafea oia i te faaiteraa mai i te reira, e piri atu â e e here atu â ïa tatou ia ˈna.

2. No te aha mea fifi ai no vetahi ia taa e te here ra Iehova ia ratou?

² Teie râ hoi, mea fifi no vetahi ia taa e te here ra te Atua ia ratou. Te manaˈo ra ratou e aita te Atua e tâuˈa ra i te taata. No ratou, te faatere noa ra aore ra te aˈo noa ra te Atua i te feia i faaroo ore ia ˈna. No te mau haapiiraa hape, te manaˈo atoa ra vetahi e e mea ino te Atua e eita roa ˈtu e nehenehe e here ia ˈna. No vetahi ê, te tiaturi nei ratou e te here ra te Atua i te taata atoa noa ˈtu ta ratou mau haaraa. Maoti râ te haapiiraa o te Bibilia e nehenehe ai outou e ite i te parau mau no nia ia Iehova. Ua ite outou e o te here te huru maitatai rahi roa ˈˈe  a Iehova e no reira oia i horoa ˈi i ta ˈna Tamaiti ei taraehara no outou. (Ioa. 3:16; Ioa. 1, 4:8) Teie râ, no te tupuraa e rave rau ta outou i faaruru i roto i te oraraa, e mea fifi paha no outou ia taa e te here ra Iehova ia outou.

3. Eaha te tauturu mai ia taa i to Iehova here no tatou?

³ No te tauturu ia tatou ia taa i to Iehova here no tatou, e titauhia ia taa na mua roa e o Iehova tei poiete ia tatou. Na ˈna i horoa mai i te ora no tatou. (A taio i te Salamo 100:3-5.) No reira te Bibilia e pii ai i te taata matamua te ‘tamaiti na te Atua.’ (Luka 3:38) E ua haapii mai Iesu ia pii tatou ia Iehova ‘to matou Metua i te raˈi.’ (Mat. 6:9) O Iehova to tatou Metua, e te here ra oia ia tatou mai te hoê metua tane maitai e here ra i ta ˈna mau tamarii.

4. (a) Eaha te huru Metua o Iehova i nia ia tatou? (b) Eaha ta tatou e hiˈopoa mai i roto i teie tumu parau e i to muri nei?

⁴ Mea fifi no vetahi ia manaˈo i te hoê metua tane ei taata î i te here. Peneiaˈe, te manaˈo ra ratou mai te reira no te tahi mau haamanaˈoraa mauiui mau a hamani-ino-hia ˈi ratou i to ratou tamariiriiraa na to ratou metua tane. Eita roa ˈtu Iehova e na reira i nia i ta ˈna mau tamarii. O ˈna te Metua maitai roa ˈˈe. (Sal. 27:10) Mea here roa na ˈna ia tatou e te aupuru ra oia ia tatou na roto e rave rahi ravea. Hau atu â tatou i te ite e te herehia ra tatou e Iehova, hau atu â ïa tatou i te here ia ˈna. (Iak. 4:8) I roto i teie tumu parau, e hiˈopoa anaˈe e maha tumu o te faaite ra i to Iehova here no tatou. E i to muri nei tumu parau, e hiˈopoa mai tatou e maha ravea no te faaite i to tatou here no Iehova.

5. Eaha ta te Atua e horoa na te mau taata atoa?

⁵ I to Paulo haereraa i Ateno, i Heleni, ua ite oia e rave rahi idolo e ua tiaturi te taata e na ta ratou mau atua i horoa mai i te ora no ratou. Ua paraparau ïa oia ia ratou no nia i ‘te Atua tei hamani i te ao e te mau mea atoa i roto.’ Ua parau mai oia e o te Atua “tei horoa mai i te ora, e te aho, e te mau mea atoa” e maoti ‘o ˈna e ora ˈi, e hahaere ai e e vai mai ai tatou.’ (Ohi. 17:24, 25, 28) Te horoa ra Iehova i te mau mea atoa na tatou ia nehenehe tatou e ora e e oaoa i te oraraa. A feruri na i te tahi mau mea ta ˈna i horoa mai maoti to ˈna here no tatou.

6. Eaha te huru o te vahi ta Iehova i horoa mai? (A hiˈo i te hohoˈa matamua.)

⁶ Ei hiˈoraa, ua faanaho Iehova i te hoê vahi nehenehe mau no tatou. (Sal. 115:15, 16) Ua poiete oia i te mau paraneta atoa, e o te fenua iho â te mea taa ê mau. Ua hiˈopoa te mau aivanaa i te reva teitei e ua ite ratou i te paraneta e rave rahi, aita râ te taata e nehenehe e ora ˈtu. Aita noa Iehova i horoa na tatou i te mau mea atoa no te ora noa, ua poiete atoa râ oia i te fenua nehenehe mau e te au mau e te papu no tatou ia oaoa i te oraraa. (Isa. 45:18) Ia feruri maite tatou i te vahi ta to tatou Metua ra o Iehova i horoa mai, e ite ïa tatou e te here ra Iehova ia tatou.—A taio i te Ioba 38:4, 7; Salamo 8:3-5.

7. E nafea te huru o ta Iehova poieteraa ia tatou e faaite ai e te here mau ra oia ia tatou?

⁷ Te vai atoa ra te tahi atu tumu i here ai Iehova ia tatou, i to ˈna ïa poieteraa ia tatou e ma te horoa mai i te aravihi ia pee tatou i to ˈna hiˈoraa. (Gen. 1:27) Oia hoi, e  nehenehe tatou e ite i to ˈna here no tatou e e faaite i to tatou here no ˈna. Ua ite o ˈna e tera te tumu o to tatou oaoa mau. Hoê â no te mau tamarii, e rahi atu â to ratou oaoa a ite ai e te here ra to ratou metua ia ratou. A haamanaˈo, ua haapii mai Iesu e e oaoa iho â tatou ia haafatata ˈtu i to tatou Metua ra o Iehova. (Luka 11:28) Ua horoa mai oia i te mau mea atoa e oaoa ˈi tatou. Mea papu, e Atua horoa noa oia e te here ra oia ia tatou.—Tim. 1, 6:17; Sal. 145:16.

8. No te aha tatou e hinaaro ai ia haapii Iehova ia tatou?

⁸ Ua here te mau metua tane i ta ratou mau tamarii e aita ratou e hinaaro ia haavarehia aore ra ia taivahia ratou. E rave rahi râ metua e ore e farii i te mau ture aveia Bibilia no nia i te maitai e te ino. No reira eita e noaa ia ratou ia aratai i ta ratou mau tamarii ma te tano. E peapea e e huanane ïa  te faahopearaa. (Mas. 14:12) Teie râ, te horoa ra Iehova i te aratairaa maitai roa ˈˈe i ta ˈna mau tamarii no te mea o ˈna “te Atua parau mau.” (Sal. 31:5) Te oaoa ra o ˈna i te haapii ia tatou i te parau mau no nia ia ˈna. E te haapii atoa mai ra oia ia tatou e nafea e haamori ai ia ˈna. E te faaite ra Iehova ia tatou i te haerea maitai roa ˈˈe no te ora. (A taio i te Salamo 43:3.) Eaha ta Iehova i haapii mai e e nafea te reira e faaite mai e te here ra Iehova ia tatou?

9, 10. (a) No te aha Iehova e faaite ai ia tatou no nia ia ˈna iho? (b) Eaha ta ˈna e haapii mai no nia i ta ˈna opuaraa no tatou?

⁹ Na mua roa, te faaite mai ra Iehova no nia ia ˈna iho. Te hinaaro ra oia ia matau tatou ia ˈna. (Iak. 4:8) No reira oia i faaite ai ia tatou i te auraa o to ˈna iˈoa. Mea rahi atu â te faahitiraa o to ˈna iˈoa i roto i te Bibilia i te tahi atu iˈoa. Oia atoa, te faaite mai ra Iehova i to ˈna huru. Ia mataitai tatou i te mau mea atoa ta ˈna i poiete, e ite ïa tatou e e Atua puai o ˈna e te î i te paari. (Roma 1:20) E a taio ai i te Bibilia, e ite tatou e e Atua parau-tia o ˈna e te here ra oia ia tatou. A haapii ai i te huru faahiahia mau o Iehova, e piri atu â ïa tatou ia ˈna.

¹⁰ Te haapii atoa mai ra Iehova eaha ta ˈna opuaraa. Te faaite ra Iehova e tei roto tatou i to ˈna utuafare. Te faataa ra oia eaha ta ˈna e titau mai ra ia nehenehe tatou e ohipa amui ma te hau e to ˈna utuafare atoa. Te haapapu ra te Bibilia e aita te Atua i hamani ia tatou e te tiaraa ia faaoti eaha te mea maitai e te mea ino no tatou iho. (Ier. 10:23) Ua ite Iehova eaha te mea maitai roa ˈˈe no tatou. Ma te farii i to ˈna tiaraa mana e ma te faaroo ia ˈna, e ite ïa tatou i te hoê oraraa hau e te oaoa. Ua haapii mai Iehova i teie parau mau faufaa no te mea te here ra oia ia tatou.

11. Eaha ta to tatou Metua î i te here i fafau mai no nia i te a muri aˈe?

¹¹ Te haapeapea ra iho â te hoê metua tane î i te here i te a muri aˈe o ta ˈna mau tamarii. Te hinaaro ra oia ia ite ratou i te hoê oraraa oaoa. Tera noa râ, te haapeapea ra e rave rahi taata i teie mahana no nia i te a muri aˈe, e te ohipa rahi noa ra ratou ia noaa i te mau mea e ore hoi e vai maoro. (Sal. 90:10) Auê ïa tatou i te mauruuru i to tatou Metua ra o Iehova, o te haapii ra ia tatou e nafea e fanaˈo i te hoê oraraa oaoa i teie nei â, e o te fafau atoa ra i te hoê a muri aˈe faahiahia mau!

12. Mea nafea Iehova i tamata ˈi i te tauturu ia Kaina e ia Baruka?

¹² I to Iehova iteraa e ua opua Kaina i te rave i te hoê ohipa ino mau, ua tamata oia i te tauturu ia Kaina ma te ani atu: “Eaha oe i riri ai; e eaha hoi i tuatua ˈi to mata na? Ia rave oe i te parau maitai ra, eita anei e itehia mai?” (Gen. 4:6, 7) Aita râ Kaina i hinaaro i ta Iehova tauturu, no reira oia i oto ai. (Gen. 11-13) I te tahi atu taime, ua ite Iehova e mea ino to Baruka haerea o tei faarohirohi e o tei haaparuparu ia ˈna. Ua faaara  ïa Iehova ia Baruka ia taui i to ˈna huru feruriraa no te mea aita to ˈna haerea i tano. Ua faaroo Baruka i ta Iehova aˈoraa, e ua ora mai ïa oia.—Ier. 45:2-5.

13. Eaha ta te mau tavini a Iehova i haapii a faaruru ai ratou i te tahi mau fifi ino mau?

¹³ Te aratai e te aˈo ra Iehova ia tatou no te mea te here ra oia ia tatou. Aita noa oia e aˈo ia tatou i te taime e titauhia, e faaineine atoa râ oia ia tatou. (Heb. 12:6) I roto i te Bibilia, e taio tatou i te aamu o te tahi mau tavini taiva ore o tei faaineinehia e Iehova ia riro ratou ei taata maitai roa ˈˈe. Ei hiˈoraa, ua faaruru Iosepha, Mose e Davida i te tahi mau fifi ino mau. I roto i te ati, tei pihai iho noa Iehova ia ratou. E ua tauturu mai te mau ohipa atoa ta ratou i haapii i tera taime i to Iehova horoaraa i te mau hopoia rahi atu â ia ratou. Ia taio tatou i roto i te Bibilia e nafea Iehova e turu ai e e faaineine ai i ta ˈna mau tavini, e ite ïa tatou e te here mau ra oia ia tatou.—A taio i te Maseli 3:11, 12.

14. Ia rave tatou i te tahi ohipa ino, e nafea Iehova e faaite mai ai i te here?

¹⁴ Noa ˈtu e e rave tatou i te hoê ohipa ino, te tamau ra Iehova i te faaite i te here ia tatou. Ia farii tatou i ta ˈna aˈoraa e ia tatarahapa atoa tatou, e faaore roa oia i ta tatou mau hara. (Isa. 55:7) Eaha ïa te auraa? Te faaite ra te mau parau a Davida no nia i to Iehova faaoreraa i te hara e e Atua aroha hamani maitai oia ia tatou: “Oia tei faaore i ta oe atoa ra mau hapa, e o tei faaora i to oe atoa ra mau maˈi; o tei faaora ia oe i te pohe; o tei faakorona ia oe i te hamani maitai e te aroha; mai te hitia o te râ e taa ê i te tooa o te râ ra, o ta ˈna ia faataa-ê-raa i ta tatou mau hara ia tatou nei.” (Sal. 103:3, 4, 12) Te aˈo e te aratai ra Iehova ia tatou ma te ravea rau. Te hinaaro ra anei outou e rave oioi i te mau tauiraa? A haamanaˈo noa e te aˈo ra Iehova ia tatou no to ˈna here ia tatou.—Sal. 30:5.

15. Eaha ˈtu â ravea o te faaite mai e te here ra Iehova ia tatou?

¹⁵ E paruru te hoê metua tane î i te here i to ˈna utuafare i te ati. Te na reira atoa ra to tatou Metua ra o Iehova. Te parau mai ra te fatu salamo no nia ia Iehova: “Te tiai ra oia i te varua o to ˈna feia moˈa ra; e te faaora ra oia ia ratou i te rima o te paieti ore ra.” (Sal. 97:10) A feruri na: Mai ta outou e haa oioi no te paruru i to outou mata no te mea mea faufaa roa te reira no outou, te haa oioi atoa ra Iehova no te paruru i ta ˈna mau tavini no te mea mea faufaa roa ratou no ˈna.—A taio i te Zekaria 2:8.

16, 17. Mea nafea Iehova i te parururaa i to ˈna nunaa i na mua ˈˈe e i teie mahana?

¹⁶ Te tahi atu â ravea ta Iehova i rave no te paruru i to ˈna nunaa i na mua ˈˈe e i teie mahana, na roto ïa i ta ˈna mau melahi. (Sal. 91:11) I te hoê po, ua haapohe te hoê melahi 185 000 faehau no Asura e ua faaora i te nunaa o te Atua. (Arii 2, 19:35) I te senekele matamua, ua faaora mai te mau melahi ia  Petero, Paulo, e te tahi atu taata mai roto mai i te fare auri. (Ohi. 5:18-20; 12:6-11) Aita i maoro aˈenei, ua tupu te hoê tamaˈi ino mau i te fenua Afirika. Tei roto te fenua i te arepurepu no teie mau tamaˈi, eiâraa, maferaraa e haapoheraa. Noa ˈtu ua ere e rave rahi taeae i ta ratou mau taoˈa atoa, ua ora mai râ ratou. Ua ite ratou i to Iehova here e ua ite atoa mai e ua aupuru Iehova ia ratou. Noa ˈtu te mau tupuraa fifi mau ta ratou i faaruru, ua oaoa noa ratou. I to te hoê tia o te pu rahi farereiraa ia ratou e i to ˈna aniraa i te mau taeae e tuahine eaha to ratou huru, ua pahono atu ratou: “Mea maitai roa, maoti o Iehova!”

¹⁷ Parau mau, te vai ra vetahi o te mau tavini a Iehova, mai te pǐpǐ ra o Setephano e te tahi atu â mau pǐpǐ mai ia ˈna, tei pohe no te mea ua vai taiva ore ratou. Eita noa Iehova e nehenehe e arai i te mau tupuraa fifi mau. E paruru atoa ra oia i to ˈna nunaa mai te hoê pǔpǔ. E na reira oia ma te faaara ˈtu ia ratou i nia i te ravea e rave rau ta Satani e faaohipa ra no te tamata i te haafifi ia ratou. (Eph. 6:10-12) E ite tatou i teie mau faaararaa i roto i te Bibilia e i te mau papai a te faanahonahoraa a Iehova. Ei hiˈoraa, ua haapii mai tatou no nia i te mau fifi atâta o te Internet, te nounou moni, e oia atoa, te mau hohoˈa teata, buka aore ra hautiraa morare ore e haavî uˈana. Mea papu, te here ra Iehova ia tatou e te hinaaro ra oia e paruru ia tatou.

18. Eaha to outou huru aau no nia i to Iehova here no outou?

¹⁸ I to Mose manaˈoraa no nia i te mau matahiti atoa i tavini na oia ia Iehova, ua papu ia ˈna i to Iehova here no ˈna. I na ô ai Mose: “I te poipoi ra, a faaî oe ia matou i to here, ia oâoâ e ia rearea matou i to matou nei pue mahana toe.” (Sal. 90:14, Te Bibilia Moˈa V.C.J.S., 1976) E haamaitaihia tatou ia hinaaro tatou e taa e e ite i to Iehova here no tatou. Auê ïa haamaitairaa rahi e ia herehia tatou e Iehova! Te tuea ra to tatou huru aau i to te aposetolo Ioane o tei parau: “A hiˈo na i te huru o to te Metua [here] ia tatou nei.”—Ioa. 1, 3:1.