E IVA matahiti to ˈu a ite ai au e ua faaea to ˈu tupuraa. I teie mahana e 43 matahiti to ˈu, hoê metera noa to ˈu roa. I te iteraa to ˈu na metua e eita roa ˈtu vau e roroa mai, ua faaitoito raua ia ˈu ia haa rahi ia ore au e manaˈonaˈo noa i nia i to ˈu roa. No reira, no te tamau i te rave i te ohipa, ua faanaho vau i te hoê fare hooraa maa hotu i mua i to matou fare. Ua tamau vau ia vai ma noa teie vahi. Ua anaanatae ïa te taata e haere mai i reira.

Tera râ, noa ˈtu mea rahi ta ˈu ohipa, aita te reira i taui. Mea poto noa iho â vau, e mea tia ia ˈu ia faaruru i te mau mea matauhia o te oraraa mai te teitei o te mau vahi aufauraa. E au ra e i hamanihia na te mau mea atoa no te taata mea roa aˈe ia ˈu. Ua mauiui roa vau. Ua taui râ te reira i te 14raa o to ˈu matahiti.

I te hoê mahana, ua hoo e piti vahine Ite no Iehova i te tahi mau maa hotu e i muri iho ua pǔpǔ mai raua ia ˈu i te hoê haapiiraa Bibilia. Ua taa ia ˈu e mea faufaa aˈe ia ite o vai Iehova e i ta ˈna opuaraa i to ˈu roa. Ua tauturu rahi te reira ia ˈu. Ua riro te Salamo 73:28 ei irava au-roa-hia e au. Te parau ra te tuhaa matamua o teie irava: “E mea maitai . . . ia ˈu ia haafatata ˈtu i te Atua.”

Ua faarue oioi to matou utuafare i Côte d’Ivoire no te ora i Burkina Faso e ua taui roa to ˈu oraraa. I to matou vahi faaearaa matamua, ua matau te taata i te ite ia ˈu i pihai iho i te vahi hooraa maa hotu. I teie râ vahi faaearaa apî to matou, e taata ěê vau e no te feia atoa no ǒ, mea huru ê roa no ˈu. Te hiˈo noa ra te taata ia ˈu, no reira vau i faaea noa ˈi i roto i te fare e rave rahi hebedoma. Ua haamanaˈo vau i te maitai rahi ta ˈu i ite a haafatata ˈtu ai au ia Iehova. Ua papai ïa vau i te amaa a te mau Ite no Iehova e ua tonohia mai te hoê taata au mau. Ua haere mai Nani, te hoê mitionare, e farerei ia ˈu na nia i te hoê pereoo e piti huira.

Mea heehee roa te purumu one i to matou vahi faaearaa. E i te tau ûa, mea vari roa. Ua topa Nani e rave rahi taime mai to ˈna pereoo e piti huira a haere mai ai oia e faatere i ta ˈu haapiiraa. Aita râ oia i taora i te tauera. I te hoê mahana, ua ani mai e e haere mai oia e tii ia ˈu no te haere i te mau putuputuraa. Taa ˈtura ia ˈu e mea titauhia ia faarue te fare no te faaruru i te mata taata. Hau atu â, e teiaha ˈtu â  to ˈna pereoo e piti huira ia parahi au i muri, mea fifi aˈena hoi ia faahoro i te reira. Noa ˈtu ua farii au, te haamanaˈo ra vau i te piti o te tuhaa o te irava au-roa-hia e au: “Ua tiaturi au i te Fatu ra ia Iehova.”

I te tahi taime, ua topa mâua Nani i roto i te vari. No to mâua râ anaanatae i te mau putuputuraa, aita mâua i tâuˈa i te reira. Mea taa ê iho â te mata ataata here mau i roto i te Piha a te Basileia e te mata o te taata ia haere au i rapae! E iva avaˈe i muri iho, ua bapetizohia vau.

Te parau ra te toru o te tuhaa o te irava o ta ˈu i au roa, “ia faaite â vau i ta oe atoa ra mau ohipa.” Ua ite au e o te taviniraa te tautooraa rahi roa ˈˈe no ˈu. Ua haamanaˈo noa vau i te taime matamua i haere ai au e poro i tera e tera fare. E hiˈo noa mai te mau tamarii e te feia paari ia ˈu, e pee mai ratou na muri ia ˈu a faaooo noa ˈtu ai i ta ˈu huru haere. Ua mauiui roa vau. I to ˈu râ haamanaˈoraa e te hinaaro mau ra ratou i te paradaiso mai ia ˈu, ua nehenehe au e faaoromai.

No te faaohie aˈe i te mau ohipa, ua noaa mai to ˈu pereoo taataahi e toru huira. E turai to ˈu hoa pororaa ia ˈu mai te hoê vahi teitei e ia oti e e ouˈa oia i nia i te pereoo taataahi a hee atu ai mâua i raro. Noa ˈtu e mea fifi te pororaa no ˈu na mua ˈˈe, ua oaoa roa râ vau i muri iho. No reira i 1998, ua faaoti au e riro ei pionie tamau.

Ua faatere au e rave rahi haapiiraa Bibilia e ua bapetizohia na feia haapii e maha. Hau atu â, ua farii atoa hoê o to ˈu mau tuahine i te parau mau! Ia faaroo vau mea nafea te tahi mau piahi i te haereraa i mua, ua faaitoito te reira ia ˈu i te taime tano. I te hoê mahana, a mauiui noa ˈi au i te maˈi malaria, ua tae mai te hoê rata na Côte d’Ivoire mai. Ua haamata vau hoê haapiiraa Bibilia e te hoê taurearea piahi no te haapiiraa teitei i Burkina Faso o ta ˈu i horoa na te hoê taeae. Tau taime i muri aˈe, ua haere teie piahi e ora i Côte d’Ivoire. Ua oaoa roa vau i to ˈu faarooraa e ua riro oia ei taata poro bapetizo-ore-hia!

E nafea vau e aupuru ai ia ˈu iho? Ua farii te hoê faanahonahoraa no te feia huma ia haapii ia ˈu i te nira. Ua tapao te hoê taata haapii i ta ˈu huru rave i te ohipa e ua parau mai “E haapii paha matou ia oe e nafea ia hamani i te puˈa.” E ua na reira ratou. I teie nei, e puˈa ïa vau i te ahu e e hamani atoa vau i te puˈa i te fare. Mea au na te taata i ta ˈu puˈa e ua parau atu ia vetahi ê ia hoo atoa i te reira. Na ˈu iho e afai roa ˈtu i te reira na nia i te hoê pereoo e toru huira.

Teie râ hoi, i 2004, ua faaea vau i te taviniraa pionie tamau no te mauiui rahi o to ˈu tua. Te tamau râ ra vau i te haere i te pororaa.

No te feia, e taata ataata roa vau. E rave rahi tumu e oaoa ai au no te mea mea maitai no ˈu ia haafatata ˈtu i te Atua.—Faatiaraa a Sarah Maiga.