1, 2. No te aha e nehenehe e parau e mea taa ê te taata i te animara?

 MEA otahi te roro o te taata. Ei hiˈoraa, e aravihi to te taata no te haapii i te parau. Maoti te parau e nehenehe ai tatou e taio, e papai, e paraparau e e taa i ta tatou e faaroo ra. Oia atoa, e nehenehe tatou e pure e e arue ia Iehova. Na te reira e faataa ê te taata i te animara. Aita te mau aivanaa e nehenehe e taa maitai e nafea to tatou roro e nehenehe ai e rave i teie mau ohipa.

² E ô te faaohiparaa i te parau no ǒ mai ia Iehova ra. (Sal. 139:14; Apo. 4:11) Ua horoa mai oia ia tatou i te tahi atu ô o te faaite ra i te taa-ê-raa e te animara. Ua poietehia te taata ma te huru o te Atua. E tiamâraa ta tatou no te maiti, oia hoi, e nehenehe ta tatou e rave i ta tatou iho mau faaotiraa. E faaoti ïa tatou ia faaohipa i te parau no te tavini e no te arue ia Iehova.—Gen. 1:27.

3. Eaha ta Iehova i horoa mai ia tatou no te riro ei taata î i te paari?

 ³ Ua faaite Iehova ia tatou e nafea e tavini ai e e arue ai ia ˈna ma te horoa i te Bibilia. Te vai ra te Bibilia taatoa aore ra te tahi tuhaa o te mau Papai o tei hau atu i te 2 800 reo. Ia feruri maite tatou i ta te Bibilia e parau ra, e haamata ïa tatou e pee i te huru feruriraa o te Atua. (Sal. 40:5; 92:5; 139:17) Maoti te mau manaˈo o Iehova, e riro ïa tatou ei taata î i te paari e e aratai te reira ia tatou i te ora mure ore.—A taio i te Timoteo 2, 3:14-17.

4. Eaha te auraa ia feruri maite e eaha te mau uiraa ta tatou e hiˈo mai?

⁴ Eaha te auraa ia feruri maite? O te feruri-roa-raa ïa i nia i te hoê ohipa aore ra o te feruriraa ma te hohonu e ma te haapao maitai i nia i te reira. (Sal. 77:12; Mas. 24:1, 2) E tauturu-rahi-hia tatou ia feruri maite i ta tatou e haapii no nia ia Iehova e ia Iesu. (Ioa. 17:3) I roto i teie tumu parau, e pahono tatou i teie mau uiraa: E nafea tatou e nehenehe ai e taio ia faaohie i te feruri-maite-raa? E feruri maite tatou i te aha? E eaha te tauturu mai ia tatou ia tamau i te feruri maite e ia oaoa i te reira?

5, 6. Eaha te nehenehe e tauturu ia oe ia haamanaˈo e ia taa ˈtu â i ta oe e taio ra?

⁵ Ua tapao aˈena anei oe e te vai ra te mau ohipa o ta oe e nehenehe e rave e aita e titauhia ia feruri i te reira? Mai te hutiraa i te aho, te haereraa na raro, aore ra na nia i te hoê pereoo taataahi. Ia taio râ oe, te vai ra te tahi mau taime aita hoi oe e feruri. Peneiaˈe te haamata ra oe i te feruri i te tahi atu ohipa i taua taime ra. Eaha ta oe e nehenehe e rave no te ore e na reira? E mea faufaa ia feruri maite i ta oe e taio ra e to ˈna auraa. No reira, i te hopea o te hoê paratarafa aore ra i te tumu parau iti o te hoê vea, a faaea rii maa taime e a feruri maite i ta oe i taio iho nei. A feruri i ta oe i haapii mai e a faaite e ua taa maitai ia oe i te reira.

⁶ Ua haapii te mau aivanaa e mea ohie aˈe ia haamanaˈo i te hoê ohipa ia taiohia te reira ma te reo puai. Ua ite Iehova i te reira. Tera hoi te tumu i parau ai oia ia Iosua ia taio i te buka o te Ture “ia haamanaˈo maite,” oia hoi, ia taio i te reira no ˈna iho. (A taio i te Iosua 1:8.) E tauturu mai te taioraa ma te reo puai i te Bibilia ia feruri maite e ia haamanaˈo atu â i te reira.

7. Eaha te taime maitai roa ˈˈe no te feruri maite i te Bibilia? (A hiˈo i te hohoˈa matamua.)

⁷ E titauhia ia tatou ia rave i te mau tutavaraa rahi no te feruri maite i ta tatou e haapii ra. No reira, ia feruri maite oe, e mea maitai aˈe ia faataa i te hoê taime e aita oe i rohirohi e ia haere oe i te hoê vahi e aita e maniania, ia ore te tahi atu ohipa e haafariu ê ia oe. Ua feruri maite Davida a faaea noa ˈi i nia i to ˈna roi i te po taatoa. (Sal.  63:6) Ua maiti Iesu, e taata tia roa o ˈna, i te mau vahi aita e maniania no te feruri maite e no te pure.—Luka 6:12.

8. (a) E feruri maite tatou i te aha? (b) Eaha te huru aau o Iehova ia paraparau tatou ia vetahi ê no nia ia ˈna?

⁸ Hau atu â i ta oe e taio ra i roto i te Bibilia, e rave rahi atu â ohipa ta oe e nehenehe e feruri maite. Ei hiˈoraa, ia mataitai oe hoê o te mau poieteraa faahiahia mau a Iehova, a faaea rii maa taime e a ui, ‘Eaha ta te reira e haapii mai ra no nia ia Iehova?’ Eita e ore, e turai te reira ia oe ia haamauruuru ia Iehova na roto i te pure. Ia apiti oe e te tahi atu, e hinaaro oe e faaite i to oe huru aau ia ratou. (Sal. 104:24; Ohi. 14:17) Te haapao mai ra Iehova ia tatou e ua oaoa oia ia feruri maite tatou i nia ia ˈna, ia pure ia ˈna e ia paraparau ia vetahi ê no nia ia ˈna. Te haapapu mai ra te Bibilia: ‘E papaihia ihora te tahi buka manaˈoraa i mua ia ˈna, no te feia i mǎtaˈu ia Iehova, e tei feruri maite i to ˈna ra iˈoa.’—Mal. 3:16.

9. (a) Ia au i ta Paulo i parau ia Timoteo, ia feruri maite o ˈna i nia i te aha? (b) Ia faaineine tatou no te haere e poro, e feruri tatou i te aha?

⁹ Ua parau te aposetolo Paulo ia Timoteo e e nehenehe te feruri-maite-raa i ta ˈna huru paraparau, to ˈna haerea e ta ˈna haapiiraa e ohipa i nia ia vetahi ê. (A taio i te Timoteo 1, 4:12-16.) E nehenehe atoa oe e feruri maite i nia i teie mau ohipa. Ei hiˈoraa, e titauhia ia oe i te taime no te feruri  maite a faaineine ai oe no te hoê haapiiraa Bibilia. A haamanaˈo i ta oe piahi e a tamata i te imi te hoê uiraa aore ra faahiˈoraa o te tauturu ia ˈna ia haere i mua. Ma te na reira, e puai atu â to oe faaroo e e riro oe ei taata haapii Bibilia maitai aˈe e oaoa aˈe. E faufaa-atoa-hia oe ia feruri maite hou a haere ai e poro. (A taio i te Ezera 7:10.) E nehenehe paha oe e taio i te hoê pene o te buka Ohipa no te tauturu ia oe ia riro ei taata poro itoito atu â. Oia atoa, e nehenehe oe e feruri maite i te mau irava Bibilia ta oe e opua i te faaohipa i tera mahana e te mau papai ta oe e vaiiho atu. (Tim. 2, 1:6) A feruri i te mau taata i roto i te tuhaa fenua e i ta oe e nehenehe e parau atu o te anaanatae ia ratou. Ia faaineine ia oe mai te reira, e nehenehe oe e faaohipa i te Bibilia ma te aravihi no te poro ia vetahi ê.—Kor. 1, 2:4.

10. Eaha ˈtu â ohipa e nehenehe ai tatou e feruri maite?

¹⁰ Eaha ˈtu â ohipa e nehenehe ai tatou e feruri maite? Ia rave oe maa nota i te roaraa o te mau oreroraa parau no te taatoaraa, putuputuraa e tairururaa, a faataa i te tahi taime no te hiˈopoa faahou i te reira. A na reira ˈi oe, a uiui, ‘Eaha ta ˈu i haapii no ǒ mai i te Parau a te Atua ra e ta ˈna faanahonahoraa?’ E nehenehe atoa oe e feruri maite i te mau tumu parau o te mau papai Te Pare Tiairaa e A ara mai na! i te mau avaˈe atoa e i te mau papai e matara mai i te tairururaa hopea. Ia taio oe i te buka matahiti, a faaea rii maa taime i muri iho i te taioraa o te hoê aamu, a feruri e a vaiiho te reira e haaputapû i to oe aau. Ia taio oe i ta tatou mau papai, a faaite papu i te mau manaˈo tumu aore ra a tapao mai i te hiti o te api. E tauturu te reira ia oe ia faaineine no te hoˈi-faahou-raa e farerei, te farereiraa faanahohia no te faaitoito, aore ra te oreroraa parau. Te mea faufaa roa ˈˈe, ia faaea rii oe maa taime e ia feruri maite oe i ta oe i taio, e rave ïa oe i te taime no te faaô i te mau parau i roto i to oe aau e no te haamauruuru ia Iehova na roto i te pure no te mau ohipa maitai ta oe e haapii nei.

11. (a) Eaha te papai faufaa roa ˈˈe te titauhia ia tatou ia feruri maite? (b) Eaha te tauturu ta te reira e horoa mai?

¹¹ Oia mau, e titauhia ia tatou ia feruri maite i te Bibilia, te papai faufaa roa ˈˈe. E nafea ïa oe ia tae i te hoê mahana e patoihia oe ia fanaˈo i te hoê Bibilia? * Aita ta te hoê taata e nehenehe e patoi ia oe ia feruri maite i te mau haapiiraa ta oe i tamau aau, mai te mau irava Bibilia aore ra himene o te Basileia ta oe e au roa ˈˈe. (Ohi. 16:25) E e tauturu mai te varua moˈa o te Atua ia haamanaˈo  i ta oe i haapii e o te tauturu ia oe ia vai taiva ore.—Ioa. 14:26.

12. Eaha te hoê ravea ta oe e nehenehe e faanaho no ta oe taioraa Bibilia i te mau mahana atoa?

¹² Eaha te hoê ravea ta oe e nehenehe e faanaho no ta oe taioraa Bibilia i te mau mahana atoa? Peneiaˈe e nehenehe oe e faataa i te tahi mau mahana o te hebedoma no te faanaho i te taioraa Bibilia no te Haapiiraa no te taviniraa Kerisetiano. I te tahi atu mau mahana, e nehenehe oe e taio i te mau Evanelia mai te buka Mataio, Mareko, Luka e Ioane e e feruri maite i ta Iesu i parau e i rave. (Roma 10:17; Heb. 12:2; Pet. 1, 2:21) Te vai atoa ra te hoê papai o te faataa ra i te mau tupuraa o to Iesu oraraa ia au i to ratou anairaa. E tauturu mai teie papai ia haafaufaa ˈtu â i ta oe taioraa o te mau Evanelia.—Ioa. 14:6.

13, 14. No te aha mea faufaa roa ˈi no tatou ia tamau i te feruri maite i nia ia Iehova e ia Iesu, e e turai te reira ia aha?

¹³ E nehenehe te feruri-maite-raa i nia ia Iehova e ia Iesu e tauturu i te hoê taata ia riro ei Kerisetiano feruriraa paari e ia tapea noa i te hoê faaroo puai. (Heb. 5:14; 6:1) Ia iti mai te taime ta te hoê taata e faataa no te feruri i te Atua, e nehenehe to ˈna taairaa e o Iehova e iti riirii mai a fariu ê atu ai ia ˈNa. (Heb. 2:1; 3:12) Ua faaara Iesu e ia ore tatou e faaroo aore ra e farii i te Parau a te Atua ma “te aau haavare ore e te au,” eita tatou e “tapea maite” i te reira. E nehenehe râ tatou e fifihia i te “manaonao o te mau taoa ˈe i te mau arearearaa no teie nei ao.”—Luka 8:14, 15, Te Faufaa Api.

¹⁴ No reira, a tamau i te feruri maite i te Bibilia e i te ite atu â no nia ia Iehova. E turai mai te reira ia pee maite atu â i to ˈna mau huru maitatai e to ˈna huru atoa. (Kor. 2, 3:18) E tamau tatou i te ite atu â no nia i to tatou Metua ra i te raˈi e i te pee i to ˈna hiˈoraa e a muri noa ˈtu. Aita ˈtu â fanaˈoraa taa ê rahi roa ˈˈe!—Koh. 3:11.

15, 16. (a) Mea nafea te feruri-maite-raa i nia ia Iehova e ia Iesu e tauturu ai ia tatou? (b) No te aha e ere i te mea ohie i te tahi mau taime ia feruri maite, e no te aha e titauhia ia tatou ia tutava i te na reira?

¹⁵ E tauturu mai te feruri-maite-raa i nia ia Iehova e ia Iesu ia vai itoito noa i roto i te parau mau. E faaitoito mai to oe hiˈoraa i te mau taeae e te taata ta oe e farerei i roto i te taviniraa. Ia feruri maite oe i ta Iehova i rave no oe maoti te tusia taraehara o Iesu, e tamau oe i te haafaufaa i to oe taairaa piri e te Atua. (Roma 3:24; Iak. 4:8) Ua na ô Mark, te hoê taeae no Afirika Apatoa o tei tapeahia i roto i te fare auri e toru matahiti no to ˈna faaroo: “E nehenehe e faaauhia te feruri-maite-raa i te hoê tere faahiahia mau. Hau atu â tatou i te feruri maite i te mau ohipa Kerisetiano, hau atu â ïa tatou i te ite rahi atu â i nia i to tatou Atua ra o Iehova. I te tahi mau taime ia paruparu aore ra ia haapeapea vau no nia i te a muri aˈe, e rave au i te Bibilia e e feruri maite au i  te hoê irava. Ua tamǎrû iho â te reira ia ˈu.”

¹⁶ No te rahi o te faaanaanataeraa i roto i teie nei ao, e ere i te mea ohie ia faataa i te taime no te feruri maite i te Bibilia. Ua parau o Patrick, te hoê taeae no Afirika: “E au to ˈu feruriraa i te hoê afata rata tei î i te mau haamaramaramaraa e rave rau. Te vai ra te mea maitai e te mea tano ore atoa o te titauhia ia maiti i te mau mahana atoa. A imi noa ˈi au eaha to roto i to ˈu feruriraa, e ite-noa-hia i te “manaˈo tapitapi.” No reira, e mea titauhia ia pure au ia Iehova hou a feruri maite ai ma te manaˈo papu. Noa ˈtu e e titauhia maa taime hou a feruri maite ai i te mau tumu parau pae varua, e haafatata ˈtu â vau ia Iehova. Ma te na reira, e taa maitai atu â ïa vau i te parau mau.” (Sal. 94:19) Mea papu, e rave rahi ravea e faufaahia ˈi ta tatou taioraa e te feruri-maite-raa i te Bibilia i te mau mahana atoa.—Ohi. 17:11.

17. E nafea oe e imi ai i te taime no te feruri maite?

¹⁷ No vetahi, e tia oioi ratou i te poipoi no te taio, no te feruri maite e no te pure. Area no te tahi atu, i te taime tamaaraa ïa. Peneiaˈe no oe atoa, e taime maitai aˈe te po aore ra hou a haere ai e taoto no te taio i te Bibilia. Mea au na vetahi ê ia taio i te Bibilia i te poipoi e oia atoa hou a haere ai ratou e taoto. (Ios. 1:8) O ‘te faaherehere-maite-raa i te taime’ te ohipa faufaa roa ˈˈe, oia hoi, ia rave i te taime faataahia no te mau ohipa e ere i te mea faufaa ia nehenehe oe e feruri maite i te Parau a te Atua i te mau mahana atoa.—Eph. 5:15, 16.

18. Eaha ta te Bibilia e fafau ra no te mau taata o te feruri maite ra i te Parau a te Atua i te mau mahana atoa e o te faaohipa ra i ta ratou e haapii ra?

¹⁸ Te fafau ra te Bibilia e e haamaitai Iehova i te mau taata atoa o te feruri maite ra i ta ˈna Parau e o te tutava ra i te faaohipa i ta ratou e haapii ra. (A taio i te Salamo 1:1-3.) Te na ô ra Iesu: “O tei faaroo â e ua haapao i te parau a te Atua, o ratou tei maitai,” aore ra, tei oaoa. (Luka 11:28) Te mea faufaa roa ˈˈe râ, e tauturu mai te feruri-maite-raa i te Parau a Iehova i te mau mahana atoa ia haa no te faahanahana ia ˈna. A na reira ˈi, e haamaitai Iehova ma te faaoaoa ia tatou i teie nei â e i a muri aˈe i roto i ta ˈna ao apî.—Iak. 1:25; Apo. 1:3.