1, 2. E nafea te mau Papai e faaite ai i te faufaaraa o te here?

 O TE aroha aore ra te here te huru maitai faufaa roa ˈˈe o te Atua ra o Iehova. (Ioa. 1, 4:16) Ua poiete na mua o ˈna i ta ˈna Tamaiti, Iesu Mesia. Ua vai oia e miria matahiti i te raˈi e to ˈna Metua e ua haapii oia e e Atua î i te here o Iehova. (Kol. 1:15) Ua faaite Iesu i te hoê â here i te roaraa o to ˈna oraraa, i te raˈi e i te fenua. Papu maitai ïa ia tatou e te faatere noa ra Iehova e Iesu ma te here.

² A ani ai te hoê taata ia Iesu eaha te faaueraa rahi roa ˈˈe, ua pahono Iesu: “Hinaaro oe i to Atua ia Iehova ma to aau atoa, e ma to varua atoa, e ma to manaˈo atoa. O te ture matamua teie e te hau i te rahi. E mai te reira atoa te piti; E aroha ˈtu oe i to taata-tupu, mai to aroha ia oe iho na.”—Mat. 22:37-39.

3. O vai to tatou “taata-tupu”?

³ E mea faufaa ia faaite i te here i roto i to tatou mau taairaa  atoa. Ua parau mai Iesu e e mea tia ia here tatou ia Iehova e oia atoa i to tatou taata-tupu. Teie râ, o vai to tatou “taata-tupu”? Mai te peu e mea faaipoipo tatou, o ta tatou tane aore ra vahine ïa to tatou taata-tupu piri roa ˈˈe. Oia atoa to tatou mau taeae e tuahine i roto i te amuiraa, e te mau taata ta tatou e farerei i roto i te pororaa, o ratou atoa to tatou taata-tupu. I roto i teie tumu parau, e hiˈopoa anaˈe e nafea tatou e faaite ai i te here i to tatou taata-tupu.

4. Noa ˈtu te huru tia ore o te taata, e nafea te hoê faaipoiporaa e manuïa ˈi?

⁴ Ua hamani Iehova ia Adamu raua Eva e ua taati oia ia raua. Teie ïa te faaipoiporaa matamua. Ua hinaaro te Atua ia oaoa raua i roto i to raua faaipoiporaa e ia faaî i te fenua i te tamarii. (Gen. 1:27, 28) Tera râ, i muri iho i to ratou faaroo-ore-raa ia Iehova, ua fifihia to raua faaipoiporaa e ua naea tatou paatoa i te hara e te pohe. (Roma 5:12) Noa ˈtu râ, e nehenehe te faaipoiporaa e manuïa i teie mahana. I roto i te Bibilia, ua horoa Iehova, te Tumu o te faaipoiporaa, i te aˈoraa maitai roa ˈˈe na te mau tane e na te mau vahine.—A taio i te Timoteo 2, 3:16, 17.

5. Eaha te faufaaraa ia faaite i te here i roto i te hoê faaipoiporaa?

⁵ Te faaite ra te Bibilia e e mea faufaa te here mahanahana no te fanaˈo i te mau taairaa oaoa. E mea papu iho â te reira i roto i te faaipoiporaa. Ua faataa te aposetolo Paulo i te here mau a parau ai oia: “E faaoromairaa roa to te aroha, e te hamani maitai; e ore te aroha e feii: e ore te aroha e faarahi, e ore hoi e faaahaaha. Eita e rave i te mea au ore, eita e imi i te maitai no ˈna iho, eita e riri vave, eita e manaˈo ino ia vetahi ê; eita e oaoa i te parau-tia ore, e oaoa râ i te parau mau; e tapoˈi i te mau mea atoa ra, e faaroo i te mau mea atoa ra, e tiai i te mau mea atoa ra, e haamahu i te mau mea atoa ra. E ore roa te aroha e mou; area te mau tohu ra, e mou ïa; area te parau ěê ra, e ore atoa ïa; area te ite ra, e faaorehia ïa te reira.” (Kor. 1, 13:4-8) Ia feruri anaˈe tatou i te mau parau a Paulo e ia faaohipa anaˈe i te reira, e fanaˈo ïa tatou i te hoê faaipoiporaa oaoa.

6, 7. (a) Eaha ta te Bibilia e parau ra no nia i te upoo o te utuafare? (b) Eaha te huru o te hoê tane Kerisetiano i nia i ta ˈna vahine?

⁶ Ua faaoti Iehova o vai te upoo o te utuafare. Ua faataa Paulo: “Teie râ to ˈu hinaaro, ia haapao outou, e o te Mesia te upoo o te taata atoa nei, e o to te vahine ra upoo, o te tane ïa, e o to te Mesia ra upoo, o te Atua ïa.” (Kor. 1, 11:3) Teie râ, te tiai ra Iehova ia riro te tane ei upoo o te utuafare î i te here, eiaha roa ˈtu râ ei upoo haavî. E Upoo hamani maitai e te miimii ore o Iehova. Ei faahopearaa, te faatura ra Iesu i te tiaraa î i te here o te Atua ma te parau, e ‘te here nei oia i te Metua.’ (Ioa. 14:31) Aita Iesu i na reira ahani mea etaeta Iehova i nia ia ˈna.

⁷ Noa ˈtu e o te tane te upoo o te vahine, te parau ra te Bibilia i te tane ia faatura i ta ˈna vahine. (Pet. 1, 3:7) E nafea te tane? E haapao ïa o ˈna i ta ta ˈna vahine e hinaaro  mau ra e e faatura oia i ta ˈna e au ra. Te na ô ra te Bibilia: “E te mau tane ra, e aroha outou i ta outou mau vahine, mai te Mesia atoa i aroha i te ekalesia [aore ra amuiraa], e ua horoa ia ˈna iho ei taui.” (Eph. 5:25) Oia mau, ua horoa Iesu i to ˈna ora no ta ˈna mau pǐpǐ. Mai ia Iesu, ia riro te hoê tane ei upoo o te utuafare î i te here, mea ohie aˈe no te hoê vahine ia here e ia faatura ia ˈna e ia farii i ta ˈna mau faaotiraa.—A taio i te Tito 2:3-5.

8. Eaha to tatou huru i nia i to tatou mau taeae e tuahine?

⁸ I teie mahana, e mirioni taata na te ao nei e haamori ra ia Iehova. Eaha ïa to tatou huru i nia i to tatou mau taeae e tuahine? Te parau ra te Bibilia: “E teie nei, te vai nei ta tatou ravea, e hamani maitai tatou i te taata atoa, ia rahi atu râ i to te fetii faaroo ra.” (Gal. 6:10; a taio i te Roma 12:10.) Ua papai te aposetolo Paulo e o te here taeae mau te faahopearaa o ta tatou “faarooraa i te parau mau.” Ua parau atoa Petero i to ˈna mau taeae Kerisetiano e ‘hau atu i te mau mea atoa, ia rahi to outou here te tahi i te tahi.’—Pet. 1, 1:22; 4:8.

9, 10. No te aha mea tahoê te mau tavini a te Atua?

⁹ Mea otahi ta tatou faanahonahoraa na te ao nei. No te aha? No to tatou here  hohonu no to tatou mau taeae e tuahine. Te mea faufaa roa ˈˈe, no to tatou here ia Iehova e no to tatou auraroraa i ta ˈna mau ture i turu ai oia ia tatou maoti te puai rahi aˈe i roto i te ao nei, to ˈna varua moˈa. Te tauturu mai ra te varua o te Atua ia riro tatou ei huitaeae tahoê na te ao nei.—A taio i te Ioane 1, 4:20, 21.

¹⁰ Ua haapapu Paulo e e hinaaro-rahi-hia te here i rotopu i te mau Kerisetiano a papai atu ai: “E tena na, e faaaau aroha noa, e te hamani maitai, e te haehaa, e te mǎrû, e te faaoromai rahi, mai te feia moˈa e te herehia i maitihia e te Atua ra; e faaoromai te tahi i te tahi, e e faaore te tahi i ta te tahi hapa, ia pariraahia ta te tahi i te tahi; mai te Mesia atoa i faaore i ta outou na, e na reira atoa outou: e ei nia roa iho i taua mau mea atoa nei, o te aroha o taua tatua nehenehe roa ra ïa.” (Kol. 3:12-14) Auê tatou i te oaoa i te iteraa e te vai ra te here, te “tatua nehenehe roa,” i rotopu ia tatou noa ˈtu te vahi no reira mai tatou!

11. Eaha te tapao a te faanahonahoraa a te Atua?

¹¹ Te faaite mai ra te here mau e te auhoêraa i rotopu i te mau tavini a Iehova e te faaohipa ra ratou i te haamoriraa mau. Ua na ô Iesu: “O te mea teie e ite ai te taata atoa e, e pǐpǐ outou na ˈu, ia aroha outou ia outou iho.” (Ioa. 13:34, 35) E ua papai te aposetolo Ioane: “O te mea teie e itea ˈi te tamarii a te Atua, e te tamarii a te diabolo: o tei ore i rave i te parau-tia ra, e ere ïa i to te Atua; e ere atoa tei ore i aroha i tana taeae. Teie hoi te parau ta outou i faaroo, mai te matamua mai, ia aroha tatou ia tatou iho.” (Ioa. 1, 3:10, 11) Maoti te here e te auhoêraa e itehia ˈi te mau Ite no Iehova ei pǐpǐ mau a te Mesia, te nunaa ta te Atua e faaohipa ra no te faaite i te parau apî oaoa o te Basileia i te ao atoa nei.—Mat. 24:14.

12, 13. Eaha ta te taata o “te feia rahi roa” e rave ra i teie mahana, e eaha ta ratou e fatata i te ite?

¹² No roto mai te rahiraa o te mau tavini a Iehova o te “feia rahi roa” i te tuhaa taa ê e rave rahi na te ao nei. Te faaite ra ratou e te turu ra ratou i te Basileia. O ratou “te feia i haere mai mai roto mai i te ati rahi ra, e ua horoi i to ratou ahu, e ua teatea, i te toto o te Arenio ra.” O ratou te faaite ra i te faaroo i roto i te tusia taraehara o Iesu. Te here ra te “feia rahi roa” ia Iehova e i ta ˈna Tamaiti, e te haamori ra ratou ia Iehova i “te rui e te ao.”—Apo. 7:9, 14, 15.

¹³ E fatata te Atua i te haamou i teie ao ino i te “ati rahi.” (Mat. 24:21; a taio i te Ieremia 25:32, 33.) E paruru e e aratai râ Iehova i ta ˈna mau tavini i roto i te ao apî no te mea te here ra oia ia ratou. Mai ta ˈna i fafau  fatata 2 000 matahiti aˈenei, “na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa.” Te tiai ru ra anei outou ia ora i roto i te paradaiso i muri aˈe te ino, te mauiui e te pohe i te faaorehia?—Apo. 21:4.

14. Eaha te auraa e e riro te nahoa rahi ei mea rahi?

¹⁴ I te haamataraa o te anotau hopea i 1914, mea iti roa te mau tavini a te Atua, e tausani noa ratou. No to ratou here i te taata-tupu e te tauturu a te varua moˈa a te Atua i poro ai teie pǔpǔ iti o te mau taeae e tuahine faatavaihia i te parau apî oaoa noa ˈtu te mau fifi atoa. Eaha ïa te faahopearaa? I teie mahana, ua amui mai te hoê nahoa rahi o te tiaturi ra e ora i te fenua e a muri noa ˈtu. Fatata e 8 000 000 Ite no Iehova, i roto hau atu 115 400 amuiraa na te ao nei, e te maraa noa ra te numera. Ei hiˈoraa, ua hau atu i te 275 500 Ite no Iehova apî tei bapetizohia i te matahiti taviniraa 2014. Fatata e 5 300 taata tei bapetizohia i te mau hebedoma atoa.

15. E nafea e rave rahi taata i te faarooraa i te parau apî oaoa i teie mahana?

¹⁵ Mea faahiahia roa i te iteraa e e nafea e rave rahi taata i te faarooraa i te parau apî oaoa o te Basileia. I teie mahana, te vai ra ta tatou mau papai na roto hau atu e 700 reo. O Te Pare Tiairaa te vea opere-roa ˈˈe-hia na te ao. Ua neneihia hau atu i te 52 000 000 vea i te mau avaˈe atoa na roto e 247 reo. E ua hurihia ta tatou buka haapiiraa Bibilia Eaha ta te Bibilia e haapii mau ra? na roto hau atu e 250 reo. I teie mahana, ua neneihia hau atu i te 200 000 000 buka.

16. No te aha te maraa noa ra te faanahonahoraa a Iehova?

¹⁶ Te maraa noa ra ta tatou faanahonahoraa no te mea e faaroo to tatou i te Atua e te farii ra tatou i te Bibilia ei Parau faaurua na ˈna. (Tes. 1, 2:13) Te tamau ra tatou i te faaite i te oaoa no te haamaitairaa a Iehova noa ˈtu te riri uˈana e te patoiraa a Satani.—Kor. 2, 4:4.

17, 18. Eaha ta Iehova e tiai ra ia tatou no nia i te taata e ore e haamori ia ˈna?

¹⁷ Mea rau te huru o te taata i nia ia tatou i roto i te pororaa. E faaroo vetahi ia tatou, area râ te tahi atu, e patoi mai ïa. Eaha ta Iehova e tiai ra ia tatou no nia i to tatou huru i nia i te taata e ore e haamori ia ˈna? Noa ˈtu te huru o te taata i nia i ta tatou poroi, e pee tatou i te aˈoraa a te Bibilia o te na ô ra: “Ei parau mǎrû maitai anaˈe â ta outou, ia rapaauhia i te miti ra i te ite, ia ite outou i te mea tia ia parau atu i te taata atoa ra.” (Kol. 4:6) I te mau taime atoa, te hinaaro nei tatou e paruru i ta tatou mau tiaturiraa “ma te mǎrû e te auraro maite” no to tatou here i to tatou taata-tupu.—Pet. 1, 3:15.

¹⁸ Noa ˈtu e te riri mai ra te taata aore ra te patoi mai ra ratou i ta tatou poroi, e faaite tatou i te here i to tatou taata-tupu e e pee tatou i te hiˈoraa o Iesu. Aita Iesu “i faaino atu, ia faainohia mai oia; e ia pohe oia ra, aore oia i parau tahoo atu.” Ua tiaturi râ Iesu ia Iehova. (Pet. 1, 2:23) No reira, i te mau taime atoa, e faaite anaˈe i te haehaa e e faaohipa anaˈe i teie aˈoraa: “Eiaha e tahoo atu i te ino i te ino, e te faaino i te faaino, ei mea ê râ, ei haamaitai ta outou.”—Pet. 1, 3:8, 9.

19. Eaha to tatou huru i nia i to tatou mau enemi?

¹⁹ E tauturu mai te haehaa ia tatou ia  auraro i te hoê faaueraa tumu faufaa roa o ta Iesu i horoa mai a faataa ˈi: “Ua faaroo hoi outou e i parauhia mai i tahito ra, E aroha ˈtu oe i to taata-tupu, e e riri atu i to enemi. Te parau atu nei râ vau ia outou, E aroha ˈtu i to outou mau enemi; e faaora ˈtu i tei tuhi mai ia outou; e hamani maitai atu i te feia i riri mai ia outou; e pure hoi i te feia i parau ino mai e tei hamani ino mai ia outou; ia riro outou ei tamarii na to outou Metua i te ao ra; te faahiti nei oia hoi i to ˈna mahana i nia i te ino e te maitai, e te haamairi mai nei oia i te ûa i nia i te parau-tia e te parau-tia ore.” (Mat. 5:43-45) Ei tavini a te Atua, e mea tia ia here tatou i to tatou mau enemi noa ˈtu to ratou huru i nia ia tatou.

20. E nafea tatou e ite ai e e î mai te fenua atoa i te here no te Atua e no te taata-tupu? (A hiˈo i te hohoˈa matamua.)

²⁰ I te mau taime atoa, e mea tia ia faaite tatou i to tatou here no Iehova e no to tatou taata-tupu. Noa ˈtu e e patoi mai te taata ia tatou e i ta tatou poroi, e tauturu atu tatou ia fifihia ratou. Ua papai te aposetolo Paulo: “Eiaha outou ei amutarahu na te taata atoa, area ia aroha ˈtu te tahi i te tahi: o tei aroha ˈtu hoi ia vetahi ê ra, ua haapao ïa i te ture. O teie hoi e, Eiaha oe e faaturi, Eiaha oe e taparahi noa i te taata, Eiaha oe e eiâ, Eiaha oe ei ite haavare, Eiaha oe e nounou, e te vai nei te tahi ture, ua hope atoa ïa i roto i teie nei parau e, E aroha ˈtu oe i to taata-tupu mai to aroha ia oe iho na. E ore roa te aroha e hamani ino i te taata-tupu: te au ra maori te aroha i te ture.” (Roma 13:8-10) I roto i teie nei ao î i te amahamaha, te haavîraa uˈana e te ino o te arataihia e Satani, te faaite ra te mau tavini a te Atua i te here mau i to ratou taata-tupu. (Ioa. 1, 5:19) Ia haamou Iehova ia Satani, i ta ˈna mau demoni e i ta ˈna ao ino, e î te ao atoa i te here. Auê te haamaitairaa ia here te taata atoa i te fenua nei ia Iehova e oia atoa i to ratou taata-tupu!