1-3. (a) No te aha e mea hau aˈe to Iehova manaˈo e reo i to te taata? (b) Eaha ta tatou e hiˈopoa mai i roto i teie tumu parau?

 UA HINAARO Iehova ia oaoa tatou e vetahi ê. No reira oia i hamani ai i te mau melahi e te mau taata. (Sal. 36:9; Tim. 1, 1:11) Ua hamani Iehova na mua roa i ta te aposetolo Ioane i pii “te Logo,” aore ra te Parau. (Ioa. 1:1; Apo. 3:14) Ua paraparau Iehova ia Iesu no nia i to ˈna manaˈo e huru aau. (Ioa. 1:14, 17; Kol. 1:15) Ua faaite te aposetolo Paulo e te paraparau atoa ra te mau melahi e te vai ra to ratou reo. Mea taa ê roa râ te reira i to te taata.—Kor. 1, 13:1.

² Ua ite Iehova i te mau ohipa atoa no nia i te mau miria melahi e taata ta ˈna i poiete. E nehenehe o ˈna e faaroo i na mirioni taata o te pure ra i te hoê â taime. E taa atoa ia ˈna i ta ratou mau pure noa ˈtu te reo e paraparauhia ra e ratou. A faaroo ai oia i te mau pure atoa, te paraparau atoa ra Iehova i te mau melahi e te aratai ra oia ia ratou. No te rave-pauroa-raa i teie mau ohipa, ua hau aˈe to Iehova manaˈo e reo i to te taata. (A taio i te Isaia 55:8, 9.) Ia aparau oia i te taata, e faaohie oia i ta ˈna poroi ia taa ia tatou i te reira.

 ³ I roto i teie tumu parau, e hiˈopoa anaˈe e nafea Iehova e aparau ai i te taata ma te ohie ia taa. Oia atoa, e hiˈo anaˈe e nafea oia e taui ai i ta ˈna huru aparauraa ia au i te mau tupuraa.

4. (a) Eaha te reo ta Iehova i faaohipa no te aparau ia Mose, Samuela e Davida? (b) Eaha tei faatiahia i roto i te Bibilia?

⁴ I to ˈna aparauraa i te taata matamua, Adamu, i roto i te ô i Edene, ua faaohipa paha Iehova i te hoê huru reo Hebera tahito ra. I muri aˈe, ua aparau Iehova i te mau taata mai ia Mose, Samuela e Davida. Noa ˈtu e ua faaohipa ratou i ta ratou iho mau taˈo na roto i te reo Hebera e na roto i ta ratou iho huru papairaa, ua papai iho â ratou i to te Atua mau manaˈo. Ua papai ratou i to Iehova mau manaˈo e ua papai atoa ratou i te aamu no nia i te taairaa e vai ra i rotopu i te Atua e to ˈna nunaa. Ei hiˈoraa, te faatia ra te Bibilia no nia i to ratou faaroo e here no te Atua e oia atoa i to ratou hape e faaroo ore. Ua papaihia te reira no to tatou maitai.—Roma 15:4.

5. O te Hebera noa anei te reo ta te Atua i faaohipa no te aparau i te taata? A faataa.

⁵ Aita Iehova i aparau i te taata na roto noa i te reo Hebera. I te tau e ua vata te mau Iseraela mai Babulonia mai, ua paraparau vetahi o ratou na roto i te reo Aramea. No reira Daniela, Ieremia e Ezera i papai ai i te tahi mau tuhaa o te Bibilia na roto i te reo Aramea.—Nota: Ua papaihia Ezera 4:8–6:18; 7:12-26; Ieremia 10:11 e Daniela 2:4b–7:28 na roto i te reo Aramea.

6. No te aha ua hurihia te mau Papai Hebera na roto i te reo Heleni?

⁶ I muri iho, ua haru Alexandre le Grand i te rahiraa o te ao e ua riro te koinè, te reo Heleni, ei reo paraparau-aˈe-hia i roto e rave rahi fenua. E rave rahi ati Iuda o tei haamata i te paraparau i te Heleni. E ua hurihia te mau Papai Hebera na roto i te reo Heleni. Ua piihia teie huriraa te Septante. O te huriraa matamua teie o te Bibilia e hoê o te mau huriraa faufaa roa ˈˈe. No te mau aivanaa, e 72 taata tei huri i te Septante. * Ua huri vetahi i te mau taˈo taitahi mai roto mai i te mau Papai Hebera, area te tahi atu taata, aita ratou i na reira. Ua tiaturi te mau ati Iuda reo Heleni e te mau Kerisetiano e o te Septante te Parau a te Atua.

7. Eaha te reo ta Iesu i faaohipa no te haapii i ta ˈna mau pǐpǐ?

⁷ I te fenua nei, ua paraparau paha Iesu  na roto i te reo Hebera. (Ioa. 19:20; 20:16; Ohi. 26:14) Peneiaˈe, ua faaohipa atoa oia i te tahi mau parau na roto i te reo Aramea o tei matauhia i taua tau ra. Ua ite atoa râ oia i te reo Hebera tahito ta Mose e te mau peropheta i paraparau e ua taiohia ta ratou mau papai i te sunago i te mau hebedoma atoa. (Luka 4:17-19; 24:44, 45; Ohi. 15:21) E noa ˈtu e ua paraparauhia te reo Heleni e te Latino i te tau o Iesu, aita te Bibilia e faaite ra e ua paraparau atoa anei oia i teie mau reo.

8, 9. No te aha e rave rahi Kerisetiano i paraparau ai na roto i te reo Heleni, e eaha ta te reira e haapii mai ra no nia ia Iehova?

⁸ Ua paraparau te mau pǐpǐ matamua a Iesu na roto i te reo Hebera. I muri iho râ i to ˈna poheraa, ua paraparau ratou na roto i te tahi atu mau reo. (A taio i te Ohipa 6:1.) A haapararehia ˈi te mau parau apî oaoa, e rave rahi Kerisetiano o tei paraparau rahi aˈe na roto i te reo Heleni i te reo Hebera. No te mea o te Heleni te reo matauhia, ua operehia te mau buka a Mataio, Mareko, Luka e Ioane na roto i te reo Heleni. * Oia atoa, ua papaihia te mau rata a te aposetolo Paulo e te tahi atu mau buka Bibilia na roto i te reo Heleni.

⁹ Te mea anaanatae, a faahiti ai te mau taata papai i te mau Papai Heleni Kerisetiano mai te mau Papai Hebera, i pinepine na ratou i te faaohipa i te Septante. I te tahi mau taime, mea taa ê rii teie mau faahitiraa no ǒ mai i te mau parau Hebera i matauhia. Ua riro ïa te ohipa a te mau taata huri tia ore ei tuhaa o te Bibilia o ta tatou e fanaˈo ra i teie mahana. Te haapii mai ra ïa te reira ia tatou e eita Iehova e haafaufaa ore i te hoê reo aore ra taˈere i te tahi atu.—A taio i te Ohipa 10:34.

10. Eaha ta tatou i haapii mai no nia i ta Iehova huru paraparau i nia i te taata?

¹⁰ Ua ite tatou e te paraparau ra Iehova i te taata ia au i te mau tupuraa. Aita oia e tiai ra ia aparau tatou na roto i te hoê reo taa ê no te ite o vai o ˈna aore ra no te ite i ta ˈna mau opuaraa. (A taio i te Zekaria 8:23; Apokalupo 7:9, 10.) Ua haapii atoa tatou e ua faaurua Iehova i te mau taata papai Bibilia. Ua farii râ oia ia papaihia to ˈna mau manaˈo na roto i ta ratou iho mau parau.

11. No te aha e ere i te mea fifi no Iehova ia faaohipa te taata e rave rahi reo?

¹¹ Te faaohipa ra te taata e rave rahi reo, e ere râ te reira i te mea fifi no Iehova. E nafea tatou e ite ai i te reira? I roto i te Bibilia, te vai ra te tahi noa mau parau na roto i te reo tumu o ta Iesu i faaohipa. (Mat. 27:46; Mar. 5:41; 7:34; 14:36) Ua haapapu  Iehova e ua papaihia e ua hurihia te poroi a Iesu na roto i te reo Heleni e i te tahi mau taime na roto i te tahi atu mau reo. Oia atoa, no te mea ua papai-faahou-hia te Parau a te Atua e rave rahi taime na te mau ati Iuda e Kerisetiano, ua paruruhia te poroi a te Atua. Ua hurihia teie Bibilia na roto e rave rahi atu â reo. Fatata 400 matahiti i muri aˈe i te Mesia, ua parau Jean Chrysostome e ua hurihia te mau haapiiraa a Iesu na roto i te reo Arama, Aiphiti, Initia, Peresia, Etiopia e e rave rahi atu â reo.

12. Mea nafea te Bibilia i te haafifi-raa-hia?

¹² I te roaraa o te tuatapaparaa, ua haafifi-pinepine-hia te Bibilia e oia atoa i te feia huri e te feia i opere i te reira. Fatata 300 matahiti i muri aˈe i to Iesu fanauraa, ua faaue te emepera Roma Dioclétien e ia faaorehia te mau Bibilia atoa. Fatata 1 200 matahiti i muri aˈe, ua haamata William Tyndale i te huri i te Bibilia na roto i te reo Beretane. Ua parau oia e ia farii mai te Atua ia ora maoro oia, ua papu ia ˈna e e mea ite aˈe te hoê taata faaapu i te Bibilia i te hoê tahuˈa. No te hamani-ino-raa, e mea tia ia Tyndale ia faarue i te fenua Beretane no te haere i Europa no te huri e no te nenei i ta ˈna Bibilia. Noa ˈtu e ua tamata te pǔpǔ ekalesiatiko e tutui i te mau Bibilia atoa ta ratou i ite, ua operehia te Bibilia ta Tyndale i huri na te taata e rave rahi. No reira i uumihia ˈi to ˈna arapoa e i tutuihia ˈi to ˈna tino i te auahi i nia i te hoê pou. Ua vai noa râ teie huriraa noa ˈtu te haafifiraa a te pǔpǔ ekalesiatiko. E ua faaohipahia te reira no te faaineine i te hoê huriraa Bibilia piihia te King James Version.—A taio i te Timoteo 2, 2:9.

13. Eaha ta te hiˈopoaraa i te mau papai Bibilia tahito e faaite mai ra?

¹³ Parau mau, te vai ra te tahi mau hape e taa-ê-raa e mea iti i rotopu i te tahi mau Bibilia e mea tahito roa ˈˈe ra. Ua hiˈopoa maite te mau taata îite i te Bibilia e tausani papai, te tahi mau tuhaa o te mau papai e te mau huriraa tahito o te Bibilia. I muri iho, a faaau ai i te reira, ua ite ratou e mea iti roa te taa-ê-raa i roto i te tahi mau irava o teie mau Bibilia. Aita râ te Bibilia i taui. Maoti te mau haapiiraa mai teie, ua ite ïa te feia haapii i te Bibilia haavare ore  e o te Parau faaurua a Iehova ta ratou e fanaˈo ra i teie mahana.—Isa. 40:8.

14. I teie mahana, ua opere-rahi-hia anei te Bibilia?

¹⁴ Noa ˈtu e ua haafifihia te Bibilia e rave rahi taime, ua hurihia te reira na roto hau atu 2 800 reo, hau atu i te tahi atu mau buka e vai ra i teie mahana. Noa ˈtu e aita e rave rahi taata o te tiaturi nei i te Atua, o ta ˈna Parau te buka te mea opere-roa ˈˈe-hia. E ere i te mea ohie ia taio i te tahi mau huriraa o te Bibilia aore ra e ere te reira i te mea tano maitai. Te horoa ra te rahiraa o te reira i te hoê poroi mea ohie ia taa no nia i te tiaturiraa e i te ora mure ore.

15. (a) Mea nafea ta tatou mau vea i taui ai mai 1919? (b) No te aha ta tatou mau vea i papaihia ˈi na roto noa i te reo Beretane?

¹⁵ I 1919, ua faatoroahia te hoê pǔpǔ iti Feia haapii Bibilia ei “tavini haapao maitai e te paari.” I taua tau ra, ua paraparau te tavini haapao maitai i te nunaa a te Atua na roto iho â râ i te reo Beretane. (Mat. 24:45) I teie nei râ mahana, te vai ra te mau papai Bibilia na roto hau atu 700 reo. Mai te reo Heleni i na mua ˈˈe, o te reo Beretane te reo mea matau-rahi-aˈe-hia i roto i te tapihooraa e te haapiiraa. Ua papaihia ta tatou mau vea na mua roa na roto i te reo Beretane. E i muri iho, ua hurihia na roto i te tahi atu mau reo.

16, 17. (a) Eaha ta te nunaa o te Atua e hinaaro mau ra? (b) Mea nafea te reira i te haapapu-raa-hia? (c) Eaha ta te taeae Knorr i hinaaro?

¹⁶ Ua niuhia ta tatou mau papai atoa i nia i te Bibilia. Na mua, ua faaohipa te nunaa a te Atua i te King James Version o tei oti i te hurihia i 1611. Teie râ, mea tahito roa te parau e e ere i te mea ohie ia taa. Mea varavara roa te iˈoa o te Atua i te faaohipahia, noa ˈtu ua tuuhia te reira i roto i te tahi mau papai tahito e tausani taime. Te vai ra te mau hape i roto i te huriraa. Te ite-atoa-hia ra te mau irava hau, aita to roto i te mau papai mea tahito aˈe. Hoê â fifi tei itehia i roto i te tahi atu mau huriraa Bibilia na roto i te reo Beretane.

¹⁷ Mea papu, ua hinaaro te nunaa o te Atua i te hoê Bibilia e mea tano e e mea ohie atoa ia taa. No reira, ua haamauhia te  hoê Tomite huriraa i te Bibilia a te ao apî e ua hiˈopoa faahou te mau taeae o teie tomite i te mau tuhaa a te Bibilia mai 1950 e tae atu i 1960. I te hoê tairururaa i te 2 no Atete 1950, ua matara mai te buka matamua o na ono buka. I teie tairururaa, ua parau te taeae Knorr e ua hinaaro te nunaa o te Atua i te hoê huriraa Bibilia apî e mea tano e e mea ohie ia taa. E e tauturu mai te reira ia haapii atu â no nia i te parau mau. Ua hinaaro rahi ratou i te hoê huriraa e mea ohie ia taio e ia taa mai te mau papai tumu a te mau pǐpǐ a te Mesia. Ua hinaaro te taeae Knorr ia tauturu te Huriraa o te ao apî i na mirioni taata ia ite o vai Iehova.

18. Eaha tei tauturu i te huriraa a te Bibilia?

¹⁸ I 1963, ua tupu te ohipa ta te taeae Knorr i hinaaro. Ua neneihia Les Écritures grecques chrétiennes. Traduction du monde nouveau na roto i te reo Farani, Heremani, Holane, Italia, Paniora e Potiti. I 1989, ua haamau te Tino aratai a te mau Ite no Iehova i te hoê tuhaa apî i te pu rahi no te tauturu i te feia huri Bibilia. E i 2005, ua faatiahia te huriraa o te Bibilia na roto i te mau reo o tei huri aˈena i Te Pare Tiairaa. Ei faahopearaa, te vai ra te Huriraa o te ao apî, te taatoaraa aore ra te tahi noa tuhaa, na roto hau atu 130 reo i teie mahana.

19. Eaha tei tupu i 2013 e eaha ta tatou e hiˈopoa i to muri mai tumu parau?

¹⁹ Ua taui te neneiraa na roto i te reo Beretane mai te neneiraa matamua o te Huriraa o te ao apî. No reira i titauhia ˈi ia taui i te tahi mau parau. I te 5 e te 6 no Atopa 2013, 1 413 676 taata tei amui aore ra tei faaroo na roto 31 fenua i te 129raa o te rururaa matahiti. Ua faaara te hoê melo o te Tino aratai i te neneiraa o te Huriraa o te ao apî faaapîhia na roto i te reo Beretane. Ua oaoa roa te taata tei tae mai e e rave rahi tei taˈi i te fanaˈoraa i ta ratou iho Bibilia o teie huriraa apî. A taio ai te taeae orero i te mau irava no roto mai i teie huriraa faaapîhia, ua papu i te taatoaraa o te taata e mea ohie roa ia taio e ia taa. I to muri nei tumu parau, e hiˈo anaˈe hau atu â no nia i teie Bibilia faaapîhia. E hiˈopoa anaˈe mea nafea te reira i hurihia ˈi na roto i te tahi atu mau reo.