E ATUA aau horoa noa o Iehova. (Iak. 1:17) E nehenehe tatou e ite i to ˈna aau horoa noa na roto i te mau mea ta ˈna i poiete. Ua faaî oia i te ao nui i te mau fetia e ua tapoi oia i te fenua i te mau raau hotu nehenehe mau.—Sal. 65:12, 13; 147:7, 8; 148:3, 4.

Ua mauruuru roa te taata papai o te Salamo 104 no te mau mea atoa ta Iehova i poiete, no reira oia i papai ai i te hoê himene no nia ia ˈNa. A taio ai oe i teie salamo, te mauruuru atoa anei oe mai te fatu salamo? Ua parau oia: “Te ora nei au ra, e himene â vau ia Iehova; te vai nei au ra, e himene au ei haamaitai i tau Atua.” (Sal. 104:33) E hinaaro anei oe e na reira atoa?

Te hinaaro ra Iehova ia pee tatou i to ˈna hiˈoraa o to ˈna aau horoa noa. E te horoa nei oia i te mau tumu maitai e faaite ai tatou i te aau horoa noa. Ua faaurua oia i te aposetolo Paulo no te papai: “E aˈo atu i te feia taoˈa rahi i teie nei ao, eiaha ei aau teitei, eiaha hoi e tiaturi i te taoˈa rahi itea ore, ei te Atua ora râ o tei horoa hua mai i te mau mea atoa nei ei raveraa na tatou; ia hamani maitai, e te taoˈa ra i te ohipa maitatai ra, ia rahi atu ïa ia ratou, ia horoa haere, ia au i te aufau. I te haapue-maite-raa i te maitai tumu no ratou iho a muri atu, ia rave ratou i te ora mure ore.”—Tim. 1, 6:17-19.

I roto i te piti o ta ˈna rata i to Korinetia, ua faataa Paulo eaha te huru ia horoa anaˈe tatou na te tahi atu taata. Ua parau oia: “E horoa te taata atoa i ta ˈna i opua i roto i to ˈna aau; eiaha ma te nounou, e mai te mea e no te titau: o te taata horoa noa hoi ta te Atua e hinaaro.” (Kor. 2, 9:7) O vai ta tatou e tauturu ia faaite tatou i te aau horoa noa? Ua parau Paulo e e tauturu tatou ia vetahi ê ma te horoa i ta ratou e hinaaro mau ra, e tauturu atoa râ tatou ia tatou iho no te mea e haamaitai mai Iehova.—Kor. 2, 9:11-14.

Ua faataa faahou Paulo i te haapapuraa rahi o te aau horoa noa o te Atua a parau ai oia e ‘ia haamaitaihia te Atua i te ô horoa noa eita e tia ia parau.’ (Kor. 2, 9:15) Ua taaihia te ô horoa noa a Iehova i te mau ohipa maitatai o ta ˈna i  horoa mai maoti Iesu Mesia. Aita e parau e nehenehe e faataa ˈtu no nia i te faufaaraa o teie ô.

E nafea tatou e faaite ai i te mauruuru no te mau mea atoa ta Iehova e Iesu i rave no tatou? Ma te faaite atoa ïa i te aau horoa noa ma te horoa i to tatou taime, i to tatou puai e ta tatou mau taoˈa no te haamori ia Iehova e ma te tauturu ia vetahi ê ia ite o vai o ˈNa. E nehenehe ta tatou e na reira, mai te peu e mea rahi anei aore ra mea iti anei.—Par. 1, 22:14; 29:3-5; Luka 21:1-4.