A haapao maitai i ta oe “haapii-maite-raa ˈtu”
A haapao maitai i ta oe “haapii-maite-raa ˈtu”
“E faaite hua oe i te parau, . . . e faaite hua i te hapa, e aˈo atu, e faaitoito atu, ma te faaoromai rahi, e te haapii-maite-raa ˈtu.”—TIM. 2, 4:2.
1. Eaha ta Iesu i faaue i ta ˈna mau pǐpǐ e rave, e eaha te hiˈoraa ta ˈna i horoa?
NOA ˈTU te mau ohipa faaoraraa faahiahia ta Iesu i rave i te roaraa o ta ˈna taviniraa i te fenua nei, ua matauhia oia na mua eiaha ei taata faaora maˈi aore ra faatupu semeio, ei orometua haapii râ. (Mar. 12:19; 13:1) O te faaiteraa i te parau apî maitai o te Basileia o te Atua te ohipa faufaa roa ˈˈe a Iesu, e no ta ˈna atoa ïa mau pǐpǐ i teie tau. Ua faauehia te mau Kerisetiano e rave tamau i te ohipa faariroraa i te taata ei pǐpǐ ma te haapii ia ratou ia haapao i te mau mea atoa ta Iesu i parau.—Mat. 28:19, 20.
2. Ia aha tatou e tia ˈi no te rave i ta tatou ohipa faauehia e poro?
2 No te rave i ta tatou ohipa faauehia e faariro i te taata ei pǐpǐ, e imi tamau tatou i te haamaitai i to tatou ite i te haapii atu. Ua haapapu te aposetolo Paulo i te faufaaraa o teie aravihi i to ˈna papairaa i to ˈna hoa pororaa o Timoteo. Teie ta ˈna i parau: “E ara ia oe, e ta oe e haapii ra; e tamau maite â i te reira: tei te na reira hoi e ora ˈi oe e te feia atoa e faaroo mai ia oe ra.” (Tim. 1, 4:16) Te huru haapiiraa ta Paulo e manaˈo ra, e ere ïa i te horoa-noa-raa ˈtu i te ite. E haaputapû te mau tavini Kerisetiano manuïa i te aau o te taata e e faaitoito ia ratou ia rave i te mau tauiraa i roto i to ratou oraraa. E aravihi te reira. E nafea tatou e haamaitai ai i te aravihi o “te haapii-maite-raa ˈtu” ia faaite tatou i te parau apî maitai o te Basileia o te Atua ia vetahi ê?—Tim. 2, 4:2.
A haamaitai i “te haapii-maite-raa ˈtu”
3, 4. (a) E nafea tatou e haamaitai ai i “te haapii-maite-raa ˈtu”? (b) E nafea te Haapiiraa o te taviniraa teotaratia e tauturu ai ia tatou ia riro ei orometua haapii manuïa?
3 E faataahia te aravihi mai te hoê ite e noaa mai i te haapiiraa, te faaohiparaa, aore ra te mataitairaa. E titauhia ia haapao maite tatou i teie na tuhaa atoa e toru no te riro ei orometua haapii manuïa i te parau apî maitai. E nehenehe tatou e taa maitai i ta tatou tumu parau maoti noa te haapiiraa i te reira i roto i te pure. (A taio i te Salamo 119:27, 34.) Na roto i te mataitairaa i te mau tavini manuïa ia haapii ratou e ite ai tatou i ta ratou mau ravea e e pee ai tatou ia ratou. A tutava tamau i te faaohipa i ta tatou e haapii ra, e nehenehe ïa tatou e haamaitai i to tatou aravihi.—Luka 6:40; Tim. 1, 4:13-15.
4 O Iehova to tatou Orometua Rahi roa ˈˈe. Na roto i te tuhaa itea o ta ˈna faanahonahoraa, te aratai ra oia i ta ˈna mau tavini e nafea ia rave i ta ratou ohipa faauehia e poro. (Isa. 30:20, 21) No reira te mau amuiraa atoa e faatupu ai i te mau hebedoma atoa i te Haapiiraa o te taviniraa teotaratia, no te tauturu i te feia apiti atoa ia riro ei feia poro manuïa i te Basileia o te Atua. O te Bibilia te buka matamua roa o teie haapiiraa. Te faaite maira te Parau faaurua a Iehova eaha ta tatou e haapii atu. Te faaite atoa ra eaha te mau ravea haapiiraa maitatai e te tano. Te haamanaˈo tamau maira te Haapiiraa o te taviniraa teotaratia e e aravihi atu â tatou ei orometua haapii ia niu tatou i ta tatou haapiiraa i nia i te Parau a te Atua, ia faaohipa maitai tatou i te mau uiraa, ia ohie noa ta tatou haapiiraa, e ia anaanatae mau tatou ia vetahi ê. E hiˈopoa hoê hoê tatou i teie nau manaˈo taitahi. I muri iho tatou e aparau ai e nafea ia haaputapû i te aau o te hoê piahi.
A niu i ta oe haapiiraa i nia i te Parau a te Atua
5. Ia niu tatou i ta tatou haapiiraa ˈtu i nia i te aha e tia ˈi, e no te aha?
5 Ua niu Iesu, te orometua haapii rahi roa ˈˈe o te mau orometua haapii taata atoa, i ta ˈna mau haapiiraa i nia i te mau Papai. (Mat. 21:13; Ioa. 6:45; 8:17) Ua paraparau oia, eiaha ma to ˈna iho iˈoa, ma te iˈoa râ o Tei tono mai ia ˈna. (Ioa. 7:16-18) Tera te hiˈoraa ta tatou e pee. No reira, e mea tia ia niu tatou i ta tatou atoa e parau i roto i te taviniraa i tera fare i tera fare aore ra i roto i te mau haapiiraa bibilia i te fare o te taata, i nia i te mana o te Parau a te Atua. (Tim. 2, 3:16, 17) Eita roa ˈtu te rahi o to tatou maramarama e faito i te aravihi e te puai o te mau Papai faaurua. Mea mana te Bibilia. Noa ˈtu eaha te manaˈo ta tatou e tutava ra i te tauturu i te hoê piahi ia taa, o te faataioraa ˈtu i ta te mau Papai e parau ra no nia i te reira te ravea maitai roa ˈˈe ta tatou e nehenehe e faaohipa.—A taio i te Hebera 4:12.
6. E nafea e papu ai i te hoê orometua haapii e ua taa maitai i te piahi te haapiiraa?
6 Aita ïa e parauhia ra e eiaha te hoê orometua haapii Kerisetiano e faaineine i te hoê haapiiraa bibilia. E titauhia râ ia feruri maitai teihea irava faahitihia ta te orometua haapii aore ra te piahi e taio i roto i te Bibilia ia haapii raua. E pinepine, e mea maitai ia taio i tera mau irava o te haapapu i ta tatou mau tiaturiraa. E mea titau-atoa-hia ia tauturu i te piahi ia taa i te mau irava atoa ta ˈna e taio ra.—Kor. 1, 14:8, 9.
A faaohipa maitai i te mau uiraa
7. No te aha e ravea haapiiraa maitai te faaohiparaa i te mau uiraa?
7 E turai te faaohipa-maitai-raa i te mau uiraa ia feruri e e tauturu te reira i te orometua haapii ia haaputapû i te aau o te piahi. No reira, a ani i ta oe piahi ia faataa ˈtu i te mau irava, eiaha râ na oe e tatara ˈtu. I te tahi taime, e titauhia paha te hoê uiraa hau aore ra te hoê anairaa uiraa no te tauturu i ta oe piahi ia taa. Ia haapii oe ia ˈna na roto i tera huru raveraa, te tauturu ra ïa oe ia ˈna eiaha noa ia taa i te mau tumu o te faaotiraa atoa i horoahia, ia tiaturi papu atoa râ i taua faaotiraa ra.—Mat. 17:24-26; Luka 10:36, 37.
8. E nafea tatou e ite ai eaha to roto i te aau o te hoê piahi?
8 Te ravea haapiiraa faaohipahia i roto i ta tatou mau papai, ma te uiraa e te pahonoraa ïa. Mea papu e e ite oioi te rahiraa o te feia ta oe e haapii ra i te Bibilia i te pahono i te mau uiraa i neneihia, ma te faaohipa i te mau haamaramaramaraa i roto i te mau paratarafa e tano. Eita râ te orometua haapii haroaroa e hinaaro noa i te mau pahonoraa tano. Ei hiˈoraa, ua ite paha te hoê piahi i te faataa maitai eaha ta te Bibilia e parau ra no nia i te faaturi. (Kor. 1, 6:18) E nehenehe râ te mau uiraa manaˈo ma te faatano i te parau e faaite eaha mau â te manaˈo o te piahi no nia i ta ˈna e haapii ra. E nehenehe ïa te orometua haapii e ui: “No te aha te Bibilia e faahapa ˈi i te mau taatiraa i rapaeau i te faaipoiporaa? Eaha to oe manaˈo i teie taotiaraa no ǒ mai i te Atua ra? I to oe manaˈo, te vai ra anei te maitai ia ora ia au i te mau ture aveia morare a te Atua?” E nehenehe te pahonoraa i teie mau uiraa e faaite mai eaha to roto i te aau o te piahi.—A taio i te Mataio 16:13-17.
Ia ohie noa te haamaramaramaraa
9. E mea maitai ia haamanaˈo tatou i te aha ia horoa tatou i te mau haamaramaramaraa bibilia?
9 E mea huru ohie te rahiraa o te pue parau mau i roto i te Parau a te Atua. Aita râ paha te feia ta tatou e haapii ra i te Bibilia e taa faahou ra no te mau haapiiraa a te haapaoraa hape. Ta tatou tuhaa ei orometua haapii, o te faaohieraa ïa i te maramaramaraa i te Bibilia. E horoa te mau orometua haapii manuïa i te mau haamaramaramaraa ma te ohie, te maramarama, e te tano. Ia pee tatou i teie aratairaa, eita ïa tatou e faariro i te parau mau ei mea fifi roa ˈtu â ia taa. A ape i te mau parau rii faufaa ore. Aita e faufaa ia tatara i te mau tuhaa atoa o te hoê irava ta tatou e taio. A haamatara noa i te mea faufaa roa no te faataa i te manaˈo e hiˈopoahia ra. E taa riirii i te piahi te pue parau mau bibilia hohonu atu â a haere ai oia i mua i roto i to ˈna maramaramaraa.—Heb. 5:13, 14.
10. Na te aha e faataa ehia rahiraa manaˈo e hiˈopoa i roto i te hoê taime haapiiraa?
10 Ehia rahiraa manaˈo e hiˈopoa i roto i te hoê taime haapiiraa e tia ˈi? E hinaarohia ïa te haroaroaraa. E ere hoê â aravihi e tupuraa to te piahi e to te orometua haapii, e mea tia râ ia haamanaˈo noa tatou i ta tatou fa ei orometua haapii, o te tautururaa ïa i ta tatou piahi ia patu i te hoê faaroo paari. No reira, e vaiiho tatou i te taime e navai ia taio, ia taa, e ia farii oia i te pue parau mau haapiihia i roto i te Parau a te Atua. Eita tatou e hiˈopoa i te tumu parau hau aˈe i ta ˈna e nehenehe e taa. I te hoê â taime, e faatere tatou i te haapiiraa ma te au noa. Ua taa anaˈe i ta tatou piahi te hoê manaˈo, e haere tatou i nia i to muri iho manaˈo.—Kol. 2:6, 7.
11. Eaha ta te aposetolo Paulo e haapii maira no nia i te haapiiraa ˈtu?
11 Mea ohie noa ta te aposetolo Paulo faaiteraa i te poroi o te parau apî maitai i te mau melo apî. Noa ˈtu e ua haapii-maitai-roa-hia oia, ua ape oia i te faaohipa i te mau parau faateitei. (A taio i te Korinetia 1, 2:1, 2.) E au e e tiaturi papu te feia haavare ore i te ohie o te parau mau bibilia. Aita e faufaa ia haere i te haapiiraa teitei no te taa i te reira.—Mat. 11:25; Ohi. 4:13; Kor. 1, 1:26, 27.
A tauturu i te mau piahi ia haafaufaa i ta ratou e haapii ra
12, 13. Na te aha e turai i te hoê piahi ia faaohipa i ta ˈna e haapii ra? A faataa na.
12 Ia manuïa tatou, e titauhia ia haaputapû ta tatou haapiiraa i te aau o te hoê piahi. E mea tia ia taa i te piahi e nafea te mau haamaramaramaraa e tano ai no ˈna iho, e nafea oia e maitaihia ˈi, e e nafea to ˈna oraraa e maitai aˈe ai ia pee oia i te aratairaa bibilia.—Isa. 48:17, 18.
13 Ei hiˈoraa, te hiˈopoa ra paha tatou i te Hebera 10:24, 25, o te faaitoito ra i te mau Kerisetiano ia haaputuputu e to ratou mau hoa i roto i te faaroo no te fanaˈo i te faaitoitoraa bibilia e te amuimuiraa î i te here. Mai te peu e aitâ te piahi i haere atura i te mau putuputuraa a te amuiraa, e nehenehe tatou e faataa poto noa ˈtu i te tereraa e te mau mea e aparauhia i reira. E nehenehe tatou e parau e e tuhaa te mau putuputuraa a te amuiraa no ta tatou haamoriraa e e faaite atu e te faufaahia ra tatou iho i te reira. I muri iho, e nehenehe tatou e titau manihini i te piahi ia haere mai. Ia faaohipa oia i te mau faaueraa bibilia, no to ˈna ïa hinaaro e faaroo ia Iehova e tia ˈi, eiaha râ no te faaoaoa i te taata e haapii ra e o ˈna.—Gal. 6:4, 5.
14, 15. (a) Eaha ta te hoê piahi Bibilia e nehenehe e haapii no nia ia Iehova? (b) E nafea te hoê piahi Bibilia e faufaahia ˈi i te iteraa i te huru o te Atua?
14 Te hoê maitai faufaa roa ta te mau piahi e fanaˈo maoti te haapiiraa i te Bibilia e te faaohiparaa i te mau faaueraa tumu i roto, o te iteraa ïa e te hereraa ia Iehova ei ihotaata. (Isa. 42:8) E ere noa oia i te hoê Metua î i te here e te Atua Poiete e te Fatu o te ao taatoa, te faaite atoa ra râ oia i to ˈna huru e ta ˈna e nehenehe e rave no te feia e here ra e e tavini ra ia ˈna. (A taio i te Exodo 34:6, 7.) Hou rii Mose a aratai ai i te nunaa Iseraela i rapae au i te faatîtîraa Aiphiti, ua faataa Iehova ia ˈna iho ma te parau: “E riro vau mai ia ˈu e riro mai.” (Exo. 3:13-15, MN) Te auraa ra, e riro Iehova ei mea atoa e titauhia ia riro oia no te faatupu i ta ˈna mau opuaraa no nia i to ˈna nunaa maitihia. Mea na reira ïa to te mau Iseraela iteraa ia Iehova ei Faaora, Atua Tamaˈi, Horoa, Faatupu i te mau parau fafau e te vai ra ˈtu â.—Exo. 15:2, 3; 16:2-5; Ios. 23:14.
15 Aita paha ta tatou mau piahi i ite i te ohipa-semeio-raa Iehova i roto i to ratou oraraa mai ia Mose. A paari ai râ ratou i roto i te faaroo e a mauruuru atu â ˈi ratou no ta ratou e haapii ra e a haamata ˈi ratou i te faaohipa i te reira, e ite iho â ratou i te faufaaraa ia turui i nia ia Iehova no te fanaˈo i te itoito, te paari, e te aratairaa. A na reira ˈi ratou, e ite atoa ratou ia Iehova ei Atua aˈo tiaturihia e te paari, ei Paruru, e te Haamâha noa i to ratou mau hinaaro atoa.—Sal. 55:22; 63:7; Mas. 3:5, 6.
A anaanatae atu ma te here
16. No te aha e ere ai te tahi aravihi natura te mea faufaa roa ˈˈe no te riro ei orometua haapii manuïa?
16 Ia manaˈo oe e e ere oe i te mea aravihi roa no te haapii atu mai ta oe e hinaaro, eiaha e toaruaru. Te tiaau ra Iehova raua Iesu i te porotarama haapiiraa e ravehia nei i te ao nei i teie mahana. (Ohi. 1:7, 8; Apo. 14:6) E nehenehe raua e haamaitai i ta tatou mau tutavaraa ia ohipa maitai ta tatou mau parau i nia i te hoê taata aau tia. (Ioa. 6:44) E nehenehe te here mau o te hoê orometua haapii i ta ˈna piahi e mono i te ereraa i te tahi aravihi natura. Ua faaite te aposetolo Paulo e ua taa ia ˈna te faufaaraa ia here i te feia e haapiihia ra.—A taio i te Tesalonia 1, 2:7, 8.
17. E nafea tatou e anaanatae mau ai i te piahi Bibilia taitahi?
17 E nehenehe atoa tatou e anaanatae mau i te piahi Bibilia taitahi ma te rave i te taime no te haamatau ia ˈna. A aparau ai tatou e o ˈna i nia i te mau faaueraa tumu bibilia, e ite tatou i to ˈna mau huru tupuraa. E ite paha tatou e te ora ê na ra oia i to ˈna oraraa ia au i te tahi mau manaˈo ta ˈna i haapii i roto i te Bibilia. I roto i te tahi atu mau tuhaa, e titauhia paha ia rave oia i te mau faatanoraa. Ma te tauturu i te piahi ia ite e nafea oia iho e faaohipa ˈi i ta ˈna i haapii i roto i te Bibilia, e nehenehe tatou e tauturu ia ˈna ma te here ia riro ei pǐpǐ mau a te Mesia.
18. No te aha e mea faufaa ˈi ia pure e ta tatou piahi e no ˈna?
18 Te mea faufaa roa ˈˈe, e nehenehe tatou e pure e ta tatou piahi e no ˈna. Ia ite maitai o ˈna e tia ˈi e ta tatou fa, o te tautururaa ïa ia ˈna ia ite maitai atu â i to ˈna Atua Poiete, ia haafatata ˈtu â ia ˈNa, e ia fanaˈo oia i ta ˈNa aratairaa. (A taio i te Salamo 25:4, 5.) Ia pure tatou ia Iehova ia haamaitai i te mau tutavaraa a te hoê piahi i te faaohipa i ta ˈna e haapii ra, e ite te piahi i te faufaaraa ia riro ei ‘taata rave i te parau.’ (Iak. 1:22) E a faaroo ai te piahi i ta outou mau pure haavare ore, e haapii atoa oia e nafea ia pure. Auê te oaoa e ia tauturu i te mau piahi Bibilia ia faatupu i to ratou iho taairaa e o Iehova!
19. Eaha te hiˈopoahia i roto i to muri iho tumu parau?
19 E mea faaitoito ia ite e hau atu i te ono mirioni e te afa Ite na te ao nei o te haa ra i roto i te haamaitairaa i “te haapii-maite-raa ˈtu,” ma te fa e tauturu i te feia aau haavare ore ia haapao i te mau mea atoa ta Iesu i parau. Eaha te mau faahopearaa o ta tatou ohipa pororaa? E hiˈopoahia te pahonoraa o teie uiraa i roto i to muri iho tumu parau.
Te haamanaˈo ra anei oe?
• No te aha e titauhia ˈi ia haamaitai te mau Kerisetiano i “te haapii-maite-raa ˈtu”?
• E faaohipa i teihea mau ravea e maitai atu â ˈi ta tatou haapiiraa ˈtu?
• Eaha te nehenehe e mono i te ereraa tatou i te tahi aravihi natura?
[Uiraa haapiiraa]
[Hohoˈa i te api 13]
Te apiti ra anei oe i te Haapiiraa o te taviniraa teotaratia?
[Hohoˈa i te api 14]
No te aha e mea faufaa ˈi ia ani i ta oe piahi ia taio i roto i te Bibilia?
[Hohoˈa i te api 16]
A pure e ta oe piahi e no ˈna