“E ara i te taviniraa i noaa ia oe i te Fatu ra”
“E ara i te taviniraa i noaa ia oe i te Fatu ra”
“E ara i te [taviniraa] i noaa ia oe i te Fatu ra, ia [rave oe i te reira].”—KOL. 4:17; MN.
1, 2. Eaha te hopoia a te mau Kerisetiano i nia i te huitaata?
E HOPOIA faufaa roa ta tatou i nia i te taata e ora ra e ati aˈe ia tatou. Na ta ratou mau faaotiraa e rave i teie nei e faataa e e ora aore ra e pohe anei ratou i “te ati rahi.” (Apo. 7:14) Ua parau te taata faaurua i papai i te buka Maseli e: “E faaora i te feia i arataihia e taparahi; te feia i fatata i te pohe ra, ia ore râ oe ia rave.” E parau maere mau â teie! Ia ore tatou e faaara i te taata i te maitiraa e vai ra i mua ia ratou, o tatou te tumu o to ratou pohe. Inaha, te na ô faahou ra taua noa irava ra: “Ia parau oe e, Inaha, aita vau i ite ia ˈna; e ore anei tei paheru i te aau nei e haamanaˈo? e ore anei tei tiai mai i to [nephe] ra e haapao? e ore anei oia e faautua mai i te taata nei i ta ˈna ra ohipa?” Mea maramarama maitai, eita ta te mau tavini a Iehova e nehenehe e parau e ‘aita ratou i ite’ i te fifi atâta ta te taata e faaruru ra.—Mas. 24:11, 12; MN.
2 Te haafaufaa ra Iehova i te ora. Te faaitoito ra oia i ta ˈna mau tavini ia tutava roa i te tauturu i te faaora e rave rahi roa taata e noaa ia ratou. E titauhia ia faaite te mau tavini atoa a te Atua i te poroi faaora i roto i te Parau a te Atua. E hohoˈa ta tatou ohipa e ta te hoê tiai o te horoa i te faaararaa ia ite oia i te hoê fifi atâta fatata roa. Eita tatou e hinaaro i te toto o te feia o te roohia i te pohe i nia ia tatou. (Ezek. 33:1-7) No reira, e mea faufaa roa iho â ia tamau tatou i te tutava i te ‘faaite hua i te parau’!—A taio i te Timoteo 2, 4:1, 2, 5.
3. Eaha te tatarahia i roto i teie e to muri iho na tumu parau e piti?
3 E faataa teie tumu parau e nafea oe e nehenehe ai e faaruru i te mau haafifiraa i ta oe taviniraa faaora e e nafea e tia ˈi ia oe ia tauturu e rave rahi atu â taata. E tauturu to muri iho tumu parau ia oe ia riro ei orometua haapii aravihi i te pue parau mau faufaa roa. E faataa te toru o te tumu parau haapiiraa i te tahi mau faahopearaa faaitoito i noaa mai i te feia poro i te Basileia i te ao nei. Hou râ tatou e tatara ˈi i teie mau tumu parau, e mea maitai ia hiˈo faahou tatou no te aha hoi e tau ati rahi roa ˈi to tatou.
No te aha aita ˈi e tiaturiraa to e rave rahi
4, 5. Te faaruru nei te huitaata i te aha, e eaha te huru o te taata e rave rahi?
4 Te faaite ra te mau tupuraa i te ao nei e te ora nei tatou i “te hopea o teie nei ao” e ua fatata roa te hopea. Te faaruru nei te huitaata i te mau ohipa e tupuraa ta Iesu e ta ˈna mau pǐpǐ i parau e o te tapao ïa o te “anotau hopea.” Te tairi nei “te pohe,” mai te mau tamaˈi, te oˈe, te aueueraa fenua, e te tahi atu mau ati, i te huitaata. Ua rahi roa te huru parau-tia ore, te miimii e te paieti ore. No te feia atoa e faaitoito ra i te ora ia au i te mau ture aveia bibilia, e “taime ati rahi faaruru atâ” teie.—Mat. 24:3, 6-8, 12; Tim. 2, 3:1-5, MN.
5 Aita râ te rahiraa o te huitaata i ite i te auraa mau o te mau tupuraa i te ao nei. No reira e rave rahi e haapeapea ˈi no to ratou iho panoonoo ore e to to ratou mau utuafare. Mea rahi to roto i te mauiui no te mea ua pohe tei herehia aore ra ua roohia ratou iho i te ati. Aita to teie mau taata e tiaturiraa, aita hoi ratou i ite mau â no te aha teie mau mea e tupu ai e teihea te ravea.—Eph. 2:12.
6. No te aha i ore ai i tia ia “Babulonia Rahi” ia tauturu i to ˈna mau taata?
6 Mea iti te tamahanahanaraa ta “Babulonia Rahi,” te hau emepera o te ao atoa o te haapaoraa hape, i horoa na te huitaata. To roto râ te mau nahoa taata i te taa ore i te pae varua no ‘te uaina o ta ˈna faaturi.’ Hau atu â, mai te hoê vahine faaturi, ua arapae e ua faateretere te haapaoraa hape i “te hui arii o te ao nei,” ma te faaohipa i te mau haapiiraa hape e te mau peu tahutahu no te tapea i te huitaata i raro aˈe i te mana o to ratou mau fatu poritita. Ua noaa ïa i te haapaoraa hape te faatereraa e te mana, i te hoê â atoa râ taime, ua faarue roa oia i te parau mau faaroo.—Apo. 17:1, 2, 5; 18:23.
7. Eaha te tiaturiraa e vai ra i mua i te rahiraa o te huitaata, e nafea râ vetahi e tauturuhia ˈi?
7 Ua haapii Iesu e te haere ra te rahiraa o te huitaata na te eˈa aano e tae atu ai i te pohe. (Mat. 7:13, 14) Tei nia vetahi mau taata i taua eˈa ra no te mea ua maiti iho â ratou i te patoi i ta te Bibilia e haapii ra, no e rave rahi râ ua haavarehia ïa ratou, aore ra aita ratou i haapiihia eaha ta Iehova e titau mau ra ia ratou. Peneiaˈe e taui vetahi i to ratou huru oraraa mai te peu e e faataahia ˈtu te mau tumu bibilia papu e na reira ˈi. Area te feia o te faaea noa i roto ia Babulonia Rahi e o te tamau i te patoi i te mau ture aveia bibilia, e ore ïa e ora ˈtu i “te ati rahi.”—Apo. 7:14.
A poro noa “aore e mahana tuua”
8, 9. Ua aha te mau Kerisetiano o te senekele matamua i mua i te patoiraa, e no te aha?
8 Ua parau Iesu e e poro ta ˈna mau pǐpǐ i te parau apî maitai o te Basileia e e faariro ratou i te taata ei pǐpǐ. (Mat. 28:19, 20) No reira te mau Kerisetiano mau i hiˈo noa ˈi i te apitiraa i te pororaa ei tumu parau o te taiva ore i te Atua e ei titauraa faufaa o to ratou faaroo. Ua tamau ïa te mau pǐpǐ matamua a Iesu i te poro noa ˈtu te patoiraa. Ua turui ratou i nia ia Iehova no te ani i te puai, ma te pure ia tauturu oia ia ratou ia “parau noa i [ta ˈna] parau ma te mǎtaˈu ore.” Ei pahonoraa, ua faaî Iehova ia ratou i te varua moˈa, e ua parau ratou i te parau a te Atua ma te mǎtaˈu ore.—Ohi. 4:18, 29, 31.
9 A uˈana ˈi te patoiraa, ua aueue anei te mau pǐpǐ a Iesu i roto i ta ratou faaotiraa papu e poro i te parau apî maitai? Aita roa ˈtu. No to ratou riri no te pororaa a te mau aposetolo, ua haru, ua haamǎtaˈu e ua rutu te mau aratai haapaoraa ati Iuda ia ratou. Teie râ, “aore e mahana tuua [i te mau aposetolo] i te aˈo, e te haapii atu i te taata, e o Iesu â te Mesia.” Ua ite maitai ratou e ‘o te Atua [ei upoo faatere] ta ratou e faaroo e tia ˈi eiaha te taata.’—Ohi. 5:28, 29, 40-42; MN.
10. Eaha te mau fifi ta te mau Kerisetiano e farerei ra i teie tau, eaha râ paha te faahopearaa no to ratou haerea maitai roa?
10 Eita te rahiraa o te mau tavini a te Atua e faaruru i te mau ruturaa aore ra te tapearaa no ta ratou mau ohipa pororaa. Te faaruru nei râ te mau Kerisetiano mau atoa i te mau tamataraa e fifi rau. Ei hiˈoraa, e turai paha to oe manaˈo haava haapiihia i te Bibilia ia oe ia pee i te hoê haerea eita te taata e au aore ra o te faariro ia oe ei taata taa ê. E manaˈo paha te mau hoa ohipa, haapiiraa, aore ra taata tapiri e mea ê roa oe no te mea te niu ra oe i ta oe mau faaotiraa i nia i te mau faaueraa tumu bibilia. Noa ˈtu râ, eiaha to ratou huru tano ore ia faatoaruaru ia oe. To roto te ao i te poiri pae varua, e titauhia râ ia ‘anaana te mau Kerisetiano mai te mau tiarǎma.’ (Phil. 2:15) Peneiaˈe e ite e e haafaufaa te tahi mau taata mataitai haavare ore i ta oe mau ohipa maitai roa, a faahanahana ˈtu ai ia Iehova.—A taio i te Mataio 5:16.
11. (a) Eaha paha to vetahi huru i mua i te pororaa? (b) Teihea huru patoiraa ta te aposetolo Paulo i faaruru, e ua aha oia?
11 E hinaaro tatou i te itoito no te poro noa i te poroi o te Basileia. E faaooo paha te tahi mau taata, te fetii atoa, ia oe aore ra e tamata i te faatoaruaru ia oe na roto i te tahi atu ravea. (Mat. 10:36) Ua rutu-pinepine-hia te aposetolo Paulo no to ˈna rave-maite-raa i ta ˈna taviniraa. A tapao na i to ˈna huru i mua i taua patoiraa ra: “Pohe noâ matou i mutaa iho, e te hamani-ino-rahi-hia mai,” ta ˈna ïa i papai, “i itoito â matou i to matou Atua, i te parauraa ˈtu ia outou i te evanelia a te Atua, i roto â i te mârô rahi ra.” (Tes. 1, 2:2) Mea papu e e tautooraa no Paulo ia faaite noa i te parau apî maitai i muri aˈe i to ˈna haruraahia, te hahaeraahia to ˈna ahu, to ˈna papairaahia i te raau, e huriraahia i roto i te tapearaa. (Ohi. 16:19-24) Nohea mai to ˈna itoito no te tamau â? No ǒ mai ïa i to ˈna hinaaro na mua roa e rave i ta ˈna ohipa faauehia e te Atua e poro.—Kor. 1, 9:16.
12, 13. Eaha te mau fifi ta vetahi e farerei ra, e eaha ta ratou i rave no te faaruru atu?
12 E tautooraa atoa ia tapea i to tatou itoito rahi i roto i te mau tuhaa fenua mea varavara te taata i te fare aore ra mea rahi te taata aita e tâuˈa ra i te poroi o te Basileia. Eaha ta tatou e nehenehe e rave i roto i taua mau tupuraa ra? E titauhia paha ia faaitoito atu â tatou i te paraparau i te taata ma te faanaho ore. E mea tia atoa paha ia faatano tatou i ta tatou porotarama aore ra i ta tatou mau tutavaraa no te poro i te mau vahi e mea rahi atu â te taata ta tatou e farerei.—A hiˈo i te Ioane 4:7-15; Ohipa 16:13; 17:17.
13 Te tahi atu mau fifi ta e rave rahi e farerei ra, o te matahiti rahi ïa e te maˈimaˈi, o te taotia ra i ta ratou e nehenehe e rave au noa i roto i te pororaa. Mai te peu e o oe atoa, eiaha ïa e toaruaru. Ua ite maitai Iehova i to oe mau taotiaraa e te mauruuru ra oia i tei maraa ia oe ia rave. (A taio i te Korinetia 2, 8:12.) Atira noa ˈtu te fifi ta oe e faaruru ra paha—te patoiraa, te tâuˈa ore, aore ra te maˈi—a rave i tei maraa atoa ia oe no te faaite i te parau apî maitai ia vetahi ê.—Mas. 3:27; a hiˈo i te Mareko 12:41-44.
‘A ara i ta oe taviniraa’
14. Eaha te hiˈoraa ta te aposetolo Paulo i vaiiho no te mau hoa Kerisetiano, e eaha ta ˈna aˈoraa?
14 Ua rave maite te aposetolo Paulo i ta ˈna taviniraa, e ua faaitoito oia i to ˈna mau hoa Kerisetiano ia na reira atoa. (Ohi. 20:20, 21; Kor. 1, 11:1) Te hoê taata ta Paulo i faaitoito taa ê, o te Kerisetiano Arehipo ïa no te senekele matamua. I roto i ta ˈna rata i to Kolosa, ua papai Paulo e: “E parau atu ia Arehipo, e ara i te [taviniraa] i noaa ia oe i te Fatu ra, ia [rave oe i te reira].” (Kol. 4:17; MN) Aita tatou i ite o vai o Arehipo aore ra eaha to ˈna huru tupuraa, e au ra râ e ua noaa ia ˈna te hoê taviniraa. Mai te peu e e Kerisetiano pûpûhia oe, ua noaa atoa ia oe te hoê taviniraa. Te ara noa ra anei oe i te taviniraa no te rave i te reira?
15. Eaha te auraa o ta tatou pûpûraa Kerisetiano, e eaha ïa te mau uiraa e hiti mai?
15 Hou to tatou bapetizoraa, ua pûpû tatou i to tatou ora ia Iehova i roto i te pure haavare ore. Te auraa ïa e ua faaoti papu tatou e rave i to ˈna hinaaro. E mea maitai ïa ia ui tatou ia tatou iho i teie nei, ‘O te raveraa i te hinaaro o te Atua mau anei te ohipa faufaa roa ˈˈe i roto i to ˈu oraraa?’ Ua rau ta tatou hopoia ta Iehova e hinaaro ra ia rave tatou—mai te aupururaa i to tatou utuafare. (Tim. 1, 5:8) E nafea râ tatou e faaohipa ˈi i te toea o to tatou taime e itoito? Eaha ta tatou fa matamua i roto i te oraraa?—A taio i te Korinetia 2, 5:14, 15.
16, 17. Eaha te mau ravea ta te mau Kerisetiano apî aore ra te feia e mea iti ta ratou hopoia, e nehenehe e feruri?
16 E Kerisetiano apî pûpûhia anei oe ua oti aore ra ua fatata te oti ta oe tau haapiiraa? Peneiaˈe aitâ ta oe e hopoia utuafare teimaha. Eaha ïa ta oe opuaraa no to oe oraraa? Eaha te mau faaotiraa ta oe e rave no te tapea maitai aˈe i ta oe parau fafau e rave i te hinaaro o Iehova? Mea rahi tei faanaho i ta ratou mau ohipa no te riro ei pionie, e ua ite ratou i te oaoa e te mauruuru rahi ei faahopearaa.—Sal. 110:3; Koh. 12:1.
17 Peneiaˈe e taata paari apî oe. E ohipa taime taatoa ta oe, mea iti râ paha ta oe hopoia, taa ê atu i te aupururaa ia oe iho. Eita e ore e te oaoa ra oe i te rave i te mau ohipa a te amuiraa ia au i ta oe porotarama. E nehenehe anei oe e ite i te oaoa rahi atu â? Ua manaˈo anei oe e faarahi i ta oe taviniraa? (Sal. 34:8; Mas. 10:22) I te tahi mau tuhaa fenua, mea rahi â te ohipa e rave no te faaite i te poroi faaora o te parau mau i te taata atoa. E nehenehe anei oe e faatano i to oe oraraa, peneiaˈe no te tavini i te hoê tuhaa fenua e te hinaaro-rahi-hia ra te feia poro i te Basileia?—A taio i te Timoteo 1, 6:6-8.
18. Eaha te mau faatanoraa ta te tahi nau taata faaipoipo apî i rave, e eaha te mau faahopearaa?
18 A hiˈo na ia Kevin raua Elena no te Hau Amui. * Mai tei matauhia e te feia paari apî o to raua tuhaa fenua, o tei faaipoipo noa ˈtura, ua manaˈo raua e hoo mai i te hoê fare. E ohipa taime taatoa ta raua e piti e ua tia ia raua ia tapea i te hoê oraraa fanaˈo. No ta raua râ ohipa i rapae e i te fare, mea iti to raua taime e toe mai no te taviniraa. Ua taa aˈera ia raua e te horoa ra raua fatata pauroa i to raua taime e itoito no ta raua mau faufaa. A ite ai râ raua i te oraraa au noa o te tahi nau pionie faaipoipo oaoa, ua faaoti aˈera Kevin raua Elena e taui i te fa matamua o to raua oraraa. I muri aˈe i te aniraa i te aratairaa a Iehova i roto i te pure, ua hoo atu raua i to raua fare e ua rave i te hoê nohoraa tarahu. Ua faaiti mai Elena i ta ˈna mau hora i te ohipa e ua riro ei pionie. Faaitoitohia e te mau tupuraa ta ta ˈna vahine e fanaˈo ra, ua faarue Kevin i ta ˈna ohipa taime taatoa e ua haamata i te taviniraa pionie. Tau taime i muri aˈe, ua reva raua e tavini i te hoê fenua i Marite Apatoa e te hinaaro-rahi-hia ra te feia poro i te Basileia. “E faaipoiporaa oaoa noa to mâua,” ta Kevin ïa e parau ra, “i to mâua râ tapiraa i te mau fa pae varua, ua rahi atu â to mâua oaoa.”—A taio i te Mataio 6:19-22.
19, 20. No te aha o te pororaa i te parau apî maitai te ohipa faufaa roa ˈˈe i teie tau?
19 O te pororaa i te parau apî maitai te ohipa faufaa roa ˈˈe e ravehia nei i te fenua i teie mahana. (Apo. 14:6, 7) E turu te reira i te faaraaraa i te iˈoa o Iehova. (Mat. 6:9) E haamaitai te poroi bibilia i te oraraa o te taata e rave rahi tausani o te farii i te reira i te mau matahiti atoa, e e nehenehe ïa ratou e ora. Teie râ, “eaha hoi ratou e ite ai i te faaite ore?” ta te aposetolo Paulo ïa i ui. (Roma 10:14, 15) E mea fifi mau â ïa! No te aha e ore ai e faaoti papu e rave i tei maraa atoa ia oe no te faatupu i ta oe taviniraa?
20 Te tahi atu ravea e tauturu ai oe i te taata ia taa i te faufaaraa o teie tau ati rahi e te mau faahopearaa o te mau faaotiraa ta ratou e rave, o te haamaitairaa ïa i to oe ite i te haapii atu. E hiˈopoa to muri iho tumu parau e nafea oe e na reira ˈi.
[Nota i raro i te api]
^ Ua tauihia te mau iˈoa.
Eaha ta oe e pahono?
• Eaha te hopoia a te mau Kerisetiano i nia i te huitaata?
• E nafea tatou ia faaruru i te mau haafifiraa i ta tatou pororaa e tia ˈi?
• E nafea tatou e rave ai i te taviniraa i noaa ia tatou?
[Uiraa haapiiraa]
[Hohoˈa i te api 9]
E hinaarohia te itoito no te poro noa ˈtu te patoiraa
[Hohoˈa i te api 11]
Eaha ta oe e nehenehe e rave ia poro oe i te mau tuhaa fenua e mea varavara te taata i te fare?