Te faaroo ra Iehova i ta tatou mau pii no te tauturu
Te faaroo ra Iehova i ta tatou mau pii no te tauturu
“Tei te feia parau-tia ra to Iehova mata; e tei ta ratou pure to ˈna tariˈa.”—SAL. 34:15.
1, 2. (a) Eaha to e rave rahi huru aau i teie mahana? (b) No te aha tatou e ore ai e maere i te reira?
TE FAARURU ra anei oe i te ahoaho? Mai te peu e e, e ere o oe anaˈe to roto i tera tupuraa. Te faaruru nei e mirioni taata i te mau faaheporaa o te oraraa o te mau mahana atoa i roto i teie faanahoraa ino o te mau mea. No vetahi, e au ra e eita e maraa ia faaoromai. Hoê â to ratou huru aau e to te fatu salamo ra o Davida, tei papai e: “Ua paruparu roa vau, ua aao roa; te aue pii hua nei au i te arepurepu o tau aau. Ua paupau tau aho, ua ore to ˈu etaeta: e te maramarama e vai i tau mata nei, aita nei.”—Sal. 38:8, 10.
2 Ei Kerisetiano, aita tatou e maere ra i te ahoaho o te oraraa. Te taa ra ia tatou e e tuhaa tera “ati” o te tapao i tohuhia o te vairaa mai o Iesu. (Mar. 13:8; Mat. 24:3, MN) Te faataa ra te taˈo tumu i hurihia ei “ati” i te mauiui rahi i te taime fanauraa. Auê ïa faataaraa tano o te uˈanaraa o te mauiui o te taata i teie tau “ati rahi,” aore ra “taehae” (Kingdom Interlinear), tau “faaruru atâ”!—Tim. 2, 3:1, MN.
Te taa ra ia Iehova to tatou ahoaho
3. Ua ite maite te nunaa o te Atua i te aha?
3 Ua ite maite te nunaa o Iehova e aita ratou i paruruhia i te mau faahopearaa o tera ahoaho, e mea papu roa e e ino roa ˈtu â te mau tupuraa fifi. Hau atu â i te mau mea e faaruruhia ra e te rahiraa o te huitaata, te faaû atoa nei tatou te mau tavini a te Atua i te hoê ‘enemi, te Diabolo’ o tei faaoti papu i te faaino i to tatou faaroo. (Pet. 1, 5:8) E mea ohie roa ia manaˈo mai ia Davida: “Ua paruparu tau aau i te faaino, ua ati au i te pohe. I imi hoi au i tei aroha mai, e aore roa! E te haamahanahana mai, e aore roa i itea e au”!—Sal. 69:20.
4. Eaha te tamahanahana ia tatou a ahoaho ai tatou?
4 Te auraa anei ïa e aita hoê aˈe tiaturiraa to Davida? Eita. A tapao na i ta ˈna i parau atu â i roto i tera salamo: “E faaroo mai . . . Iehova i te feia haehaa ra, e aore hoi e vahavaha i to ˈna taata tapeahia ra,” aore ra “vetahi o to ˈna mau taata i tapeahia.” (Sal. 69:33, MN, nota.) I roto i te hoê auraa rahi, mai te huru ra e te tapea-tîtî-hia ra tatou, i te tahi mau taime, e to tatou ahoaho aore ra hepohepo. E au ra e aita vetahi ê e taa mau ra i to tatou tupuraa—e peneiaˈe aita roa ˈtu. Mai ia Davida râ, e nehenehe tatou e tamahanahanahia i te iteraa e te taa roa ra ia Iehova to tatou ahoaho.—Sal. 34:15.
5. Te tiaturi ra te arii Solomona i te aha?
5 Ua haamataratara Solomona, te tamaiti a Davida, i te reira i te avariraahia te hiero i Ierusalema. (A taio i te Paraleipomeno 2, 6:29-31.) Ua taparu oia ia Iehova ia faaroo i te pure a te taata aau haavare ore taitahi o tei haafatata ˈtu ia ˈNa no nia i “to ˈna iho ino e to ˈna iho ati.” Eaha te huru o te Atua i mua i te mau pure a tera feia e ahoaho ra? Ua faaite o Solomona i to ˈna tiaturi e eita noa te Atua e faaroo i ta ratou mau pure, e tauturu atoa râ oia ia ratou. No te aha? No te mea ua ite maitai oia eaha to roto i “te aau o te taata atoa.”
6. E nafea tatou e faaruru ai i te tapitapi, e no te aha?
6 E nehenehe atoa tatou e haafatata ˈtu ia Iehova ra ma te pure no ‘to tatou iho ino e to tatou iho ati,’ to tatou taitahi ahoaho. E tamahanahanahia iho â tatou i te iteraa e te taa maira oia i to tatou ahoaho e te tapitapi ra oia ia tatou. Ua haapapu te aposetolo Petero i te reira i to ˈna parauraa e: “E huri i to outou ahoaho atoa i nia ia ˈna; oia hoi te tiai mai ia outou.” (Pet. 1, 5:7) E haapeapea iho â Iehova no te mau mea e tupu i nia ia tatou. Ua haapapu Iesu i ta Iehova aupuru î i te here, ma te na ô e: “E ere anei taipiti manu rii ia hoo i te moni veo hoê nei? e ore râ te hoê o taua na manu rii ra e moe i to outou Metua ia mairi i raro i te repo. Eiaha ˈtu â ïa, ua hope atoa ra te rouru o to outou upoo na i te taiohia. Eiaha maori outou e mǎtaˈu, e maitai rahi hoi to outou i to te manu e ia rahi noa ˈtu.”—Mat. 10:29-31.
A tiaturi i te tauturu a Iehova
7. Eaha te tauturu ta tatou e nehenehe e tiaturi papu?
7 E nehenehe iho â tatou e tiaturi papu e te hinaaro ra Iehova e e nehenehe atoa o ˈna e tauturu ia tatou ia û tatou i te ahoaho. “O te Atua to matou haapuraa e to matou etaeta, e tauturu fatata ia roohia e te ati ra.” (Sal. 34:15-18; 46:1) E nafea te Atua e horoa ˈi i taua tauturu ra? A hiˈo na i ta te Korinetia 1, 10:13 e parau ra: “E parau mau ta te Atua e ore oia e vaiiho noa ia outou ia ati, maori râ o te tia ia outou ia faaoromai ra; e faatupu atoa oia i te haapuraa i taua ati ra, ia tia ia outou ia faaoromai.” E nehenehe ta Iehova e aratai i te mau mea no te faaore i to tatou ati, aore ra e nehenehe oia e horoa mai i te puai ta tatou e hinaaro no te faaoromai atu. Noa ˈtu eaha te tupuraa, e tauturuhia tatou.
8. E nafea tatou e fanaˈo ai i te tauturu a te Atua?
8 E nafea tatou e fanaˈo ai i tera tauturu? A tapao na eaha te aˈohia ra ia tatou ia rave: “E huri i to outou ahoaho atoa i nia ia ˈna.” Te auraa ra, e tuu taipe tatou i nia ia Iehova i te hopoia o to tatou mau tapitapi atoa. E tamata ïa tatou i te faaea i te haapeapea e e tiaturi tatou ia ˈna ma te faaoromai no te haamâha i to tatou mau hinaaro. (Mat. 6:25-32) E titau taua tiaturi ra i te haehaa, eiaha e tiaturi i to tatou iho puai aore ra paari. Na roto i te faahaehaaraa ia tatou iho “i raro aˈe i te rima mana o te Atua,” te farii ra ïa tatou i to tatou tiaraa haehaa. (A taio i te Petero 1, 5:6.) Ei faahoˈiraa, e tauturu te reira ia tatou ia faaruru i te mau mea atoa ta te Atua e faatia ra. E hinaaro ru paha tatou i te tamahanahanaraa oioi, tera râ te tiaturi ra tatou e ua ite Iehova afea roa e e nafea ia tauturu ia tatou.—Sal. 54:7; Isa. 41:10.
9. Teihea hopoia ta Davida i tuu ia Iehova ra?
9 A haamanaˈo i ta Davida mau parau papaihia i roto i te Salamo 55:22: “E tuu oe i ta oe hopoia ia Iehova ra, e na ˈna oe e tauturu mai; e ore roa oia e vaiiho noa ˈtu i te taata parau-tia ia faaaueuehia.” I to Davida papairaa i taua mau parau ra, e mauiui rahi to ˈna. (Sal. 55:4) Eita e ore e ua papaihia teie salamo i to ta ˈna tamaiti ra o Abasaloma opua-huna-raa e haru i to ˈna tiaraa arii. Ua turu atoa ˈtu te taata aˈo tiaturi-roa ˈˈe-hia e Davida, o Ahitophela, i te opuaraa ino. Ua titauhia ia faarue Davida ia Ierusalema ia ora hoi oia. (Sam. 2, 15:12-14) I roto atoa i taua mau tupuraa ahoaho ra, ua tamau noa Davida i te tiaturi i te Atua, e aita oia i hape.
10. Eaha te titauhia ia rave tatou ia faaruru tatou i te ahoaho?
10 E mea faufaa roa no tatou, mai ia Davida, ia haafatata ˈtu ia Iehova i roto i te pure no nia i te mau ahoaho atoa ta tatou e nehenehe e faaruru. E hiˈo anaˈe eaha ta te aposetolo Paulo i faaitoito ia tatou ia rave i roto i te reira tupuraa. (A taio i te Philipi 4:6, 7.) Eaha te faahopearaa o taua pure haavare ore ra? “Na te hau a te Atua, o tei hau ê atu i te ite taata nei, e faaitoito mai i to [ta]tou aau, e to [ta]tou manaˈo i te Mesia nei ia Iesu.”
11. E nafea “te hau a te Atua” e paruru ai i to tatou aau e puai feruriraa?
11 E taui anei te pure i to oe huru tupuraa? E nehenehe. E mea tia atoa râ ia taa ia tatou e eita Iehova e pahono noa i ta tatou mau pure mai ta tatou e hinaaro. Noa ˈtu râ, e tauturu te pure ia tatou ia vai faito noa to tatou feruriraa, ia ore to tatou ahoaho ia faateimaha roa ia tatou. E nehenehe “te hau a te Atua” e tamǎrû ia tatou ia teimaha tatou i te mau huru aau peapea. Mai te hoê nuu faehau tei maitihia no te paruru i te hoê oire i te aroraa enemi, e paruru “te hau a te Atua” i to tatou aau e puai feruriraa. E tauturu atoa te reira ia tatou ia tinai i to tatou mau feaaraa, riaria, e manaˈo faatoaruaru, a ape atu ai tatou i te tahi huru feruri ore e te maamaa.—Sal. 145:18.
12. A faahohoˈa na e nafea te hoê taata e fanaˈo ai i te hau o te feruriraa.
12 E nafea tatou e nehenehe ai e fanaˈo i te hau o te feruriraa a roohia ˈi tatou i te ahoaho? E hiˈo mai tatou i te hoê faahohoˈaraa o te faataa ra i to tatou tupuraa, i roto i te tahi mau tuhaa. Te ohipa ra paha te hoê taata no te hoê faatere ohipa ino. E nehenehe râ te rave ohipa e faaite i to ˈna mau huru aau i te fatu o te taiete, mea maitai hoi oia e te mǎrû. E haapapu te fatu i te rave ohipa e te taa ra ia ˈna te huru tupuraa e e faaite oia e ua fatata te tiaraa o te faatere ohipa i te tatarahia. Eaha te huru aau o te rave ohipa? E haapaari to ˈna tiaturi i tera haapapuraa e te iteraa eaha te tupu, i ta ˈna faaotiraa papu e tamau â i te ohipa, noa ˈtu e e faaruru oia i te tahi atu â mau fifi i tera area taime. Oia atoa, ua ite tatou e te taa ra Iehova i to tatou huru tupuraa, e te haapapu ra oia ia tatou e ua fatata te taime “e hee ai te arii o teie nei ao.” (Ioa. 12:31) Auê ïa tamahanahanaraa!
13. Hau atu i te pureraa, eaha ˈtu â ta tatou e rave e tia ˈi?
13 E navai noa anei ïa ia tuu i to tatou mau fifi ia Iehova ra i roto i te pure? Eita. Te titauhia ra hau atu â. E mea tia ia haa tatou ia au i ta tatou mau pure. I to te arii Saula tonoraa ˈtu i te taata i te utuafare o Davida no te taparahi pohe ia ˈna, ua pure Davida: “Ia ora vau, e tau Atua, i to ˈu nei mau enemi; e faatia mai oe ia ˈu i tei mârô mai ia ˈu nei. Ia ora vau i te feia rave parau ino ra, e faaora ia ˈu i te feia i hinaaro i te toto ra.” (Sal. 59:1, 2) Hau atu â i te pureraa, ua faaroo Davida i ta ˈna vahine e ua rave oia i tei titauhia no te horo ê. (Sam. 1, 19:11, 12) Oia atoa, e nehenehe tatou e pure no te ani i te paari e au ia faaohipa o te tauturu ia tatou ia faaruru e peneiaˈe ia haamaitai i to tatou mau huru tupuraa ahoaho.—Iak. 1:5.
E nafea e noaa ˈi ia tatou te puai no te faaoromai
14. Eaha te tauturu ia tatou ia faaoromai a faaruru ai tatou i te fifi?
14 Eita to tatou mau fifi e faaore-oioi-hia. Peneiaˈe e tamau noa te reira no te hoê taime. Mai te peu e tera iho â, na te aha e tauturu ia tatou ia faaoromai? A tahi, e haamanaˈo tatou e ia tamau tatou i te tavini ia Iehova ma te haapao maitai noa ˈtu te mau fifi, te haapapu ra tatou i to tatou here ia ˈna. (Ohi. 14:22) A haamanaˈo i te pariraa a Satani no nia ia Ioba: “E haamori anei Ioba ia oe ahiri aita ta ˈna apî e noaa mai? Ua paruru noa oe ia ˈna e to ˈna utuafare e ta ˈna mau mea atoa. Te haamaitai ra oe i te mau mea atoa ta ˈna e rave ra, e ua navai te mau puaatoro ta oe i horoa na ˈna e î ai te fenua taatoa. I teie nei râ, a rave na i ta ˈna mau mea atoa—e faaino oia ia oe i mua i to aro!” (Ioba 1:9-11, Today’s English Version) Maoti to ˈna hapa ore, ua haapapu Ioba e e haavare taua pariraa ra. Na roto i to tatou faaoromairaa i te mau tupuraa ahoaho, e nehenehe tatou atoa e haapapu e e haavare o Satani. Ei faahoˈiraa, e haapuai to tatou faaoromai i to tatou tiairaa e to tatou tiaturi.—Iak. 1:4.
15. Eaha te mau hiˈoraa e nehenehe e faaitoito ia tatou?
15 A piti, a haamanaˈo e “tei to outou mau taeae atoa i te ao nei taua mau pohe ra.” (Pet. 1, 5:9) Oia, “aita outou e roohia e te ati maori râ mai ta te taata nei â.” (Kor. 1, 10:13) E nehenehe ïa oe e fanaˈo i te puai e te itoito na roto i te feruriruriraa i te mau hiˈoraa o vetahi ê eiaha râ i to oe iho mau fifi. (Tes. 1, 1:5-7; Heb. 12:1) A rave i te taime no te feruri i te hiˈoraa o te feia ta oe i matau o tei faaoromai ma te haapao maitai noa ˈtu e ua faaruru ratou i te mau ahoaho mauiui. Ua imi anei oe i te tahi aamu tei neneihia o te feia i faaruru i te hoê â huru tupuraa e to oe? E nehenehe te reira e faaitoito roa ia oe.
16. E nafea te Atua e faaitoito ai ia tatou a faaû ai tatou i te mau ati huru rau?
16 A toru, a haamanaˈo e o Iehova ‘te Metua o te aroha e te Atua no ˈna anaˈe te mahanahana, o tei haamahanahana mai ia tatou i to tatou mau [ati] atoa nei, ia tia ia tatou ia haamahanahana i te feia i roohia i te [ati huru rau], i te mahanahana a te Atua i mahanahana ˈi tatou iho nei.’ (Kor. 2, 1:3, 4; MN) Mai te huru ra e te tia ra te Atua i pihai iho ia tatou no te faaitoito e no te haapuai ia tatou, eiaha noa i roto i to tatou ati nei, i roto atoa râ ‘i to tatou mau ati atoa nei.’ E tia ïa ia tatou ia haamahanahana ia vetahi ê “i roohia i te ati huru rau.” Ua ite o Paulo iho i te tanoraa o taua mau parau ra.—Kor. 2, 4:8, 9; 11:23-27.
17. E nafea te Bibilia e tauturu ai ia tatou ia faaruru i te ahoaho o te oraraa?
17 A maha, te vai ra ia tatou ra te Parau a te Atua, te Bibilia, e “mea faufaa ei haapiiraa, ei faahaparaa, ei faatitiaifaroraa i te mau mea, ei aˈoraa ma te parau-tia ra, ia aravihi roa te taata no te Atua, ia ineine roa no te mau ohipa maitatai atoa ra.” (Tim. 2, 3:16, 17, MN) Eita noa te Parau a te Atua e ‘faaaravihi’ e e ‘faaineine ia tatou no te mau ohipa maitatai atoa ra.’ E tauturu atoa râ te Bibilia ia tatou ia faaruru i te ahoaho o te oraraa. E faariro oia ia tatou ei taata “aravihi roa” e te “ineine roa.” Te auraa mau o te taˈo tumu tei hurihia ei “ineine roa,” oia ïa “faaineinehia.” Ua faaohipahia teie taˈo i te tau tahito ra no te hoê poti o tei faaineinehia i te mau mea atoa no te hoê tere aore ra no te hoê matini o te nehenehe e rave i te mau mea atoa e tiaihia i te reira. Oia atoa, te horoa ra Iehova na roto i ta ˈna Parau i te mau mea atoa ta tatou e hinaaro no te faaruru i te mau mea atoa ta tatou e nehenehe e farerei. No reira, e nehenehe tatou e parau e, “Mai te peu e te faatia ra te Atua i te reira, e nehenehe ïa ta ˈu e faaruru, maoti ta ˈna tauturu.”
E faaorahia tatou i to tatou ahoaho atoa
18. Na te haamanaˈoraa i te aha e tauturu ia tatou ia faaoromai ma te haapao maitai?
18 A pae, e haamanaˈo noa tatou i te ohipa faahiahia e ua fatata Iehova i te faaora i te huitaata i te mau ahoaho atoa. (Sal. 34:19; 37:9-11; Pet. 2, 2:9) Inaha, eita noa te Atua e faaora ia tatou i te ahoaho nei, e horoa atoa mai râ oia i te ravea e fanaˈo ai tatou i te ora mure ore, i nia i te raˈi e o Iesu aore ra i nia i te hoê fenua paradaiso.
19. E nafea e nehenehe ai e faaoromai ma te haapao maitai?
19 A tiai noa ˈi i taua taime ra, e tamau â ïa tatou i te faaruru i te mau tupuraa ahoaho o teie ao ino. Te tiai ru nei iho â tatou i te tau e ore ai tera mau mea atoa! (Sal. 55:6-8) E haamanaˈo tatou e e haapapu to tatou faaoromai ma te haapao maitai e e haavare te Diabolo. Ia nehenehe e noaa mai ia tatou te puai no roto mai i ta tatou mau pure e to tatou huitaeae Kerisetiano, a haamanaˈo ai tatou e te faaû atoa nei to tatou mau taeae i te ati mai ta tatou e faaruru nei. A tamau â i te faaaravihi e i te faaineine roa ma te faaohipa maitai i te Parau a te Atua. Eiaha roa e faatia i to oe tiaturi i te aupuru î i te here a “te Atua no ˈna anaˈe te mahanahana” ia aueue. A haamanaˈo e “tei te feia parau-tia ra to Iehova mata; e tei ta ratou pure to ˈna tariˈa.”—Sal. 34:15.
E nehenehe anei oe e pahono?
• Eaha to Davida huru a ahoaho ai oia?
• Ua tiaturi te arii Solomona i te aha?
• Eaha te nehenehe e tauturu ia tatou ia faaruru i ta Iehova e faatia ra?
[Uiraa haapiiraa]
[Hohoˈa i te api 20]
Ua tiaturi Solomona e e tauturu Iehova i to ˈNa mau taata e ahoaho ra
[Hohoˈa i te api 22]
Ua tuu Davida i ta ˈna hopoia i nia ia Iehova ra na roto i te pure e ua ohipa ia au i ta ˈna pure