Te hinaarohia ra te faaoraraa!

I PIHAI iho ia Pittsburgh, i Pennsylvanie, i Marite, ua î taue te hoê apoo heruraa arahu e mirioni litera pape. Ua mau e iva taata heru i roto i te hoê apoo mataˈi i e 73 metera i raro i te fenua. E toru mahana i muri iho, te haere mai ra ratou i rapae, mea maitai e te pepe ore. Mea nafea to ratou faaoraraahia?

Maoti te mau hohoˈa o te apoo e te ravea GPS, ua ô te feia faaora i te hoê apoo e 65 tenetimetera i te aano e faatae atura i te hoê afata roa e te ǒaǒa i te vahi i reira nau taata heru i te haapueraa. Te tahi i muri iho i te tahi, ua hutihia mai te feia heru i nia i roto i taua afata ra, mai te vahi mai o tei nehenehe e riro ei menema no ratou. Ua oaoa te taatoaraa o te feia i faaorahia, ua topa te hau, e ua mauruuru no to ratou faaoraraahia mai.

Eita roa ˈtu te rahiraa o tatou e mau i raro i te fenua mai teie nau taata heru arahu e iva aore ra e faaû i te pohe i roto i te hoê ati. Noa ˈtu râ, e hinaaro pauroa tatou ia faaorahia tatou, no te mea eita tatou e nehenehe e ape i te mau faahopearaa o te maˈi, o te ruhiruhiaraa e o te pohe i te pae hopea. “Te taata ta te vahine e fanau nei, aita rea o ˈna pue mahana, e te î hoi i te peapea,” o ta te patereareha haapao maitai ra o Ioba ïa i faahiti. “Te tupu nei oia mai te tiare, e ua motu ihora; te maue nei mai te maru ra, e aore i mau mai.” (Ioba 14:1, 2) I teie mahana, fatata e 3 500 matahiti i muri aˈe, te tano noa ra teie mau parau, o vai hoi i rotopu ia tatou te nehenehe e ape i te faahopearaa ino mau o te ora—te pohe? Noa ˈtu teihea te vahi ta tatou e ora ra aore ra te haapao-maitai-raa tatou i to tatou ea, te hinaaro mau nei iho â tatou ia faaorahia mai tatou i te mana o te mauiui, te paari, e te pohe.

Te ohipa puai ra te mau aivanaa e te tahi atu mau taata no te faaroa ˈtu â i te ora matauhia e te taata i teie mahana. Te faataa ra te hoê faanahonahoraa e te ohipa ra oia no “te upootia i nia i te pohe hinaaro-ore-hia” e no “te tauturu i to ˈna mau melo ia manuïa i roto i te raveraa i te hoê mea ia ore te taata e pohe faahou i te pae tino.” Teie râ, e tae mai i teie nei, ia amuihia te haereraa i mua a te ihi e te hinaaro puai ia manuïa, aita te reira i faaroa ˈtu â i te ora o te taata hau atu i te 70 aore ra 80 matahiti faahitihia e Mose a 3 500 matahiti aˈenei.—Salamo 90:10.

Ia farii oe i te mau huru aau o Ioba no nia i te oraraa e te pohe aore ra eita, e mairi iho â te mau matahiti, e “maue [atoa oe] mai te maru,” e atea ê oe i to oe mau hoa, to oe utuafare, to oe nohoraa, e te mau mea atoa ta oe i rave—e hope ïa i te pohe. “Ua ite te feia e ora nei, e pohe ratou,” ta Solomona ïa, arii paari o Iseraela i tahito ra, i papai. “Aita râ a te feia i pohe ra e parau itea. Aita hoi a ratou e utua toe i te fenua nei; ua aramoina hoi ratou.”—Koheleta 9:5.

 Te tupuraa mau peapea, mai ta te Bibilia e faataa ra, oia hoi ‘ua mana te pohe,’ mai te hoê tia faatere haavî, i nia i te taata. Oia mau, o te pohe te enemi hopea o ta te huitaata e hinaaro ra ia faaorahia ratou. (Roma 5:14; Korinetia 1, 15:26) Eita te feia faaora haamataro-roa ˈˈe-hia e te ineine roa ˈˈe e nehenehe e faaora tamau noa ia oe. Teie râ, ua faanaho maitai o Iehova, te Atua Poiete o te taata, i taua huru faaoraraa ra.

[Faaiteraa i te fatu o te hohoˈa i te api 3]

Hohoˈa a Gene J. Puskar-Pool/Getty Images