Uiraa a te feia taio

Ihea te tamaˈi o Aramagedo e tupu ai?

Eita te tamaˈi o Aramagedo e tupu i te tahi vahi aroraa taa maitai. O te fenua taatoa râ te vahi aroraa. No te aha? I te mea e mea rahi roa na pae enemi e piti, eita ratou e nehenehe e ô i te hoê noa vahi.

Ua matau-atoa-hia Aramagedo mai “te tamaˈi i taua mahana rahi o te Atua Puai hope ra.” E faaohipa te Atua ra o Iehova i ta ˈna Tamaiti, te Mesia ra o Iesu, no te haaputu i te hoê nuu melahi no te aro i te mau puai amui o te mau taata faatere paieti ore atoa o te fenua.—Apokalupo 16:14; 19:11-16.

E au ra e ua arato te mau puai a Satani i te mau nunaa ia faaô atoa i roto i te tamaˈi. Te parau ra te Bibilia e te haere nei ‘[“te mau parau faauruhia e te mau demoni,” MN] i te hui arii [feia faatere] o te fenua nei e o te ao atoa nei no te haaputu ia ratou i te vahi o Aramagedo te iˈoa i te parau Hebera ra.’—Apokalupo 16:14-16.

Taa ê atu i te tahi atu buka bibilia, ua faaara te Apokalupo i te feruriraa o e rave rahi taata taio Bibilia. Ua faataa e rave rahi taata taio, o tei manaˈo e e auraa mau to te buka Apokalupo, i te hoê vahi papu i reira, i to ratou manaˈo, e haamata ˈi te tamaˈi, e ua hiˈo noa ratou i te mau tupuraa i taua tuhaa fenua ra ma te taiâ. Ua itehia mai te parau e faataa ra ia Aramagedo mai te hoê vahi taa maitai i roto i te tatararaa Heleni tahito roa ˈˈe i nia i te Apokalupo e vai noa nei, papaihia i te senekele 6 T.T. e Œcumenius.

Ma te faahiti faahou i te hoê manaˈo matauhia i rotopu i te pǔpǔ ekalesiatiko faatumu, te parau ra John Walvoord, te peretiteni tahito no te hoê fare haapiiraa perepitero teologia no Dallas e Aramagedo, o “te tamaˈi ïa aita e ravea faahou hopea o te hoê aroraa fifi roa a te ao haamauhia i te pae Hitia o te râ no ropu.” Te faataa ra Walvoord i “‘te Mouˈa no Megido,’ te hoê mouˈa iti i te pae apatoerau no Paretetina i te hopea o te hoê peho aano,” mai te vahi faufaa roa ˈˈe o tera tamaˈi rahi a muri aˈe.

E ere râ te buka Apokalupo i te hoê hohoˈa purumu o te faaite i te hoê vahi mau o Aramagedo te iˈoa. Te faaite ra ta ˈna mau parau matamua e e hohorahia te faatiaraa “na roto i te mau tapao.” (Apokalupo 1:1, MN) Mea maoro aˈenei, ua parau te mau Ite no Iehova i roto i ta ratou buka Études des Écritures, buka IV: “Aita matou e tiaturi ra i te tahi haaputuputuraa mau o te mau taata i te aivi no Megido.”

Te faahohoˈa ra te mau mea tei tupu i mutaa ihora i Megido i te hoê huru tupuraa aita e hororaa no te mau enemi o te Atua. No reira, i Aramagedo, e rave papu te Atua e ia mou roa te ohipa piˈo e te ino atoa, noa ˈtu eaha te vahi e itehia ˈi te reira i nia i teie fenua.—Apokalupo 21:8.

Eiaha te feia e here i te Atua ra o Iehova e i ta ˈna Tamaiti, Iesu Mesia, e mǎtaˈu ia Aramagedo. E arataihia te tamaˈi a te Atua i nia noa i te feia ta te Atua e haava ra e mea ino fati ore. E tamaˈi maiti ta ˈna i roto i ta ˈna haamouraa. “Ua ite maori [Iehova] i te faaora i te feia paieti,” ta te Bibilia ïa e parau ra. (Petero 2, 2:9; MN) Te na ô ra te hoê parau fafau mahanahana i roto i te Salamo 37:34: “E tiai atu ia Iehova, a haapao maite ai i to ˈna eˈa, e na ˈna oe e faateitei ia noaa ia oe te fenua; e ite oe i te pohe o te feia paieti ore ra.”