A farii i te mana faatere o Iehova
A farii i te mana faatere o Iehova
“Teie . . . te hinaaro i te Atua, o te haapao i ta ˈna ra parau: e ere hoi ta ˈna parau i te mea teimaha.”—IOA. 1, 5:3.
1, 2. (a) No te aha e rave rahi i teie tau e ore ai e au i te manaˈo e auraro i te mana faatere? (b) E mea tiamâ mau anei te feia aita e hinaaro ra e faaau atu i nia i te mana faatere o vetahi ê? A faataa.
“MANA FAATERE,” e ere ïa i te hoê taˈo auhia i teie mahana. Mea rahi o te ore e au i te manaˈo e auraro i te hinaaro o te tahi atu taata. “Eiaha na te taata e parau mai eaha ta ˈu e rave,” tera ïa te huru o te feia aita e hinaaro ra e faaau atu i nia i te mana faatere o vetahi ê. Teie râ, e mea tiamâ iho â anei teie mau taata? E ere roa ˈtu! Te pee noa ra te rahiraa i te mau ture aveia a te tahi atu e rave rahi o tei “faaau atu i teie nei ao.” (Roma 12:2) E ere ratou i te mea tiamâ, e “tîtî” râ ratou “na te ino,” ia au i te aposetolo Kerisetiano Petero. (Pet. 2, 2:19) To ratou haerea, “ta to teie nei ao [ïa], ta te arii mana o te reva nei,” o Satani te Diabolo.—Eph. 2:2.
2 Ua parau te hoê taata papai buka ma te faaoru e: “Eita vau e faatia e na to ˈu mau metua aore ra te hoê perepitero aore ra te hoê tia faaroo aore ra te hoê orometua faaroo Hindou aore ra na te Bibilia e faaoti eaha te mea mau no ˈu.” Parau mau, e faaohipa hape paha vetahi i to ratou mana faatere e eita ïa e tano ia auraro tatou ia ratou. Teie râ, o te patoi-roa-raa anei ïa i te aratairaa e hinaarohia te ravea? A hiˈo poto noa ˈtu i te mau parau apî i roto i te mau vea, mea au ore roa te pahonoraa. E mea peapea mau e i te hoê tau e hinaaro roa ˈi te taata i te aratairaa, aita te rahiraa e hinaaro roa ra e farii i te reira.
To tatou manaˈo i te mana faatere
3. Mea nafea to te mau Kerisetiano i te senekele matamua faaiteraa e aita ratou i auraro matapo noa ˈtu i te mana faatere o te taata?
3 Ei Kerisetiano, e rave tatou i te hoê tiaraa taa ê i to te ao. E ere ïa e e rave matapo noa tatou i te mau mea atoa e parauhia mai. Eita, i te tahi taime e titauhia ia patoi tatou i te faatia i te hinaaro o vetahi ê noa ˈtu e e tiaraa faatere to ratou. Hoê â huru atoa no te mau Kerisetiano i te senekele matamua. Ei hiˈoraa, i to te mau aposetolo faaueraahia e faaea i te poro, aita ratou i auraro i te tahuˈa rahi e te tahi atu feia mana toroa, melo o te Sunederi. Aita ratou i vaiiho i to ratou haerea maitai no te faaau atu i nia i te mana faatere o te taata.—A taio i te Ohipa 5:27-29.
4. Eaha te mau hiˈoraa i roto i te mau Papai Hebera e faaite ra e mea rahi o te nunaa o te Atua tei pee i te hoê haerea au-ore-hia?
4 Mea rahi te tavini a te Atua i te tau hou te Kerisetianoraa tei haa ma taua atoa faaotiraa papu ra. Ei hiˈoraa, ‘aore i tia ia Mose ia mairihia oia ei tamaiti a te tamahine a Pharao; e mea maitai ia ˈna te rave atoa i te pohe i te amuiraa i te taata no te Atua ra,’ noa ˈtu e e faatupu te reira i “te riri o te arii.” (Heb. 11:24, 25, 27) Ua patoi Iosepha i te mau faahinaaroraa a te vahine a Potiphara, e mana hoi to ˈna no te tahoo atu e no te haamauiui ia ˈna. (Gen. 39:7-9) Ua ‘manaˈo te aau o Daniela e eiaha oia ia viivii i te tufaa maa a te arii,’ noa ˈtu e e ere i te mea ohie no te taata rahi o te aorai Babulonia ia farii i to ˈna tiaraa. (Dan. 1:8-14) I te pae tuatapaparaa, te faaite ra tera mau hiˈoraa e ua rave te nunaa o te Atua i te hoê tiaraa aueue ore no te mea maitai, noa ˈtu eaha te mau faahopearaa. Aita ratou i faaroo i te mau taata ia fariihia ratou; eiaha atoa ïa tatou.
5. E nafea to tatou manaˈo i te mana faatere e taa ê ai i to te ao manaˈo?
5 Mea ê to tatou tiaraa itoito e mea ê te aau etaeta; e ere atoa tatou mai te tahi pae o te orure hau no te faaite noa e aita ratou e farii ra i te faanahoraa poritita. Ua faaoti papu râ tatou i te farii i te mana faatere o Iehova tei hau ê i to te taata atoa. Ia patoi te ture a te taata i te ture a te Atua, e ere i te mea fifi ia faaoti eaha ta tatou e rave. Mai te mau aposetolo i te senekele matamua, o te Atua ei upoo faatere ta tatou e faaroo eiaha te taata.
6. No te aha e mea maitai noa ˈi ia faaroo i te mau faaue a Iehova?
6 Eaha tei tauturu ia tatou ia farii i te mana faatere o te Atua? Te farii ra tatou i ta te Maseli 3:5, 6 e parau ra: “E tiaturi ia Iehova ma to aau atoa ra; eiaha râ e tiaturi i to oe ihora [“maramarama,” MN]. Eiaha e haamoe ia ˈna i to oe atoa ra mau haerea; e na ˈna e faaite ia oe i to oe ra mau haerea.” Te tiaturi ra tatou e no to tatou iho â maitai te mau mea atoa ta te Atua e ani maira. (A taio i te Deuteronomi 10:12, 13.) Oia mau, ua faataa Iehova ia ˈna iho ia Iseraela mai “tei faaite ia oe i te mea e maitai ai oe ra; o tei aratai ia oe na te eˈatia maitai ia haere oe ra.” E ua na ô faahou oia e: “Ahiri oe i faaroo mai i te mau faaue na ˈu e; ua riro ïa to oe [hau] mai te pape pue ra; e ta oe [parau-tia] mai te are moana ra.” (Isa. 48:17, 18; MN) Te tiaturi ra tatou i teie mau parau. Ua papu roa ia tatou e e maitai noa tatou ia faaroo tatou i te mau faaue a te Atua.
7. Ia aha tatou e tia ˈi ia ore tatou e taa roa i te hoê faaue faataahia i roto i te Parau a te Atua?
7 E farii tatou i te mana faatere o Iehova e e faaroo tatou ia ˈna noa ˈtu e aita tatou e taa roa ra i te tumu o te tahi mau titauraa faataahia i roto i ta ˈna Parau. E ere i te tiaturi matapo; e tiaturi papu râ. Te faaite ra te reira i te tiaturi hohonu e ua ite Iehova eaha te mea maitai no tatou. E faaiteraa atoa to tatou faarooraa i to tatou here, ua papai hoi te aposetolo Ioane e: “Teie . . . te hinaaro i te Atua, o te haapao i ta ˈna ra parau: e ere hoi ta ˈna parau i te mea teimaha.” (Ioa. 1, 5:3) Teie râ, te vai ra te tahi atu tuhaa o to tatou faarooraa eiaha tatou e haamoe.
E haamataro tatou i to tatou puai haroaroaraa
8. Eaha te taairaa i rotopu i to tatou ‘puai haroaroaraa haamatarohia’ e te fariiraa i te mana faatere o Iehova?
8 Te parau maira te Bibilia e ia ‘haamatarohia to tatou puai haroaroaraa i te faataa ê i te maitai e te ino’ e tia ˈi. (Heb. 5:14, MN) No reira, e ere ta tatou fa i te haapaoraa i te mau ture a te Atua ma te faatia ture noa; e hinaaro râ tatou ia tia ia tatou ia “faataa ê i te maitai e te ino” maoti te mau ture aveia a Iehova. E hinaaro tatou e ite i te paari o te mau eˈa o Iehova, ia nehenehe tatou e parau mai te papai salamo: ‘Te vai nei ta oe ture i roto i to ˈu nei aau.’—Sal. 40:8.
9. E nafea ia faatuati i to tatou manaˈo haava i te mau ture aveia a Iehova, e no te aha e mea faufaa ˈi ia na reira tatou?
9 No te taa i te faufaa o te mau ture a te Atua mai te papai salamo, e titauhia ia feruriruri tatou i ta tatou e taio i roto i te Bibilia. Ei hiˈoraa, ia haapii tatou i te tahi titauraa a Iehova, e nehenehe tatou e ui ia tatou iho: ‘No te aha e faaue aore ra e faaueraa tumu paari ai teie? No te aha e mea maitai ai ia haapao vau i te reira? Eaha te mau faahopearaa ino i tupu i nia i te feia tei ore i tâuˈa i te aˈoraa a te Atua i roto i taua tuhaa ra?’ Ua tuati anaˈe to tatou manaˈo haava i te mau eˈa o Iehova, e riro atu â ïa tatou i te rave i te mau faaotiraa e tuati i to ˈna hinaaro. E tia ia tatou ia ‘ite i to te Fatu ra o Iehova hinaaro’ e ia auraro atu i te reira. (Eph. 5:17) E ere i te mea ohie noa.
Te imi ra Satani i te haafifi i te mana faatere o te Atua
10. Ua imi Satani i te haafifi i te mana faatere o te Atua i roto i teihea tuhaa?
10 Mea maoro to Satani imiraa i te haafifi i te mana faatere o te Atua. E itehia to ˈna feruriraa orure hau i roto e rave rahi tuhaa. A hiˈo na i te faatura ore i te faaipoiporaa, te faanahoraa a te Atua. E maiti vetahi i te faaea noa mai tera, area te tahi atu ra, e opua ïa e faataa ê i to ratou apiti. E farii tera mau taata i te parau a te hoê vahine hauti teata matau-maitai-hia e: “Eita e haere hoê noa apiti to te tane e to te vahine.” Ua parau â oia e: “Aita vau i ite hoê aˈe apiti taiva ore aore ra o te hinaaro e na reira.” Ma te manaˈo i ta ˈna iho mau faataa-ê-raa, ua parau atoa te hoê tane hauti teata tuiroo e: “Aita i papu ia ˈu e o to tatou iho â natura e hoê noa apiti to tatou no te toea o to tatou oraraa.” E mea maitai ia ui tatou ia tatou iho, ‘Te farii ra anei au i te mana faatere o Iehova i roto i te faaipoiporaa, aore ra ua riro anei to ˈu feruriraa i te huru tâuˈa ore o te ao?’
11, 12. (a) No te aha e mea fifi ai paha no te feia apî ia farii i te mana faatere o Iehova? (b) A faatia i te hoê tupuraa e faaite ra e mea maamaa ia haafaufaa ore i te mau ture e faaueraa tumu a Iehova.
11 E taata apî anei oe i roto i te faanahonahoraa a Iehova? Mai te peu e e, e fa taa ê ïa oe o te mau tamataraa a Satani i te haafifi i te mana faatere o Iehova. E nehenehe “te mau hinaaro o te apîraa” e te faaheporaa a to oe mau hoa e turai ia oe ia manaˈo e mea teimaha te mau ture a te Atua. (Tim. 2, 2:22) Eiaha e vaiiho i te reira ia tupu. A tutava i te ite i te paari o te mau ture aveia a te Atua. Ei hiˈoraa, te parau ra te Bibilia ia oe ia “maue ê atu i te faaturi.” (Kor. 1, 6:18) I ǒ nei â, a ui ia oe iho i teie mau uiraa: ‘No te aha e faaue paari ai tera? E nafea vau e maitai ai i te faarooraa i te reira?’ Ua ite paha oe i te tahi mau taata o tei ore i tâuˈa i te aˈoraa a te Atua e o tei faaruru i muri iho i te mau faahopearaa peapea no taua hape ra. Mea oaoa iho â anei ratou i teie nei? E oraraa maitai aˈe anei to ratou i teie nei i ta ratou i fanaˈo na a apiti ai ratou i te faanahonahoraa a Iehova? Ua ite mau anei ratou i te tahi ravea o te oaoa ta te toea o te mau tavini a te Atua i ere?—A taio i te Isaia 65:14.
12 A feruri i ta te hoê Kerisetiano o Sharon te iˈoa i parau tau taime aˈenei: “No to ˈu tâuˈa-ore-raa i te ture a Iehova, ua roohia vau i te maˈi heˈa mate haapohe. E haamanaˈo pinepine au i te matahiti oaoa e rave rahi a tavini ai au ia Iehova.” Ua farii oia e mea maamaa ia ofati i te mau ture a Iehova e ahani iho â oia i faatura roa i te reira. No to tatou iho parururaa te mau ture a Iehova. Ua pohe Sharon e hitu noa hebedoma i muri aˈe i te papairaahia te mau parau i nia nei. Mai ta to ˈna tupuraa peapea mau e faaite ra, aita e ohipa maitai ta Satani e pûpû na te feia o te amui i teie faanahoraa ino. Ei ‘metua no te haavare,’ e parau oia e rave rahi fafau, aita râ e faufaa, mai ta ˈna i fafau ia Eva. (Ioa. 8:44) Parau mau, e mea maitai aˈe noa iho â ia farii i te mana faatere o Iehova.
A ara i te feruriraa orure hau
13. I roto i teihea tuhaa e mea tia ˈi ia ara tatou i te hoê huru feruriraa orure hau?
13 No te farii i te mana faatere o Iehova, e titauhia ia ara tatou i te hoê huru feruriraa orure hau. E nehenehe te hoê huru ahaaha e turai ia tatou ia manaˈo e eita tatou e hinaaro i te aratairaa a te tahi taata. Ei hiˈoraa, e patoi paha tatou i te mau aˈoraa a te feia aratai i rotopu i te nunaa o te Atua. Ua haamau te Atua i te hoê faanahoraa e na te hoê pǔpǔ tavini haapao maitai e te paari e opere i te maa varua i te hora mau. (Mat. 24:45-47) E mea maitai ia farii haehaa tatou e mea na reira Iehova e aupuru ai i to ˈna nunaa i teie tau. Mai te mau aposetolo haapao maitai tatou e tia ˈi. I te turoriraa te tahi mau pǐpǐ, ua ui Iesu i te mau aposetolo: “E haere atoa anei outou?” Ua pahono Petero e: “E te Fatu, e haere tia matou ia vai ra? tei ia oe hoi te parau o te ora mure ore ra.”—Ioa. 6:66-68.
14, 15. No te aha e mea maitai ai ia auraro haehaa tatou i te mau aˈoraa bibilia?
14 Te fariiraa i te mana faatere o Iehova, o te haapao-atoa-raa ïa i te mau aˈoraa niuhia i nia i ta ˈna Parau. Ei hiˈoraa, te aˈo maira te pǔpǔ tavini haapao maitai e te paari ia ‘ara e ia [tapea i to tatou feruriraa] haapao maitai.’ (Tes. 1, 5:6; MN) E tano maitai tera aˈoraa i teie anotau hopea e mea rahi ‘te taata miimii e te nounou moni.’ (Tim. 2, 3:1, 2) E nehenehe anei tatou e peehia i tera mau huru matauhia? E. E nehenehe te mau fa pae tino e haavarea ia tatou i te taoto i te pae varua, aore ra e farii paha tatou i te hoê huru nounou taoˈa. (Luka 12:16-21) No reira, e haerea paari mau â ia farii i te mau aˈoraa bibilia e ia ape i te huru oraraa miimii matau-roa-hia i roto i te ao a Satani!—Ioa. 1, 2:16.
15 Na te mau matahiapo faatoroahia i roto i te mau amuiraa e opere ra i te maa varua no ǒ mai i te pǔpǔ tavini haapao maitai e te paari. Te faaue maira te Bibilia e: “E faaroo i to outou mau aratai, e auraro atu outou; te faaitoito ra hoi ratou i to outou mau [nephe], e faaitehia hoi ta ratou parau; ia na reira râ ratou ma te oaoa, eiaha ma te oto: e ore hoi e faufaahia ta outou i te reira.” (Heb. 13:17; MN) Te auraa anei ïa e eita te mau matahiapo o te amuiraa e hape? Eita roa ˈtu! O te Atua tei ite aˈe i to ratou mau huru tia ore i te taata. Te hinaaro ra râ oia ia auraro tatou. Ia haa amui tatou e te mau matahiapo, noa ˈtu e e mea tia ore ratou, e haapapuraa ïa e te farii ra tatou i te mana faatere o Iehova.
Te faufaaraa o te haehaa
16. E nafea tatou e faaite ai i te faatura ia Iesu ei Upoo o te amuiraa Kerisetiano?
16 E titauhia ia haamanaˈo noa tatou e o Iesu iho â te Upoo o te amuiraa. (Kol. 1:18) Tera te hoê tumu e pee haehaa ˈi tatou i te aratairaa a te mau matahiapo faatoroahia, “ia rahi roa te faatura ia ratou.” (Tes. 1, 5:12, 13) Parau mau, e nehenehe te mau matahiapo o te amuiraa e faaite e mea auraro ratou atoa ma te haapao maitai i te horoa i te amuiraa i te poroi a te Atua, eiaha to ratou iho mau manaˈo. Aita ‘i hau to ratou manaˈo i tei papaihia’ no te turu i to ratou iho manaˈo.—Kor. 1, 4:6.
17. No te aha e mea atâta ˈi te hoê huru feruriraa ahaaha?
17 E titauhia ia ara te mau melo atoa o te amuiraa i te fifi atâta e imi i to ratou iho hanahana. (Mas. 25:27) Ua topa mau â te tahi pǐpǐ ta te aposetolo Ioane i farerei i roto i taua marei ra. Ua papai te aposetolo e: “O Dioterephe . . . o tei faateitei ia ˈna iho i nia iho ia ratou ra, e ore oia e farii mai ia matou. E teie nei, i tae atu vau ra, eita e moe ia ˈu ta ˈna e rave ra, i te paraparau haereraa ia matou i te parau faaino ra.” (Ioa. 3, 9, 10) E haapiiraa to roto no tatou atoa i teie tau. E tano roa ia tinai tatou i te hinaaro nounou toroa atoa ta tatou paha e ite i roto ia tatou. Te na ô maira te Bibilia e: “O te teoteo to te pohe ra na mua, e te aau faateitei to te hiˈa.” E titauhia ia patoi te feia o te farii ra i te mana faatere o te Atua i te marei o te teoteo, aita anaˈe o te haama to muri iho.—Mas. 11:2; 16:18.
18. Eaha te tauturu ia tatou ia farii i te mana faatere o Iehova?
18 Oia, a haamau i te fa e patoi i te huru feruriraa orure hau o te ao e e farii i te mana faatere o Iehova. I te tahi taime, a feruriruri ma te mauruuru i ta oe fanaˈoraa taa ê rahi e tavini ia Iehova. Tei rotopu oe i te nunaa o te Atua, e haapapuraa ïa e ua faatae mai o ˈna ia oe ia ˈna maoti to ˈna varua moˈa. (Ioa. 6:44) Eiaha roa ˈtu e haafaufaa ore i to oe taairaa e te Atua. A tutava roa i roto i te mau tuhaa atoa o te oraraa i te faaite e te patoi ra oe i te huru feruriraa orure hau e te farii ra oe i te mana faatere o Iehova.
Te haamanaˈo ra anei oe?
• Eaha te auraa e farii i te mana faatere o Iehova?
• Eaha te taairaa i rotopu i te haamataroraa i to tatou puai haroaroaraa e te fariiraa i te mana faatere o Iehova?
• Te imi ra Satani i te haafifi i te mana faatere o te Atua i roto i teihea mau tuhaa?
• No te aha e mea faufaa ˈi te haehaa no te farii i te mana faatere o Iehova?
[Uiraa haapiiraa]
[Hohoˈa i te api 22]
“O te Atua ta matou e faaroo e tia ˈi eiaha te taata”
[Hohoˈa i te api 24]
E haerea paari noa ia pee i te mau ture aveia a te Atua