Ta ˈu e ite o ta ˈu ïa e tiaturi

“Te hoê agnostique o te hoê ïa taata o te manaˈo ra e eita roa e itehia te parau mau no nia i te mau tumu parau mai te Atua e te oraraa a muri aˈe tei taaihia i te haapaoraa Kerisetiano e te tahi atu mau haapaoraa. Aore ra, peneiaˈe e itehia, eiaha râ i teie nei tau.”—BERTRAND RUSSELL, PHILOSOPHO, 1953.

TE TAATA tei manaˈo matamua i te parau “agnostique” o Thomas Huxley to ˈna iˈoa, e aivanaa oia no te animara. Fanauhia i 1825, ua ora Huxley i te hoê â tau e o Charles Darwin e ua paturu o ˈna i te haapiiraa o te tauiuiraa o te mau mea ora. I 1863, ua papai Huxley e aita e haapapuraa e te vai mau ra te hoê Atua o te “here ra e o te haapao ra ia tatou mai ta te Kerisetianoraa e parau ra.”

E farii e rave rahi taata i te mau manaˈo o taua feia tuiroo ra, ma te parau e ta ratou e ite o ta ratou ïa e tiaturi. E parau mai paha ratou e e mea maamaa ia tiaturi matapo noa i te mau mea atoa aita e haapapuraa.

Te titau ra anei te Bibilia ia tiaturi matapo noa tatou i te Atua? Aita roa ˈtu. Te faaite ra te Bibilia e e mea paari ore—maamaa atoa—ia tiaturi i te mau parau aita e turuhia ra e te hoê haapapuraa. “Te [tiaturi] ra te ite ore i te mau parau atoa ra,” ta te Bibilia ïa e parau ra, “te hiˈo maitai ra râ te taata haapao ra i to ˈna taahiraa.”—Maseli 14:15; MN.

E no nia i te tiaturiraa i te Atua? Aita mau anei e haapapuraa e te vai mau ra te Atua? Hau atu â, aita anei e haapapuraa e te vai ra te Atua o te here ra e o te haapao ra ia tatou?

E itehia te mau huru maitatai o te Atua

Ua parau Paulo, taata papai Bibilia, a paraparau ai oia i te hoê pǔpǔ taata maramarama no Ateno e na te Atua “i hamani i teie nei ao, e te mau mea atoa i roto ra.” Ua parau Paulo i te feia feaa e faaroo ra ia ˈna e te anaanatae ra te Atua i te huitaata e oia mau, “aita . . . oia i atea ê atu ia tatou atoa nei.”—Ohipa 17:24-27.

No te aha Paulo i tiaturi papu ai e te vai mau ra te Atua e te anaanatae ra oia i te taata ta ˈna i poiete? Ua faaite Paulo i te hoê tumu i to ˈna papairaa i to ˈna mau hoa Kerisetiano no te oire o Roma. Ua parau oia no nia i te Atua e: “Te mau mea . . . no ˈna e ore e tia ia hiˈo ra, te itea papuhia nei ïa i te mau mea i hamanihia nei.”—Roma 1:20.

E faaite to muri iho nei mau api e toru huru maitatai o te Atua o tei ite-papu-hia i roto i te mau mea o ta ˈna i poiete. A hiˈopoa ˈi oe i teie mau hiˈoraa, a ui ia oe iho, ‘E nafea te haapiiraa no nia i teie mau huru maitatai o te Atua e ohipa ˈi i nia ia ˈu?’

[Parau iti faaôhia i te api 3]

Aita te Bibilia e titau ra ia tiaturi matapo noa tatou i te Atua