Te hoê ravea maramarama

E TORU tane apî i Afirika i Ropu tei hinaaro e haere i te hoê tairururaa mataeinaa i to ratou tuhaa fenua. E nafea ratou e tae ai i reira? Fatata e 90 kilometera i te atea, e mea ofaifai te purumu e te repo puehu, e aita to ratou e faurao. Ua faaoti ratou e ani e toru pereoo taataahi, aita râ i itea ia ratou te pereoo taataahi maitai.

Ua ite te hoê matahiapo o ta ratou amuiraa i to ratou fifi e ua pûpû i to ˈna iho pereoo taataahi—tahito, o te tere noa ra râ. Ua faataa oia mea nafea to ˈna e te tahi atu na mua ˈˈe faanahoraa ia ratou iho no te tae i te hoê tairururaa. Ua poroi oia ia ratou e tufa hoê noa pereoo taataahi i rotopu ia ratou e toru. E ravea ohie, o te titau râ i te hoê faanahoraa maitai. E nafea ïa ratou?

No te ape i te mahana puai, ua farerei na taeae apî i te poipoi roa e ua tuu i ta ratou taihaa i nia iho i te pereoo taataahi. Hoê tei taahi na mua, e ua apee vitiviti na taeae e piti ia ˈna na raro. I muri aˈe e 500 metera, ua faaea te taeae matamua i te taahi e ua vaiiho i te pereoo taataahi e ta ratou taihaa i nia iho i te pae tumu raau. Parau mau, ua tuu iho â oia i te pereoo taataahi i te hoê vahi e ite atu ai na taeae e piti, ia ore hoi te tahi atu taata ia “rave” atu. Ua tamau te taeae matamua i to ˈna tere na raro.

Ia tae atu na taeae e piti i te pereoo taataahi ra, e taahi hoê e e tamau te tahi atu i te haere na raro e 500 â metera, e o ˈna ˈtu ai te taahi. Maoti ïa te hoê faanahoraa maitai e te faaotiraa papu, ua tia ia ratou e toru ia faaiti i to ratou tere na raro mai te 90 kilometera e tae atu fatata i te 60 kilometera. Ua hoona te tutavaraa. Ua ruru ratou e to ratou mau taeae e tuahine Kerisetiano i te tairururaa e ua fanaˈo ma te oaoa i te hoê amuraa maa pae varua. (Deut. 31:12) I teie matahiti, e imi anei oe i te mau ravea atoa e nehenehe no te haere i te tairururaa mataeinaa i to oe vahi?