EAHA te mau fifi i to oe manaˈo e mea tia ia faaafaro na hoa faaipoipo i faahitihia i nia nei? Ia hiˈohia, e mea fifi no te tane ia haavî i to ˈna riri. Hau atu â râ, e au ra e aita raua e afaro ra i nia i te tiamâraa o ta raua na tamarii. E e au ra e e fifi to raua i roto i te aparauraa.

Aita e faaipoiporaa tia roa. E farerei te feia faaipoipo atoa i te tahi mau huru fifi. E fifi rahi aore ra e fifi iti, mea faufaa roa ia haapii te hoê tane e ta ˈna vahine i te faaafaro i te reira. No te aha?

A mairi ai te tau, e nehenehe te mau fifi aita i faaafarohia e riro ei patu o te haafifi i te aparauraa. ‘E au te tahi mau mârôraa i te teˈa auri o te pare ra,’ ia au ïa i te arii paari ra o Solomona. (Maseli 18:19) E nafea oe e nehenehe ai e iriti i te uputa i te aparauraa maitai atu â ia faaafarohia te mau fifi?

Mai te peu e e mea faufaa roa te aparauraa i roto i te hoê faaipoiporaa, oia atoa ïa no te here e te faatura. (Ephesia 5:33) Ia faaafaro raua i te mau fifi, e turai te here i na hoa faaipoipo ia haamoe i te mau hape tahito—e te mau pepe o te aau i tupu mai—e ia tiatonu i te fifi e vai ra. (Korinetia 1, 13:4, 5; Petero 1, 4:8) E vaiiho te feia faaipoipo o te faaite i te faatura ia paraparau noa te tahi i te tahi e e tutava i te faaroo eiaha noa eaha te parauhia ra, eaha atoa râ te auraa o te reira.

A hiˈopoa i na taahiraa e maha i raro nei, e a tapao e nafea te mau faaueraa tumu bibilia e nehenehe ai e tauturu ia oe ia faaafaro i te mau fifi ma te here e te faatura.

1. A faataa i te hoê taime no te aparau no nia i te fifi.

“E tau to te mau mea atoa nei, . . . e taime to te mamû noa, e taime to te parau.” (Koheleta 3:1, 7) Ia au i te tatamaˈiraa i faahitihia aˈenei, e nehenehe te tahi mau fifi e faaara  i te mau huru aau puai. Ia tupu te reira, a haavî ia oe e a tâpû i te aparauraa no te hoê taime—no te “mamû noa”—hou a ura ˈi. E nehenehe oe e faaora i to orua taairaa i te ino rahi mai te peu e e pee oe i te aˈoraa bibilia: “E au te haamataraa o te hoê mârôraa i te hoê apoo i roto i te hoê haapahuraa pape, a faaea ïa i te mârô hou a tupu ai te tatamaˈiraa.”—Maseli 17:14, New Century Version.

Teie râ, e “taime [atoa] to te parau.” Ia ore e haapaohia, e rahi oioi te mau fifi, mai te zizania. No reira, eiaha e tâuˈa ore i te fifi, ma te tiaturi e e ore te reira i muri aˈe. Mai te peu e e ani oe ia faaea te aparauraa, a faaite i te faatura i to oe apiti ma te maiti i te hoê taime fatata i muri iho e paraparau ai orua no nia i te fifi. E nehenehe taua parau fafau ra e tauturu ia oe ia faaohipa i te manaˈo tumu o te aˈoraa bibilia: “Eiaha ia mairi te mahana i to outou ririraa.” (Ephesia 4:26) Parau mau, e titauhia ïa ia tapea oe i ta oe parau.

A TAMATA NA: A maiti i te hoê taime matauhia i te mau hebedoma atoa i reira orua e nehenehe ai e aparau no nia i te mau fifi utuafare. Ia ite oe e e riro ohie oe i te mârô i te tahi taime o te mahana—ei hiˈoraa, mai te peu e o oe te tae na mua i te fare ia oti te ohipa aore ra hou a tamaa ˈi—a faaau i te parau eiaha e aparau no nia i te mau fifi i taua taime ra. A maiti râ i te hoê taime e mea hau orua e piti atoa.

2. A faaite i to oe manaˈo ma te huna ore e te faatura.

“Ei parau mau ta te taata atoa ia parau atu i te tahi [aore ra to ˈna taata-tupu].” (Ephesia 4:25) Mai te peu e e mea faaipoipo oe, o to oe apiti to oe taata-tupu piri roa ˈˈe. No reira, a faaite maitai e ma te huna ore i to oe mau huru aau ia paraparau oe i to oe apiti. Te na ô ra Margareta, a faaipoipohia e 26 matahiti i te maoro, e: “Ei vahine faaipoipo apî, ua tiaturi au e e ite oioi ta ˈu tane i to ˈu huru aau ia tupu te hoê fifi. Ua haapii au e mea tano ore taua manaˈo ra. I teie nei, e tamata vau i te faaite i to ˈu mau manaˈo e huru aau ma te maramarama.”

A haamanaˈo i ta oe fa ia aparau oe i te hoê fifi, e ere ïa te upootiaraa i te hoê aroraa aore ra te haapauraa i te hoê enemi, tera râ te faaite-noa-raa ˈtu i to oe mau manaˈo i to oe apiti. Ia manuïa te reira, a parau eaha te fifi i to oe manaˈo, i muri iho afea te reira e tupu ai, e a faataa eaha to oe huru aau. Ei hiˈoraa, ia riri oe no te mea e mea hue to oe apiti, e nehenehe oe e parau ma te faatura e, ‘Ia hoˈi mai oe i te fare na te ohipa mai e ia vaiiho oe i to oe ahu i raro [afea e eaha te fifi], te manaˈo ra vau e aita ta ˈu mau tutavaraa no te atuatu i te fare e mauruuruhia ra [o te faataa maitai ra eaha to oe huru aau].’ E ma te faatano i te parau, a pûpû i te hoê ravea e matara ˈi te fifi i to oe manaˈo.

A TAMATA NA: Ia maramarama maitai to oe mau manaˈo i roto i to oe feruriraa hou oe a paraparau ai i to oe apiti, a papai i te fifi i to oe manaˈo e e nafea oe e hinaaro ai e faaafaro i te reira.

3. A faaroo e a farii i te mau huru aau o to oe apiti.

Ua papai te pǐpǐ Iakobo e mea maitai ‘ia ru te mau Kerisetiano i te faaroo, ia haere maine i te parau, ia haere maine i te riri.’ (Iakobo 1:19) Mea iti te mea e faatupu i te peapea rahi i roto i te hoê faaipoiporaa maori râ te oreraa to oe apiti e taa i to oe huru aau no nia i te hoê fifi. No reira, a faaoti papu i te ore e horoa ˈtu i taua huru manaˈo ra i to oe apiti!—Mataio 7:12.

Te na ô ra Wolfgang, faaipoipohia e 35 matahiti i te maoro e, “Ia aparau mâua i nia i te mau fifi, e ahoaho vau ia hiˈo vau e aita ta ˈu vahine e taa ra i to ˈu huru feruriraa.” Te faˈi ra Dianna, faaipoipohia e 20 matahiti i te maoro e, “E pinepine au i te amuamu i nia i ta ˈu tane e aita mau â o ˈna e faaroo ra ia ˈu ia aparau mâua no nia i te mau fifi.” E nafea oe e nehenehe ai e faaafaro i teie fifi?

Eiaha e na ô e ua ite oe eaha te manaˈo aore ra huru aau o to oe apiti. “Tei te teoteo anaˈe ra  e tupu ai te tamaˈi; area te feia i faaroo i te aˈo ra te reira te paari,” ia au ïa i te Parau a te Atua. (Maseli 13:10) A faatura i to oe apiti ma te vaiiho ia ˈna ia faaite i to ˈna manaˈo ma te ore e tâpû i ta ˈna parau. Ia oti, ia papu ia oe e ua taa ia oe ta ˈna i parau, a faataa i to oe apiti i ta ˈna i parau i to oe manaˈo, eiaha ma te tâhitohito aore ra ma te riri. A faatia i to oe apiti ia faaafaro ia oe ia hape ta oe taaraa i tei parauhia. Eiaha o oe noa te paraparau. O te tahi i muri aˈe i te tahi te paraparau mai tei faataahia i nia nei e tae noa ˈtu i te taime e farii ai orua e te taa ra ia orua te mau manaˈo e huru aau o te tahi e te tahi no nia i te fifi.

Parau mau, e titauhia te haehaa e te faaoromai no te faaroo maite i to oe apiti e no te farii i to ˈna manaˈo. Ia imi râ oe na mua i te faaite i taua tura ra i to oe apiti, e na reira atoa ˈtu ïa to oe apiti.—Mataio 7:2; Roma 12:10.

A TAMATA NA: Ia faahiti faahou oe i te mau parau a to oe apiti, eiaha e faahiti noa i te mau taˈo iho â ta ˈna i parau. Ma te hamani maitai, a tamata i te faataa eaha ta oe i taa i roto i te parau e te huru aau o to oe apiti.—Petero 1, 3:8.

4. A faaau i te hoê ravea.

“E maitai te taata toopiti i te taata hoê; no te mea e utua maitai ta raua i ta raua ohipa. Ia hiˈa hoi te tahi ra, na te hoa e rave e faatia i nia.” (Koheleta 4:9, 10) E nehenehe te tahi mau fifi i roto i te hoê faaipoiporaa e faaafarohia mai te peu e e haa amui e e turu na hoa faaipoipo te tahi i te tahi.

Parau mau, ua faatoroa Iehova i te tane faaipoipo ei upoo o te utuafare. (Korinetia 1, 11:3; Ephesia 5:23) E ere râ te tiaraa upoo i te faatereraa haavî. Eita te hoê tane paari e rave o ˈna anaˈe i te mau faaotiraa. Te na ô ra David, faaipoipohia e 20 matahiti i te maoro e, “E tamata vau i te ite i te hoê mea e tu ai to mâua ta ˈu vahine manaˈo e i te imi i te hoê faaotiraa ta mâua e piti atoa e turu.” Te parau ra Tanya, faaipoipohia e hitu matahiti i te maoro e: “E ere o vai tei tano e o vai tei hape. I te tahi taime, mea taa ê te mau manaˈo e nafea ia faaafaro i te hoê fifi. Ua ite au e te ravea faufaa roa no te manuïa, ia faaau ohie ïa e ia au noa.”

A TAMATA NA: A faatupu i te huru feruriraa haa amui ma te papai orua e piti atoa i te ravea taa ê e rave rahi e afaro ai te fifi i to orua manaˈo. Mai te peu e aita e manaˈo faahou, a hiˈo faahou i ta orua tapura e a faaohipa i te ravea ta orua e piti atoa e maiti. Ia oti a faataa i te hoê taime fatata i muri iho e hiˈo ai orua e ua peehia anei te faaotiraa e ua manuïa anei.

Ua faaau Iesu i te faaipoiporaa i te hoê taatiraa, aore ra zugo. (Mataio 19:6) I to ˈna ra tau, e tâpû raau te hoê zugo o te taati e piti animara no te rave i te tahi ohipa. Ia ore na animara e ohipa amui, aita ïa e ohipa maitai e oti e e uiui te zugo i to raua afii. Ia ohipa amui râ raua, e maraa ia raua ia huti i te mau mea teiaha aore ra e arote i te hoê faaapu.

Oia atoa, e nehenehe te zugo o te faaipoiporaa e uiui i te hoê tane e ta ˈna vahine o te ore e ohipa amui. Ia haapii râ raua i te huti amui, e tia ia raua ia faaafaro fatata i te mau huru fifi atoa e ia faatupu rahi i te maitai. Te haapoto ra te hoê tane faaipoipo oaoa o Kalala te iˈoa mai teie e, “E 25 matahiti i te maoro, ua faaafaro mâua ta ˈu vahine i to mâua mau fifi ma te paraparau noa ˈtu, ma te taa i te huru aau o te tahi atu, ma te pure ia Iehova ia tauturu mai, e ma te faaohipa i te mau faaueraa tumu bibilia.” E nehenehe anei oe e na reira atoa?