Pororaa i tera i tera fare—eaha mea faufaa ˈi i teie nei?

“Aore e mahana tuua ia ratou i te [faaite], e te haapii atu i te taata, e o Iesu â te Mesia, i roto i te hiero, e i tera fare, i tera fare.”—OHI. 5:42; MN.

1, 2. (a) Ua matauhia te mau Ite no Iehova no teihea ravea pororaa? (b) Eaha ta tatou e hiˈopoa i roto i teie tumu parau?

 MEA matauhia te reira fatata i te mau nunaa atoa i te fenua nei. E haere mai e piti taata mea faanehenehe maitai i te hoê fare e e tutava raua i te faaite i te fatu fare i te hoê poroi bibilia poto no nia i te Basileia o te Atua. Ia anaanatae oia i te poroi, e faaite raua i te mau papai bibilia, a pûpû atu ai i te hoê haapiiraa bibilia tamoni ore i ǒ ˈna. E e na reira raua i to muri iho fare. Mai te peu e te apiti ra oe i teie ohipa, te ite ra paha oe e e pinepine te taata i te taa e e Ite no Iehova oe hou oe e paraparau ai. Oia mau, ua riro te pororaa i tera i tera fare ei tapao haapapuraa no tatou.

² Te faaohipa ra tatou e rave rau ravea no te faatupu i ta Iesu faaueraa e poro e e faariro i te taata ei pǐpǐ. (Mat. 28:19, 20) Te poro ra tatou i te matete, i te mau poro aroâ, e i te tahi atu mau vahi taata. (Ohi. 17:17) Te niuniu ra tatou i te taata e rave rahi e te papai ra i te rata. Te faaite ra tatou i te pue parau mau bibilia i te feia ta tatou e farerei i te roaraa o ta tatou mau ohipa o te mau mahana atoa. E afata poroi Web atoa ta tatou o te horoa i te haamaramaramaraa bibilia na roto e 300 tiahapa reo. * E faahopearaa maitai ta teie mau ravea atoa e faatupu mai. I te rahiraa râ o te mau fenua, ta tatou ravea matamua no te haaparare i te parau apî maitai, o te pororaa ïa i tera i tera fare. Eaha te niu o teie ravea pororaa? Mea nafea te reira i te faaohiparaahia ma te aano atu â e te nunaa o te Atua i teie tau? E eaha mea faufaa ˈi i teie nei?

Ravea a te mau aposetolo

3. Eaha ta Iesu i faaue i te mau aposetolo no nia i te pororaa, e eaha ta te reira e faaite ra no nia i ta ratou huru pororaa?

³ Ua niuhia te ravea pororaa i tera i tera fare i nia i te Bibilia. Ia Iesu i tono i te mau aposetolo e poro, ua faaue oia ia ratou: “E te oire e te oire iti ta outou e tomo ra, e ui atu i to reira taata au.” Mea nafea to ratou imiraa i te taata e au? Ua parau Iesu ia ratou e haere i te fare o te taata, ma te na ô: “Ia tomo atu outou i roto i te fare, a faaora ˈtu i taua fetii ra. E te au ra taua fetii ra, o te ora ta outou i hinaaro no ratou ra, e tae ïa i nia ia ratou.” Ua haere anei ratou e farerei ma te ore e titauhia? A tapao na i ta Iesu i parau â: “O te ore e ite mai ia outou, e aore e haapao i ta outou parau, ia haere ê outou i taua fare ra e i taua oire ra, e ueue atu i te repo o to outou avae.” (Mat. 10:11-14) Te haamaramarama ra teie mau faaueraa e i to te mau aposetolo ‘haereraa na roto i te mau oire rii i te poro haerea i te parau [apî] maitai,’ ua titauhia ia rave ratou i te taahiraa no te haere e farerei i te taata i ǒ ratou.—Luka 9:6; MN.

4. Ihea te faahiti-maitai-raahia te pororaa i tera i tera fare i roto i te Bibilia?

⁴ Te faahiti maitai ra te Bibilia e ua poro te mau aposetolo i tera i tera fare. Ei hiˈoraa, te na ô ra te Ohipa 5:42 (MN) no ratou: “Aore e mahana tuua ia ratou i te [faaite], e te haapii atu i te taata, e o Iesu â te Mesia, i roto i te hiero, e i tera fare, i tera fare.” Fatata e 20 matahiti i muri aˈe, ua haamanaˈo te aposetolo Paulo  i te mau matahiapo o te amuiraa i Ephesia: “Aore roa aˈenei e mea e maitai ai outou na i vaiihohia e au; aita aˈenei i tuutuu i te [faaite] atu ia outou, e te haapii ia outou, i te vahi taata, e i tera fare, i tera fare.” Ua haere anei Paulo e farerei i tera mau matahiapo hou to ratou riroraa mai ei Kerisetiano? Oia iho â, no te mea i rotopu i te tahi atu mau mea, ua haapii oia ia ratou no nia i “te tatarahapa i te Atua, e te faaroo i to tatou Fatu ia Iesu.” (Ohi. 20:20, 21; MN) No nia i te Ohipa 20:20, te na ô ra te hoê buka (Word Pictures in the New Testament) a Robertson: “E mea anaanatae ia tapao e ua poro teie taata poro rahi roa ˈˈe o te mau taata poro i tera i tera fare.”

Te hoê nuu vivi o teie tau

5. Mea nafea te faataaraahia te pororaa i roto i ta Ioela parau tohu?

⁵ E faaiteraa atea noa te pororaa o te senekele matamua o te hoê ohipa rahi aˈe e ravehia i to tatou tau. Ua faaau te peropheta Ioela i te pororaa a te mau Kerisetiano faatavaihia i te hoê ati faaino a te mau manumanu, oia atoa te mau vivi. (Ioe. 1:4) Mai te hoê nuu e haere ra i mua, e faaû te mau vivi i te mau fifi, e tomo i roto i te mau fare, e e amu i te mau mea atoa i nia i to ratou eˈa. (A taio i te Ioela 2:2, 7-9.) Auê ïa faataaraa oraora o te raveraa te nunaa o te Atua ma te tuutuu ore e te hope roa i te pororaa i teie tau! Te ravea faufaa roa ˈˈe e faaohipahia ra e te mau Kerisetiano faatavaihia e to ratou mau hoa o te “mamoe ê atu” ei faatupuraa i te hohoˈa tohu, o te pororaa ïa i tera i tera fare. (Ioa. 10:16) Mea nafea tatou, te mau Ite no Iehova, i te peeraa i teie ravea pororaa a te mau aposetolo?

6. I 1922, eaha te faaitoitoraa i horoahia no te poro i tera i tera fare, ua aha râ vetahi?

⁶ Mai 1919 mai â, ua haamataratarahia te hopoia a te Kerisetiano taitahi e apiti roa ˈtu â i te pororaa. Ei hiˈoraa, ua haamanaˈo te hoê tumu parau “Mea faufaa roa te taviniraa” i roto i Te Pare Tiairaa o te 15 no Atete 1922 (Beretane), i te mau Kerisetiano faatavaihia i te faufaaraa ia “taˈitaˈi rahi i te poroi neneihia i te taata e ia paraparau ia ratou i to ratou uputa, ia horoa i te faaiteraa e ua fatata mai te basileia o te raˈi.” Ua horoahia te mau faaiteraa tatara-huˈahuˈa-hia i roto i te Bulletin (Ta tatou taviniraa i te Basileia i teie nei). Teie râ, mea iti te numera o te feia i poro iho â i tera i tera fare i te omuaraa. Aita vetahi i na reira. Ua faahiti ratou e rave rahi otoheraa, te fifi tumu râ, ua manaˈo ïa vetahi e te faahaehaa ra te pororaa i tera i tera fare ia ratou. A haafaufaa-noa-hia ˈi te pororaa, ua faaea riirii e rave rahi o teie mau taata i te apiti mai i te faanahonahoraa a Iehova.

7. I te mau matahiti 1950, ua ite-papu-hia teihea hinaaro?

⁷ I te mau ahuru matahiti i muri mai, ua rahi roa te taata i apiti i te pororaa. Ua ite-papu-hia râ e ua hinaarohia te faaineineraa hau ia poro i tera i tera fare. A hiˈo na i te tupuraa i te mau Hau amui no Marite. I te omuaraa o te mau matahiti 1950, ua taotia e 28 % o te mau Ite o tera fenua i ta ratou pororaa i te opereraa i te mau api parau aore ra i te tiaraa i te mau aroâ e te mau vea. Ua hau atu i te 40 % aita e poro tamau ra, ma te vaiiho ia mairi te mau avaˈe ma te ore e poro aˈe. Eaha te nehenehe e ravehia no te tauturu i te mau Kerisetiano pûpûhia atoa ia poro i tera i tera fare?

8, 9. Eaha te porotarama faaineineraa i haamauhia i 1953, e eaha te mau faahopearaa?

⁸ I te hoê tairururaa nunaa rau i tupu i New York i 1953, ua huti-taa-ê-hia te ara-maite-raa i nia i te pororaa i tera i tera fare. Ua parau Taeae Nathan Knorr e te ohipa matamua a te mau tiaau Kerisetiano atoa, o te tautururaa ïa i te mau Ite atoa ia riro ei taata poro tamau i tera i tera fare e tia ˈi. “E mea maitai,” ta ˈna ïa i parau, “ia poro te taata taitahi i te parau apî maitai i tera i tera fare.” Ua haamauhia te hoê porotarama faaineineraa e ati aˈe te ao ia naea tera fa. Ua faaineinehia te feia aita i poro atura i tera i tera fare ia paraparau i te taata i to ratou  uputa, ia haaferuri ia ratou i nia i te Bibilia, e ia pahono i ta ratou mau uiraa.

⁹ Mea faahiahia te mau faahopearaa o tera porotarama faaineineraa. I roto hoê ahuru matahiti, ua maraa te numera o te mau taata poro na te ao atoa nei i nia i te faito 100 %, 126 % no te mau farerei-faahou-raa e 150 % no te mau haapiiraa bibilia. I teie mahana, ua fatata e hitu mirioni taata poro i te Basileia e poro nei i te parau apî maitai na te ao atoa nei. E haapapuraa teie maraaraa faahiahia i ta Iehova haamaitairaa i te mau tutavaraa a to ˈna nunaa i te pororaa i tera i tera fare.—Isa. 60:22.

Tapaoraa i te taata no te faaoraraa

10, 11. (a) Eaha te orama i horoahia ia Ezekiela i papaihia i roto i te Ezekiela pene 9? (b) Mea nafea te tupuraa tera orama i to tatou tau?

¹⁰ Te itehia ra te faufaaraa o te pororaa i tera i tera fare i roto i te hoê orama i horoahia i te peropheta Ezekiela. I roto i tera orama, te ite ra Ezekiela e ono taata e mauhaa i to ratou rima, e oia atoa te hitu o te taata e vavai te ahu ma te hoê farii inita a te taata papai parau i te aoao ra. Te parauhia ra i te hitu o te taata e ‘haere na rotopu i te oire e e tuu i te tapao i nia i te rae o te mau taata i autâ noa e i pii hua i te mau parau faufau atoa i ravehia i roto ra.’ I muri iho i tera ohipa tapaoraa, te faauehia ra na taata tooono e mauhaa taparahi ia haapohe i te feia atoa aita i tapaohia.—A taio i te Ezekiela 9:1-6.

¹¹ Te taa ra ia tatou e i roto i te tupuraa o teie parau tohu, te faahohoˈa ra te taata “e vavai te ahu” i te toea o te mau Kerisetiano faatavaihia i te varua. Na roto i te pororaa e te faariroraa i te taata ei pǐpǐ, te tuu ra te pǔpǔ faatavaihia i te hoê tapao taipe i nia i te feia e riro mai ei melo o te “mamoe â atu” a te Mesia. (Ioa. 10:16) Eaha te tapao? E haapapuraa ïa, mai te huru ra e ua faaitehia i nia i to ratou rae i tapoi-ore-hia, e e mamoe pûpûhia, bapetizohia ei pǐpǐ a Iesu Mesia ratou e ua ahu ratou i te huru taata apî e au i te Mesia. (Eph. 4:20-24, MN) E riro mai teie mau taata e au i te mamoe ei hoê nǎnǎ e te mau Kerisetiano faatavaihia e e paturu ia ratou i roto i ta ratou ohipa faufaa roa o te tapao-noa-raa ia vetahi ê.—Apo. 22:17.

12. E nafea ta Ezekiela orama o te tapaoraa i te rae e haamahitihiti ai i te faufaaraa ia imi noa tatou i te taata e au i te mamoe?

 ¹² Te haamahitihiti ra ta Ezekiela orama hoê tumu e ru roa ˈi tatou i te imi noa i te taata ‘e autâ nei e e pii hua nei.’ E fifihia te ora o te taata. Ua fatata te mau puai haamou a Iehova i te raˈi, i faahohoˈahia e na taata tooono e mauhaa taparahi ta ratou, i te haapohe i te feia aita to ratou e tapao taipe. No te haavaraa e fatata maira, ua papai te aposetolo Paulo e ‘e tuu mai’ te Fatu ra o Iesu, ma te apeehia e ‘tana mau melahi mana, i te pohe i te feia aore i ite i te Atua, e tei ore i faaroo i te evanelia o to tatou Fatu o Iesu.’ (Tes. 2, 1:7, 8) A tapao na e e haavahia te taata ia au i to ratou huru i mua i te parau apî maitai. No reira, e mea tia ia tamau noa iho â te pororaa i te poroi a te Atua e tae atu i te hopea. (Apo. 14:6, 7) E hopoia teimaha mau teie no te taatoaraa o te mau tavini pûpûhia a Iehova.—A taio i te Ezekiela 3:17-19.

13. (a) Ua manaˈo te aposetolo Paulo i teihea hopoia, e no te aha? (b) Eaha ta oe hopoia i te taata o ta oe tuhaa fenua?

¹³ Ua manaˈo te aposetolo Paulo e e hopoia na te taata taitahi ia tufa i te parau apî maitai ia vetahi ê. Ua papai oia: “E amutarahu vau na te Heleni, e na te taata ěê; na te feia paari, e na te ite ore. E teie nei, ua tia roa ia ˈu i te parau atu i te evanelia ia outou atoa i Roma na, e hope noa ˈtu to ˈu nei puai.” (Roma 1:14, 15) No to ˈna mauruuru no te aroha i faaitehia ia ˈna, ua turaihia Paulo ia tutava i te tauturu ia vetahi ê ia fanaˈo i te aroha o te Atua mai ia ˈna i fanaˈo i te reira. (Tim. 1, 1:12-16) Mai te huru ra e ua tarahu oia i te taata taitahi ta ˈna i farerei, te hoê tarahu o te tia ia aufauhia maoti noa te tufaraa i te parau apî maitai i tera taata. Te manaˈo ra anei oe e e tarahu ta oe i te taata o ta oe tuhaa fenua?—A taio i te Ohipa 20:26, 27.

14. Eaha ta tatou tumu faufaa roa ˈˈe e poro ai tatou i mua i te taata e i tera i tera fare?

¹⁴ Noa ˈtu e mea faufaa ia faaora i te taata, te vai ra te hoê tumu rahi roa e poro ai tatou i tera i tera fare. I roto i te parau tohu i papaihia i roto i te Malaki 1:11, te na ô ra Iehova: “E rahi . . . to ˈu nei iˈoa i te mau fenua nei, mai te hitiraa mai o te mahana, e tae noa ˈtu i to ˈna mairiraa; e hopoihia mai . . . te tusia maitai ra e rahi hoi to ˈu nei iˈoa i te mau fenua ra.” Ei faatupuraa i teie parau tohu, te arue nei te mau tavini pûpûhia a Iehova i to ˈna iˈoa i mua i te taata na te ao atoa nei a rave haehaa ˈi ratou i ta ratou taviniraa. (Sal. 109:30; Mat. 24:14) O te pûpûraa i ‘te tusia haamaitai’ ia Iehova ta tatou tumu faufaa roa ˈˈe e poro ai tatou i mua i te taata e i tera i tera fare.—Heb. 13:15.

Tupuraa faufaa roa i mua nei

15. (a) Mea nafea te mau Iseraela i te haapuairaa i ta ratou ohipa a haaati ai ratou ia Ieriko i te hitu o te mahana? (b) Eaha ta te reira e haapapu ra no nia i te pororaa?

¹⁵ Eaha te mau tupuraa e tiai mai ra râ i te pororaa? Te horoa ra te haaatiraahia o Ieriko, i papaihia i roto i te buka a Iosua, i te hoê faahohoˈaraa. A haamanaˈo na e na mua noa ˈˈe te Atua i haamou ai ia Ieriko, ua faauehia te mau Iseraela ia haaati i te oire hoê aˈe taime i roto e ono mahana i te maoro. I te hitu râ o te mahana, e tapaohia ïa te hoê haapuairaa i roto i ta ratou ohipa. Ua parau Iehova ia Iosua: “Ia hitu . . . haaatiraa i taua oire ra, a faaoto ai te feia tahuˈa i taua mau pu ra. E ia haamaoro ratou i te aho i taua mau pu iubili ra, . . . ei reira te taata atoa e umere ai ei umere rahi; ei reira te aua o te oire e mairi ai i raro.” (Ios. 6:2-5) E nehenehe e itehia i te hoê â haapuairaa o ta tatou pororaa. Aita e feaaraa, i te tau o te haamouraa o teie faanahoraa o te mau mea, e ite tatou i te faaiteraa  rahi roa ˈˈe o te iˈoa o te Atua e te Basileia i roto i te tuatapaparaa o teie ao.

16, 17. (a) Eaha te ravehia hou “te ati rahi” e hope ai? (b) Eaha ta tatou e hiˈopoa i roto i to muri nei tumu parau?

¹⁶ E tae atoa mai ïa te taime e riro ai te poroi ta tatou faaite ra “ei umere rahi.” I roto i te buka Apokalupo, ua faahohoˈahia te mau poroi haavaraa puai i ‘te ûa paari rahi e au te topata hoê i te taleni i te teiaha.’ * E te na ô ra te Apokalupo 16:21: “E pohe rahi roa . . . taua pohe ra.” Aita tatou i ite atura eaha te tuhaa a te pororaa i tera i tera fare i roto i te faaite-haere-raa i tera mau poroi haavaraa hopea a te Atua. E nehenehe râ tatou e papu e hou “te ati rahi” e hope ai, e faaitehia te iˈoa o Iehova mai tei ore i itehia aˈenei i roto i te tuatapaparaa o te taata.—Apo. 7:14; Ezek. 38:23.

¹⁷ A tiai ai tatou i te mau tupuraa faufaa roa i mua nei, ia tamau ïa tatou i te faaite ma te itoito rahi i te parau apî maitai o te Basileia. Ma te amo i tera hopoia, eaha te mau fifi ta tatou e faaû ia poro i tera i tera fare, e nafea tatou e faaruru ai i te reira? E hiˈopoahia teie na uiraa e piti i roto i to muri nei tumu parau.

[Nota i raro i te api]

Eaha ta outou e pahono?

• Eaha te niu bibilia o te pororaa i tera i tera fare?

• Mea nafea te haamataratararaahia te pororaa i tera i tera fare i to tatou tau?

• No te aha e hopoia ˈi na te mau tavini pûpûhia a Iehova ia poro?

• Eaha to mua nei mau tupuraa faufaa roa?

[Uiraa haapiiraa]

[Hohoˈa i te api 15]

Mai te aposetolo Paulo, te manaˈo ra anei oe e e hopoia na oe ia poro ia vetahi ê?

[Hohoˈa i te api 16]

Taeae Knorr, 1953