A tapea i te taiva ore ma te aau rotahi
A tapea i te taiva ore ma te aau rotahi
“E haapao vau i ta oe ra parau mau: ia rotahi maite hoi tau aau i te mǎtaˈuraa i to iˈoa na.”—SAL. 86:11.
1, 2. (a) Ia au i te Salamo 86:2, 11, eaha te tauturu mai ia faaea taiva ore noa ia Iehova i mua i te mau tamataraa aore ra faahemaraa? (b) I teihea taime e mea tia ˈi ia atuatuhia te taiva ore ma te aau atoa?
NO TE aha te tahi mau Kerisetiano o te faaea taiva ore noa e rave rahi matahiti i te maoro noa ˈtu te tapearaa aore ra te hamani-ino-raa, e hema ˈi i muri aˈe i te nounou taoˈa? Ua taaihia te pahonoraa i to tatou aau—to tatou huru mau i roto. Te faatuati ra te Salamo 86 i te taiva ore i te aau rotahi, oia hoi te hoê aau taatoa, te hoê i ore i feaapiti. “E faaora hoi oe i tau [nephe, no to ˈu taiva ore],” ta te fatu salamo Davida ïa i pure. “Ia ora, e tau Atua, to tavini e tiaturi ia oe nei.” Ua pure atoa Davida: “E haapii mai oe, e Iehova, i to oe ra eˈa, e haapao vau i ta oe ra parau mau: ia rotahi maite hoi tau aau i te mǎtaˈuraa i to iˈoa na.”—Sal. 86:2, 11; MN.
2 Ia ore tatou e tiaturi ia Iehova ma to tatou aau atoa, e haafifi te tahi atu mau tapitapi e taairaa i to tatou taiva ore i te Atua mau. E au te mau hinaaro miimii i te mau ofai paaina i hunahia i raro aˈe i te purumu ta tatou e haere ra. Noa ˈtu e ua faaea taiva ore noa paha tatou ia Iehova i roto i te mau tupuraa fifi roa, e nehenehe tatou e hema i teie mau marei a Satani. Mea faufaa roa ïa ia atuatu tatou i te taiva ore ma to tatou aau atoa ia Iehova i teie nei hou tatou e roohia ˈi i te mau tamataraa aore ra faahemaraa! Te parau ra te Bibilia: “[Hau atu i te mau mea ê atoa e mea tia ia tiaihia,] e faaitoito i te tiai i to aau na.” (Mas. 4:23; MN) E nehenehe tatou e huti i te mau haapiiraa faufaa i roto i teie tuhaa na roto i te tupuraa o te hoê peropheta no Iuda o tei tonohia e Iehova ia Ieroboama ra, te arii o Iseraela.
‘E faataoˈa ˈtu vau ia oe’
3. Eaha to Ieroboama huru i mua i te poroi haavaraa i faaitehia e te peropheta a te Atua?
3 A faahohoˈa na i te tupuraa. No faaite noa ˈtura te taata o te Atua i te hoê poroi puai i te arii Ieroboama, o tei haamau i te haamoriraa kafa i roto i te basileia apatoerau o na opu hoê ahuru o Iseraela. E riri roa te arii. E faaue oia i to ˈna mau taata ia haru i te vea. Tei pihai iho râ Iehova i ta ˈna tavini. Etaeta ˈtura te rima ta te arii i faatoro no to ˈna riri, e maoˈi semeio aˈera, e haea ihora te fata i faaohipahia no te haamoriraa hape. E taui taue te huru o Ieroboama. E taparu oia i te taata o Atua: “E parau maitai atu na oe i to Atua ra ia Iehova, e pure oe ia ˈu, ia faaorahia tau rima nei.” E pure te peropheta, e e faaorahia te rima o te arii.—Arii 1, 13:1-6.
4. (a) No te aha e tamataraa mau ai te pûpûraa a te arii i te taiva ore o te peropheta? (b) Eaha te pahonoraa a te peropheta?
4 I muri iho, e parau Ieroboama i te taata o te Atua mau: “Mai haere atoa i tau fare aˈera, e amu i te [maa], e faataoˈa ˈtu hoi au ia oe.” (Arii 1, 13:7; MN) Eaha ta te peropheta e rave i teie nei? E mea tia anei ia farii oia i te farii maitai a te arii i muri aˈe i te faaiteraa ia ˈna i te poroi faautuaraa? (Sal. 119:113) Aore ra e mea tia anei ia patoi oia i te titau-manihini-raa a te arii, noa ˈtu e te tatarahapa ra oia ia hiˈohia? Mea papu maitai, e ravea ta Ieroboama no te pûpû i te mau taoˈa moni rahi no to ˈna mau hoa. Ahiri te peropheta a te Atua i atuatu omoe i te hinaaro i te mau taoˈa materia, e riro paha ïa te pûpûraa a te arii ei faahemaraa rahi. Ua aˈo râ Iehova i te peropheta: “Eiaha e amu i te maa, eiaha e inu i te pape, eiaha e hoˈi na te eˈa i haerehia e oe ra.” E pahono papu maitai ïa te peropheta: “Horoa noa mai oe i te tahi pae i te fare no oe, e ore au e tae atu i roto, e ore hoi au e amu i te maa, e ore e inu i te pape i teie nei vahi.” E e faarue te peropheta ia Betela na te tahi eˈa ê atu. (Arii 1, 13:8-10) Te haapii maira te faaotiraa a te peropheta i te aha no nia i te taiva ore ma te aau atoa?—Roma 15:4.
“Ia mauruuru tatou”
5. E nafea te nounou taoˈa e riro ai ei tamataraa o to tatou taiva ore?
5 Eita paha te nounou taoˈa e riro ei tamataraa o te taiva ore ia hiˈohia, oia râ. Te tiaturi ra anei tatou i ta Iehova parau fafau e horoa i ta tatou e hinaaro mau ra? (Mat. 6:33; Heb. 13:5) E nehenehe anei tatou e ora aita anaˈe te tahi mau taoˈa materia “maitai aˈe” i roto i te oraraa mai te peu e eita te reira e noaa ia tatou i teie nei? (A taio i te Philipi 4:11-13. *) Ua hema anei tatou i te haapaeraa i te mau fanaˈoraa taa ê teotaratia ia noaa ta tatou e hinaaro ra i teie nei? Tei te parahiraa matamua anei te taviniraa taiva ore ia Iehova i roto i to tatou oraraa? Ua taai-rahi-hia ta tatou mau pahonoraa e mea taatoa anei to tatou aau i roto i ta tatou taviniraa i te Atua aore ra aita. “Area te paieti e te mauruuru ra,” ta te aposetolo Paulo i papai, “o te taoˈa rahi mau ïa. Aita roa hoi a tatou e taoˈa i hopoi mai i teie nei ao; e ua itea-papu-hia hoi e aita roa e taoˈa e tia ia hopoi atoa ia haere ê tatou ra. E teie nei, e maa ta tatou, e te ahu, ia mauruuru tatou i te reira.”—Tim. 1, 6:6-8.
6. Eaha te mau “taoˈa” e pûpûhia mai paha, e eaha te tauturu mai ia faaoti e farii anei i te reira?
6 Ei hiˈoraa, e pûpû mai paha ta tatou paoti ohipa i te parahiraa teitei aˈe ma te moni maitai aˈe e te tahi atu mau fanaˈoraa. Aore ra peneiaˈe te taa ra ia tatou e e nehenehe e noaa mai te mau haamaitairaa rahi aˈe i te pae moni ia tere tatou i te tahi atu fenua aore ra vahi no te imi i te ohipa. I te omuaraa, e au ra e e haamaitairaa teie mau ravea no ǒ mai ia Iehova ra. Hou râ tatou e rave ai i te hoê faaotiraa no nia i te reira, eiaha anei tatou e hiˈopoa i to tatou mau manaˈo turai? Te uiraa tumu ia feruri tatou e tia ˈi, “E nafea ta ˈu faaotiraa e ohipa ˈi i nia i to ˈu taairaa e Iehova?”
7. No te aha mea faufaa ˈi ia tinai i te mau hinaaro nounou taoˈa?
7 Te faaitoito ra ta Satani faanahoraa ma te tuutuu ore i te nounou taoˈa. (A taio i te Ioane 1, 2:15, 16.) Te fa a te Diabolo, o te haapiˈoraa ïa i to tatou aau. No reira, e mea tia ia ara tatou no te ite e te tinai i te mau hinaaro nounou taoˈa i to tatou aau. (Apo. 3:15-17) Aita Iesu i fifi aˈe no te patoi atu i ta Satani pûpûraa i te mau basileia atoa o te ao. (Mat. 4:8-10) Ua faaara oia: “E ara ia outou i te nounou taoˈa, rahi noa iho hoi ta te taata nei taoˈa, e ere hoi tei taua taoˈa na ˈna ra to ˈna ora.” (Luka 12:15) E tauturu te taiva ore ia tatou ia turui i nia ia Iehova eiaha râ i nia ia tatou iho.
‘Ua haavare te hoê peropheta tahito ia ˈna’
8. Mea nafea te tamataraahia te taiva ore o te peropheta a te Atua?
8 E maitai mai te mau mea i te peropheta a te Atua ahiri oia i tamau noa i to ˈna tere no te hoˈi atu i te fare. Teie râ, ua faaû oia i te tahi atu â tamataraa fatata i muri iho i taua taime ra. “Te parahi ra te hoê peropheta tahito i Betela,” ta te Bibilia ïa e faatia ra, “e ua haere maira te mau tamarii na ˈna, ua faaite maira” i te mau ohipa atoa i ravehia na mua ˈtu i tera mahana. I to ˈna faarooraa i te faatiaraa, e ani te taata ruhiruhia ia ratou ia tuu i te parahiraa na ˈna i nia i te asini ia noaa ia ˈna te peropheta a te Atua. Aita i maoro i muri aˈe, e itea ia ˈna te peropheta e parahi ra i raro aˈe i te hoê ale a na ô atu ai: “Mai haere i te utuafare, e amu i te maa.” I to te taata o te Atua mau oreraa e farii i te titau-manihini-raa, e pahono te taata ruhiruhia: “E peropheta atoa hoi au mai ia oe atoa na, e ua parauhia mai au e te hoê melahi i faauehia e Iehova, na ô maira, E faahoˈi mai oe ia ˈna i roto i to fare, ia amu oia i te maa, e ia inu i te pape.” Te faaite ra râ te mau Papai: “Ua haavare oia ia ˈna.”—Arii 1, 13:11-18.
9. Eaha ta te mau Papai e parau ra no nia i te feia haavare, e te haamauiui ra ratou ia vai ma?
9 Noa ˈtu eaha te mau manaˈo turai o te peropheta tahito, ua haavare oia. Peneiaˈe i riro na te taata ruhiruhia i te hoê taime ei peropheta haapao maitai a Iehova. I teie nei râ, te haavare ra oia. Te faahapa etaeta ra te mau Papai i tera haerea. (A taio i te Maseli 3:32.) Eita te feia haavare e haamauiui noa ia ratou iho i te pae varua e pinepine râ e haamauiui ia vetahi ê.
“Ua hoˈi atura oia raua” te taata ruhiruhia
10. Ua aha te peropheta a te Atua i mua i te titau-manihini-raa a te taata ruhiruhia, e eaha te faahopearaa?
10 E mea tia ia taa i te peropheta no Iuda te auraa mau o te ravea paari a te peropheta tahito. Ua tia ia ˈna ia uiui ia ˈna iho, ‘No te aha Iehova e tono ai i te hoê melahi i te tahi atu taata e te mau faaueraa apî na ˈu?’ Ua tia i te peropheta ia ui ia Iehova ia haamaramarama mai i te aratairaa, aita râ te mau Papai e haapapu ra e ua na reira iho â oia. Teie râ, “ua hoˈi atura oia raua [te taata ruhiruhia], e ua amu i te maa i roto i to ˈna fare, e ua inu hoi i te pape.” Aita Iehova i mauruuru. I to te peropheta i haavarehia hoˈiraa ˈtu i Iuda i te pae hopea, ua farerei maira te hoê liona ia ˈna e ua haapohe atura ia ˈna. E hopearaa riaria mau to to ˈna toroa peropheta!—Arii 1, 13:19-25. *
11. Eaha te hiˈoraa maitai ta Ahia i vaiiho?
11 I te tahi aˈe pae, ua faaea taiva ore noa te peropheta Ahia, o tei tonohia no te faatoroa ia Ieroboama ei arii e tae atu i to ˈna ruhiruhiaraa. Ia Ahia i ruhiruhia e i matapo, ua tono ihora Ieroboama i ta ˈna vahine no te aniani ia Ahia no nia i te huru o ta raua tamaiti maˈimaˈi. Ua tohu Ahia ma te mǎtaˈu ore e e pohe ta Ieroboama tamaiti. (Arii 1, 14:1-18) I rotopu i te haamaitairaa e rave rahi ta Ahia i fanaˈo, te vai ra ïa te fanaˈoraa taa ê e papai i te Parau faaurua a te Atua. Mea nafea? Ua faaohipahia ta ˈna mau papai i muri aˈe e Ezera te tahuˈa ei haamaramaramaraa.—Par. 2, 9:29.
12-14. (a) Eaha ta tatou e nehenehe e haapii i to te peropheta apî aˈe tupuraa? (b) A faahohoˈa i te faufaaraa ia haapao maitai e ia feruri i roto i te pure i te aˈoraa i niuhia i nia i te Bibilia e horoahia ra e te mau matahiapo.
12 Aita te Bibilia e faahiti ra i te tumu i ore ai te peropheta apî aˈe i ani ia Iehova hou a fariu ê ai i te tahi atu pae e a tamaa ˈi e a inu ai e te taata paari aˈe. Aita anei te taata paari aˈe i parau atu ia ˈna i ta ˈna i hinaaro e faaroo? Eaha ta tatou e haapii mai? E mea tia ia papu roa ia tatou te tanoraa o te mau titauraa a Iehova. E e mea tia ia faaoti papu tatou i te haapao i te reira, noa ˈtu eaha te tupu mai.
13 Te faaroo ra vetahi i ta ratou e hinaaro ra e faaroo ia aˈohia ratou. Ei hiˈoraa, e pûpûhia paha na te hoê taata poro i te hoê ohipa e haafifi i te taime ta ˈna e nehenehe e horoa no to ˈna utuafare e te mau ohipa teotaratia. E ani paha oia i te manaˈo o te hoê matahiapo. E haamata mai paha te matahiapo i ta ˈna mau parau na roto i te faaiteraa e aita to ˈna e tiaraa no te parau atu i te taeae e nafea ia turu i to ˈna utuafare. E e haamanaˈo faahou mai paha te matahiapo i te taeae i te mau fifi atâta i te pae varua ia farii i te ohipa e pûpûhia ra ia ˈna. E haamanaˈo anei te taeae i te mau parau matamua anaˈe a te matahiapo, aore ra e feruri maite anei oia i to muri iho? E mea tia ia hiˈo maitai mau te taeae eaha te mea maitai roa ˈˈe no ˈna i te pae varua.
14 A rave na i te tahi atu â tupuraa. E ani paha te hoê tuahine i te hoê matahiapo e mea tia anei ia faataa oia i ta ˈna tane tiaturi ore. E faataa iho â ïa te matahiapo e na ˈna iho e rave i te faaotiraa e faataa anei aore ra eita. I muri iho e haamanaˈo paha oia i te aˈoraa bibilia no nia i te tumu parau. (Kor. 1, 7:10-16) E feruri maite mau anei te tuahine i te parau a te matahiapo? Aore ra ua manaˈo aˈena oia e faarue i ta ˈna tane? Ei raveraa i ta ˈna faaotiraa, e haerea paari ia feruri oia i roto i te pure i te mau aˈoraa i niuhia i nia i te Bibilia.
Ia faahaihai te aau
15. Eaha ta tatou e haapii mai i te hape a te peropheta a te Atua?
15 Eaha ˈtu â ta tatou e haapii mai i te hape a te peropheta no Iuda? Te na ô ra te Maseli 3:5: “E tiaturi ia Iehova ma to aau atoa ra; eiaha râ e tiaturi i to oe ihora haapao.” I roto i teie tupuraa, ua tiaturi te peropheta no Iuda i to ˈna iho manaˈo aita râ oia i tamau noa i te turui i nia ia Iehova mai ta ˈna i na reira i mutaa iho. No to ˈna hapa, ua haapohehia oia e ua ere oia i to ˈna roo maitai i te Atua. Te haamataratara ra to ˈna tupuraa i te faufaaraa ia faahaihai te aau e ia tavini ma te taiva ore ia Iehova!
16, 17. Eaha te tauturu ia tatou ia faaea taiva ore noa ia Iehova?
16 E aratai hape te hinaaro miimii o to tatou aau ia tatou. “E haavare rahi to te aau i te mau mea atoa nei, e ua ino roa.” (Ier. 17:9) No te faaea taiva ore noa ia Iehova, e mea tia ia tamau tatou i te haa puai no te haapae i te huru taata tahito e to ˈna hinaaro e teoteo mai e e tiaturi ia ˈna iho. E e mea tia ia ahu tatou i te huru taata apî “o tei hamanihia ia au i te Atua ra, i te parau-tia e te maitai mau” aore ra taiva ore.—A taio i te Ephesia 4:22-24.
17 Te na ô ra te Maseli 11:2: “Tei te feia haehaa . . . te paari.” E tauturu mai te turuiraa ma te aau faahaihai i nia ia Iehova ia ore tatou e rave i te hapa ino mau. Ei hiˈoraa, e nehenehe te toaruaruraa e faahape ohie i ta tatou huru hiˈoraa. (Mas. 24:10) Ua rohirohi paha tatou i te apiti i te tahi tuhaa o te taviniraa moˈa e e haamata tatou i te manaˈo e ua navai tatou i te raveraa ehia matahiti i te maoro, a manaˈo ai e peneiaˈe e taime te reira no vetahi ê ia amo i te hopoia. Aore ra e hinaaro paha tatou e ora mai “tei matau-roa-hia.” Teie râ, e tiai te ‘faaitoito-hua-raa’ e te ‘rahiraa i te rave i te ohipa a te Fatu’ i to tatou aau.—Luka 13:24; Kor. 1, 15:58.
18. Eaha ta tatou e nehenehe e rave mai te peu e aita tatou i ite eaha te faaotiraa e rave?
18 I te tahi mau taime, e mea titauhia paha ia rave tatou i te mau faaotiraa fifi, e e ere râ paha i te mea papu te haerea tano e rave. E hinaaro anei ïa tatou e haa na roto i to tatou iho puai? I te mau taime atoa e faaû ai tatou i teie mau tupuraa, e haerea paari to tatou ia ani ia Iehova ia tauturu mai. Te na ô ra te Iakobo 1:5: “Te ere ra . . . te hoê o outou i te ite, e ani oia i te Atua ra, o tei horoa hua mai i te maitai i te taata atoa ra.” E horoa mai to tatou Metua i te raˈi i te varua moˈa ta tatou e hinaaro ia nehenehe tatou e rave i te mau faaotiraa maitatai.—A taio i te Luka 11:9, 13.
Ia faaoti papu tatou i te faaea taiva ore noa
19, 20. E mea tia ia faaoti papu tatou i te aha?
19 Ua tamata mau â te mau matahiti arepurepu i muri aˈe i to Solomona taivaraa i te haamoriraa mau i te taiva ore o te mau tavini a te Atua. E parau mau e mea rahi tei taiva na roto i tera aore ra tera tupuraa. Noa ˈtu râ, ua faaea taiva ore noa vetahi ia Iehova.
20 I te mahana taitahi, te rave ra tatou i te mau maitiraa e faaotiraa o te tamata i to tatou taiva ore. E nehenehe atoa tatou e haapapu e mea haapao maitai tatou iho. E faaea taiva ore noa anaˈe ïa ia Iehova a rotahi maite ai to tatou aau, a tiaturi hope ai tatou e e tamau oia i te haamaitai mai i to ˈna feia taiva ore.—Sam. 2, 22:26.
[Nota i raro i te api]
^ Philipi 4:13 (MN): “E tia ia ˈu te mau mea atoa nei ia ˈna, tei horoa mai i te puai.”
^ Aita te Bibilia e parau ra e na Iehova anei i haapohe i te peropheta tahito.
Eaha ta outou e pahono?
• No te aha e mea tia ˈi ia haa puai tatou no te tinai i te mau hinaaro nounou taoˈa i to tatou aau?
• Eaha te tauturu mai ia faaea taiva ore noa ia Iehova?
• E nafea te aau faahaihai e tauturu ai ia tatou ia faaea taiva ore noa i te Atua?
[Uiraa haapiiraa]
[Hohoˈa i te api 15]
Mea fifi anei no oe ia patoi i te mau faahemaraa?
[Hohoˈa i te api 16]
E feruri maite anei oe i roto i te pure i te aˈoraa i niuhia i nia i te Bibilia?