E faatura na anei oe?
E faatura na anei oe?
“I te faaturaraa ˈtu [na] te tahi i te tahi.”—ROMA 12:10; MN.
1. Eaha te peu matauhia aita e ite-faahou-hia ra i te tuhaa e rave rahi o te ao?
I TE tahi mau tuhaa o te ao nei, e peu na te mau tamarii ia faatura i te feia paari na roto i te tuturiraa ma te faatura ia amui ia ratou. Mea na ô ratou e ore ai e riro ei mea rahi aˈe i te feia paari aˈe. I roto i teie mau totaiete, e hiˈo-atoa-hia mai te hoê haerea faatura ore ia huri te hoê tamarii i to ˈna tua i te hoê taata paari. Noa ˈtu e te faaitehia ra te faatura na roto i te tahi ravea ê atu i roto i te mau taˈere rau, te haamanaˈo maira teie mau faaiteraa i te faatura i te Ture a Mose. Tei roto atoa te faaueraa ra: “E tia oe i nia i mua i te aro o te upoo teatea, e faatura oe i te taata tahito.” (Lev. 19:32) Te mea peapea, i te vahi e rave rahi, e ere i te mea matau-faahou-hia ia faatura ia vetahi ê. Inaha, o te faatura ore te itehia ra i te mau vahi atoa i teie mahana.
2. Te parau maira te Parau a te Atua e faatura ia vai?
2 Te haafaufaa roa ra te Parau a te Atua i te faatura. Te parau maira te reira ia haamaitai, aore ra ia faatura, ia Iehova e ia Iesu. (Ioa. 5:23) Te faaue-atoa-hia ra tatou ia faatura i te mau melo utuafare e hoa Kerisetiano oia atoa vetahi i rapaeau mai i te amuiraa. (Roma 12:10; Eph. 6:1, 2; Pet. 1, 2:17) Eaha te tahi mau ravea e faatura ˈi tatou ia Iehova? E nafea tatou e faatura ˈi, aore ra e faatura hohonu ai, i to tatou mau taeae e tuahine Kerisetiano? E hiˈopoa anaˈe i teie e i te tahi atu mau uiraa.
A faatura ia Iehova e i to ˈNa iˈoa
3. Eaha te hoê ravea faufaa no te faatura ia Iehova?
3 Te hoê ravea faufaa no te faatura ia Iehova, o te faaturaraa ïa ma te tia i to ˈna iˈoa. Inaha, ‘e taata tatou no to ˈna ra iˈoa.’ (Ohi. 15:14) E haamaitairaa taa ê mau ia amo i te iˈoa o te Atua puaihope ra o Iehova. Ua na ô te peropheta Mika: “E haere noa te mau taata ěê atoa ma te iˈoa anaˈe o to ˈna iho atua; e haere râ tatou ma te iˈoa o Iehova, o to tatou ïa Atua e a muri noa ˈtu.” (Mika 4:5) E ‘haere tatou ma te iˈoa o Iehova’ na roto i te tutavaraa i te ora i te mahana taitahi ma te faaite maitai i te iˈoa ta tatou e amo ra. Mai ta Paulo i haamanaˈo i te mau Kerisetiano i Roma, mai te peu e eita tatou e ora ia au i te parau apî maitai ta tatou e poro ra, e “faainohia,” e faatura-ore-hia te iˈoa o te Atua.—Roma 2:21-24.
4. Eaha to oe manaˈo i te fanaˈoraa taa ê e faaite ia Iehova?
4 E faatura atoa tatou ia Iehova na roto i ta tatou ohipa faaiteraa. I tahito ra, ua ani Iehova i te mau melo o te nunaa Iseraela ia riro ei ite no ˈna, aita râ ratou i haapao i taua ohipa ra. (Isa. 43:1-12) Ua orure hau pinepine ratou ia Iehova e “ua aa ˈtu i Tei Moˈa i Iseraela.” (Sal. 78:40, 41) I te pae hopea, ua ere roa ino te nunaa i te farii maitai a Iehova. I teie mahana râ, te mauruuru ra tatou no te fanaˈoraa taa ê e faaite ia Iehova e i to ˈna iˈoa. E na reira tatou no to tatou hoi here ia ˈna e no to tatou hinaaro ia faaraahia to ˈna iˈoa. E nafea tatou e nehenehe ai e ore e poro a ite ai tatou i te parau mau no nia i to tatou Metua i te raˈi e ta ˈna mau opuaraa? E tu to tatou manaˈo e to te aposetolo Paulo ia ˈna i parau: ‘Eita vau e tia ia ore; e ati hoi to ˈu ia ore au ia parau i te evanelia!’—Kor. 1, 9:16.
5. Mea nafea te tiaturiraa ia Iehova i faatuatihia ˈi e te faaturaraa ia ˈna?
5 Ua na ô te fatu salamo ra o Davida: “Te feia i ite i to oe ra iˈoa, e tiaturi ïa ia oe; o tei imi hoi ia oe ra, e Iehova, o tei ore roa ïa e faaruehia e oe ra.” (Sal. 9:10) Mai te peu e ua ite mau tatou ia Iehova e te faatura ra tatou i to ˈna iˈoa no ta te reira e faahohoˈa ra, e tiaturi ïa tatou ia ˈna mai ta ˈna mau tavini haapao maitai i tahito atoa. O te noaaraa teie tiaturi e faaroo ia Iehova te tahi atu â ravea no te faatura ia ˈna. A tapao na e nafea te Parau a te Atua e faatuati ai i te tiaturiraa ia Iehova e te faaturaraa ia ˈna. I to Iseraela i tahito oreraa i tiaturi ia ˈNa, ua ui Iehova ia Mose: “Afea râ teie nei feia e faaea ˈi i te faatiˈotiˈoo mai ia ˈu? afea hoi ratou e faaroo mai ai ia ˈu i te mau tapao ta ˈu i rave i roto ia ratou ra?” (Num. 14:11) E parau mau atoa i te tahi atu pae. Ma te tiaturi ia Iehova no te paruru e te turu ia tatou i roto atoa i te mau ati, te faaite ra tatou e te faatura ra tatou ia ˈna.
6. Eaha te turai ia tatou ia faatura ia Iehova?
6 Ua faaite Iesu e no roto roa mai taua faatura ia Iehova ra i te taata o roto e tia ˈi. Ma te paraparau i te feia haamoriraa haavarevare, ua faahiti Iesu i ta Iehova e parau nei: “Te faatura mai nei [teie nei feia] ia ˈu i to ratou utu; tei te atea ê râ to ratou aau ia ˈu.” (Mat. 15:8) No roto mai te faatura haavare ore i te hinaaro haavare ore ia ˈna. (Ioa. 1, 5:3) E e haamanaˈo atoa tatou i ta Iehova parau fafau: “O tei faatura mai ia ˈu ra o ta ˈu ïa e faatura ˈtu.”—Sam. 1, 2:30.
E faatura te mau tiaau ia vetahi ê
7. (a) No te aha e mea tia ˈi ia faatura te mau taeae e amo ra i te hopoia i te feia ta ratou e aratai ra? (b) Mea nafea to Paulo faaturaraa i te mau hoa Kerisetiano?
7 Ua aˈo te aposetolo Paulo i te mau hoa Kerisetiano: “I te faaturaraa ˈtu [na] te tahi i te tahi.” (Roma 12:10; MN) E mea tia ia horoa te feia e amo ra i te hopoia i roto i te amuiraa i te hiˈoraa i te faaturaraa—“na”—i te feia ta ratou e aratai ra. I roto i taua tuhaa ra, ia pee maite iho â te feia e hopoia teimaha ta ratou i te hiˈoraa ta Paulo i vaiiho e tia ˈi. (A taio i te Tesalonia 1, 2:7, 8.) Ua ite te mau taeae o te mau amuiraa ta Paulo i tere atu e aita roa ˈtu oia i ani ia ratou ia rave i ta ˈna iho i ore e hinaaro e rave. Ua faatura Paulo i te mau hoa Kerisetiano, e ei faahoˈiraa, ua noaa ia ˈna to ratou faatura. Ia Paulo i parau: “E teie nei, te aˈo aroha ˈtu nei au ia outou, e ei pee mai outou ia ˈu nei,” e nehenehe tatou e papu e ua pee atu e rave rahi ma te aau tae no to ˈna hiˈoraa maitai roa.—Kor. 1, 4:16.
8. (a) Eaha te hoê ravea faufaa roa i faatura ˈi Iesu i ta ˈna mau pǐpǐ? (b) E nafea te mau tiaau i teie mahana e pee ai i to Iesu hiˈoraa?
8 Te tahi atu â ravea e faatura ˈi te hoê taeae e amo ra i te hopoia i te feia ta ˈna e aratai ra, o te faaiteraa ïa i te mau tumu o ta ˈna mau aniraa aore ra o ta ˈna mau aratairaa. I te na ôraa, te pee ra oia ia Iesu. Ei hiˈoraa, i to ˈna parauraa i ta ˈna mau pǐpǐ ia pure ia tonohia e rave rahi rave ohipa i roto i te auhune, ua faaite oia ia ratou eaha te tumu. Teie ta ˈna i parau: “Te rahi mau nei te auhune, te iti nei râ te feia e rave: e teie nei, e pure outou i te Fatu o te ohipa ia tono â oia i te rave ohipa ei ooti.” (Mat. 9:37, 38) Oia atoa, ia ˈna i parau i ta ˈna mau pǐpǐ ia “ara,” ua horoa oia ia ratou i te tumu. Ua na ô oia: “Aore hoi outou i ite i te hora e tae mai ai to outou Fatu.” (Mat. 24:42) Ua faaite faahou Iesu i ta ˈna mau pǐpǐ eiaha noa te mea ia rave ratou e tia ˈi, no te aha atoa râ ia rave ratou e tia ˈi. Mea na ô to ˈna faaturaraa i ta ˈna mau pǐpǐ. Auê ïa hiˈoraa maitai roa no te mau tiaau Kerisetiano ia pee e!
A faatura i ta Iehova amuiraa e ta ˈna aratairaa
9. O vai atoa ta tatou e faatura ia faatura tatou i te amuiraa Kerisetiano na te ao atoa nei e to ˈna mau tia? A faataa.
9 No te faatura ia Iehova, ia faatura atoa ïa tatou i te amuiraa Kerisetiano na te ao atoa nei, e ta ˈna mau tia e tia ˈi. Ia haapao tatou i te aˈoraa bibilia a te pǔpǔ o te tavini haapao maitai, te faatura ra tatou i ta Iehova faanahoraa. I roto i te amuiraa Kerisetiano o te senekele matamua, ua ite te aposetolo Ioane e e mea titauhia ia faahapa i te feia o tei ore i faatura i te feia faatavaihia. (A taio i te Ioane 3, 9-11.) Te faaite ra ta Ioane mau parau e te vai ra te hoê ereraa i te faatura, eiaha noa i te mau tiaau iho, i ta ratou atoa râ haapiiraa e aratairaa. Auaa e ere mai tera te rahiraa o te mau Kerisetiano. A ora noa ˈi te mau aposetolo, ua faatura hohonu iho â te huitaeae taatoa i te mau tiaau.—Phil. 2:12.
10, 11. A faataa na ia au i te mau Papai i te tumu e tia ˈi ia vetahi ia fanaˈo i te hoê faito mana faatere i roto i te amuiraa Kerisetiano.
10 Ua feruri vetahi e i te mea e ua parau Iesu i ta ˈna mau pǐpǐ ‘e taeae anaˈe outou atoa,’ eita ïa e titauhia i te parahiraa mana i roto i te amuiraa Kerisetiano. (Mat. 23:8) I roto râ i te mau Papai Hebera e Heleni atoa, mea rahi roa te hiˈoraa o te mau taata i faaohipa i to ratou mana faatere ta te Atua i horoa ia ratou. Te haapapu rahi roa ra te tuatapaparaa o te mau patereareha, tavana, e arii i rotopu i te mau Hebera i tahito e te aratai ra Iehova na roto i te mau tia taata. Aita anaˈe te nunaa i faatura ma te tia i te mau taata faatoroahia, ua aˈohia ratou e Iehova.—Arii 2, 1:2-17; 2:19, 23, 24.
11 Hoê â huru, ua farii te mau Kerisetiano o te senekele matamua i te mana faatere a te mau aposetolo. (Ohi. 2:42) Ua aratai Paulo, ei hiˈoraa, i to ˈna mau taeae. (Kor. 1, 16:1; Tes. 1, 4:2) Noa ˈtu râ, ua auraro atoa oia ma te aau tae i te feia e mana to ratou i nia ia ˈna. (Ohi. 15:22; Gal. 2:9, 10) Oia mau, e hiˈoraa tia ta Paulo i te mana faatere i roto i te amuiraa Kerisetiano.
12. Eaha na tuhaa e piti o te haapiiraa no nia i te mana faatere ta tatou e nehenehe e haapii i te mau hiˈoraa bibilia ra?
12 E haapiiraa e piti tuhaa ta tatou e haapii. A tahi, e au i te mau Papai ia maiti “te tavini haapao maitai e te paari” na roto i to ˈna Tino aratai i te mau taata no te mau toroa hopoia, e ua faatavanahia vetahi mau taata no te faatere i te tahi atu mau taata i faatoroahia. (Mat. 24:45-47; Pet. 1, 5:1-3) A piti, e mea tia ia faatura tatou paatoa, oia atoa te mau taata i faatoroahia, i te feia atoa e mana faatere to ratou i nia ia tatou. Eaha ˈtura ïa vetahi mau ravea e au ia faaohipahia e nehenehe ai tatou e faatura i te feia e amo ra i te mau toroa hopoia o te tiaauraa i roto i te amuiraa Kerisetiano na te ao atoa nei?
Faaturaraa i te mau tiaau ratere
13. E nafea tatou e faatura ˈi i te mau tia o teie tau a te amuiraa Kerisetiano?
13 Ua na ô Paulo: “Te aˈo atu nei . . . matou ia outou, e te mau taeae, e ite atu outou i te feia i rave i te ohipa i roto ia outou na, o te mau faaite i nia iho ia outou i te Fatu nei, o tei aˈo atu hoi ia outou; e ia rahi roa te faatur[a] ia ratou ma te aroha, no ta ratou ra ohipa. E ei hau hoi to roto ia outou iho.” (Tes. 1, 5:12, 13) Tei rotopu iho â te mau tiaau ratere i ‘te feia e rave [puai] nei i te ohipa.’ No reira, ‘e faarahi roa anaˈe i te faatura’ ia ratou. Te hoê ravea no te na reira, o te fariiraa ïa ma te aau tae i ta ratou aˈoraa e faaitoitoraa. Ia horoa mai te hoê tiaau i te aratairaa no ǒ mai i te pǔpǔ o te tavini haapao maitai, e turai te “paari no nia maira” ia tatou ia “faaroo ohie.”—Iak. 3:17.
14. E nafea te amuiraa e haapapu ai i te faatura haavare ore i te mau tiaau ratere, e eaha te faahopearaa?
14 E nafea ïa mai te peu e te faauehia ra tatou ia rave i te mau mea ma te huru taa ê i ta tatou i matau na i te rave? E titau te faatura i te tahi mau taime ia aro tatou i te hinaaro puai e patoi mai teie, “Eita matou e rave i te mau mea mai tera i ǒ nei” aore ra, “E nehenehe tera e ravehia i te tahi atu mau vahi eiaha râ i ta matou amuiraa.” E tutava râ tatou i te auraro. E tauturu mai te haamanaˈo-noa-raa e o Iehova te fatu o te amuiraa e o Iesu to te reira Upoo ia na reira. Ia fariihia te aratairaa no ǒ mai i te hoê tiaau ratere ma te oaoa e ia haapaohia ˈtu e te amuiraa, te ite-papu-hia ra ïa te faatura mau. Ua haapopou te aposetolo Paulo i te mau taeae i Korinetia no to ratou faaroo ma te faatura i te aratairaa a te matahiapo ratere ra o Tito. (Kor. 2, 7:13-16) I teie mahana, e nehenehe atoa tatou e papu e te paturu rahi roa ra ta tatou faaohiparaa ma te aau tae i te aratairaa no ǒ mai i te mau tiaau ratere i te oaoa ta tatou e fanaˈo ra i roto i ta tatou ohipa pororaa.—A taio i te Korinetia 2, 13:11.
“E faaturatura ˈtu i te taata atoa”
15. Eaha vetahi mau ravea e faatura ˈi tatou i te mau hoa Kerisetiano?
15 Ua papai Paulo: “Eiaha e avau atu i te taata paari; e aˈo atu râ mai te mea e e metua, e te mau taata apî ra, ei taeae ïa. E te mau vahine paari ra mai te metua vahine, e te mau vahine apî ra ei tuahine ïa, ma te haapao maitai. E ite maitai atu i te mau vahine ivi, i te ivi mau ra.” (Tim. 1, 5:1-3) Oia, te aˈo maira te Parau a te Atua ia faatura i te taata atoa o te amuiraa Kerisetiano. E nafea ïa mai te peu e e peapea to oe e to oe taeae aore ra tuahine o te amuiraa? E fifihia anei oe ia faatura i to oe hoa Kerisetiano? Aore ra e tia anei ia oe ia faatano i to oe haerea ma te farii i te mau huru maitatai pae varua o taua tavini a te Atua ra? E mea tia ia tapea te feia e mana faatere iho â râ to ratou i te hoê hiˈoraa faatura i to ratou mau taeae—eiaha roa ‘e faahepo i te nǎnǎ.’ (Pet. 1, 5:3) Oia mau, i roto i te amuiraa Kerisetiano, i tapaohia hoi e te aroha haavare ore e itehia ra i rotopu i to ˈna mau melo, mea rahi ta tatou mau ravea no te faatura te tahi i te tahi.—A taio i te Ioane 13:34, 35.
16, 17. (a) No te aha mea faufaa ˈi ia faatura eiaha noa i te taata ta tatou e poro ra i te feia patoi atoa râ? (b) E nafea tatou ia “faaturatura ˈtu i te taata atoa”?
16 Parau mau, eita tatou e taotia i to tatou faatura i te mau melo o te amuiraa Kerisetiano. Ua papai Paulo i te mau Kerisetiano o to ˈna tau: “Te vai nei ta tatou ravea, e hamani maitai tatou i te taata atoa.” (Gal. 6:10) E nehenehe mau â te faaohiparaa i taua faaueraa tumu ra e riro ei tautooraa ia haa te hoê hoa rave ohipa aore ra hoa haapiiraa i nia ia tatou ma te aroha ore. I tera mau taime, e mea tia ia haamanaˈo tatou i te mau parau: “Eiaha oe e inoino i te feia parau ino ra.” (Sal. 37:1) E tauturu te faaohiparaa i tera aˈoraa ia tatou ia haa noa ma te faatura i nia atoa i te feia patoi. Oia atoa, a poro ai tatou, e nehenehe te hiˈo-haehaa-raa ia tatou iho e tauturu ia tatou ia haa i nia i te taata atoa ma “te mǎrû e te auraro maite.” (Pet. 1, 3:15) E nehenehe atoa to tatou huru rapaeau e faaahuraa e faaite e te faatura ra tatou i te mau taata ta tatou e poro ra.
17 Oia mau, noa ˈtu e te ohipa nei tatou e to tatou mau hoa Kerisetiano aore ra e to rapaeau mai i te amuiraa, e hinaaro tatou e tutava i te faaohipa i te aˈoraa: “E faaturatura ˈtu i te taata atoa. E aroha ˈtu i te hui taeae. E mǎtaˈu i te Atua. E faateitei i te arii.”—Pet. 1, 2:17.
Eaha ta oe e pahono?
E nafea oe e nehenehe ai e faatura ma te tia:
• Ia Iehova?
• I te mau matahiapo o te amuiraa e te mau tiaau ratere?
• I te melo taitahi o te amuiraa?
• I te taata ta oe e poro ra?
[Uiraa haapiiraa]
[Hohoˈa i te api 25]
Ua faatura te mau Kerisetiano o te senekele matamua i te tiaauraa a te tino aratai
[Hohoˈa i te api 26]
Te faatura ra te matahiapo i te mau fenua atoa i te mau tiaau ratere, i faatoroahia e te Tino aratai