O vai te nehenehe e ite i te tau no a muri aˈe?

‘O vau mau â te Atua, Tei faaite i te hopea mai te matamua mai â, e mai mutaaiho mai â i te mau mea aitâ i tupu ra.’—Isaia 46:9, 10.

I TEIE tau papu ore roa, te hiˈopoa ra te feia faahohonu i te pae poritita, faanavairaa faufaa, e totiare i te tuatapaparaa e te mau peu o teie tau, no te tutava i te tohu i te tau no a muri aˈe. E imi vetahi atu, o te hinaaro rahi ra e ite eaha to ratou iho a muri aˈe, i te mau pahonoraa i roto i te peu hiˈo fetia aore ra te peu tahutahu. E mea pinepine taua mau taata ra i te inoino i te mau faahopearaa. Eita roa anei e nehenehe e ite eaha te tupu i teie ao, i to tatou utuafare, e ia tatou taitahi? E nehenehe mau anei ïa te hoê taata e ite atea i te tau no a muri aˈe?

I roto i ta ˈna mau parau i te peropheta Isaia i faahitihia i nia nei, ua faataa te Atua Mana hope ra o Iehova i to ˈna iho aravihi no te tohu i te tau no a muri aˈe. Na roto ia Isaia, ua tohu te Atua i te faaoraraa o te mau Iseraela i tahito mai te faatîtîraa i Babulonia e to ratou hoˈiraa e patu faahou ia Ierusalema e i te hiero. Mea nafea teie parau tohu i te tupuraa iho â? Fatata e 200 matahiti na mua ˈtu, ua horoa Isaia ma te tano i te iˈoa o te taata e haru ia Babulonia, Kuro. Hau atu â, ua faataa Isaia ma te tano i te ravea a Kuro—te faatioiraa i te taheraa pape o te anavai Eupharate e paruru ra i te oire. Ua tohu atoa oia e e vai matara noa na opani iti rahi e piti o te patu o te oire i mua ia Kuro, o te faaohie i to ˈna upootiaraa.—Isaia 44:24–45:7.

Ia faaauhia i te Atua, aita e mana to te taata no te hiˈo maite i te tau no a muri aˈe. “Eiaha oe e faaahaaha i to ananahi ra parau,” ta te arii paari Solomona i papai, “aore hoi oe i ite i te parau e tupu i te mahana hoê nei â.” (Maseli 27:1) E parau mau noâ tera faataaraa. Aita e taata e nehenehe e ite atea i to ˈna atoa iho a muri aˈe. Na te aha e faataa ê ra i te Atua? Te taa roa ra ia ˈna te mau mea atoa ta ˈna i poiete, oia atoa te huru e te mau hinaaro o te taata. Ia hinaaro oia, e nehenehe te Atua e ite atea ma te papu e nafea te taata e te mau nunaa taatoa e haa ˈi. Hau atu â, e mana otia ore to ˈna no te ohipa i nia i te faahopearaa o te mau tupuraa. Ia tohu oia na roto i ta ˈna mau peropheta e e ohipa te tupu mai, e riro oia mai ‘Tei faatupu i te parau a tana tavini, e tei rave i te aˈo a ta ˈna ra mau vea.’ (Isaia 44:26) O te Atua ra o Iehova anaˈe te nehenehe e parau ma te haavare ore i te reira.

Ua ora Isaia hau atu i te 700 matahiti na mua ˈˈe ia Iesu, te Mesia. Ua tohu râ Isaia i te taeraa mai o te Mesia. Mai te 18raa iho â râ o te senekele, ua patoi te feia faahapa Bibilia i te tanoraa o te buka a Isaia. Ua parau ratou e e ere tera mau parau tohu a Isaia i te tohuraa mau, ua papaihia râ te reira i muri aˈe i to ratou tupuraa, ua papai noa te tahi atu taata i tei tupu aˈena. Ua tano anei te reira? I 1947, ua itehia mai te hoê otaro o te buka a Isaia e te  tahi atu mau otaro tahito, i roto i te hoê ana i pihai iho i te miti Pohe. Ua faaoti te mau aivanaa e ua hau atu teie otaro i te hanere matahiti hou te fanauraahia te Mesia i tohuhia. Oia, ua tohu te Bibilia i te tau no a muri aˈe!

Aita i nehenehe ia Isaia e i vetahi atu mau taata papai Bibilia ia tohu i te mau tupuraa no te tau no a muri aˈe na nia noa i to ratou iho paari. Ua riro râ ratou ei auvaha no ‘te Atua tei parau i ta te varua maitai i tuu mai ia ratou ra.’ (Petero 2, 1:21) I roto i to muri nei tumu parau, e tuatapapa maite tatou i vetahi mau tuhaa rii o te oraraa o Iesu tei tohuhia mai na roto ia Isaia. E hiˈopoa ïa tatou i te mau tupuraa ta Iesu e ta ˈna mau pǐpǐ i tohu no to tatou nei tau e no te tau no a muri aˈe.