“Te Himene o te miti”—Parau papai e faatuati e piti tau

I TE 22 no Me 2007, ua faaiteitehia te hoê tâpû otaro Hebera no te 7 aore ra 8 o te senekele T.T. i te fare manaha o Iseraela i Ierusalema. E parau papai teie o te Exodo 13:19–16:1. To roto tei matauhia mai “Te Himene o te miti”—te himene upootiaraa ta te mau Iseraela i himene i muri aˈe i to ratou faaoraraa semeio i te miti Uteute. No te aha mea faufaa ˈi te faaiteiteraa o teie tâpû otaro?

Ua taaihia te pahonoraa i te matahiti o te parau papai. Ua papaihia te mau otaro o te miti Pohe i rotopu i te senekele 3 H.T.T. e te senekele matamua T.T. Hou to ratou itearaa mai fatata a 60 matahiti aˈenei, te parau papai Hebera tahito roa ˈˈe, o te Codex no Alep ïa, no 930 T.T. Taa ê atu i te tahi mau tâpû otaro, aita ˈtu parau papai Hebera i itea mai no te tau e rave rahi hanere matahiti.

“Te parau papai o te Himene o te miti,” ta James Snyder, taata faatere i te fare manaha o Iseraela, e parau ra, “e faatuati ïa e piti tau o te tuatapaparaa i rotopu i te mau Otaro o te miti Pohe . . . e te Codex no Alep.” I to ˈna manaˈo, “e hiˈoraa otahi” teie parau papai e te tahi atu mau parau papai bibilia tahito “o te huru tamau o te parau papai.”

Te manaˈohia ra e o te tâpû otaro hoê o te parau papai e rave rahi i itea mai i te hopea senekele 19 i roto i te hoê sunago i Le Caire, i Aiphiti. Aita râ te hoê taata haapue na ˈna iho i te mau parau papai Hebera i ite maitai i to ˈna auraa e tae roa i to ˈna farereiraa i te hoê taata aravihi i te hopea o te mau matahiti 1970. Ua tataio-mahana-hia te tâpû otaro i tera taime e ua faahereherehia e tae roa i te faaiteiteraahia te reira i te fare manaha o Iseraela.

No nia i te faufaaraa o te tâpû otaro, te na ô ra Adolfo Roitman, upoo o te Sanctuaire du Livre, fare manaha o Iseraela, e tiai o te mau Otaro o te miti Pohe: “Te faaite ra te parau papai o te Himene o te miti i te haapao maitai faahiahia o te papairaahia te huriraa a te mau Massorètes o te Bibilia i te roaraa o te mau senekele. E mea faahiahia e hoê â huru papairaa taa maitai to te Himene o te miti i teie tau mai i na senekele 7-8.”

E Parau faaurua a te Atua te Bibilia, e o Iehova te tumu matamua roa o to ˈna faaherehereraa. Hau atu â, ua papai-maitai-faahou-hia te mau Papai e te mau papai parau. No reira, mea papu maitai roa te parau papai bibilia ta tatou e faaohipa ra i teie mahana.

[Faaiteraa i te fatu o te hohoˈa i te api 32]

Courtesy of Israel Museum, Ierusalema