Eaha ta Iesu i haapii no nia i te po?

“Te hapa ra oe i to mata,” ta Iesu i parau, “e ohiti ê atu, e maitai hoi oe ia tae mata hoê i te basileia o te Atua, i te mata piti ia hurihia i te auahi i te po; te vahi e ore e pohe to ratou tuˈa, e to ratou auahi e ore e tinaihia.”—MAREKO 9:47, 48.

I te tahi atu taime, ua parau Iesu no te hoê tau haavaraa e parau ai oia i te feia ino: “E haere è atu outou, e te feia i katara hia ra, i roto i te auahi mure ore, i haapao hia no te diabolo e tana mau melahi.” (V.C.J.S.) Ua parau atoa oia e e “reva teie feia i te utua mure ore.” (The New American Bible)—MATAIO 25:41, 46.

I TE hiˈoraa matamua, e au ra e te paturu ra te mau parau a Iesu i nia nei i te haapiiraa o te po auahi. Te mea papu, aita Iesu i opua e faahape i te Parau a te Atua, o te parau maitai ra: “Aita roa te feia i pohe e ite faahou i te tahi mea è atu.”—Koheleta 9:5, V.C.J.S.

Eaha ïa ta Iesu i hinaaro e parau i to ˈna parauraa no te hoê taata te hurihia i roto i “te auahi i te po”? E mea mau anei aore ra e taipe “te auahi mure ore” ta Iesu i faaara? Eaha te auraa e ‘reva ˈtu te feia ino i te utua mure ore’? E hiˈopoa hoê hoê anaˈe i tera mau uiraa.

Eaha ta Iesu i hinaaro e parau i to ˈna parauraa no te hoê taata te hurihia i roto i “te auahi i te po”? Te taˈo Heleni tumu i hurihia ei ‘po auahi’ i roto i te Mareko 9:47, o Geʹen·na ïa. No roto mai teie taˈo i te Hebera Geh Hin·nomʹ, “Peho o Hinoma” ïa te auraa. Tei rapaeau mai te Peho o Hinoma ia Ierusalema i tahito. I te tau o te mau arii Iseraela, ua faaohipahia tera vahi no te mau tusia tamarii—te hoê peu faufau faautuahia e te Atua. Ua parau te Atua e e haamou oia i te feia e rave ra i tera huru ohipa o te haamoriraa hape. Ua parauhia ïa te Peho o Hinoma “te peho taparahiraa,” i reira e vai ai “te pera o teie nei mau taata” tei ore i hunahia. (Ieremia 7:30-34) Ua faaite atea ïa Iehova e e riro te Peho o Hinoma ei vahi, eiaha no te haamauiui i te taata ora, no te huri râ i te tino pohe e rave rahi.

I te tau o Iesu, ua faaohipa te mau taata no Ierusalema i te Peho o Hinoma ei vahi faarueraa pehu. E huri na ratou i te tino pohe o te feia taparahi taata i reira e e ama noa ˈi te auahi ia pau roa te pehu e te tino pohe.

I to Iesu parauraa no nia i te mau tuˈa te ore e pohe e te auahi te ore e tinaihia, te faahiti ra paha oia i te Isaia 66:24. No nia i “te mau tino o te mau taata i faarue [i te Atua],” te parau ra Isaia e ‘e ore to ratou tuˈa e pohe, e to ratou auahi e ore e tinaihia.’ Ua ite Iesu e te feia e faaroo ra ia ˈna e ua faahiti teie mau parau i roto i te Isaia i te huru raveraa o te tino pohe o te feia tei ore e tia ia hunahia.

Ua faaohipa ïa Iesu i te Peho o Hinoma, aore ra Gehena, ei taipe tano no te pohe aita e tiaturiraa no te tia-faahou-raa. Ua faataa  maitai oia i te reira i to ˈna faaararaa e ‘e tia i te Atua ia rave pohe roa i te tino e te varua atoa i te gehena.’ (Mataio 10:28) E hohoˈa taipe te Gehena o te pohe mure ore, eiaha râ o te haamauiuiraa mure ore.

E mea mau anei aore ra e taipe “te auahi mure ore” ta Iesu i faaara? A tapao na e ua faaineinehia “te auahi mure ore” faahitihia e Iesu e papaihia i roto i te Mataio 25:41 “no te diabolo e ta ˈna ra mau melahi.” Ia manaˈo oe, e nehenehe anei te mau mea ora varua e paapaa i te auahi mau? Aore ra te faaohipa taipe ra Iesu i te taˈo “auahi”? Te mea papu, e ere “te mamoe” e te “puaaniho” faahitihia i roto i taua noâ oreroraa i te mea mau; e parau faataipe te reira o te faahohoˈa ra e piti huru taata. (Mataio 25:32, 33) E haapaapaa roa te auahi mure ore ta Iesu i faahiti i te feia ino ei auraa taipe.

Eaha te auraa e ‘reva ˈtu te feia ino i te  utua mure ore’? Noa ˈtu e te faaohipa ra te rahiraa o te mau huriraa i te taˈo “utua” i roto i te Mataio 25:46, te auraa tumu o te taˈo Heleni koʹla·sin o te “hiˈopoaraa i te tupuraa o te mau tumu raau,” aore ra topetoperaa, tâpûraa i te mau amaa faufaa ore. A fanaˈo ai te feia e au i te mau mamoe i te ora mure ore, e mauiui te feia tatarahapa ore e au i te puaaniho i te “utua mure ore,” tâpû-ê-hia e a muri noa ˈtu i te ora.

Eaha to oe manaˈo?

Aita roa ˈtu Iesu i haapii e e nephe pohe ore to te taata. Ua haapii pinepine râ oia i te faatia-faahou-raa o tei pohe. (Luka 14:13, 14; Ioane 5:25-29; 11:25) No te aha Iesu i parau ai e e faatia-faahou-hia tei pohe mai te peu e te manaˈo ra oia e aita to ratou nephe i pohe?

Aita Iesu i haapii e e opua ino te Atua e haamauiui i te feia ino e a muri noa ˈtu. Ua parau râ Iesu: “Ua here mai te Atua i to te ao nei, e tae roa i te horoa noa mai i tana Tamaiti fanau tahi: ia ore ia pohe te hoe tei faaroo iana ra, ia roaa râ iana te ora mure ore.” (Ioane 3:16, V.C.J.S.) Eaha ta Iesu i hinaaro e parau a na ô ai e e pohe te feia e ore e tiaturi ia ˈna? Mai te peu e te hinaaro mau ra oia ia ora ratou e a muri noa ˈtu, ma te mauiui roa ino i roto i te hoê po auahi, e na reira anei ïa oia i te parau?

Aita te haapiiraa e e vahi haamauiuiraa te po i niuhia i nia i te Bibilia. E tiaturiraa etene râ i haapiihia ei haapiiraa “Kerisetiano.” (A hiˈo i te tumu parau tarenihia “Te hoê aamu poto o te po,” i te api 6.) Eita, eita te Atua e haamauiui e a muri noa ˈtu i te taata i roto i te po. E nafea te haapiiraa i te parau mau no nia i te po e ohipa ˈi i nia i to oe haerea i mua i te Atua?

[Tumu parau tarenihia i te api 6]

TE HOÊ AAMU POTO O TE PO

NO ROTO MAI I TE MAU TIATURIRAA ETENE: I tiaturi na to Aiphiti i tahito ra i te hoê po auahi ura. Te faahiti ra te hoê buka no 1375 H.T.T. i te feia o te “hurihia, te upoo na mua, i roto i te apoo auahi; e . . . o te ore e tia ia horo ê, e . . . o te ore e tia ia horo ê i te auahi.” (Le Livre de l’Amdouat) Ua papai te philosopho Heleni o Plutarque (area 46-120 T.T.) no nia i te feia i roto i te ao i raro mai: “Te uuru ra [ratou] a faaruru ai i te mauiui rahi riaria e te utua mamae iti rahi e te haama rahi.”

UA PEEHIA TE MAU PǓPǓ ITI A TE HAAPAORAA ATI IUDA: Ua faataa te taata tuatapapa ra o Josèphe (37-area 100 T.T.) e i tiaturi na te mau Esséniens, te hoê pǔpǔ iti faaroo ati Iuda, e “mea pohe ore te mau nephe, e e ora noa ratou e a muri noa ˈtu.” Ua na ô â oia: “Mai tera atoa te manaˈo o te mau Heleni . . . Te manaˈo ra ratou e te tapeahia ra te mau nephe iino i roto i te hoê vahi poiri e te riaria, tei î i te utua tamau.”

FAAÔHIA I ROTO I TE “KERISETIANORAA”: I te senekele 2 T.T., ua parau te buka apokirifa Apokalupo a Petero (Beretane) no nia i te taata ino: “Ua haapararehia te auahi pohe ore no ratou.” Ua parau atoa tera buka: “E aratai mai Ezrael, te melahi o te riri, i te mau tane e vahine te paapaa ra te afaraa o to ratou tino e e huri oia ia ratou i roto i te hoê vahi poiri, te po o te mau taata; e e faautua te hoê varua o te riri ia ratou.” I tera atoa area tau, te faahiti ra te taata papai o Teophilo no Anetiohia i te hoê peropheta vahine Heleni o tei faaite atea i te mau faautuaraa a te mau atua tei parauhia e ua fanauhia ratou: “I nia ia outou e tae mai ai te auahi ura, e e paapaa noa outou i roto i te auahi i te mau mahana atoa.” No teie mau parau atoa ta Teophilo e parau ra e mea “mau, e te faufaa, e te tia, e te maitai no te mau taata atoa.”

UA FAAOHIPAHIA TE PO AUAHI NO TE FAATIA I TE HAAVÎRAA UˈANA I TE ANOTAU NO ROPU: E au ra e ua parau o Marie I, arii vahine no Beretane (1553-1558), o tei tanina fatata e 300 Porotetani i nia i te pou, e: “I te mea e i te ao no a muri aˈe e ura noa te mau nephe o te mau hairesi i te auahi e a muri noa ˈtu i roto i te po auahi, e tano roa ïa ia pee au i te tahooraa a te Atua ma te tutui ia ratou i te auahi i nia i te fenua.”

TE HOÊ FAATAARAA APÎ: I te mau matahiti i mairi aˈenei, ua hiˈo faahou te tahi mau faanahonahoraa faaroo i ta ratou haapiiraa no nia i te po. Ei hiˈoraa, ua parau te apooraa haapiiraa faaroo a te Ekalesia no Beretane i 1995 e: “E ere te po i te haamauiuiraa mure ore, o te maitiraa hopea râ e te taui ore o te hoê huru oraraa e patoi roa ino i te Atua e o te vai-ore-roa-raa te hopea hoê roa.”

[Tumu parau tarenihia/Hohoˈa i te api 7]

EAHA “TE ROTO AUAHI”?

Te parau ra te Apokalupo 20:10 e e hurihia te Diabolo i roto i “te roto auahi” e e ‘haamauiuihia oia i te rui e i te ao, e a muri noa ˈtu.’ Ahiri e haamauiuihia te Diabolo e a muri noa ˈtu, e mea tia ia tapea ora noa te Atua ia ˈna, te parau ra râ te Bibilia e e ‘haapohe Iesu ia ˈna.’ (Hebera 2:14) Te faahohoˈa ra te roto auahi taipe i “te piti o te pohe.” (Apokalupo 21:8) E ere te reira i te pohe tei faahiti-matamua-hia i roto i te Bibilia—pohe no te hara a Adamu—te pohe e nehenehe te taata e faatia-faahou-hia mai. (Korinetia 1, 15:21, 22) I te mea e aita te Bibilia e parau ra e e tuu mai “te roto auahi” i te feia tei roto ia ˈna, te auraa iho â ïa e o te hoê huru pohe ê atu ïa “te piti o te pohe,” te hoê pohe aore e faaoraraa.

I roto i teihea auraa e haamauiuihia ˈi te taata e a muri noa ˈtu i roto i “te roto auahi”? I te tahi taime, e nehenehe te taˈo “haamauiui” e faataahia ei “haapae” i te hoê taata. I te hoê taime, i to Iesu faaûraa i te mau demoni, ua tuô ratou: “I haere mai oe e haamauiui rahi ia mâua [e huri ia mâua i te vahi hohonu] eiaha ia tae i te tau mau ra?” (Mataio 8:29; Luka 8:30, 31) E ‘mauiui rahi’ ïa te taata atoa i roto i te “roto auahi” i te haapaeraa mure ore, aore ra “te piti o te pohe.”