Eaha te tupu mau ua pohe anaˈe?

“E mea pohe ore te nephe atoa, to te feia iino atoa . . . Faautuahia e te tahooraa aore e hopea o te auahi o te ore e tia ia tupohe, e te ore e pohe, eita roa ˈtu ta ratou e nehenehe e faaore i to ratou mauiui.”—Clément no Alesanederia, taata papai o te senekele piti e toru T.T.

MAI ia Clément, te manaˈo ra te feia e paturu ra i te haapiiraa e e vahi haamauiuiraa te po e e mea pohe ore te nephe taata. Te paturu ra anei te Bibilia i tera haapiiraa? A hiˈo na i ta te Parau a te Atua e pahono ra i te mau uiraa i muri nei.

E nephe pohe ore anei to te taata matamua ra o Adamu? Te parau ra te huriraa Porotetani matauhia mai Te Bibilia moˈa ra no nia i te poieteraa o Adamu: “A hamani ai te Atua ra o Iehova i te taata i te repo fenua nei, ua haapuai ihora oia i te aho ora i roto i tana apoo ihu ra, riro aˈera te taata ei taata [“nephe,” MN] ora.” (Genese 2:7) A tapao na e aita te irava e parau ra e ua horoahia ˈtu ia Adamu i te hoê nephe.

Eaha tei tupu i te pae hopea i nia ia Adamu i muri aˈe i to ˈna hararaa? E ere ta te Atua faautuaraa i te haamauiuiraa mure ore i roto i te po. Te horoa ra râ te huriraa Katolika V.C.J.S. i te mau parau a te Atua mai teie: “E ma te hou i to rae, e amu ai oe i te maa e hoi noaˈtu ai oe i te repo, no reira mai oe, no te mea e repo hoi oe, e hoi à oe i te repo.” (Na matou e haapapu nei; Genese 3:19) Aita te mau parau ta te Atua e faaite ra e e ora noâ te hoê tuhaa i roto ia Adamu i muri aˈe i to ˈna poheraa. I to Adamu poheraa, ua pohe te nephe ra o Adamu.

E nephe pohe ore anei to te taata atoa? Ua parau te Atua i te peropheta Ezekiela: “O tei rave i te hara ra, o te pohe ïa.” (Ezekiela 18:4) Ua papai te aposetolo Paulo: “No te taata hoe ra [Adamu] i ô mai ai te hara i te ao nei, e no te hara hoi te pohe; e ua taea hia te taataˈtoa e te pohe, i te mea e ua hara paatoa i roto i taua taata ra.” (Roma 5:12, V.C.J.S.) Mai te peu e ua hara te taata atoa, te faaotiraa tano maitai, oia hoi e pohe pauroa te nephe.

E ite aore ra e huru ê anei te nephe o tei pohe i te tahi noa ˈˈe mea? Te parau ra te Parau a te Atua: “Ua ite te feia e ora nei e, e pohe ratou, aita roa te feia i pohe e ite faahou i te tahi mea è atu.” (Koheleta 9:5, V.C.J.S.) Ma te faataa eaha te tupu i nia i te hoê taata ua pohe anaˈe, te parau ra te Bibilia: “Te hoˈi nei oia i to ˈna ra repo; mou roa ˈtura ta ˈna i opua i taua mahana ra.” (Salamo 146:4) Mai te peu e “aita roa” te feia pohe “e ite faahou i te tahi è mea” e ‘ua mou roa ta ratou i opua,’ e nafea ïa ratou e faaruru ai i te mauiui i roto i te po?

Aita Iesu Mesia i faaau i te pohe i te tahi huru araararaa o te feruriraa, i te taoto râ. a (Ioane 11:11-14) E patoi mai paha ïa vetahi ma te parau e ua haapii Iesu e e mea veavea te po e e hurihia te feia hara i roto. E hiˈo anaˈe eaha ta Iesu i parau mau no nia i te po.

[Nota i raro i te api]