Uiraa a te feia taio

Te tiaturi ra anei te mau Ite no Iehova e o ratou anaˈe te ora ˈtu?

Te manaˈo ra te mau Ite no Iehova e ua itea ia ratou te haapaoraa mau. Aita anaˈe, e taui ratou i ta ratou mau tiaturiraa. Mai te mau melo o te haapaoraa e rave rahi, te tiaturi ra te mau Ite no Iehova e e ora ˈtu ratou. Teie râ, te tiaturi atoa ra ratou e e ere na ratou e faaoti o vai te faaorahia. I te pae hopea roa, o te Atua te Haava. Na ˈna e faaoti.—Isaia 33:22.

Te faaite ra te Parau a te Atua e e mea tia ia hinaaro te feia e faaorahia eiaha noa e ora ˈtu, e haa amui atoa râ e te Faaora. Ei faahohoˈaraa: E moe paha te hoê taata ori haere na te medebara. E hinaaro iti rahi to ˈna e ite i to ˈna eˈa. E pohe anei o ˈna, aore ra e ora anei? Tei to ˈna ïa huru i mua i te tauturu. No to ˈna teoteo, e patoi paha oia i te tauturu a te hoê taata faaora. Aore ra e nehenehe oia e farii haehaa i te tauturu e e ora.

Hoê â huru, e ora te feia o te haa amui e te Faaora o te huitaata, te Atua ra o Iehova. Te ora, e ô ïa no ǒ mai i te Atua ra, eita râ e naea i te mau taata atoa. Ua parau te Tamaiti a te Atua ra o Iesu e: “E ore te feia e parau mai ia ˈu ra e, E te Fatu, e te Fatu, e hope paatoa i te tae i te basileia ra o te ao, o te taata râ i haapao i te hinaaro o tau Metua i te ao ra.”—Mataio 7:21.

Te tiaturi ra te mau Ite no Iehova e e faaora noa te Atua i te feia o te faaohipa i te faaroo i te tusia taraehara o Iesu e o te pee maite i ta Iesu mau haapiiraa. (Ohipa 4:10-12) E hiˈopoa anaˈe e toru titauraa faufaa no te ora ˈtu, tei faaitehia i roto i te Parau a te Atua.

(1) “O te mea teie e ite ai te taata atoa e, e pǐpǐ outou na ˈu, ia aroha outou ia outou iho,” ta Iesu ïa i parau i to ˈna mau hoa. (Ioane 13:35) Ua haapapu to Iesu iho hiˈoraa i te horoaraa i to ˈna ora no vetahi ê i te faufaaraa o te here. Te faaite nei te feia e here ra ia vetahi ê i te hoê huru maitai faufaa roa no te ora ˈtu.

(2) ‘Ua faaite au ia ratou i to oe iˈoa,’ ta Iesu ïa i pure i to ˈna Metua. (Ioane 17:26) Ua ite Iesu e e mea faufaa te iˈoa o te Atua, Iehova, no to ˈna Metua. Ua pure Iesu e “ia raa” te iˈoa o to ˈna Metua. (Mataio 6:9) E titau te faaraaraa i te iˈoa o te Atua ia ite i tera iˈoa e ia faariro i te reira ei mea faufaa e te moˈa. Mai ia Iesu, e titauhia ia faaohipa te feia e imi ra i te ora i te iˈoa o te Atua. E titau-atoa-hia ia haapii ratou ia vetahi ê i te iˈoa e te mau huru maitatai o te Atua. (Mataio 28:19, 20) Oia mau, o te feia anaˈe e tiaoro i te iˈoa o te Atua te faaorahia.—Roma 10:13.

(3) “E ere i to teie nei ao to ˈu basileia,” ta Iesu ïa i parau ia Ponotio Pilato. (Ioane 18:36) Aita i rahi te taata i teie mahana e faaite papu ra i to ratou faaroo i te Basileia, aore ra faatereraa, a te Atua e ariihia ra e Iesu. Te tiaturi ra râ ratou i te mau faanahonahoraa a te taata. I te tahi aˈe pae, te turu ra te feia e faaorahia ma te taiva ore i te Basileia o te Atua e te haapii ra ia vetahi ê e nafea te reira e faatiamâ ˈi i te taatoaraa o te huitaata haapao maitai.—Mataio 4:17.

I muri aˈe i to ratou haapiiraa i te tahi mau titauraa no te ora ˈtu, ua parau ta Iesu mau pǐpǐ e: “O vai atura hoi te ora?” Ua pahono Iesu: “Te mau mea e ore e tia i te taata nei, e tia i te Atua.” (Luka 18:18-30) Te tutava maite ra te mau Ite no Iehova i te haapao i tera mau titauraa no te ora ˈtu. Te haa puai atoa ra ratou no te tauturu ia vetahi ê ia ora.