Te hoê Atua Poiete e au ia arue tatou
A haafatata ˈtu i te Atua
Te hoê Atua Poiete e au ia arue tatou
UA UI ê na anei oe, ‘Eaha te auraa o te oraraa?’ Te perehahu noa ra te feia e tiaturi ra e e hotu te ora no te tauiuiraa matapo o te mau mea ora i te pahonoraa. E ere hoê â huru no te feia e farii ra i te parau mau papu maitai e o te Atua ra o Iehova te Tumu o te ora. (Salamo 36:9) Ua ite ratou e e opuaraa ta ˈna i to ˈna poieteraa ia tatou. Ua faataahia taua opuaraa ra i roto i te Apokalupo 4:11. E hiˈo mai na tatou e nafea taua irava ra, papaihia e te aposetolo Ioane, e faataa ˈi i te tumu o to tatou vairaa mai i ǒ nei.
Te faataa ra Ioane i te hoê himene i te raˈi o te faahanahana ra i te Atua: “E au te hanahana ia oe, e te Fatu, e te tura, e te mana, na oe hoi i hamani i te mau mea atoa nei, e no to oe hinaaro i mau ai, e i hamanihia ˈi ratou.” E au taua faahanahanaraa ra ia Iehova anaˈe. No te aha? No te mea na ˈna “i hamani i te mau mea atoa nei.” Ia aha ïa ta ˈna mau mea ora maramarama i poiete e tia ˈi?
Te parauhia ra e e au “ia” Iehova te hanahana, te tura, e te mana. Aita e feaaraa, o ˈna te Ihotaata hanahana, tura, e mana roa ˈˈe i te ao taatoa. Aita râ te rahiraa o te taata e farii mau ra i to ˈna tiaraa Atua Poiete. Noa ˈtu râ, te vai ra te feia o te ite papu ra i to te Atua ‘mau [huru maitatai] e ore e tia ia hiˈo ra’ i roto i te mau mea ta ˈna i hamani. (Roma 1:20; MN) Ma te aau mehara, te turaihia ra ratou ia faatae i te hanahana e te tura ia Iehova. Te faaite haere ra ratou i te feia atoa e faaroo mai i te haapapuraa maere e na Iehova i hamani i te mau mea atoa ma te nehenehe e e au ïa ia ˈna to tatou faatura hohonu.—Salamo 19:1, 2; 139:14.
E nafea râ ei ia Iehova ˈi te mana a to ˈna feia haamori? Parau mau, aita e mea ora e tia ia horoa i te mana na te Atua Poiete puai hope. (Isaia 40:25, 26) Ma te hamanihia râ ma to te Atua huru, te vai ra maa ateriputi o te Atua i roto ia tatou, o te mana te tahi. (Genese 1:27) Mai te peu e te mauruuru mau ra tatou i ta to tatou Atua Poiete i rave no tatou, e turaihia ïa tatou ia faaohipa i to tatou mana e puai no te faahanahana e no te arue ia ˈna. Eita tatou e faaohipa i to tatou puai no to tatou noa maitai, e na ô râ tatou e e au i te Atua ra o Iehova to tatou mana atoa a tavini ai tatou ia ˈna.—Mareko 12:30.
No te aha ïa tatou i vai mai ai i ǒ nei? Te pahono ra te tuhaa hopea o te Apokalupo 4:11 e: “No to oe hinaaro i mau ai, e i hamanihia ˈi ratou,” te mau mea atoa i poietehia. E ere na tatou iho i hamani ia tatou. No to te Atua hinaaro i vai mau ai tatou. No reira e mea faufaa ore e e mea hoona ore ai ia ora no to ˈna noa iho maitai. No te ite i te hau o roto mai, te oaoa, e te mauruuru, e mea tia ia haapii tatou eaha te hinaaro o te Atua e ia faatano i to tatou oraraa i nia i te reira. Mea na reira noa e ite ai tatou i te tumu o to tatou poieteraa e vai-mau-raa.—Salamo 40:8.
[Faaiteraa i te fatu o te hohoˈa i te api 32]
NASA, ESA, and A. Nota (STScI)